ਇੰਟਰਨੈਸ਼ਨਲ ਡੈਸਕ : ਆਸਟ੍ਰੇਲੀਆ ਦੇ ਸਮੁੰਦਰੀ ਤੱਟਾਂ 'ਤੇ ਇਸ ਸਮੇਂ ਦਹਿਸ਼ਤ ਦਾ ਮਾਹੌਲ ਹੈ ਕਿਉਂਕਿ ਪਿਛਲੇ ਸਿਰਫ ਤਿੰਨ ਦਿਨਾਂ ਵਿੱਚ ਸ਼ਾਰਕਾਂ ਨੇ ਇਨਸਾਨਾਂ 'ਤੇ ਚਾਰ ਵਾਰ ਹਮਲਾ ਕੀਤਾ ਹੈ। ਇਨ੍ਹਾਂ ਘਟਨਾਵਾਂ ਦੇ ਮੱਦੇਨਜ਼ਰ ਪ੍ਰਸ਼ਾਸਨ ਨੇ ਨਿਊ ਸਾਊਥ ਵੇਲਜ਼ (NSW) ਦੇ ਉੱਤਰੀ ਤੱਟ ਅਤੇ ਉੱਤਰੀ ਸਿਡਨੀ ਦੇ ਕਈ ਪ੍ਰਮੁੱਖ ਸਮੁੰਦਰੀ ਕੰਢਿਆਂ ਨੂੰ ਅਗਲੇ 48 ਘੰਟਿਆਂ ਲਈ ਬੰਦ ਕਰ ਦਿੱਤਾ ਹੈ।
ਲਗਾਤਾਰ ਹੋ ਰਹੇ ਹਮਲੇ
ਤਾਜ਼ਾ ਘਟਨਾ ਮੰਗਲਵਾਰ ਸਵੇਰੇ ਪੁਆਇੰਟ ਪਲੋਮਰ ਵਿਖੇ ਵਾਪਰੀ, ਜਿੱਥੇ ਇੱਕ 39 ਸਾਲਾ ਸਰਫਰ 'ਤੇ ਸ਼ਾਰਕ ਨੇ ਹਮਲਾ ਕਰ ਦਿੱਤਾ। ਖੁਸ਼ਕਿਸਮਤੀ ਨਾਲ ਸਰਫਿੰਗ ਬੋਰਡ ਨੇ ਹਮਲੇ ਦਾ ਜ਼ਿਆਦਾਤਰ ਅਸਰ ਝੱਲ ਲਿਆ, ਜਿਸ ਕਾਰਨ ਸਰਫਰ ਦੀ ਜਾਨ ਬਚ ਗਈ, ਹਾਲਾਂਕਿ ਉਸ ਨੂੰ ਹਸਪਤਾਲ ਭਰਤੀ ਕਰਵਾਇਆ ਗਿਆ ਹੈ।
ਇਸ ਤੋਂ ਪਹਿਲਾਂ ਵਾਪਰੀਆਂ ਹੋਰ ਦਰਦਨਾਕ ਘਟਨਾਵਾਂ ਵਿੱਚ:
• ਐਤਵਾਰ: ਸਿਡਨੀ ਹਾਰਬਰ ਦੇ ਜੰਪ ਰਾਕ ਵਿਖੇ 12 ਸਾਲਾ ਲੜਕੇ 'ਤੇ ਹਮਲਾ ਹੋਇਆ, ਜਿਸ ਵਿੱਚ ਉਸ ਨੇ ਆਪਣੇ ਦੋਵੇਂ ਪੈਰ ਗੁਆ ਦਿੱਤੇ ਹਨ।
• ਸੋਮਵਾਰ: ਦੁਪਹਿਰ ਵੇਲੇ ਇੱਕ 11 ਸਾਲਾ ਲੜਕੇ ਦੇ ਸਰਫਬੋਰਡ ਨੂੰ ਸ਼ਾਰਕ ਨੇ ਕੱਟ ਲਿਆ, ਪਰ ਲੜਕਾ ਵਾਲ-ਵਾਲ ਬਚ ਗਿਆ। ਉਸੇ ਸ਼ਾਮ ਇਕ 20 ਸਾਲਾ ਨੌਜਵਾਨ ਦੇ ਪੈਰ 'ਤੇ ਸ਼ਾਰਕ ਨੇ ਕੱਟ ਲਿਆ, ਜਿਸ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ।
ਖਤਰੇ ਦਾ ਕਾਰਨ
ਗੰਦਾ ਪਾਣੀ ਤੇ ਬੁੱਲ ਸ਼ਾਰਕ ਅਧਿਕਾਰੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਹਾਲੀਆ ਬਾਰਿਸ਼ ਕਾਰਨ ਸਮੁੰਦਰ ਦਾ ਪਾਣੀ ਗੰਦਾ ਹੋ ਗਿਆ ਹੈ, ਜੋ ਬੁੱਲ ਸ਼ਾਰਕ (Bull Shark) ਦੀਆਂ ਗਤੀਵਿਧੀਆਂ ਲਈ ਬਹੁਤ ਅਨੁਕੂਲ ਹੁੰਦਾ ਹੈ। ਸਰਫ ਲਾਈਫ ਸੇਵਿੰਗ NSW ਦੇ ਮੁੱਖ ਕਾਰਜਕਾਰੀ ਸਟੀਵ ਪੀਅਰਸ ਨੇ ਲੋਕਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਇਸ ਸਮੇਂ ਸਮੁੰਦਰ ਵਿੱਚ ਜਾਣ ਦੀ ਬਜਾਏ ਸਥਾਨਕ ਸਵੀਮਿੰਗ ਪੂਲਾਂ ਦੀ ਵਰਤੋਂ ਕਰਨ ਕਿਉਂਕਿ ਸਮੁੰਦਰੀ ਕੰਢੇ ਅਸੁਰੱਖਿਅਤ ਹਨ।
ਸੁਰੱਖਿਆ ਦੇ ਇੰਤਜ਼ਾਮ
ਸਿਡਨੀ ਤੱਟ 'ਤੇ ਇਲੈਕਟ੍ਰਾਨਿਕ ਡਰੱਮਲਾਈਨਾਂ ਲਗਾਈਆਂ ਗਈਆਂ ਹਨ, ਜੋ ਵੱਡੀਆਂ ਸ਼ਾਰਕਾਂ ਦੇ ਚਾਰੇ ਵੱਲ ਆਉਣ 'ਤੇ ਅਧਿਕਾਰੀਆਂ ਨੂੰ ਤੁਰੰਤ ਸੁਚੇਤ ਕਰਦੀਆਂ ਹਨ। ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਸਤੰਬਰ ਵਿੱਚ ਵੀ ਇੱਕ 57 ਸਾਲਾ ਸਰਫਰ ਅਤੇ ਨਵੰਬਰ ਵਿੱਚ ਇੱਕ 25 ਸਾਲਾ ਸਵਿਸ ਸੈਲਾਨੀ ਦੀ ਸ਼ਾਰਕ ਦੇ ਹਮਲੇ ਵਿੱਚ ਮੌਤ ਹੋ ਗਈ ਸੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਸਪੇਨ ਰੇਲ ਹਾਦਸੇ 'ਚ ਮਰਨ ਵਾਲਿਆਂ ਦੀ ਗਿਣਤੀ ਹੋਈ 41
NEXT STORY 
