ਦੇਸ਼ ’ਚ ਦੇਹ ਵਪਾਰ ਚਿੰਤਾਜਨਕ ਪੱਧਰ ਤੱਕ ਵਧਦਾ ਜਾ ਰਿਹਾ ਹੈ। ਵੱਡੇ ਪੱਧਰ ’ਤੇ ਕੁਝ ਸਪਾ ਸੈਂਟਰਾਂ ਅਤੇ ਮਸਾਜ ਪਾਰਲਰਾਂ, ਹੋਟਲਾਂ, ਘਰਾਂ ਆਦਿ ’ਚ ਇਸ ਦੇ ਮਾਮਲੇ ਸਾਹਮਣੇ ਆ ਰਹੇ ਹਨ ਅਤੇ ਇਹ ਅਨੈਤਿਕ ਧੰਦਾ ਚਲਾਉਣ ’ਚ ਮਰਦਾਂ ਦੇ ਨਾਲ-ਨਾਲ ਔਰਤਾਂ ਵੀ ਸ਼ਾਮਲ ਪਾਈਆਂ ਜਾ ਰਹੀਆਂ ਹਨ। ਇਸ ਦੀਆਂ ਇਸੇ ਮਹੀਨੇ ਸਾਹਮਣੇ ਆਈਆਂ ਘਟਨਾਵਾਂ ਹੇਠਾਂ ਦਰਜ ਹਨ :
* 3 ਅਗਸਤ ਨੂੰ ‘ਕੋਡਰਮਾ’ (ਝਾਰਖੰਡ) ਦੇ ‘ਚੰਦਵਾੜਾ’ ਸਥਿਤ ਇਕ ਹੋਟਲ ’ਚ ਚੱਲ ਰਹੇ ਦੇਹ ਵਪਾਰ ਦੇ ਧੰਦੇ ਦਾ ਪਰਦਾਫਾਸ਼ ਕਰ ਕੇ ਪੁਲਸ ਨੇ 3 ਪੀੜਤਾਂ ਨੂੰ ਮੁਕਤ ਕਰਵਾ ਕੇ ਉੱਥੋਂ 3 ਗਾਹਕਾਂ ਅਤੇ ਹੋਟਲ ਦੇ ਮੈਨੇਜਰ ਸਮੇਤ 5 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰਨ ਦੇ ਨਾਲ-ਨਾਲ ਇਤਰਾਜ਼ਯੋਗ ਸਮੱਗਰੀ ਅਤੇ ਸ਼ਰਾਬ ਜ਼ਬਤ ਕੀਤੀ।
* 6 ਅਗਸਤ ਨੂੰ ‘ਦੌਸਾ’ (ਰਾਜਸਥਾਨ) ਦੀ ‘ਲਾਲਸੋਟ’ ਥਾਣਾ ਪੁਲਸ ਨੇ ਇਕ ਹੋਟਲ ’ਚ ਚੱਲ ਰਹੇ ਦੇਹ ਵਪਾਰ ਦੇ ਅੱਡੇ ਦਾ ਪਤਾ ਲਗਾ ਕੇ ਉੱਥੋਂ ਮੈਨੇਜਰ ਸਮੇਤ 5 ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕਰ ਕੇ ਉਨ੍ਹਾਂ ਦੇ ਚੁੰਗਲ ’ਚ ਫਸੀਆਂ 4 ਔਰਤਾਂ ਨੂੰ ਮੁਕਤ ਕਰਵਾਇਆ। ਪੁਲਸ ਨੇ ਮੌਕੇ ਤੋਂ 14,000 ਰੁਪਏ ਨਕਦ ਅਤੇ 2 ਮੋਬਾਈਲ ਫੋਨ ਵੀ ਬਰਾਮਦ ਕੀਤੇ।
* 12 ਅਗਸਤ ਨੂੰ ‘ਭਿਲਾਈ’ (ਛੱਤੀਸਗੜ੍ਹ) ਦੇ ‘ਜੁਨਵਾਨੀ’ ’ਚ ਪੁਲਸ ਨੇ ਇਕ ਸਪਾ ਸੈਂਟਰ ’ਤੇ ਛਾਪਾ ਮਾਰ ਕੇ ਉੱਥੋਂ ਮੈਨੇਜਰ ‘ਤਨਯ ਸੋਨੀ’, ਮਹਿਲਾ ਦਲਾਲ ‘ਹੇਮਾ ਸਿੰਘ’ ਉਰਫ਼ ‘ਪ੍ਰੀਤ’ ਅਤੇ 7 ਗਾਹਕਾਂ ਸਮੇਤ 9 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰ ਕੇ ਉੱਥੇ ਦੇਹ ਵਪਾਰ ਲਈ ਲਿਆਂਦੀਆਂ ਗਈਆਂ ਛੱਤੀਸਗੜ੍ਹ ਅਤੇ ਉੱਤਰ-ਪੂਰਬੀ ਰਾਜਾਂ ਦੀਆਂ 8 ਲੜਕੀਆਂ ਨੂੰ ਮੁਕਤ ਕਰਵਾਇਆ। ਉੱਥੋਂ 19 ਮੋਬਾਈਲ ਫੋਨਾਂ ਅਤੇ ਨਕਦੀ ਤੋਂ ਇਲਾਵਾ ਇਤਰਾਜ਼ਯੋਗ ਸਮੱਗਰੀ ਵੀ ਬਰਾਮਦ ਕੀਤੀ ਗਈ।
* 13 ਅਗਸਤ ਨੂੰ ‘ਨਾਗਪੁਰ’ (ਮਹਾਰਾਸ਼ਟਰ) ’ਚ ਇਕ ਲੌਜ ਦੀ ਆੜ ’ਚ ਚਲਾਏ ਜਾ ਰਹੇ ਦੇਹ ਵਪਾਰ ਦੇ ਅੱਡੇ ਤੋਂ ਪੁਲਸ ਨੇ 3 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰਨ ਦੇ ਨਾਲ-ਨਾਲ ਉੱਥੋਂ ਇਕ ਨਾਬਾਲਗਾ ਸਮੇਤ 3 ਔਰਤਾਂ ਨੂੰ ਮੁਕਤ ਕਰਵਾਇਆ।
* 14 ਅਗਸਤ ਨੂੰ ‘ਲਖਨਊ’ (ਉੱਤਰ ਪ੍ਰਦੇਸ਼) ਦੀ ਪੁਲਸ ਨੇ 5 ਰਾਜਾਂ ’ਚ ਫੈਲੇ ਇਕ ਵੱਡੇ ਕੌਮਾਂਤਰੀ ਸੈਕਸ ਰੈਕੇਟ ਦਾ ਪਰਦਾਫਾਸ਼ ਕਰ ਕੇ ‘ਉਜ਼ਬੇਕਿਸਤਾਨ’ ਦੀ ਮੂਲ ਨਿਵਾਸੀ ਅਤੇ ਦਲਾਲ ‘ਲੋਲਾ’ ਨੂੰ ਗ੍ਰਿਫ਼ਤਾਰ ਕੀਤਾ।
ਪੁਲਸ ਅਨੁਸਾਰ ਉਹ 2014 ਤੋਂ ਇਹ ਗੈਰ-ਕਾਨੂੰਨੀ ਧੰਦਾ ਚਲਾ ਰਹੀ ਸੀ। ਉਹ ‘ਉਜ਼ਬੇਕਿਸਤਾਨ’ ਦੀਆਂ ਲੜਕੀਆਂ ਨੂੰ ‘ਰੂਸੀ’ ਦੱਸ ਕੇ ਗਾਹਕਾਂ ਨੂੰ ਸਪਲਾਈ ਕਰਦੀ ਸੀ। ਇਸ ਧੋਖਾਦੇਰੀ ਰਾਹੀਂ ਉਸ ਨੇ ‘ਲਖਨਊ’ ਅਤੇ ਹੋਰ ਸ਼ਹਿਰਾਂ ਦੇ ਲੋਕਾਂ ਤੋਂ ਕਰੋੜਾਂ ਰੁਪਏ ਠੱਗੇ ਸਨ। ਪੁਲਸ ਹੁਣ ਇਸ ਹਾਈ-ਪ੍ਰੋਫਾਈਲ ਰੈਕੇਟ ਨਾਲ ਜੁੜੇ ਹੋਰ ਸਥਾਨਕ ਮਦਦਗਾਰਾਂ ਅਤੇ ਵਿੱਤੀ ਲੈਣ-ਦੇਣ ਦੇ ਨੈੱਟਵਰਕ ਦੀ ਜਾਂਚ ਕਰ ਰਹੀ ਹੈ।
* 15 ਅਗਸਤ ਨੂੰ ਪੁਲਸ ਨੇ ‘ਰਾਂਚੀ’ (ਝਾਰਖੰਡ) ਸਥਿਤ ਇਕ ਹੋਟਲ ਦੇ ਵੱਖ-ਵੱਖ ਕਮਰਿਆਂ ਤੋਂ ਪੱਛਮੀ ਬੰਗਾਲ ਤੋਂ ਦੇਹ ਵਪਾਰ ਲਈ ਲਿਆਂਦੀਆਂ ਗਈਆਂ 5 ਲੜਕੀਆਂ ਨੂੰ ਮੁਕਤ ਕਰਵਾਉਣ ਦੇ ਇਲਾਵਾ 3 ਗਾਹਕਾਂ ਅਤੇ ਹੋਟਲ ਦੇ ਮੈਨੇਜਰ ਸਮੇਤ 11 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ।
* 18 ਅਗਸਤ ਨੂੰ ‘ਅਲੀਗੜ੍ਹ’ (ਉੱਤਰ ਪ੍ਰਦੇਸ਼) ਦੇ ‘ਕੁਆਰਸੀ’ ਥਾਣਾ ਖੇਤਰ ’ਚ ਪੁਲਸ ਨੇ ਮਸਾਜ ਪਾਰਲਰ ਦੀ ਆੜ ’ਚ ਚਲਾਏ ਜਾ ਰਹੇ ਜਿਸਮਫਰੋਸ਼ੀ ਦੇ ਧੰਦੇ ਦਾ ਪਰਦਾਫਾਸ਼ ਕੀਤਾ।
* 22 ਅਗਸਤ ਨੂੰ ਪੁਲਸ ਨੇ ‘ਕੈਥਲ’ (ਹਰਿਆਣਾ) ’ਚ ਬੋਗਸ ਗਾਹਕ ਭੇਜ ਕੇ ‘ਖੁਰਾਣਾ ਰੋਡ’ ’ਤੇ ਸਥਿਤ ਇਕ ਮਕਾਨ ’ਚ ਚੱਲ ਰਹੇ ਦੇਹ ਵਪਾਰ ਦੇ ਅੱਡੇ ਦਾ ਪਰਦਾਫਾਸ਼ ਕਰ ਕੇ 2 ਔਰਤਾਂ ਨੂੰ ਹਿਰਾਸਤ ’ਚ ਲਿਆ।
* 23 ਅਗਸਤ ਨੂੰ ‘ਦਿੱਲੀ’ ਦੇ ‘ਕਾਲਕਾ ਜੀ’ ਇਲਾਕੇ ’ਚ ਪੁਲਸ ਨੇ 2 ਸਪਾ ਸੈਂਟਰਾਂ ’ਤੇ ਨਕਲੀ ਗਾਹਕ ਭੇਜ ਕੇ ਕਾਰਵਾਈ ਕੀਤੀ ਅਤੇ ਛਾਪਾ ਮਾਰ ਕੇ ਦੋਵਾਂ ਦੇ ਮੈਨੇਜਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਅਤੇ ਉੱਥੋਂ 21 ਲੜਕੀਆਂ ਨੂੰ ਮੁਕਤ ਕਰਵਾਇਆ।
* ਅਤੇ ਹੁਣ 25 ਅਗਸਤ ਨੂੰ ‘ਜਲੰਧਰ’ (ਪੰਜਾਬ) ਦੇ ‘ਛੋਟੀ ਬਾਰਾਂਦਰੀ’ ’ਚ ਸਥਿਤ ਇਕ ਸਪਾ ਸੈਂਟਰ ਦੀ ਆੜ ’ਚ ਚਲਾਏ ਜਾ ਰਹੇ ਦੇਹ ਵਪਾਰ ਦੇ ਅੱਡੇ ’ਤੇ ਛਾਪਾ ਮਾਰ ਕੇ ਪੁਲਸ ਨੇ 2 ਗਾਹਕਾਂ ਨੂੰ 2 ਲੜਕੀਆਂ ਨਾਲ ਇਤਰਾਜ਼ਯੋਗ ਹਾਲਤ ’ਚ ਫੜਿਆ ਅਤੇ ਉੱਥੋਂ ਕੁਝ ਇਤਰਾਜ਼ਯੋਗ ਸਮੱਗਰੀ ਵੀ ਬਰਾਮਦ ਕੀਤੀ ਗਈ।
ਜਿੱਥੇ ਇਸ ਘਿਨਾਉਣੇ ਧੰਦੇ ’ਚ ਸ਼ਾਮਲ ਲੋਕਾਂ ਅਤੇ ਇਸ ਕੰਮ ’ਚ ਉਨ੍ਹਾਂ ਦੀ ਸਹਾਇਤਾ ਕਰਨ ਵਾਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਕਰਨ ਅਤੇ ਸਭ ਤੋਂ ਸਖ਼ਤ ਸਜ਼ਾ ਦੇਣ ਦੀ ਲੋੜ ਹੈ, ਉੱਥੇ ਹੀ ਇਸ ਨੂੰ ਅਪਣਾਉਣ ਲਈ ਮਜਬੂਰ ਹੋਣ ਵਾਲੀਆਂ ਲੜਕੀਆਂ ਨੂੰ ਇਸ ਚਿੱਕੜ ’ਚੋਂ ਕੱਢ ਕੇ ਉਨ੍ਹਾਂ ਦਾ ਮੁੜ-ਵਸੇਬਾ ਕਰਨ ਲਈ ਪ੍ਰਭਾਵਸ਼ਾਲੀ ਕਦਮ ਚੁੱਕਣ ਦੀ ਵੀ ਓਨੀ ਹੀ ਲੋੜ ਹੈ।
—ਵਿਜੇ ਕੁਮਾਰ
ਜਾਤੀਗਤ ਜਨਗਣਨਾ ’ਚ ਵਿਵਾਦ ਦੇ ਨੁਕਤੇ ਤਾਂ ਹਨ ਹੀ!
NEXT STORY 
