ਜਦੋਂ ਵਲਾਦੀਮੀਰ ਪੁਤਿਨ ਨੂੰ ਇਕ ‘ਹੌਟ ਮਾਈਕ’ ’ਤੇ ਸ਼ੀ ਜਿਨਪਿੰਗ ਨੂੰ ਇਹ ਕਹਿੰਦੇ ਹੋਏ ਰਿਕਾਰਡ ਕੀਤਾ ਗਿਆ ਕਿ ਮਨੁੱਖ ਆਪਣੇ ਅੰਗਾਂ ਨੂੰ ਬਦਲ ਕੇ ਅਮਰਤਾ ਪ੍ਰਾਪਤ ਕਰ ਸਕਦਾ ਹੈ, ਤਾਂ ਕੁਝ ਲੋਕਾਂ ਨੇ ਇਸ ਗੱਲਬਾਤ ਨੂੰ ਵੱਡੀ ਉਮਰ ਦੇ ਤਾਨਾਸ਼ਾਹਾਂ ਦਰਮਿਆਨ ਦੀ ਇਕ ਸਨਕੀ ਛੋਟੀ-ਮੋਟੀ ਗੱਲ ਕਹਿ ਕੇ ਖਾਰਿਜ ਕਰ ਦਿੱਤਾ।
ਅਸਲ ’ਚ, ਪਿਛਲੇ ਸਾਲ ਸਤੰਬਰ ’ਚ ਬੀਜਿੰਗ ’ਚ ਆਯੋਜਿਤ ਇਕ ਫੌਜੀ ਪਰੇਡ ਦੌਰਾਨ ਹੋਈ ਗੱਲਬਾਤ ’ਚ ਪੁਤਿਨ ਕ੍ਰੈਮਲਿਨ ਹਮਾਇਤੀ ਲੰਮੀ ਉਮਰ ਦੀ ਪਹਿਲ ਦਾ ਜ਼ਿਕਰ ਕਰਦੇ ਹੋਏ ਪ੍ਰਤੀਤ ਹੋਏ, ਜੋ ਰੂਸ ਦੇ ਪ੍ਰਮੁੱਖ ਵਿਗਿਆਨਕ ਯੋਜਨਾਵਾਂ ’ਚੋਂ ਇਕ ਬਣ ਗਈ ਹੈ।
ਜੇਫ ਬੇਜੋਸ, ਸੈਮ ਆਲਟਮੈਨ ਅਤੇ ਪੀਟਰ ਥੀਏਲ ਵਰਗੇ ਸਿਲੀਕਾਨ ਵੈਲੀ ਦੇ ਅਰਬਪਤੀਆਂ ਵਾਂਗ, ਪੁਤਿਨ ਵੀ ਲੰਮੇ ਸਮੇਂ ਤੋਂ ਐਂਟੀ-ਏਜਿੰਗ ਖੋਜ ’ਚ ਦਿਲਚਸਪੀ ਰੱਖਦੇ ਆ ਰਹੇ ਹਨ ਪਰ ਰੂਸ ’ਚ, ਉਮਰ ਵਧਣ ਦੀ ਪ੍ਰਕਿਰਿਆ ਨੂੰ ਰੋਕਣ ਦਾ ਪੁਤਿਨ ਦਾ ਯਤਨ ਹੁਣ ਇਕ ਸਰਕਾਰੀ ਪਹਿਲ ਬਣ ਗਿਆ ਹੈ।
ਪਿਛਲੇ ਮਹੀਨੇ ਰੂਸ ਦੇ ਵਿਗਿਆਨ ਉਪ ਮੰਤਰੀ ਡੈਨਿਸ ਸੇਕਿਰਿੰਸਕੀ ਨੇ ਐਲਾਨ ਕੀਤਾ ਕਿ ਪੁਤਿਨ ਦੀ 26 ਅਰਬ ਡਾਲਰ ਦੀ ਲੰਮੀ ਉਮਰ ਦੀ ਮੁਹਿੰਮ ਅਧੀਨ ਨਵੀਆਂ ਸਿਹਤ ਸੁਰੱਖਿਆ ਤਕਨੀਕਾਂ ਤਹਿਤ ਸੈੱਲਾਂ ਦੀ ਉਮਰ ਵਧਣ ਦੀ ਪ੍ਰਕਿਰਿਆ ਨੂੰ ਹੌਲੀ ਕਰਨ ਦੇ ਉਦੇਸ਼ ਨਾਲ ਵਿਗਿਆਨੀ ਇਕ ਜੀਨ-ਥੈਰੇਪੀ ਇਲਾਜ ਵਿਕਸਿਤ ਕਰ ਰਹੇ ਹਨ, ਜੋ ਬੁਢਾਪੇ ਵਿਰੁੱਧ ਲੜਾਈ ’ਚ ਸਭ ਤੋਂ ਉਮੀਦ ਵਾਲੇ ਰਸਤਿਆਂ ’ਚੋਂ ਇਕ ਹੈ।
ਇਕ ਹੋਰ ਉਮੀਦ ਵਾਲਾ ਰਸਤਾ, ਟ੍ਰਾਂਸਪਲਾਂਟੇਸ਼ਨ ਲਈ ਪ੍ਰਯੋਗਸ਼ਾਲਾ ’ਚ ਮਨੁੱਖੀ ਅੰਗਾਂ ਦਾ ਨਿਰਮਾਣ ਕਰਨਾ ਹੈ, ਜੋ ਜੀਵਨ ਕਾਲ ਵਧਾਉਣ ਵਾਲੀਆਂ ਉਨ੍ਹਾਂ ਨਵੀਨਤਾਵਾਂ ’ਚੋਂ ਇਕ ਹੈ ਜਿਸ ਬਾਰੇ ਪੁਤਿਨ ਨੇ ਬੀਜਿੰਗ ’ਚ ਵੀ ਗੱਲ ਕੀਤੀ ਸੀ। ਇਹ ਸਾਰੇ ਯਤਨ ਰਾਸ਼ਟਰੀ ਲੰਮੀ ਉਮਰ ਦੀ ਪਹਿਲ ਦਾ ਹਿੱਸਾ ਹਨ, ਜਿਸ ਦੀ ਉਨ੍ਹਾਂ ਨੇ 2024 ’ਚ ਘੁੰਡ-ਚੁਕਾਈ ਕੀਤੀ ਸੀ, ਜੋ ਦਹਾਕੇ ਦੇ ਅੰਤ ਤੱਕ 1,75,000 ਲੋਕਾਂ ਦੀ ਜਾਨ ਬਚਾਉਣ ਦਾ ਵਾਅਦਾ ਕਰਦੀ ਹੈ (ਇਹ ਅੰਕੜਾ ਜੰਗ ਦੇ ਸਮੇਂ ਦੀ ਸਥਿਤੀ ਦੀ ਯਾਦ ਦਿਵਾਉਂਦਾ ਹੈ, ਜੋ ਯੂਕ੍ਰੇਨ ’ਤੇ ਹਮਲੇ ’ਚ ਰੂਸੀ ਫੌਜੀਆਂ ਦੇ ਨੁਕਸਾਨ ਦੇ ਆਜ਼ਾਦ ਅਨੁਮਾਨਾਂ ਨਾਲ ਲਗਭਗ ਮੇਲ ਖਾਂਦਾ ਹੈ, ਜਿਵੇਂ ਕਿ ਆਲੋਚਕਾਂ ਨੇ ਉਸ ਸਮੇਂ ਜ਼ਿਕਰ ਕੀਤਾ ਸੀ)।
ਦੂਜੇ ਪਾਸੇ ਰੂਸ ਦੇ ਯੂਕ੍ਰੇਨ ’ਚ ਚੱਲ ਰਹੀ ਮੌਜੂਦਾ ਜੰਗ ’ਚ ਲੱਖਾਂ ਲੋਕ ਮਾਰੇ ਗਏ ਹਨ। ਕਿਉਂਕਿ ਜੰਗ ਅਤੇ ਆਪ੍ਰੇਸ਼ਨਲ ਸੀਕ੍ਰੇਸੀ ਕਾਰਨ ਮੌਤਾਂ ਦੀ ਸਹੀ ਗਿਣਤੀ ਦਾ ਅਨੁਮਾਨ ਲਗਾਉਣਾ ਮੁਸ਼ਕਲ ਹੈ, ਪਰ ਅਧਿਕਾਰਤ ਅੰਕੜਿਆਂ ਤੋਂ ਸੰਕੇਤ ਮਿਲਦਾ ਹੈ ਕਿ ਰੂਸ ਦੀ ਫੌਜ ਵਿਚ 5 ਲੱਖ ਦੇ ਲਗਭਗ ਮੌਤਾਂ ਹੋਈਆਂ ਹਨ, ਜਦੋਂ ਕਿ ਯੂਕ੍ਰੇਨ ’ਚ ਹੋਈਆਂ ਮੌਤਾਂ ਦਾ ਅੰਕੜਾ ਮੋਟੇ ਤੌਰ ’ਤੇ 3,25,000 ਦੱਸਿਆ ਜਾ ਰਿਹਾ ਹੈ ਅਤੇ ਇਹ ਜੰਗ ਹੁਣ ਪੰਜਵੇਂ ਸਾਲ ’ਚ ਜਾ ਰਹੀ ਹੈ।
ਇਕ ਪਾਸੇ ਪੁਤਿਨ ਯੂਕ੍ਰੇਨ ’ਚ ਲੋਕਾਂ ਦੀ ਮੌਤ ਦਾ ਕਾਰਨ ਬਣ ਰਹੇ ਹਨ, ਪਰ ਦੂਜੇ ਪਾਸੇ ਉਨ੍ਹਾਂ ਨੇ ਬੁਢਾਪੇ ਦੀ ਪ੍ਰਕਿਰਿਆ ਨੂੰ ਰੋਕਣ ਅਤੇ ਉਮਰ ਲੰਮੀ ਕਰਨ ਲਈ ਖੋਜ ਸ਼ੁਰੂ ਕਰਵਾਈ ਹੋਈ ਹੈ।
ਜਿਸ ਤਰ੍ਹਾਂ ਟਰੰਪ ਨੇ ਈਰਾਨ ’ਚ, ਪੁਤਿਨ ਨੇ ਯੂਕ੍ਰੇਨ ’ਚ ਅਤੇ ਨੇਤਨਯਾਹੂ ਨੇ ਗਾਜ਼ਾ ’ਚ ਜੰਗ ਛੇੜੀ ਹੋਈ ਹੈ, ਤਾਂ ਕੀ ਲੰਮੀ ਉਮਰ ਕਰਨ ਦੀ ਖੋਜ ਦੇ ਨਾਲ-ਨਾਲ ਆਪਣੀਆਂ ਇੱਛਾਵਾਂ ਦੀ ਪੂਰਤੀ ਲਈ ਲੋਕਾਂ ਦੇ ਜੀਵਨ ਨੂੰ ਬਰਬਾਦ ਕਰਨਾ ਬੰਦ ਨਹੀਂ ਹੋਣਾ ਚਾਹੀਦਾ?
ਅੱਜ ਤੋਂ ਲਗਭਗ 200 ਸਾਲ ਪਹਿਲਾਂ ਲੋਕਾਂ ਦੀ ਔਸਤ ਉਮਰ 30 ਸਾਲ ਮੰਨੀ ਜਾਂਦੀ ਸੀ, ਜੋ ਬਾਅਦ ’ਚ ਵਧ ਕੇ ਰੂਸ ’ਚ 68 ਸਾਲ ਤੱਕ ਪਹੁੰਚੀ ਅਤੇ ਅਮਰੀਕਾ ’ਚ 76 ਸਾਲ ਅਤੇ ਯੂਰਪ ਦੀਆਂ ਕਈ ਥਾਵਾਂ ’ਤੇ ਇਹ 90 ਤੱਕ ਪਹੁੰਚ ਗਈ ਹੈ, ਜਦੋਂ ਕਿ ਪੁਤਿਨ ਵਲੋਂ ਕਰਵਾਈ ਜਾਣ ਵਾਲੀ ਨਵੀਂ ਖੋਜ ਸਫ਼ਲ ਹੋਣ ’ਤੇ ਉਮਰ 150 ਸਾਲਾਂ ਤੱਕ ਪਹੁੰਚ ਸਕਦੀ ਹੈ।
ਪੁਤਿਨ ਵਲੋਂ ਨਿਯੁਕਤ ਰੂਸੀ ਸਰਕਾਰੀ ਵਿਗਿਆਨੀਆਂ ਨੇ ਦੋ ਪ੍ਰਮੁੱਖ ਤਕਨੀਕਾਂ ’ਤੇ ਧਿਆਨ ਕੇਂਦਰਿਤ ਕੀਤਾ ਹੈ-ਬਾਇਓਪ੍ਰਿੰਟਿੰਗ, ਭਾਵ ਜੀਵਤ ਟਿਸ਼ੂਆਂ ਦੀ 3ਡੀ ਪ੍ਰਿੰਟਿੰਗ ਅਤੇ ਜੈਨੋਟ੍ਰਾਂਸਪਲਾਂਟੇਸ਼ਨ, ਭਾਵ ਗਿਨੀ-ਪਿਗ ਅੰਦਰ ਮਨੁੱਖੀ ਅੰਗਾਂ ਦਾ ਵਿਕਾਸ ਕਰਨਾ। ਇਸ ਸੂਰਾਂ ਦੀ ਇਕ ਅਜਿਹੀ ਨਸਲ ਹੈ ਜਿਸ ਨੂੰ ਖਾਨਦਾਨੀ ਢੰਗ ਨਾਲ ਮਨੁੱਖਾਂ ਮੁਤਾਬਕ ਮੰਨਿਆ ਜਾਂਦਾ ਹੈ।
ਰੂਸ ਦੀ ਲੰਬੀ ਉਮਰ ਦੀ ਪਹਿਲ ਦੀ ਅਗਵਾਈ ਪੁਤਿਨ ਦੇ ਕਰੀਬੀ 2 ਵਿਅਕਤੀ, ਉਨ੍ਹਾਂ ਦੀ ਬੇਟੀ ਮਾਰੀਆ ਵੋਰੋਨਤਸੋਵਾ ਅਤੇ ਭੌਤਿਕ ਵਿਗਿਆਨੀ ਮਿਖਾਇਲ ਕੋਵਲਚੁਕ ਕਰ ਰਹੇ ਹਨ। ਪੁਤਿਨ ਦੇ ਕਰੀਬੀ ਸਹਿਯੋਗੀ ਯੂਰੀ ਕੋਵਲਚੁਕ ਦੇ ਭਰਾ ਕੋਵਲਚੁਕ ਦਾ ਕਹਿਣਾ ਹੈ ਕਿ ਵਿਗਿਆਨ ਜਲਦੀ ਹੀ ਮਨੁੱਖਾਂ ਨੂੰ ਸਰੀਰ ਦੇ ਅੰਗਾਂ ਦੀ ਮੁਰੰਮਤ ਕਰਨ ਅਤੇ ਉਨ੍ਹਾਂ ਨੂੰ ਅਣਮਿੱਥੇ ਸਮੇਂ ਤੱਕ ਬਦਲਣ ਦੇ ਯੋਗ ਬਣਾ ਦੇਵੇਗਾ।
ਜਿੱਥੋਂ ਤੱਕ ਭਾਰਤ ਦਾ ਸਬੰਧ ਹੈ, ਹਾਲਾਂਕਿ ਸਾਡੇ ਡਾਕਟਰ ਦੁਨੀਆ ਦੇ ਹਰ ਦੇਸ਼ ਦੇ ਚੋਟੀ ਦੇ ਹਸਪਤਾਲਾਂ ’ਚ ਮੌਜੂਦ ਹਨ, ਪਰ ਐੱਨ. ਸੀ. ਆਰ. ਟੀ. ਆਦਿ ਅਦਾਰਿਆਂ ਵਲੋਂ ਵਿਗਿਆਨ ਦੇ ਵਿਸ਼ਿਆਂ ਨੂੰ 9ਵੀਂ ਜਮਾਤ ਤੱਕ ਸੀਮਤ ਕਰ ਦਿੱਤੇ ਜਾਣ ਤੋਂ ਬਾਅਦ ਵਿਗਿਆਨ ਵੱਲ ਭਾਰਤੀਆਂ ਦਾ ਰੁਝਾਨ ਘਟਦਾ ਜਾ ਰਿਹਾ ਹੈ।
ਜ਼ਿਕਰਯੋਗ ਹੈ ਕਿ ਭਾਰਤ ਵਿਚ 10 ਲੱਖ ਲਾਇਸੰਸਸ਼ੁਦਾ ਡਾਕਟਰ, ਅਮਰੀਕਾ ’ਚ 12 ਲੱਖ, ਚੀਨ ’ਚ 10 ਲੱਖ ਅਤੇ ਬ੍ਰਾਜ਼ੀਲ ਤੇ ਜਰਮਨੀ ’ਚ 4,50,000 ਡਾਕਟਰ ਹਨ।
ਭਾਰਤ ’ਚ ਹਰ ਸਾਲ ਜਿੰਨੇ ਡਾਕਟਰ ਤਿਆਰ ਹੁੰਦੇ ਹਨ, ਓਨੇ ਸ਼ਾਇਦ ਦੁਨੀਆ ਦੇ ਕਿਸੇ ਦੇਸ਼ ਵਿਚ ਨਹੀਂ ਹੁੰਦੇ ਅਤੇ ਬਿਹਤਰੀਨ ਤਜਰਬੇਕਾਰ ਡਾਕਟਰ ਬਣਦੇ ਹਨ। ਤਾਂ ਕੀ ਸਾਡੇ ਕੋਲ ਅਜਿਹੀ ਕੋਈ ਤਕਨੀਕ ਨਹੀਂ ਆਉਣੀ ਚਾਹੀਦੀ ਸੀ, ਜੋ ਲੋਕਾਂ ਨੂੰ ਸਿਹਤਮੰਦ ਜੀਵਨ ਦੇ ਸਕੇ? ਕੀ ਅਸੀਂ ਇਸ ਖੇਤਰ ’ਚ ਨਿਵੇਸ਼ ਘੱਟ ਕਰ ਰਹੇ ਹਾਂ, ਇਸ ’ਚ ਅਸੀਂ ਮੌਕਿਆਂ ਨੂੰ ਦਬਾਅ ਰਹੇ ਹਾਂ? ਇਸ ਤਰ੍ਹਾਂ ਦੇ ਹਾਲਾਤ ਬਣਨ ਦਾ ਕੀ ਕਾਰਨ ਹੈ, ਇਹ ਵੀ ਦੇਖਣ ਵਾਲੀ ਗੱਲ ਹੈ।
ਹਾਲਾਂਕਿ ਇਹ ਚੰਗੀ ਗੱਲ ਹੈ ਕਿ ਦੁਨੀਆ ’ਚ ਸਭ ਲੋਕਾਂ ਦੀ ਉਮਰ ਲੰਮੀ ਹੋਵੇ, ਸਾਰਿਆਂ ਨੂੰ ਲਾਭ ਹੋਵੇ ਅਤੇ ਬਿਮਾਰੀਆਂ ਤੋਂ ਮੁਕਤੀ ਮਿਲੇ। ਇਹ ਵੀ ਕਿ ਕੀ ਲੰਮੀ ਉਮਰ ਸਿਰਫ਼ ਅਮੀਰ ਲੋਕਾਂ ਲਈ ਹੋਵੇਗੀ ਅਤੇ ਮੱਧਵਰਗੀ ਤੇ ਗਰੀਬ ਲੋਕ ਇੰਝ ਹੀ ਜੰਗਾਂ ’ਚ ਮਰਦੇ ਰਹਿਣਗੇ?
ਜਸਟਿਸ ਯਸ਼ਵੰਤ ਵਰਮਾ ਮਾਮਲਾ ਅਤੇ ਭਾਰਤ ਦਾ ਸੰਵਿਧਾਨਕ ਧੁੰਦਲਾ ਖੇਤਰ
NEXT STORY 
