ਚੋਂਗਕਿੰਗ : ਚੀਨ ਨੇ ਹਾਲ ਹੀ 'ਚ ਦੁਨੀਆ ਦਾ ਸਭ ਤੋਂ ਵੱਡਾ ਰੇਲਵੇ ਸਟੇਸ਼ਨ, ਚੋਂਗਕਿੰਗ ਈਸਟ ਬਣਾ ਕੇ ਇੰਜੀਨੀਅਰਿੰਗ ਦੀ ਦੁਨੀਆ 'ਚ ਇੱਕ ਹੋਰ ਵੱਡਾ ਕਾਰਨਾਮਾ ਕੀਤਾ ਹੈ। ਇਹ ਸਟੇਸ਼ਨ ਆਕਾਰ ਵਿੱਚ 170 ਫੁੱਟਬਾਲ ਮੈਦਾਨਾਂ ਦੇ ਬਰਾਬਰ ਫੈਲਿਆ ਹੋਇਆ ਹੈ ਅਤੇ 1.22 ਮਿਲੀਅਨ ਵਰਗ ਮੀਟਰ 'ਚ ਵਿਕਸਤ ਕੀਤਾ ਗਿਆ ਹੈ। ਇਸ ਦੀ ਵਿਸ਼ਾਲਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਇਹ ਨਿਊਯਾਰਕ ਦੇ ਗ੍ਰੈਂਡ ਸੈਂਟਰਲ ਟਰਮੀਨਲ ਤੋਂ ਪੰਜ ਗੁਣਾ ਵੱਡਾ ਹੈ।
ਇਸ ਸਟੇਸ਼ਨ ਦਾ ਨਿਰਮਾਣ 2022 'ਚ ਸ਼ੁਰੂ ਹੋਇਆ ਤੇ 2025 ਤੱਕ ਪੂਰਾ ਹੋਇਆ, ਜਿਸ 'ਤੇ ਲਗਭਗ 65,000 ਕਰੋੜ ਰੁਪਏ ਖਰਚ ਕੀਤੇ ਗਏ। ਇਹ ਸਟੇਸ਼ਨ ਸਿਰਫ਼ ਵਿਸ਼ਾਲਤਾ ਦਾ ਪ੍ਰਤੀਕ ਨਹੀਂ ਹੈ, ਬਲਕਿ ਆਧੁਨਿਕ ਡਿਜ਼ਾਈਨ, ਹਾਈ-ਟੈਕ ਸੁਵਿਧਾਵਾਂ ਅਤੇ ਯਾਤਰੀਆਂ ਲਈ ਆਰਾਮਦਾਇਕ ਯਾਤਰਾ ਦਾ ਇੱਕ ਬੇਜੋੜ ਮਿਸ਼ਰਣ ਪੇਸ਼ ਕਰਦਾ ਹੈ।
ਏਅਰਪੋਰਟ ਵਰਗੀਆਂ ਆਧੁਨਿਕ ਸੁਵਿਧਾਵਾਂ
ਚੋਂਗਕਿੰਗ ਈਸਟ ਰੇਲਵੇ ਸਟੇਸ਼ਨ ਯਾਤਰੀਆਂ ਨੂੰ ਹਵਾਈ ਅੱਡੇ (Airport) ਵਰਗੀਆਂ ਸੁਵਿਧਾਵਾਂ ਪ੍ਰਦਾਨ ਕਰਦਾ ਹੈ। ਇੱਥੇ ਡਿਜੀਟਲ ਸੂਚਨਾ ਬੋਰਡ, ਮਲਟੀ-ਲੈਂਗਵੇਜ ਹੈਲਪ ਸਿਸਟਮ ਅਤੇ ਹਾਈ-ਸਪੀਡ Wi-Fi ਵਰਗੀਆਂ ਆਧੁਨਿਕ ਤਕਨੀਕਾਂ ਉਪਲਬਧ ਹਨ। ਯਾਤਰੀਆਂ ਦੀ ਸਹੂਲਤ ਲਈ ਲੋੜੀਂਦੀਆਂ ਸੀਟਾਂ, ਮੋਬਾਈਲ ਚਾਰਜਿੰਗ ਸਟੇਸ਼ਨ, ਸੁਰੱਖਿਅਤ ਲਾਕਰ ਤੇ ਵ੍ਹੀਲਚੇਅਰ ਐਕਸੈਸਿਬਿਲਟੀ ਦੀ ਵਿਵਸਥਾ ਹੈ। ਇਸ ਤੋਂ ਇਲਾਵਾ, ਇੱਥੇ ਮੈਕਡੋਨਾਲਡਜ਼ ਅਤੇ KFC ਵਰਗੀਆਂ ਅੰਤਰਰਾਸ਼ਟਰੀ ਫੂਡ ਚੇਨਾਂ ਦੇ ਨਾਲ-ਨਾਲ ਸਥਾਨਕ ਚੋਂਗਕਿੰਗ ਪਕਵਾਨ ਵੀ ਉਪਲਬਧ ਹਨ। ਸੁਰੱਖਿਆ ਦੇ ਲਿਹਾਜ਼ ਨਾਲ, ਆਨ-ਗਰਾਊਂਡ ਸੁਰੱਖਿਆ ਅਤੇ ਬਾਇਓਮੀਟ੍ਰਿਕ ਸਕੈਨਿੰਗ ਦੀ ਵੀ ਵਿਵਸਥਾ ਕੀਤੀ ਗਈ ਹੈ।
ਤਕਨੀਕ ਤੇ ਆਰਕੀਟੈਕਚਰ ਦਾ ਅਨੋਖਾ ਮੇਲ
ਇਸ ਸਟੇਸ਼ਨ ਦੀ ਆਰਕੀਟੈਕਚਰ ਵਿੱਚ ਸਥਾਨਕ ਸੱਭਿਆਚਾਰ ਦੀ ਝਲਕ ਦੇਖਣ ਨੂੰ ਮਿਲਦੀ ਹੈ, ਜਿਵੇਂ ਕਿ ਹੁਆਂਗ ਜੁਏ-ਇੰਸਪਾਇਰਡ ਪਿਲਰ ਅਤੇ ਕੈਮੇਲੀਆ-ਸਟਾਈਲ ਏਅਰ ਕੰਡੀਸ਼ਨਿੰਗ ਯੂਨਿਟਸ। ਛੱਤ 'ਚ ਲੱਗੇ ਗਲਾਸ ਪੈਨਲ ਦਿਨ ਭਰ ਕੁਦਰਤੀ ਰੌਸ਼ਨੀ ਪ੍ਰਦਾਨ ਕਰਦੇ ਹਨ। ਇਹ ਕੰਪਲੈਕਸ ਤਿੰਨ ਪੱਧਰਾਂ 'ਚ ਫੈਲਿਆ ਹੋਇਆ ਹੈ, ਜਿਸ ਵਿੱਚ 15 ਪਲੇਟਫਾਰਮ ਅਤੇ 29 ਰੇਲਵੇ ਟਰੈਕ ਹਨ, ਜੋ ਭੀੜ ਵਾਲੇ ਸਮੇਂ 'ਚ ਵੀ ਆਵਾਜਾਈ ਨੂੰ ਸੁਚਾਰੂ ਰੱਖਦੇ ਹਨ। ਰੋਜ਼ਾਨਾ ਲਗਭਗ 3,84,000 ਯਾਤਰੀ ਇਸ ਸਟੇਸ਼ਨ ਤੋਂ ਗੁਜ਼ਰਦੇ ਹਨ।
ਹਾਈ-ਸਪੀਡ ਕੁਨੈਕਟੀਵਿਟੀ
ਚੋਂਗਕਿੰਗ ਈਸਟ ਸਟੇਸ਼ਨ 7 ਵੱਡੀਆਂ ਹਾਈ-ਸਪੀਡ ਲਾਈਨਾਂ ਨਾਲ ਜੁੜਿਆ ਹੋਇਆ ਹੈ, ਜਿਸ ਨਾਲ ਯਾਤਰਾ ਦਾ ਸਮਾਂ ਬਹੁਤ ਘੱਟ ਹੋ ਗਿਆ ਹੈ। ਫੁਕਸਿੰਗ ਬੁਲੇਟ ਟਰੇਨਾਂ ਵਿੱਚ ਯਾਤਰੀ 350 km/h ਦੀ ਰਫ਼ਤਾਰ ਨਾਲ ਸਫ਼ਰ ਕਰ ਸਕਦੇ ਹਨ। ਇਸ ਦੀ ਇੱਕ ਉਦਾਹਰਨ ਨਵੀਂ ਚੋਂਗਕਿੰਗ-ਝਾਂਗਜਿਆਜੀ ਲਾਈਨ ਹੈ, ਜਿਸ ਨੇ ਯਾਤਰਾ ਦਾ ਸਮਾਂ ਲਗਭਗ 2.5 ਘੰਟੇ ਘਟਾ ਦਿੱਤਾ ਹੈ। ਮੈਟਰੋ ਨਾਲ ਜੁੜੇ ਹੋਣ ਕਾਰਨ ਲੋਕਲ ਯਾਤਰਾ ਵੀ ਆਸਾਨ ਤੇ ਤੇਜ਼ ਹੋ ਗਈ ਹੈ। ਚੋਂਗਕਿੰਗ ਈਸਟ ਰੇਲਵੇ ਸਟੇਸ਼ਨ ਸਿਰਫ਼ ਇੱਕ ਆਵਾਜਾਈ ਕੇਂਦਰ ਨਹੀਂ, ਬਲਕਿ ਚੀਨ ਦੀ ਇੰਜੀਨੀਅਰਿੰਗ ਤਾਕਤ ਅਤੇ ਆਧੁਨਿਕਤਾ ਦਾ ਇੱਕ ਅਨੋਖਾ ਪ੍ਰਮਾਣ ਹੈ।
'ਅਗਲੀ ਵਾਰੀ ਸਾਡੀ ਹੋਵੇਗੀ...', ਰੂਸ ਨਾਲ ਵਿਵਾਦ ਮਗਰੋਂ NATO ਮੁਖੀ ਨੇ ਦਿੱਤੀ ਜੰਗ ਦੀ ਚਿਤਾਵਨੀ
NEXT STORY 
