ਮੋਦੀ ਸਰਕਾਰ ‘ਇਕ ਦੇਸ਼, ਇਕ ਚੋਣ’ ਦੇ ਆਪਣੇ ਸੁਫਨੇ ਨੂੰ ਸਾਕਾਰ ਕਰਨਾ ਚਾਹੁੰਦੀ ਹੈ। ਭਾਰਤ ਵਿਚ ਭਵਿੱਖ ’ਚ ਲੋਕ ਸਭਾ ਚੋਣਾਂ ਦੇਸ਼ ਭਰ ਵਿਚ ਵਿਧਾਨ ਸਭਾ ਚੋਣਾਂ ਦੇ ਨਾਲ-ਨਾਲ ਕਰਵਾਈਆਂ ਜਾਣਗੀਆਂ। ਫਿਰ ਵੀ, ਜਦੋਂ ਮਹਾਰਾਸ਼ਟਰ, ਹਰਿਆਣਾ, ਜੰਮੂ-ਕਸ਼ਮੀਰ ਅਤੇ ਛੱਤੀਸਗੜ੍ਹ ਦੀਆਂ 4 ਵਿਧਾਨ ਸਭਾਵਾਂ ਲਈ ਚੋਣਾਂ ਦੀ ਯੋਜਨਾ ਬਣਾਈ ਗਈ ਸੀ, ਚੋਣ ਕਮਿਸ਼ਨ ਇਨ੍ਹਾਂ 4 ਵਿਧਾਨ ਸਭਾਵਾਂ ਲਈ ਵੀ ਚੋਣਾਂ ਇਕੋ ਸਮੇਂ ਨਹੀਂ ਕਰਵਾ ਸਕਿਆ। ਇਸ ਨੇ ਜੰਮੂ-ਕਸ਼ਮੀਰ ਅਤੇ ਹਰਿਆਣਾ ਦੀਆਂ ਚੋਣਾਂ ਪਹਿਲਾਂ ਕਰਵਾਈਆਂ ਅਤੇ ਮਹਾਰਾਸ਼ਟਰ ਅਤੇ ਛੱਤੀਸਗੜ੍ਹ ਨੂੰ ਅਗਲੇ ਮਹੀਨੇ ਲਈ ਟਾਲ ਦਿੱਤਾ!
ਮੇਰੇ ਸੂਬੇ ਵਿਚ ਚੋਣਾਂ ਦੀਆਂ ਤਰੀਕਾਂ ਦਾ ਐਲਾਨ 15 ਅਕਤੂਬਰ ਨੂੰ ਕੀਤਾ ਗਿਆ ਸੀ, ਜਦੋਂ ਸਮਾਂ ਖਤਮ ਹੋ ਰਿਹਾ ਸੀ। ਭਾਜਪਾ ਦੀ ਦੇਵੇਂਦਰ ਫੜਨਵੀਸ ਦੀ ਅਗਵਾਈ ਵਾਲੀ ਮਹਾਯੁਤੀ ਸਰਕਾਰ ਨੇ ਵੱਡੇ-ਵੱਡੇ ਵਾਅਦੇ ਕਰਕੇ ਸਰਕਾਰੀ ਖਜ਼ਾਨੇ ਨੂੰ ਖਾਲੀ ਕਰ ਦਿੱਤਾ ਹੈ, ਜਿਨ੍ਹਾਂ ਨੂੰ ਪੂਰਾ ਕਰਨਾ ਅਸੰਭਵ ਜਾਂ ਘੱਟੋ-ਘੱਟ ਮੁਸ਼ਕਲ ਹੋਵੇਗਾ। ਇਸ ਦੌਰਾਨ, ਸੂਬੇ ਦੀ ਰਾਜਧਾਨੀ ਮੁੰਬਈ ਅਤੇ ਇਸ ਦੇ ਆਲੇ-ਦੁਆਲੇ ਅਜੀਬ ਚੀਜ਼ਾਂ ਹੋ ਰਹੀਆਂ ਹਨ। ਸਾਬਕਾ ਪੁਲਸ ਕਮਿਸ਼ਨਰ ਅਨਾਮੀ ਰਾਏ ਵੱਲੋਂ ‘ਐਨਕਾਊਂਟਰ ਸਪੈਸ਼ਲਿਸਟ’ ਨੂੰ ਦੇਸ਼ ਨਿਕਾਲਾ ਦੇਣ ਦੀ ਘਟਨਾ ਅਚਾਨਕ ਫਿਰ ਤੋਂ ਸਾਹਮਣੇ ਆ ਗਈ ਹੈ।
ਸੰਜੇ ਸ਼ਿੰਦੇ ਨਾਮਕ ਇਕ ਅਭਿਲਾਸ਼ੀ ਮਾਹਿਰ, ਜਿਸ ਨੇ ਪ੍ਰਦੀਪ ਸ਼ਰਮਾ ਨਾਂ ਦੇ ਇਕ ਪੁਰਾਣੇ ਸਮੇਂ ਦੇ ਪੈਰੋਕਾਰ ਵਜੋਂ ਸ਼ੁਰੂਆਤ ਕੀਤੀ ਸੀ, ਨੂੰ ਉਸ ਦੇ ‘ਆਰਾਮਦਾਇਕ ਖੇਤਰ’ ਤੋਂ ਬਾਹਰ ਕੱਢ ਲਿਆ ਗਿਆ ਅਤੇ ਇਕ ਨਾਬਾਲਗ ਅਪਰਾਧੀ ਨੂੰ ਜੇਲ ਤੋਂ ਠਾਣੇ ਕਮਿਸ਼ਨਰੇਟ ਦੇ ਅਪਰਾਧ ਸ਼ਾਖਾ ਦੇ ਦਫ਼ਤਰ ਵਿਚ ਲਿਜਾਣ ਦਾ ਕੰਮ ਸੌਂਪਿਆ ਗਿਆ। ਮੁਲਜ਼ਮਾਂ ਨੂੰ ਲਿਜਾ ਰਹੀ ਪੁਲਸ ਦੀ ਗੱਡੀ ਵਿਚ ਹੋਏ ਪੁਲਸ ਮੁਕਾਬਲੇ ਨੇ ਇੰਸਪੈਕਟਰ ਸ਼ਿੰਦੇ ਦੀ ‘ਐਨਕਾਊਂਟਰ ਸਪੈਸ਼ਲਿਸਟ’ ਬਣਨ ਦੀ ਇੱਛਾ ਨੂੰ ਫਿਰ ਤੋਂ ਜਗਾਇਆ। ਇਸ ਨੇ ਇਕ ਸਖ਼ਤ ਪ੍ਰਸ਼ਾਸਕ ਵਜੋਂ ਉਪ ਮੁੱਖ ਮੰਤਰੀ ਦੀ ਭਰੋਸੇਯੋਗਤਾ ਨੂੰ ਵੀ ਮੁੜ ਸਥਾਪਿਤ ਕੀਤਾ ਕਿਉਂਕਿ ਅਗਲੇ ਹੀ ਦਿਨ ਠਾਣੇ ਅਤੇ ਮੁੰਬਈ ਵਿਚ ਫੜਨਵੀਸ ਦੇ ਹੱਥ ਵਿਚ ਰਿਵਾਲਵਰ ਜਾਂ ਪਿਸਤੌਲ ਵਾਲੇ ਪੋਸਟਰ ਦਿਖਾਈ ਦਿੱਤੇ! ਇਹ ਮਹਾਯੁਤੀ ਗ੍ਰਹਿ ਮੰਤਰੀ ਦੀ ਤਾਕਤ ਅਤੇ ਅਜੇਤੂ ਦੇ ਆਭਾ-ਮੰਡਲ ’ਚ ਜਨਤਾ ਦਾ ਵਿਸ਼ਵਾਸ ਬਹਾਲ ਕਰਨ ਲਈ ਸੀ।
ਮੱਧਵਰਗ ਦੇ ਨਾਗਰਿਕ ਖਾਸ ਤੌਰ ’ਤੇ ਖੁਸ਼ ਹੁੰਦੇ ਹਨ ਜਦੋਂ ਉਹ ਮਹਿਸੂਸ ਕਰਦੇ ਹਨ ਕਿ ਤੇਜ਼ੀ ਨਾਲ ਨਿਆਂ ਦਿੱਤਾ ਗਿਆ ਹੈ। ਉਨ੍ਹਾਂ ਨੂੰ ਇਹ ਅਹਿਸਾਸ ਨਹੀਂ ਹੁੰਦਾ ਕਿ ਇਹ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੇ ਅੰਦਰ ਅਪਰਾਧ ਨੂੰ ਵੀ ਵਧਾਉਂਦਾ ਹੈ ਅਤੇ ਇਸ ਦੇ ਮੈਂਬਰਾਂ ਨੂੰ ਕਾਨੂੰਨ ਤੋੜਨ ਲਈ ਉਤਸ਼ਾਹਿਤ ਕਰਦਾ ਹੈ। ਇਹ ਬੀਮਾਰੀ ਫਿਰ ਅਪਰਾਧੀਆਂ ਵਿਚ ਫੈਲਦੀ ਹੈ ਕਿਉਂਕਿ ਦੋਵੇਂ ਇਕੱਠੇ ਰਹਿੰਦੇ ਹਨ।
ਇਕ ਪੁਰਾਣੇ ਕਾਂਗਰਸੀ ਆਗੂ ਦੀ ਹੱਤਿਆ ਨੇ ਮੁੰਬਈ ਸ਼ਹਿਰ ਦੇ ਸਿਆਸੀ ਵਰਗ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ, ਜੋ ਹਾਲ ਹੀ ਵਿਚ ਐੱਨ. ਸੀ. ਪੀ. (ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ) ਦੇ ਅਜੀਤ-ਪਵਾਰ ਧੜੇ ਵਿਚ ਸ਼ਾਮਲ ਹੋ ਗਏ ਸਨ, ਜੋ ਕਿ ਭਾਜਪਾ ਨਾਲ ਜੁੜਿਆ ਇਕ ਧੜਾ ਹੈ। ਕਤਲ ਦੇ ਸ਼ਿਕਾਰ ਹੋਏ ‘ਬਾਬਾ’ ਸਿੱਦੀਕੀ ਦੀ ਸ਼ਨੀਵਾਰ ਸ਼ਾਮ ਨੂੰ ਉਨ੍ਹਾਂ ਦੀ ਆਪਣੀ ਸ਼ਿਕਾਰਗਾਹ ਬਾਂਦਰਾ ਦੇ ਮੈਦਾਨ ’ਚ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਪੁਲਸ ਨੇ ਦੋ ਸ਼ੱਕੀਆਂ ਨੂੰ ਹਿਰਾਸਤ ਵਿਚ ਲਿਆ ਹੈ ਜਿਨ੍ਹਾਂ ’ਚੋਂ ਇਕ ਹਰਿਆਣਾ ਦਾ ਅਤੇ ਦੂਜਾ ਯੂ. ਪੀ. ਦਾ ਵਸਨੀਕ ਹੈ।
ਦੱਸਿਆ ਜਾਂਦਾ ਹੈ ਕਿ ਉਹ ਲਾਰੈਂਸ ਬਿਸ਼ਨੋਈ ਗੈਂਗ ਨਾਲ ਸਬੰਧਤ ਹਨ ਜਿਸ ਦੀ ਉਤਪਤੀ ਪੰਜਾਬ ਵਿਚ ਹੋਈ ਸੀ ਅਤੇ ਜੋ ਪਹਿਲੀ ਵਾਰ ਦੇਸ਼ ਦੇ ਧਿਆਨ ਵਿਚ ਉਸ ਵੇਲੇ ਆਇਆ ਜਦੋਂ ਇਸ ਗਿਰੋਹ ’ਤੇ ਪੰਜਾਬ ਦੇ ਮਾਨਸਾ ਜ਼ਿਲੇ ਵਿਚ ਇਕ ਪ੍ਰਸਿੱਧ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਦਾ ਦੋਸ਼ ਲੱਗਾ।
ਉਨ੍ਹਾਂ ਦੇ ਨਿਸ਼ਾਨੇ ’ਤੇ ਅਦਾਕਾਰ ਸਲਮਾਨ ਖਾਨ ਸਨ। ਸਿਆਸਤਦਾਨ ਸਿੱਦੀਕੀ ਨਿਯਮਿਤ ਤੌਰ ’ਤੇ ਸਲਮਾਨ ਦੇ ਬਾਂਦਰਾ ਸਥਿਤ ਘਰ ਆਉਂਦੇ-ਜਾਂਦੇ ਰਹਿੰਦੇ ਸਨ। ਕੁਝ ਲੋਕਾਂ ਦਾ ਕਹਿਣਾ ਹੈ ਕਿ ਲਾਰੈਂਸ ਵੱਲੋਂ ਸਿੱਦੀਕੀ ਨੂੰ ਨਿਸ਼ਾਨਾ ਬਣਾਉਣ ਦਾ ਇਹ ਵੀ ਇਕ ਕਾਰਨ ਹੋ ਸਕਦਾ ਹੈ। ਇਕ ਘੱਟ ਸਟਾਫ਼ ਵਾਲੀ ਪੁਲਸ ਫੋਰਸ ਨੂੰ ਅਪਰਾਧ ਨੂੰ ਰੋਕਣ ਅਤੇ ਉਸ ਦਾ ਪਤਾ ਲਾਉਣ ਅਤੇ ਸੜਕਾਂ ’ਤੇ ਵਿਵਸਥਾ ਬਣਾਈ ਰੱਖਣ ਲਈ ਆਪਣੀ ਜ਼ਰੂਰੀ ਭੂਮਿਕਾ ਨਿਭਾਉਣੀ ਕਾਫੀ ਮੁਸ਼ਕਲ ਹੋਵੇਗੀ। ਉਨ੍ਹਾਂ ਦੀਆਂ ਚਿੰਤਾਵਾਂ ਨੂੰ ਹੋਰ ਵਧਾਉਣ ਲਈ, ਪੁਲਸ ਨੂੰ ਮ੍ਰਿਤਕ ਸਿਆਸੀ ਆਗੂ ਦਾ ਸਰਕਾਰੀ ਤੌਰ ’ਤੇ ਅੰਤਿਮ ਸੰਸਕਾਰ ਕਰਨ ਦਾ ਹੁਕਮ ਦਿੱਤਾ ਗਿਆ।
ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਸਿੱਦੀਕੀ ਬਾਂਦਰਾ ਦੀਆਂ ਝੁੱਗੀਆਂ ਵਿਚ ਮੁਸਲਿਮ ਵੋਟਰਾਂ ਵਿਚ ਹਰਮਨਪਿਆਰੇ ਸਨ। ਫਿਰ ਵੀ, ਨਿੱਜੀ ਤੌਰ ’ਤੇ ਮੈਨੂੰ ਯਕੀਨ ਨਹੀਂ ਹੈ ਕਿ ਬਾਬਾ ਸਿੱਦੀਕੀ ਵੀ ਆਪਣੇ ਸਹਿ-ਧਰਮੀਆਂ ਨੂੰ ਭਾਜਪਾ ਦੀ ਅਗਵਾਈ ਵਾਲੀ ਮਹਾਯੁਤੀ ਵਿਚ ਸ਼ਾਮਲ ਹੋਣ ਲਈ ਮਨਾ ਪਾਉਂਦੇ। ਸ਼ੱਕੀ ਪਸ਼ੂ ਵਪਾਰੀਆਂ ਅਤੇ ਗਊ ਮਾਸ ਖਾਣ ਵਾਲਿਆਂ ਦੀ ਲਗਾਤਾਰ ਹੱਤਿਆ ਅਤੇ ਹਿੰਦੂ ਕੁੜੀਆਂ (ਲਵ ਜਿਹਾਦ) ਨਾਲ ਪਿਆਰ ਕਰਨ ਵਾਲੇ ਮੁਸਲਿਮ ਨੌਜਵਾਨਾਂ ਦਾ ਪਿੱਛਾ ਕਰਨ ਨੇ ਲਗਭਗ ਸਮੁੱਚੀ ਮੁਸਲਿਮ ਵੋਟ ਭਾਜਪਾ ਦੇ ਖਿਲਾਫ ਇਕਜੁੱਟ ਕਰ ਦਿੱਤੀ ਹੈ।
ਸੂਬੇ ਦੀਆਂ ਵਿਧਾਨ ਸਭਾ ਚੋਣਾਂ ਹੋਣ ਵਾਲੀਆਂ ਹਨ। ਵਿਰੋਧੀ ਧਿਰ ਐੱਮ. ਵੀ. ਏ. (ਮਹਾ ਵਿਕਾਸ ਆਘਾੜੀ) ਕੁਝ ਮਹੀਨੇ ਪਹਿਲਾਂ ਅੱਗੇ ਸੀ। ਮਹਾਯੁਤੀ ਦੀ ‘ਲਾਡਕੀ ਬਹਿਨ’ ਯੋਜਨਾ, ਜਿਸ ਦੇ ਤਹਿਤ ਕਈ ਗਰੀਬ ਔਰਤਾਂ ਨੂੰ ਇਸ ਮਹੀਨੇ ਉਨ੍ਹਾਂ ਦੇ ਬੈਂਕ ਖਾਤਿਆਂ ’ਚ 4 ਮਹੀਨਿਆਂ ਦੀ ਇਕਮੁਸ਼ਤ ਰਕਮ 6000 ਰੁਪਏ ਮਿਲੀ ਹੈ, ਨਾਲ ਹੀ ਇਹ ਵਾਅਦਾ ਵੀ ਕੀਤਾ ਗਿਆ ਹੈ ਕਿ ਜੇਕਰ ਉਹ ਮਹਾਯੁਤੀ ਨੂੰ ਵੋਟ ਪਾਉਣਗੇ ਤਾਂ ਇਹ ਰਕਮ ਦੁੱਗਣੀ ਕਰ ਦਿੱਤੀ ਜਾਵੇਗੀ, ਨੇ ਸੱਤਾਧਾਰੀ ਪਾਰਟੀ ਦੇ ਹੱਕ ਵਿਚ ਮਾਹੌਲ ਬਦਲ ਦਿੱਤਾ ਹੈ। ਪਹਿਲਾਂ ਜੋ ਫਰਕ ਸੀ ਉਹ ਹੁਣ ਖਤਮ ਹੋ ਗਿਆ ਹੈ।
ਇਕ ਆਖਰੀ ਸਲਾਹ। 23 ਨਵੰਬਰ ਨੂੰ ਐਗਜ਼ਿਟ ਪੋਲ ਦੇਖਣ ਦੀ ਖੇਚਲ ਨਾ ਕਰੋ। ਭਾਰਤੀ ਵੋਟਰਾਂ ਨੇ ਚੋਣ ਲੜਨ ਵਾਲਿਆਂ ਨੂੰ ਧੋਖਾ ਦੇਣਾ ਸਿੱਖ ਲਿਆ ਹੈ।
-ਜੂਲੀਓ ਰਿਬੈਰੋ
ਹਰਿਆਣਾ ’ਚ ਭਾਜਪਾ ਦੀ ਤੀਜੀ ਅਤੇ ਨਾਇਬ ਸੈਣੀ ਦੀ ਦੂਜੀ ਪਾਰੀ ਦੀ ਸ਼ੁਰੂਆਤ
NEXT STORY 
