ਕੁਈਨਜ਼ਲੈਂਡ— ਆਸਟ੍ਰੇਲੀਆ ਦੇ ਦੋ ਸੂਬਿਆਂ ਨਿਊ ਸਾਊਥ ਵੇਲਜ਼ ਅਤੇ ਕੁਈਨਜ਼ਲੈਂਡ 'ਚ ਬਹੁਤ ਸਾਰੀਆਂ ਝਾੜੀਆਂ 'ਚ ਅੱਗ ਲੱਗੀ ਹੋਈ ਹੈ। ਕੁਈਨਜ਼ਲੈਂਡ 'ਚ ਲਗਭਗ 18 ਪਰਿਵਾਰ ਬੇਘਰ ਹੋ ਗਏ ਹਨ। 90 ਕਿਲੋ ਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਹਵਾਵਾਂ ਚੱਲਣ ਕਾਰਨ ਅੱਗ ਫੈਲ ਰਹੀ ਹੈ। ਅੱਗ ਕਾਰਨ ਸਰਾਬਾਹ ਇਲਾਕੇ 'ਚ 10 ਘਰ ਬਰਬਾਦ ਹੋ ਗਏ ਅਤੇ ਸਟੈਨਥੋਰਪ 'ਚ 7 ਘਰ ਸੜ ਗਏ ਜਦਕਿ ਕਈ ਘਰਾਂ ਨੂੰ ਸੁਰੱਖਿਆ ਕਾਰਨਾਂ ਕਰਕੇ ਖਾਲੀ ਕਰਵਾਇਆ ਗਿਆ। ਇਸ ਕਾਰਨ ਨੇੜਲੇ ਇਲਾਕਿਆਂ 'ਚ ਧੂੰਆਂ ਭਰਿਆ ਹੋਇਆ ਹੈ ਤੇ ਲੋਕਾਂ ਸਾਹ ਲੈਣ 'ਚ ਵੀ ਪ੍ਰੇਸ਼ਾਨੀ ਹੋ ਰਹੀ ਹੈ। ਫਾਇਰ ਫਾਈਟਰਜ਼ ਅੱਗ 'ਤੇ ਕਾਬੂ ਪਾਉਣ ਦੀਆਂ ਕੋਸ਼ਿਸ਼ਾਂ 'ਚ ਲੱਗੇ ਹੋਏ ਹਨ ਪਰ ਖੁਸ਼ਕ ਹਵਾਵਾਂ ਕਾਰਨ ਅੱਗ 'ਤੇ ਕਾਬੂ ਪਾਉਣਾ ਮੁਸ਼ਕਲ ਹੋ ਗਿਆ ਹੈ।
ਲਗਭਗ 50 ਘਰ ਤੇ ਹੋਰ ਇਮਾਰਤਾਂ ਅੱਗ ਦੀ ਲਪੇਟ 'ਚ ਆ ਚੁੱਕੀਆਂ ਹਨ। ਅਜੇ ਗਰਮੀਆਂ ਆਉਣ 'ਚ 3 ਮਹੀਨਿਆਂ ਦਾ ਸਮਾਂ ਪਿਆ ਹੈ ਪਰ ਇਸ ਤੋਂ ਪਹਿਲਾਂ ਹੀ ਥਾਂ-ਥਾਂ 'ਤੇ ਝਾੜੀਆਂ ਨੂੰ ਅੱਗ ਲੱਗਣ ਦੀਆਂ ਖਬਰਾਂ ਮਿਲ ਰਹੀਆਂ ਹਨ ਜੋ ਇਸ ਖਤਰੇ ਦੀ ਘੰਟੀ ਹਨ ਕਿ ਅਗਲਾ ਸਮਾਂ ਹੋਰ ਵੀ ਮੁਸ਼ਕਲਾਂ ਵਾਲਾ ਹੋ ਸਕਦਾ ਹੈ। ਕੁਈਨਜ਼ਲੈਂਡ 'ਚ ਕਈ ਹੋਰ ਝਾੜੀਆਂ 'ਚ ਅੱਗ ਲੱਗਣ ਦੀ ਖਬਰ ਮਿਲੀ ਹੈ ਅਤੇ ਹੋ ਸਕਦਾ ਹੈ ਕਿ ਮੰਗਲਵਾਰ ਨੂੰ ਹਾਲਤ ਇਸ ਤੋਂ ਵਧੇਰੇ ਖਰਾਬ ਹੋਣ। ਕੁਈਨਜ਼ਲੈਂਡ ਦੀ ਪ੍ਰੀਮੀਅਰ ਜੈਕੀ ਚਰਾਡ ਨੇ ਦੱਸਿਆ ਕਿ ਰਿਹਾਇਸ਼ੀ ਇਮਾਰਤਾਂ ਨੂੰ ਮਿਲਾ ਕੇ ਕੁੱਲ 47 ਇਮਾਰਤਾਂ ਅੱਗ 'ਚ ਬਰਬਾਦ ਹੋ ਗਈਆਂ ਹਨ।
ਨਿਊ ਸਾਊਥ ਵੇਲਜ਼ ਦੇ ਆਰਮੀਡੇਲ 'ਚ 60,000 ਹੈਕਟੇਅਰ ਅਤੇ ਡਰੇਕ 'ਚ 30,000 ਹੈਕਟੇਅਰ ਤੋਂ ਵਧੇਰੇ ਜ਼ਮੀਨ ਅੱਗ 'ਚ ਝੁਲਸ ਚੁੱਕੀ ਹੈ। ਆਸਟ੍ਰੇਲੀਆ 'ਚ ਆਮ ਤੌਰ 'ਤੇ ਦਸੰਬਰ ਤੋਂ ਮਾਰਚ ਮਹੀਨਿਆਂ ਵਿਚਕਾਰ ਝਾੜੀਆਂ 'ਚ ਅੱਗ ਲੱਗਦੀ ਹੈ ਕਿਉਂਕਿ ਉਸ ਸਮੇਂ ਉੱਥੇ ਗਰਮੀਆਂ ਦਾ ਮੌਸਮ ਹੁੰਦਾ ਹੈ ਪਰ ਸਤੰਬਰ 'ਚ ਅੱਗ ਲੱਗਣਾ ਚਿੰਤਾ ਦੀ ਗੱਲ ਹੈ। ਜ਼ਿਕਰਯੋਗ ਹੈ ਕਿ ਫਰਵਰੀ 2009 'ਚ ਵਿਕਟੋਰੀਆ ਸੂਬੇ ਦੀਆਂ ਝਾੜੀਆਂ 'ਚ ਲੱਗੀ ਅੱਗ ਕਾਰਨ 173 ਲੋਕਾਂ ਦੀ ਮੌਤ ਹੋ ਗਈ ਸੀ ਤੇ ਹੋਰ 414 ਜ਼ਖਮੀ ਹੋ ਗਏ ਸਨ।
ਜਰਮਨੀ ਦੇ ਪਿੰਡ 'ਚ ਧਮਾਕਾ, 14 ਲੋਕ ਜ਼ਖਮੀ
NEXT STORY 
