ਨਵੀਂ ਦਿੱਲੀ (ਬਿਊਰੋ) - ਭਾਰਤ ਦੀ ਆਜ਼ਾਦੀ ਨੂੰ 'ਭੀਖ' ਦੱਸਦਿਆਂ ਅਦਾਕਾਰਾ ਕੰਗਨਾ ਰਣੌਤ ਨੇ ਅੱਜ ਯਾਨੀਕਿ ਸ਼ਨੀਵਾਰ ਨੂੰ ਸਵਾਲ ਕੀਤਾ ਕਿ 1947 ਦੀ ਲੜਾਈ ਕੀ ਸੀ? ਇਸ ਦੇ ਨਾਲ ਹੀ ਉਸ ਨੇ ਕਿਹਾ ਕਿ ਜੇਕਰ ਕੋਈ ਉਸ ਦੇ ਸਵਾਲ ਦਾ ਜਵਾਬ ਦੇ ਸਕਦਾ ਹੈ ਤਾਂ ਉਹ ਆਪਣਾ 'ਪਦਮ ਸ਼੍ਰੀ ਪੁਰਸਕਾਰ' ਵਾਪਸ ਕਰ ਦੇਵੇਗੀ ਅਤੇ ਮੁਆਫੀ ਵੀ ਮੰਗੇਗੀ। ਕੰਗਨਾ ਰਣੌਤ ਅਕਸਰ ਆਪਣੀਆਂ ਭੜਕਾਊ ਟਿੱਪਣੀਆਂ ਕਾਰਨ ਸੁਰਖੀਆਂ 'ਚ ਰਹਿੰਦੀ ਹੈ। ਉਸ ਨੇ ਕੁਝ ਘੰਟੇ ਪਹਿਲਾਂ ਨੇ ਇੰਸਟਾਗ੍ਰਾਮ ਸਟੋਰੀਜ਼ 'ਤੇ ਕਈ ਸਵਾਲ ਖੜ੍ਹੇ ਕੀਤੇ। ਇਸ ਦੌਰਾਨ ਉਸ ਨੇ ਵੰਡ ਅਤੇ ਮਹਾਤਮਾ ਗਾਂਧੀ ਦਾ ਵੀ ਜ਼ਿਕਰ ਕੀਤਾ ਅਤੇ ਦੋਸ਼ ਲਾਇਆ ਕਿ ਉਸ ਨੇ ਭਗਤ ਸਿੰਘ ਨੂੰ ਮਰਨ ਦਿੱਤਾ ਅਤੇ ਸੁਭਾਸ਼ ਚੰਦਰ ਬੋਸ ਦਾ ਸਮਰਥਨ ਨਹੀਂ ਕੀਤਾ। ਉਸ ਨੇ ਬਾਲ ਗੰਗਾਧਰ ਤਿਲਕ, ਅਰਬਿੰਦੋ ਘੋਸ਼ ਅਤੇ ਬਿਪਿਨ ਚੰਦਰ ਪਾਲ ਸਮੇਤ ਕਈ ਆਜ਼ਾਦੀ ਘੁਲਾਟੀਆਂ ਦੇ ਹਵਾਲੇ ਨਾਲ ਇੱਕ ਕਿਤਾਬ ਦੇ ਅੰਸ਼ ਵੀ ਸਾਂਝੇ ਕੀਤੇ ਅਤੇ ਕਿਹਾ ਕਿ ਉਹ 1857 ਦੀ "ਆਜ਼ਾਦੀ ਲਈ ਸਮੂਹਿਕ ਲੜਾਈ" ਬਾਰੇ ਜਾਣਦੀ ਸੀ ਪਰ 1947 ਦੀ ਲੜਾਈ ਬਾਰੇ ਕੁਝ ਨਹੀਂ ਜਾਣਦੀ।
ਕੰਗਨਾ ਰਣੌਤ (34) ਨੇ ਆਪਣੇ ਇੰਸਟਾਗ੍ਰਾਮ ਸਟੋਰੀਜ਼ 'ਤੇ ਅੰਗਰੇਜ਼ੀ 'ਚ ਇਕ ਲੰਬੀ ਪੋਸਟ 'ਚ ਲਿਖਿਆ, "ਸਿਰਫ਼ ਸਹੀ ਵਰਣਨ ਦੇਣ ਲਈ 1857 ਆਜ਼ਾਦੀ ਲਈ ਪਹਿਲੀ ਜਨਤਕ ਲੜਾਈ ਸੀ ਅਤੇ ਸੁਭਾਸ਼ ਚੰਦਰ ਬੋਸ, ਰਾਣੀ ਲਕਸ਼ਮੀਬਾਈ ਅਤੇ ਵੀਰ ਸਾਵਰਕਰ ਜੀ ਵਰਗੇ ਮਹਾਨ ਲੋਕਾਂ ਨੇ ਦਿੱਤੀ ਸੀ।" ਉਸ ਨੇ ਲਿਖਿਆ, "1857 ਮੈਂ ਜਾਣਦੀ ਹਾਂ ਪਰ 1947 'ਚ ਕਿਹੜੀ ਜੰਗ ਹੋਈ ਸੀ, ਮੈਨੂੰ ਨਹੀਂ ਪਤਾ। ਜੇਕਰ ਕੋਈ ਮੈਨੂੰ ਸੂਚਿਤ ਕਰ ਸਕਦਾ ਹੈ ਤਾਂ ਮੈਂ ਆਪਣਾ ਪਦਮ ਸ਼੍ਰੀ ਵਾਪਸ ਕਰ ਦੇਵਾਂਗੀ ਅਤੇ ਮਾਫੀ ਵੀ ਮੰਗਾਂਗੀ। ਕਿਰਪਾ ਕਰਕੇ ਇਸ 'ਚ ਮੇਰੀ ਮਦਦ ਕਰੋ।"
ਕੰਗਨਾ ਰਣੌਤ ਨੇ ਬੁੱਧਵਾਰ ਸ਼ਾਮ ਨੂੰ ਇੱਕ ਨਿਊਜ਼ ਚੈਨਲ ਦੇ ਪ੍ਰੋਗਰਾਮ 'ਚ ਇਹ ਕਹਿ ਕੇ ਵਿਵਾਦਾਂ 'ਚ ਘਿਰੀ ਕੀ ਭਾਰਤ 1947 'ਚ ਆਜ਼ਾਦ ਨਹੀਂ ਹੋਇਆ ਸਗੋਂ ਸਾਨੂੰ ਅਜ਼ਾਦੀ 2014 'ਚ ਮਿਲੀ।" ਜਦੋਂ ਨਰਿੰਦਰ ਮੋਦੀ ਸਰਕਾਰ ਸੱਤਾ 'ਚ ਆਈ ਸੀ। ਅਦਾਕਾਰਾ ਨੇ ਇਹ ਵਿਵਾਦਪੂਰਨ ਟਿੱਪਣੀ ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਦੁਆਰਾ 'ਪਦਮ ਸ਼੍ਰੀ' ਨਾਲ ਸਨਮਾਨਿਤ ਕੀਤੇ ਜਾਣ ਤੋਂ ਦੋ ਦਿਨ ਬਾਅਦ ਕੀਤੀ, ਜਿਸ ਨਾਲ ਇਤਿਹਾਸਕਾਰਾਂ, ਸਿੱਖਿਆ ਸ਼ਾਸਤਰੀਆਂ, ਸਾਥੀ ਕਲਾਕਾਰਾਂ ਸਮੇਤ ਵੱਖ-ਵੱਖ ਸਿਆਸੀ ਪਾਰਟੀਆਂ ਨੇ ਨਾਰਾਜ਼ਗੀ ਪ੍ਰਗਟਾਈ ਅਤੇ ਕਈਆਂ ਨੇ ਕਿਹਾ ਕਿ ਉਹ ਸਨਮਾਨ ਦੀ ਹੱਕਦਾਰ ਹੈ।
ਆਪਣੀ 2019 ਦੀ ਫ਼ਿਲਮ "ਮਣੀਕਰਣਿਕਾ: ਦਿ ਕਵੀਨ ਆਫ ਝਾਂਸੀ" ਦਾ ਹਵਾਲਾ ਦਿੰਦੇ ਹੋਏ ਕੰਗਨਾ ਨੇ ਕਿਹਾ ਕਿ ਉਸ ਨੇ 1857 ਦੇ ਸੰਘਰਸ਼ 'ਤੇ ਵਿਆਪਕ ਖੋਜ ਕੀਤੀ ਹੈ। ਕੰਗਨਾ ਰਣੌਤ ਨੇ ਫ਼ਿਲਮ 'ਚ 'ਰਾਣੀ ਲਕਸ਼ਮੀਬਾਈ' ਦਾ ਕਿਰਦਾਰ ਨਿਭਾਇਆ ਸੀ। ਕੰਗਨਾ ਨੇ ਕਿਹਾ, ''ਰਾਸ਼ਟਰਵਾਦ ਦੇ ਨਾਲ-ਨਾਲ ਸੱਜੇ ਵਿੰਗ ਵੀ ਉਭਰਿਆ ਪਰ ਇਹ ਸਮੇਂ ਤੋਂ ਪਹਿਲਾਂ ਕਿਉਂ ਮਰ ਗਿਆ? ਅਤੇ ਗਾਂਧੀ ਨੇ ਭਗਤ ਸਿੰਘ ਨੂੰ ਕਿਉਂ ਮਰਨ ਦਿੱਤਾ? ਨੇਤਾ ਬੋਸ ਨੂੰ ਕਿਉਂ ਮਾਰਿਆ ਗਿਆ ਅਤੇ ਉਸ ਨੂੰ ਕਦੇ ਗਾਂਧੀ ਜੀ ਦਾ ਸਮਰਥਨ ਨਹੀਂ ਮਿਲਿਆ?
ਇੱਕ ਗੋਰੇ ਆਦਮੀ ਦੁਆਰਾ ਵੰਡਣ ਵਾਲੀ ਰੇਖਾ ਕਿਉਂ ਖਿੱਚੀ ਗਈ ਸੀ? ਭਾਰਤੀਆਂ ਨੇ ਆਜ਼ਾਦੀ ਦਾ ਜਸ਼ਨ ਮਨਾਉਣ ਦੀ ਬਜਾਏ ਇੱਕ-ਦੂਜੇ ਨੂੰ ਕਿਉਂ ਮਾਰਿਆ? ਕੁਝ ਜਵਾਬ ਜੋ ਮੈਂ ਭਾਲ ਰਹੀ ਹਾਂ ਕਿਰਪਾ ਕਰਕੇ ਇਹ ਜਵਾਬ ਲੱਭਣ 'ਚ ਮੇਰੀ ਮਦਦ ਕਰੋ। ਅੰਗਰੇਜ਼ਾਂ ਵੱਲੋਂ ਭਾਰਤ ਨੂੰ ਲੁੱਟਣ ਦਾ ਹਵਾਲਾ ਦਿੰਦੇ ਹੋਏ ਕੰਗਨਾ ਰਣੌਤ ਨੇ ਦਾਅਵਾ ਕੀਤਾ ਕਿ "ਆਈ. ਐੱਨ. ਏ. ਦੁਆਰਾ ਇੱਕ ਛੋਟੀ ਜਿਹੀ ਲੜਾਈ" ਵੀ ਸਾਨੂੰ ਆਜ਼ਾਦੀ ਦੇ ਸਕਦੀ ਸੀ ਅਤੇ ਬੋਸ ਪ੍ਰਧਾਨ ਮੰਤਰੀ ਹੋ ਸਕਦੇ ਸਨ। ਉਸ ਨੇ ਲਿਖਿਆ, "ਜਦੋਂ ਸੱਜੇ ਪੱਖੀ ਲੜਨ ਅਤੇ ਆਜ਼ਾਦੀ ਲੈਣ ਲਈ ਤਿਆਰ ਸਨ ਤਾਂ ਇਸ ਨੂੰ (ਆਜ਼ਾਦੀ) ਕਾਂਗਰਸ ਦੀ ਭੀਖ ਦੇ ਕਟੋਰੇ 'ਚ ਕਿਉਂ ਰੱਖਿਆ ਗਿਆ, ਕੋਈ ਮੇਰੀ ਇਹ ਸਮਝਣ 'ਚ ਮਦਦ ਕਰ ਸਕਦਾ ਹੈ।''
ਰਣੌਤ ਨੇ ਕਿਹਾ ਕਿ ਜੇਕਰ ਕੋਈ ਸਵਾਲਾਂ ਦੇ ਜਵਾਬ ਲੱਭਣ ਅਤੇ ਇਹ ਸਾਬਤ ਕਰਨ 'ਚ ਉਸ ਦੀ ਮਦਦ ਕਰ ਸਕਦਾ ਹੈ ਕਿ ਉਸ ਨੇ ਸ਼ਹੀਦਾਂ ਅਤੇ ਸੁਤੰਤਰਤਾ ਸੈਨਾਨੀਆਂ ਦਾ ਅਪਮਾਨ ਕੀਤਾ ਹੈ ਤਾਂ ਉਹ 'ਪਦਮ ਸ਼੍ਰੀ' ਵਾਪਸ ਕਰ ਦੇਵੇਗੀ। ਅਦਾਕਾਰਾ ਨੇ ਆਪਣੇ ਬਿਆਨ ਦੇ ਉਸ ਹਿੱਸੇ ਨੂੰ ਵੀ ਸਪੱਸ਼ਟ ਕੀਤਾ ਜਿੱਥੇ ਉਸ ਨੇ ਕਿਹਾ ਕਿ ਦੇਸ਼ ਨੂੰ "2014 'ਚ ਆਜ਼ਾਦੀ" ਮਿਲੀ। ਉਸ ਨੇ ਕਿਹਾ, "ਜਿੱਥੋਂ ਤੱਕ 2014 ਦੀ ਆਜ਼ਾਦੀ ਦਾ ਸਵਾਲ ਹੈ, ਮੈਂ ਵਿਸ਼ੇਸ਼ ਤੌਰ 'ਤੇ ਕਿਹਾ ਸੀ ਕਿ ਸਾਡੇ ਕੋਲ ਭੌਤਿਕ ਆਜ਼ਾਦੀ ਹੋ ਸਕਦੀ ਹੈ ਪਰ ਭਾਰਤ ਦੀ ਚੇਤਨਾ ਅਤੇ ਜ਼ਮੀਰ 2014 'ਚ ਆਜ਼ਾਦ ਹੋ ਗਿਆ ਹੈ। ਇੱਕ ਮਰੀ ਹੋਈ ਸਭਿਅਤਾ ਜ਼ਿੰਦਾ ਹੋ ਗਈ ਅਤੇ ਆਪਣੇ ਖੰਭਾਂ ਨੂੰ ਫੜ੍ਹਿਆ ਅਤੇ ਹੁਣ ਉੱਚੀ ਉਡਾਣ ਭਰ ਰਹੀ ਹੈ।"
ਕੀ ਕਾਂਗਰਸ ’ਚ ਸ਼ਾਮਲ ਹੋਣਗੇ ਸੋਨੂੰ ਸੂਦ? ਨਵਜੋਤ ਸਿੱਧੂ ਨਾਲ ਮੋਗਾ ’ਚ ਕਰ ਸਕਦੇ ਨੇ ਮੁਲਾਕਾਤ
NEXT STORY 
