ਓਪੀਨੀਅਨ ਪੋਲ ਦੇ ਤਾਜ਼ਾ ਅਨੁਮਾਨਾਂ ਅਨੁਸਾਰ, ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਦੇ ਲਗਾਤਾਰ ਚੌਥੀ ਵਾਰ ਇਤਿਹਾਸਕ ਕਾਰਜਕਾਲ ਹਾਸਲ ਕਰਨ ਦੀ ਸੰਭਾਵਨਾ ਹੈ। ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਸੂਬੇ ’ਚ ਆਪਣੀ ਪਕੜ ਮਜ਼ਬੂਤ ਕਰ ਰਹੀ ਹੈ ਅਤੇ ਮਮਤਾ ਦੀ ਸਥਿਤੀ ਨੂੰ ਚੁਣੌਤੀ ਦੇਣ ਲਈ ਕਾਫ਼ੀ ਉਤਸ਼ਾਹਤ ਹੈ। ਇਸ ਦੌਰਾਨ ਕਾਂਗਰਸ ਅਤੇ ਭਾਰਤੀ ਕਮਿਊਨਿਸਟ ਪਾਰਟੀ (ਸੀ. ਪੀ. ਆਈ.) ਦੋਵਾਂ ਨੇ ਆਪਣਾ ਪ੍ਰਭਾਵ ਗੁਆ ਦਿੱਤਾ ਹੈ। ਮਮਤਾ ਲਈ ਮੁੱਖ ਸੰਦੇਸ਼ ਇਹ ਹੈ ਕਿ ਭਾਜਪਾ ਦਾ ਉਭਾਰ ਇਨ੍ਹਾਂ ਰਵਾਇਤੀ ਪਾਰਟੀਆਂ ਦੀ ਕੀਮਤ ’ਤੇ ਹੋਇਆ ਹੈ।
ਬੰਗਾਲ ’ਚ ਸਿਆਸੀ ਮੁਕਾਬਲਾ ਤੇਜ਼ ਹੋ ਗਿਆ ਹੈ, ਜਿਸ ਨਾਲ ਇਹ ਚੋਣ ਸੂਬੇ ਦੇ ਲਈ ਇਕ ਮਹੱਤਵਪੂਰਨ ਮੋੜ ਬਣ ਗਿਆ ਹੈ। ਇਹ ਗਤੀਸ਼ੀਲਤਾ ਇਕ ਬਹੁਤ ਹੀ ਮੁਕਾਬਲੇਬਾਜ਼ ਸਿਆਸੀ ਦ੍ਰਿਸ਼ ਨੂੰ ਉਤਸ਼ਾਹਿਤ ਕਰਦੀ ਹੈ। ਟੀ. ਐੱਮ. ਸੀ. ਕੋਲ ਸਪਸ਼ਟ ਬੜ੍ਹਤ ਹੈ, ਜਿਸ ਦੀਆਂ 119 ਸੀਟਾਂ ‘ਬੇਹੱਦ ਮਜ਼ਬੂਤ’ ਅਤੇ ਵਾਧੂ 95 ਸੀਟਾਂ ‘ਮਜ਼ਬੂਤ’ ਸ਼੍ਰੇਣੀ ’ਚ ਹਨ। ਮਮਤਾ ਬੈਨਰਜੀ ਨੰਦੀਗ੍ਰਾਮ ਚੋਣ ਹਲਕੇ ’ਚ ਆਪਣੇ ਪੁਰਾਣੇ ਸਹਿਯੋਗੀ ਅਤੇ ਭਾਜਪਾ ਉਮੀਦਵਾਰ ਸੁਵੇਂਦੂ ਅਧਿਕਾਰੀ ਦਾ ਸਾਹਮਣਾ ਕਰ ਰਹੀ ਹੈ। ਭਾਜਪਾ ਨੇ ਸੁਵੇਂਦੂ ਨੂੰ ਭਾਜਪਾ ਦੇ ਮੁੱਖ ਮੰਤਰੀ ਅਹੁਦੇ ਦੇ ਚਿਹਰੇ ਵਜੋਂ ਪੇਸ਼ ਕੀਤਾ ਹੈ।
ਭਾਜਪਾ ਨੇ ਆਪਣੀ ਮੁਹਿੰਮ ਮਮਤਾ ਬੈਨਰਜੀ ਦੇ 15 ਸਾਲਾਂ ਦੇ ਸ਼ਾਸਨ ਦੌਰਾਨ ਟੀ. ਐੱਮ. ਸੀ. ਦੀ ਆਲੋਚਨਾ ਕਰਨ ’ਤੇ ਕੇਂਦਰਿਤ ਕੀਤੀ ਹੈ। ਪਿਛਲੇ ਹਫ਼ਤੇ, ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਪੱਛਮੀ ਬੰਗਾਲ ਸਰਕਾਰ ਦੇ ਖਿਲਾਫ਼ ਇਕ ਚਾਰਜਸ਼ੀਟ ਜਾਰੀ ਕੀਤੀ, ਜਿਸ ’ਚ ਬੈਨਰਜੀ ਨੂੰ ‘ਮਮਤਾ ਜੀ’ ਜਾਂ ‘ਦੀਦੀ’ ਕਹਿ ਕੇ ਸੰਬੋਧਨ ਕਰਦੇ ਹੋਏ ਉਨ੍ਹਾਂ ਦੀ ਅਗਵਾਈ ਦੀ ਆਲੋਚਨਾ ਕੀਤੀ।
2021 ਦੀਆਂ ਪੱਛਮੀ ਬੰਗਾਲ ਚੋਣਾਂ ’ਚ, ਟੀ. ਐੱਮ. ਸੀ. ਨੇ 215 ਸੀਟਾਂ ਜਿੱਤ ਕੇ ਇਕ ਅਹਿਮ ਜਿੱਤ ਹਾਸਲ ਕੀਤੀ ਸੀ। ਇਹ ਇਕ ਮਹੱਤਵਪੂਰਨ ਸਿਆਸੀ ਬਦਲਾਅ ਨੂੰ ਦਰਸਾਉਂਦਾ ਹੈ। ਇਸ ਦੇ ਉਲਟ, ਭਾਜਪਾ ਨੇ 77 ਸੀਟਾਂ ਜਿੱਤੀਆਂ, ਜੋ ਸੂਬੇ ’ਚ ਉਸ ਦੇ ਵਧਦੇ ਪ੍ਰਭਾਵ ਨੂੰ ਉਜਾਗਰ ਕਰਦੀਆਂ ਹਨ।
ਧਾਰਮਿਕ ਅਤੇ ਜਾਤੀ ਆਧਾਰ ’ਤੇ ਵੋਟਿੰਗ ਦੇ ਪੈਟਰਨ ਤੋਂ ਪਤਾ ਲੱਗਦਾ ਹੈ ਕਿ ਕਿਵੇਂ ਵੱਖ-ਵੱਖ ਭਾਈਚਾਰੇ ਟੀ. ਐੱਮ. ਸੀ. ਅਤੇ ਭਾਜਪਾ ਦਾ ਸਮਰਥਨ ਕਰਦੇ ਹਨ, ਜਿਸ ਨਾਲ ਚੋਣਾਂ ਦੇ ਨਤੀਜੇ ਲਈ ਹਰ ਵੋਟ ਮਹੱਤਵਪੂਰਨ ਹੋ ਜਾਂਦੀ ਹੈ। ਮੇਦਨੀਪੁਰ ਅਤੇ ਮਾਲਦਾ ਵਰਗੇ ਹਲਕੇ, ਜਿੱਥੇ ਸੀਟਾਂ ਦੀ ਅਦਲਾ-ਬਦਲੀ ਵਧੇਰੇ ਹੁੰਦੀ ਹੈ, ਪ੍ਰਮੁੱਖ ਜੰਗ ਦੇ ਮੈਦਾਨ ਹਨ, ਜੋ ਚੋਣਾਂ ਦੀ ਦਿਸ਼ਾ ਤੈਅ ਕਰ ਸਕਦੇ ਹਨ।
ਬੈਨਰਜੀ ਨੇ ਵੋਟਰਾਂ ਨੂੰ ਸੱਦਾ ਦਿੱਤਾ ਹੈ ਕਿ ਉਹ ਉਨ੍ਹਾਂ ਨੂੰ ਸਿਰਫ ਨਿੱਜੀ ਟੀ. ਐੱਮ. ਸੀ. ਉਮੀਦਵਾਰਾਂ ਵਜੋਂ ਨਹੀਂ, ਸਗੋਂ ਰਾਜ ਵਿਧਾਨ ਸਭਾ ਦੀਆਂ ਸਾਰੀਆਂ 294 ਸੀਟਾਂ ਦੇ ਉਮੀਦਵਾਰ ਵਜੋਂ ਦੇਖਣ। ਉਨ੍ਹਾਂ ਨੇ ਭਾਜਪਾ ’ਤੇ ਬਿਹਾਰ, ਰਾਜਸਥਾਨ, ਹਰਿਆਣਾ ਅਤੇ ਉੱਤਰ ਪ੍ਰਦੇਸ਼ ਦੇ ਵੋਟਰਾਂ ਨੂੰ ਗੈਰ-ਕਾਨੂੰਨੀ ਢੰਗ ਨਾਲ ਪੱਛਮੀ ਬੰਗਾਲ ਦੀ ਵੋਟਰ ਸੂਚੀ ’ਚ ਜੋੜਨ ਦੀ ਕੋਸ਼ਿਸ਼ ਕਰਨ ਦਾ ਦੋਸ਼ ਲਾਇਆ ਅਤੇ ਦਾਅਵਾ ਕੀਤਾ ਕਿ ਉਹ ਬਿਹਾਰ ’ਚ ਅਪਣਾਏ ਗਏ ਤਰੀਕਿਆਂ ਵਾਂਗ ਟਰੇਨ ਰਾਹੀਂ ਇਨ੍ਹਾਂ ਵੋਟਰਾਂ ਨੂੰ ਲਿਆਉਣ ਦੀ ਯੋਜਨਾ ਬਣਾ ਰਹੇ ਹਨ।
‘ਜੈ ਸ਼੍ਰੀ ਰਾਮ’ ਦਾ ਸਥਾਨ ਹੁਣ ‘ਜੈ ਮਾਂ ਦੁਰਗਾ’ ਦੇ ਨਾਅਰੇ ਨੇ ਲੈ ਲਿਆ ਹੈ। ਇਹ ਬਦਲਾਅ ਬੰਗਾਲ ਦੀ ਸੱਭਿਆਚਾਰ ’ਚ ਦੇਵੀ ਦੇ ਮਹੱਤਵ ਨੂੰ ਦਰਸਾਉਂਦਾ ਹੈ। ਪੱਛਮੀ ਬੰਗਾਲ ’ਚ ਲੱਗਭਗ 125 ਚੋਣ ਹਲਕਿਆਂ ’ਚ ਮੁੱਖ ਤੌਰ ’ਤੇ ਮੁਸਲਿਮ ਆਬਾਦੀ ਹੈ, ਜਿਨ੍ਹਾਂ ’ਚੋਂ ਟੀ. ਐੱਮ. ਸੀ. ਨੇ 100 ਤੋਂ ਵੱਧ ਸੀਟਾਂ ਜਿੱਤੀਆਂ, ਜਿਸ ਨਾਲ ਉਨ੍ਹਾਂ ਨੂੰ ਇਕ ਮਜ਼ਬੂਤ ਲਾਭ ਮਿਲਿਆ। 2021 ਦੀਆਂ ਚੋਣਾਂ ਦੇ ਉਲਟ, ਭਾਜਪਾ ਹੁਣ ਆਪਣੀ ਮੁਹਿੰਮ ’ਚ ਧਾਰਮਿਕ ਵਿਸ਼ਿਆਂ ’ਤੇ ਘੱਟ ਧਿਆਨ ਕੇਂਦਰਿਤ ਕਰ ਰਹੀ ਹੈ।
ਭਾਜਪਾ ਦਾ ਟੀਚਾ ਆਉਣ ਵਾਲੀਆਂ ਚੋਣਾਂ ’ਚ 2021 ਵਾਂਗ ਧਾਰਮਿਕ ਧਰੁਵੀਕਰਨ ਤੋਂ ਬਚਣਾ ਹੈ। 30 ਫੀਸਦੀ ਤੋਂ ਵੱਧ ਵੋਟਰ ਮੁਸਲਿਮ ਹੋਣ ਕਾਰਨ, ਪਿਛਲੇ ਬਟਵਾਰਿਆਂ ਨੇ ਉਨ੍ਹਾਂ ਦੇ ਸਮਰਥਨ ਨੂੰ ਨੁਕਸਾਨ ਪਹੁੰਚਾਇਆ ਹੈ। ਆਪਣੇ ਦ੍ਰਿਸ਼ਟੀਕੋਣ ਨੂੰ ਨਰਮ ਕਰਨ ਲਈ, ਉਹ ਹੁਣ ‘ਬਾਹਰੀ’ ਸ਼ਬਦ ਦੀ ਵਰਤੋਂ ਕਰਦੇ ਹਨ। ਇਹ ‘ਅੰਦਰੂਨੀ ਬਨਾਮ ਬਾਹਰੀ’ ਦਾ ਮੁੱਦਾ ਮਮਤਾ ਨੂੰ ਲਾਭ ਪਹੁੰਚਾਉਂਦਾ ਹੈ।
ਇਕ ਦ੍ਰਿੜ੍ਹ ਇਰਾਦੇ ਵਾਲੀ ਆਗੂ ਮਮਤਾ ਨੇ 2011 ’ਚ 34 ਸਾਲ ਤੱਕ ਰਾਜ ਕਰਨ ਵਾਲੀ ਕਮਿਊਨਿਸਟ ਸਰਕਾਰ ਨੂੰ ਜੜ੍ਹੋਂ ਪੁੱਟ ਕੇ ਸੱਤਾ ਹਾਸਲ ਕੀਤੀ ਸੀ ਅਤੇ ਉਦੋਂ ਤੋਂ ਉਹ ਆਪਣੇ ਅਹੁਦੇ ’ਤੇ ਬਣੀ ਹੋਈ ਹੈ। ਟੀ. ਐੱਮ. ਸੀ. ਬਹੁਤ ਜ਼ਿਆਦਾ ਸੰਗਠਿਤ ਨਹੀਂ ਹੈ ਅਤੇ ਇਸ ’ਚ ਸਖ਼ਤ ਨਿਯਮਾਂ ਦੀ ਘਾਟ ਹੈ। ਇਸ ’ਚ ਵਿਚਾਰਧਾਰਾਵਾਂ ਦੇ ਇਕ ਮਜ਼ਬੂਤ ਸੈੱਟ ਦੀ ਵੀ ਕਮੀ ਹੈ। ਭਾਰਤ ਦੀਆਂ ਕਈ ਖੇਤਰੀ ਪਾਰਟੀਆਂ ਵਾਂਗ, ਇਹ ਮਮਤਾ ਬੈਨਰਜੀ ਦੀ ਮਜ਼ਬੂਤ ਅਗਵਾਈ ’ਤੇ ਨਿਰਭਰ ਹੈ, ਜਿਨ੍ਹਾਂ ਨੂੰ ਉਨ੍ਹਾਂ ਦੇ ਸਮਰਥਕ ਪਿਆਰ ਨਾਲ ‘ਅਗਨੀ ਦੇਵੀ’ ਕਹਿੰਦੇ ਹਨ।
ਪੱਛਮੀ ਬੰਗਾਲ ’ਚ ਭਾਜਪਾ ਦੀ ਜਿੱਤ ਪਾਰਟੀ ਨੂੰ ਇਕ ਮਹੱਤਵਪੂਰਨ ਬੜ੍ਹਤ ਦੇਵੇਗੀ, ਖਾਸ ਕਰ ਕੇ ਇਸ ਲਈ ਕਿਉਂਕਿ ਨਰਿੰਦਰ ਮੋਦੀ ਭਾਰਤ ਦੇ ਸਭ ਤੋਂ ਹਰਮਨ ਪਿਆਰੇ ਆਗੂ ਹੋਣ ਦੇ ਬਾਵਜੂਦ, ਰਾਜ ਵਿਧਾਨ ਸਭਾ ਚੋਣਾਂ ’ਚ ਸੰਘਰਸ਼ ਕਰਦੇ ਰਹੇ ਹਨ। ਵੱਡੀ ਮੁਸਲਿਮ ਆਬਾਦੀ ਵਾਲੇ ਰਾਜ ’ਚ ਜਿੱਤਣਾ ਇਕ ਮਜ਼ਬੂਤ ਪ੍ਰਤੀਕਾਤਮਕ ਮਹੱਤਵ ਰੱਖੇਗਾ ਅਤੇ 2029 ਦੀਆਂ ਆਮ ਚੋਣਾਂ ’ਚ ਮੋਦੀ ਦੀ ਸੰਗਠਿਤ ਪਾਰਟੀ ਨੂੰ ਚੁਣੌਤੀ ਦੇਣ ਲਈ ਖਿੰਡੇ ਹੋਏ ਵਿਰੋਧ ਦੀ ਬਚੀ-ਖੁਚੀ ਸੰਭਾਵਨਾ ਨੂੰ ਵੀ ਘੱਟ ਕਰ ਦੇਵੇਗਾ।
ਮੱਛੀ ਨੂੰ ਲੈ ਕੇ ਵਿਵਾਦ, ਜਿਸ ਨੂੰ ਬੰਗਾਲ ’ਚ ਕਿਸਮਤ ਵਾਲੀ ਅਤੇ ਨਵੇਂ ਪ੍ਰਾਜੈਕਟਾਂ ਨੂੰ ਸ਼ੁਰੂ ਕਰਨ ਲਈ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ, ਉਦੋਂ ਵਧ ਗਿਆ ਜਦੋਂ ਤ੍ਰਿਣਮੂਲ ਕਾਂਗਰਸ ਨੇ ਭਾਜਪਾ ’ਤੇ ਮਾਸਾਹਾਰੀ ਭੋਜਨ ’ਤੇ ਪਾਬੰਦੀ ਲਗਾਉਣ ਦੀ ਇੱਛਾ ਰੱਖਣ ਦਾ ਦੋਸ਼ ਲਾਇਆ।
ਮਮਤਾ ਬੈਨਰਜੀ ਨੇ ਭਾਜਪਾ ਏਜੰਟਾਂ ’ਤੇ ਬਾਹਰੀ ਲੋਕਾਂ ਨੂੰ ਸ਼ਾਮਲ ਕਰਨ ਲਈ ਫਰਜ਼ੀ ਫਾਰਮ 6 ਅਰਜ਼ੀਆਂ ਦੇ ਨਾਲ ਪੱਛਮੀ ਬੰਗਾਲ ਦੀ ਵੋਟਰ ਸੂਚੀ ਨੂੰ ਭਰਨ ਦਾ ਦੋਸ਼ ਲਾਇਆ ਹੈ। ਉਨ੍ਹਾਂ ਨੇ ਚੋਣ ਕਮਿਸ਼ਨ ਨੂੰ ਲੋਕਤੰਤਰੀ ਅਧਿਕਾਰਾਂ ਦੀ ਰੱਖਿਆ ਕਰਨ ਦੀ ਅਪੀਲ ਕੀਤੀ। ਮਹੱਤਵਪੂਰਨ ਸਰੋਤਾਂ ਦੇ ਬਾਵਜੂਦ, ਫੋਰਟ ਵਿਲੀਅਮ ਨੂੰ ਸੁਰੱਖਿਅਤ ਕਰਨ ਅਤੇ ਪੱਛਮੀ ਬੰਗਾਲ ’ਚ ਆਪਣੀ ਪਹਿਲੀ ਸਰਕਾਰ ਸਥਾਪਤ ਕਰਨ ਦੇ ਭਾਜਪਾ ਦੇ ਯਤਨ ਵਿਧਾਨ ਸਭਾ ਚੋਣਾਂ ’ਚ ਅੱਧੇ ਰਸਤੇ (ਬਹੁਮਤ) ਤੱਕ ਨਹੀਂ ਪਹੁੰਚੇ ਹਨ।
ਚੋਣ ਪ੍ਰਚਾਰ ਦਾ ਰਸਤਾ ਭਾਸ਼ਣਾਂ ਤੋਂ ਹਟ ਕੇ ਸਿਆਸੀ ਨੇੜਤਾ ਵੱਲ ਵਧ ਗਿਆ ਹੈ, ਜਿਸ ’ਚ ਉਮੀਦਵਾਰ ਇਕ ਹੀ ਸੰਦੇਸ਼ ਦੇ ਰਹੇ ਹਨ, ‘‘ਮੈਂ ਤੁਹਾਡੇ ਤੋਂ ਉੱਪਰ ਨਹੀਂ ਹਾਂ, ਮੈਂ ਤੁਹਾਡੇ ’ਚੋਂ ਹੀ ਇਕ ਹਾਂ।’’
ਲੋਕ ਭਲਾਈ ਯੋਜਨਾਵਾਂ ਦੀ ਝੜੀ—ਵਿਦਿਆਰਥੀਆਂ ਲਈ ਸਾਈਕਲ ਅਤੇ ਵਜ਼ੀਫ਼ਾ, ਵਿਦਿਆਰਥਣਾਂ ਨੂੰ ਸਿੱਖਿਆ ਜਾਰੀ ਰੱਖਣ ਲਈ ਨਕਦ ਟ੍ਰਾਂਸਫਰ ਅਤੇ ਸਿਹਤ ਬੀਮਾ ਨੇ ਇਹ ਯਕੀਨੀ ਬਣਾਇਆ ਹੈ ਕਿ ਬੈਨਰਜੀ ਦੀ ਲੋਕ-ਭਰਮਾਊ ਅਪੀਲ ਬਰਕਰਾਰ ਰਹੇ। ਉਹ ਮਹਿਲਾ ਵੋਟਰਾਂ (ਔਰਤਾਂ) ਵਿਚਾਲੇ ਹਰਮਨ-ਪਿਆਰੀ ਬਣੀ ਹੋਈ ਹੈ, ਇਸ ਚੋਣ ’ਚ ਉਨ੍ਹਾਂ ਦੀਅਾਂ ਲੱਗਭਗ 17 ਫੀਸਦੀ ਉਮੀਦਵਾਰਾਂ ਔਰਤਾਂ ਹਨ।
ਕਮਜ਼ੋਰ ਹੁੰਦੇ ਕਮਿਊਨਿਸਟਾਂ ਵੱਲੋਂ ਮੁੱਖ ਵਿਰੋਧੀਆਂ ਤੋਂ ਵੋਟਾਂ ਖੋਹਣ ਲਈ ਇਕ ਮੁਸਲਿਮ ਮੌਲਵੀ ਅਤੇ ਕਮਜ਼ੋਰ ਕਾਂਗਰਸ ਨਾਲ ਗੱਠਜੋੜ ਕਰਨ ਦੇ ਬਾਵਜੂਦ, ਪੱਛਮੀ ਬੰਗਾਲ ਦੀ ਲੜਾਈ ਮੁੱਖ ਤੌਰ ’ਤੇ ਦੋ-ਧਰੁਵੀ ਹੈ। ਰਾਜ ਜਿੱਤਣ ਲਈ ਕਿਸੇ ਪਾਰਟੀ ਨੂੰ 45 ਫੀਸਦੀ ਵੋਟਾਂ ਹਾਸਲ ਕਰਨੀਆਂ ਹੁੰਦੀਆਂ ਹਨ।
ਜ਼ਿਆਦਾਤਰ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਮਮਤਾ ਬੈਨਰਜੀ ਜਿੱਤਣਗੇ। ਅਜੇ ਉਨ੍ਹਾਂ ਨੂੰ ਆਪਣੇ ਵਿਰੋਧੀਆਂ ’ਤੇ ਬੜ੍ਹਤ ਹਾਸਲ ਹੈ। ਭਾਜਪਾ ਆਰ. ਐੱਸ. ਐੱਸ. ਦੀ ਮਦਦ ਨਾਲ ਜ਼ਮੀਨ ’ਤੇ ਕੰਮ ਕਰ ਰਹੀ ਹੈ ਅਤੇ ਭਾਜਪਾ ਦੇ ਚੋਟੀ ਦੇ ਆਗੂ ਕੋਲਕਾਤਾ ’ਚ ਹਨ। ਮਮਤਾ ਨੇ ਸੀ. ਪੀ. ਆਈ.(ਐੱਮ) ਤੋਂ ਸਿੱਖਿਆ ਹੈ ਕਿ ਸੱਤਾ ’ਚ ਕਿਵੇਂ ਬਣੇ ਰਹਿਣਾ ਹੈ। ਕੀ ਇਹ ਰਣਨੀਤੀਆਂ ਇਸ ਵਾਰ ਉਨ੍ਹਾਂ ਲਈ ਕੰਮ ਕਰਨਗੀਆਂ, ਇਹ ਵੱਡਾ ਸਵਾਲ ਹੈ।
ਕਲਿਆਣੀ ਸ਼ੰਕਰ
‘ਮਰਜ਼ ਬੜਤਾ ਗਯਾ, ਜਿਉਂ-ਜਿਉਂ ਦਵਾ ਕੀ’ ਨਕਲੀ ਦਵਾਈਆਂ ਦਾ ਫੈਲਦਾ ਕਾਰੋਬਾਰ!
NEXT STORY 
