ਸ੍ਰੀ ਕੀਰਤਪੁਰ ਸਾਹਿਬ, (ਬਾਲੀ)- ਕੇਂਦਰ ਸਰਕਾਰ ਦੇ ਅਧੀਨ ਕੰਮ ਕਰਦੇ ਬੀ.ਬੀ.ਐੱਮ.ਬੀ. ਵਿਭਾਗ ਵੱਲੋਂ ਭਾਖਡ਼ਾ ਨਹਿਰ ਦੀ ਉਸਾਰੀ ਸਮੇਂ ਸ੍ਰੀ ਕੀਰਤਪੁਰ ਸਾਹਿਬ ਦੇ ਪੁਰਾਣੇ ਬੱਸ ਸਟੈਂਡ ਦੇ ਨਜ਼ਦੀਕ ਅਤੇ ਇਤਿਹਾਸਕ ਗੁਰਦੁਆਰਾ ਚਰਨ ਕੰਵਲ ਸਾਹਿਬ ਜਿੱਥੇ ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਕੀਰਤਨ ਕੀਤਾ ਸੀ, ਦੇ ਸਾਹਮਣੇ ਭਾਖਡ਼ਾ ਨਹਿਰ ਦੇ ਨਾਲ ਹੀ ਜਿਹਡ਼ੇ ਜਨਾਨਾ ਤੇ ਮਰਦਾਨਾ ਇਸ਼ਨਾਨਘਾਟਾਂ ਦੀ ਉਸਾਰੀ ਕਰਵਾਈ ਗਈ ਸੀ ਦੀ ਮੁਡ਼ ਸਾਰ ਨਾ ਲਏ ਜਾਣ ਕਾਰਨ ਇਹ ਤਰਸਯੋਗ ਹਾਲਤ ’ਚ ਹਨ। ਬੀ.ਬੀ.ਐੱਮ.ਬੀ. ਵਿਭਾਗ ਅਤੇ ਨਗਰ ਪੰਚਾਇਤ ਸ੍ਰੀ ਕੀਰਤਪੁਰ ਸਾਹਿਬ ਜੋ ਇਸ ਸਮੇਂ ਕਰੋਡ਼ਾਂ ਰੁਪਏ ਦੇ ਵੱਖ-ਵੱਖ ਕੰਮ ਕਰਵੇ ਰਹੇ ਹਨ ਵੱਲੋਂ ਇਸ਼ਨਾਨਘਾਟਾਂ ਦੀ ਸਾਫ-ਸਫਾਈ ਤੇ ਮੁਰੰਮਤ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਜਾ ਰਿਹਾ।
ਖਸਤਾ ਹਾਲਤ ਕਾਰਨ ਇਸ਼ਨਾਨ ਨਹੀਂ ਕਰਦੇ ਯਾਤਰੀ
ਸ੍ਰੀ ਕੀਰਤਪੁਰ ਸਾਹਿਬ ਇਲਾਕੇ ’ਚ 22 ਦੇ ਕਰੀਬ ਗੁਰਦੁਆਰਾ ਸਾਹਿਬ, 7 ਮੰਦਰ ਹੋਣ ਕਰ ਕੇ ਅਤੇ ਇਸ ਤੋਂ ਇਲਾਵਾ ਹੋਲਾ ਮਹੱਲਾ ਮੇਲਾ, ਸੰਗਰਾਂਦ, ਮਾਤਾ ਦੇ ਨਰਾਤਿਅਾਂ ਤੇ ਹੋਰ ਦਿਨ ਤਿਉਹਾਰ ਨੂੰ ਲੈ ਕਿ ਇੱਥੇ ਸ਼ਰਧਾਲੂਆਂ ਦਾ ਤਾਂਤਾ ਲੱਗਾ ਰਹਿੰਦਾ ਹੈ। ਜਿਨ੍ਹਾਂ ਨੂੰ ਸਿਰਫ਼ ਇਹ ਦੋਵੇਂ ਘਾਟ ਇਸ਼ਨਾਨ ਕਰਨ ਲਈ ਨਜ਼ਦੀਕ ਤੇ ਸੁਰੱਖਿਅਤ ਪੈਂਦੇ ਹਨ। ਜਦ ਕਿ ਮੇਨ ਭਾਖਡ਼ਾ ਨਹਿਰ ’ਚ ਬਹੁਤ ਘੱਟ ਲੋਕ ਪਾਣੀ-ਪੀਣ ਤੇ ਇਸ਼ਨਾਨ ਕਰਨ ਲਈ ਉਤਰਦੇ ਹਨ। ਕਈ ਸ਼ਰਧਾਲੂ ਇਨ੍ਹਾਂ ਘਾਟਾਂ ਦੀ ਸਾਫ-ਸਫਾਈ ਨਾ ਹੋਣ ਕਾਰਨ ਭਾਖਡ਼ਾ ਨਹਿਰ ’ਚ ਇਸ਼ਨਾਨ ਕਰਦੇ ਸਮੇਂ ਰੁਡ਼੍ਹ ਚੁੱਕੇ ਹਨ। ਇਸ ਸਮੇਂ ਉਕਤ ਦੋਵੇਂ ਇਸ਼ਨਾਨਘਾਟ ਗੰਦਗੀ ਨਾਲ ਭਰੇ ਪਏ ਹਨ। ਭਾਰੀ ਤਦਾਦ ਵਿਚ ਹਰਿਆਲੀ ਬੂਟੀ ਤੇ ਗੰਦਗੀ ਇਨ੍ਹਾਂ ਘਾਟਾਂ ’ਤੇ ਤੈਰਦੀ ਆਮ ਵੇਖੀ ਜਾ ਸਕਦੀ ਹੈ।
ਪੌਡ਼ੀਆਂ ਹਨ ਖਸਤਾ ਹਾਲਤ ’ਚ
ਇਸ਼ਨਾਨਘਾਟ ਵਿਚ ਉੱਤਰਨ ਲਈ ਬਣਾਈਆਂ ਪੌਡ਼ੀਆਂ ਖਸਤਾ ਹਾਲਤ ਵਿਚ ਹਨ ਇਨ੍ਹਾਂ ’ਤੇ ਜਿਥੇ ਹਰਿਆਲੀ ਜੰਮਣ ਕਾਰਨ ਤਿਲਕਣ ਹੋਈ ਪਈ ਹੈ ਦੂਜੇ ਪਾਸੇ ਪਾਣੀ ’ਚ ਉਤਰਨ ਲਈ ਪੌਡ਼ੀਆਂ ਨਾਲ ਲਾਏ ਲੋਹੇ ਦੇ ਮਜ਼ਬੂਤ ਸੰਗਲ ਅਣਪਛਾਤੇ ਚੋਰ ਕਦੋਂ ਦੇ ਲਾਹ ਕੇ ਲੈ ਗਏ ਹਨ। ਇਸ ਤੋਂ ਇਲਾਵਾ ਜਨਾਨਾ ਇਸ਼ਨਾਨ ਘਰ ਦਾ ਲੋਹੇ ਦਾ ਦਰਵਾਜ਼ਾ ਟੁੱਟ ਚੁੱਕਿਆ ਹੈ। ਜਿਸ ਕਾਰਨ ਲੋਕ ਇਸ ਦੀ ਚਾਰਦੀਵਾਰੀ ਦੇ ਅੰਦਰ ਗੰਦਗੀ ਫੈਲਾਉਣ ਲੱਗ ਪਏ ਹਨ।
ਕੀ ਕਹਿੰਦੇ ਹਨ ਸਾਬਕਾ ਸਰਪੰਚ
ਪਿੰਡ ਭਟੋਲੀ ਦੇ ਸਾਬਕਾ ਸਰਪੰਚ ਭੁਪਿੰਦਰ ਸਿੰਘ ਭਾਰਜ, ਗੁਰਮੀਤ ਸਿੰਘ ਟੀਨਾ ਅਤੇ ਸ੍ਰੀ ਕੀਰਤਪੁਰ ਸਾਹਿਬ ਦੇ ਸਾਬਕਾ ਸਰਪੰਚ ਮਨੋਹਰ ਲਾਲ ਬੇਦੀ ਨੇ ਦੱਸਿਆ ਕਿ ਇਨ੍ਹਾਂ ਇਸ਼ਨਾਨਘਾਟਾਂ ਦੀ ਪੰਜ ਪਿੰਡਾਂ ਤੋਂ ਇਲਾਵਾ ਨਾਲ ਲੱਗਦੇ ਪਿੰਡਾਂ ਦੇ ਲੋਕ ਵੀ ਵਰਤੋਂ ਕਰਦੇ ਹਨ। ਇਲਾਕੇ ਵਿਚ ਜਿਹਡ਼ਾ ਵੀ ਕੋਈ ਪ੍ਰਾਣੀ ਸਵਰਗ ਸਿਧਾਰ ਜਾਂਦਾ ਹੈ, ਉਸ ਦੀਆਂ ਅੰਤਿਮ ਰਸਮਾਂ ਵੀ ਇਸ ਘਾਟ ’ਤੇ ਹੀ ਪੂਰੀਆਂ ਕੀਤੀਆਂ ਜਾਂਦੀਆਂ ਹਨ। ਭਟੋਲੀ ਪੰਚਾਇਤ ਵੱਲੋਂ ਪਹਿਲਾਂ ਇਸ ਦੀ ਫੰਡ ਆਉਣ ਸਮੇਂ ਕਈ ਵਾਰ ਸਾਫ-ਸਫਾਈ ਤੇ ਮੁਰੰਮਤ ਕਰਵਾ ਦਿੱਤੀ ਜਾਂਦੀ ਸੀ, ਪਰ ਪੰਚਾਇਤਾਂ ਭੰਗ ਹੋ ਕੇ ਨਗਰ ਪੰਚਾਇਤ ਬਣਨ ਤੋਂ ਬਾਅਦ ਤਾਂ ਇਸ ਦੀ ਸਾਂਭ-ਸੰਭਾਲ ਕਰਨ ਵਾਲਾ ਕੋਈ ਨਹੀਂ ਹੈ।
ਕੀ ਕਹਿੰਦੇ ਨੇ ਅਧਿਕਾਰੀ
ਇਸ ਬਾਰੇ ਜਦੋਂ ਬੀ. ਬੀ. ਐੱਮ. ਬੀ. ਦੇ ਇਕ ਅਧਿਕਾਰੀ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਸਾਡੇ ਵੱਲੋਂ ਐਸਟੀਮੇਟ ਬਣਾ ਕੇ ਵਿਭਾਗ ਨੂੰ ਭੇਜਿਆ ਗਿਆ ਹੈ, ਜੋ ਅਜੇ ਤੱਕ ਪਾਸ ਨਹੀਂ ਹੋਇਆ, ਜਿਸ ਦੇ ਪਾਸ ਹੋਣ ਮਗਰੋਂ ਇਸ਼ਨਾਨਘਾਟਾਂ ਦੀ ਸਾਫ-ਸਫਾਈ, ਮੁਰੰਮਤ ਤੇ ਸੁੰਦਰੀਕਰਨ ਕਰਵਾਇਆ ਜਾਵੇਗਾ। ਇਸ ਬਾਰੇ ਜਦੋਂ ਨਗਰ ਪੰਚਾਇਤ ਕੀਰਤਪੁਰ ਸਾਹਿਬ ਦੇ ਕਾਰਜ ਸਾਧਕ ਅਫਸਰ ਗੁਰਦਰਸ਼ਨ ਸਿੰਘ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਨੇ ਆਪਣਾ ਫੋਨ ਨਹੀਂ ਚੁੱਕਿਆ।
ਪੰਚਾਇਤੀ ਚੋਣਾਂ ’ਚ ਵੰਡੀ ਜਾਣ ਵਾਲੀ 605 ਪੇਟੀਅਾਂ ਸ਼ਰਾਬ ਬਰਾਮਦ
NEXT STORY 
