ਇੰਟਰਨੈਸ਼ਨਲ ਡੈਸਕ - ਈਰਾਨ ਅਤੇ ਅਮਰੀਕਾ ਇਜ਼ਰਾਈਲ ਵਿਚਾਲੇ ਚੱਲ ਰਹੀ ਜੰਗ ਨੇ ਭਾਵੇਂ ਦੁਨੀਆ ਭਰ ਦੀ ਆਰਥਿਕਤਾ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ, ਪਰ ਇਸ ਸਥਿਤੀ 'ਚ ਰੂਸ ਦੀਆਂ ਪੰਜੇ ਉਂਗਲਾਂ ਘਿਓ 'ਚ ਹਨ। ਕੱਚੇ ਤੇਲ ਦੀਆਂ ਕੀਮਤਾਂ 'ਚ ਆਏ ਭਾਰੀ ਉਛਾਲ ਕਾਰਨ ਰੂਸ ਹੁਣ ਤੇਲ ਵੇਚ ਕੇ ਰੋਜ਼ਾਨਾ 150 ਮਿਲੀਅਨ ਡਾਲਰ ਦੀ ਵਾਧੂ ਕਮਾਈ ਕਰ ਰਿਹਾ ਹੈ।
ਤੇਲ ਦੀਆਂ ਕੀਮਤਾਂ 200 ਡਾਲਰ ਤੱਕ ਜਾਣ ਦਾ ਖਦਸ਼ਾ
ਸੂਤਰਾਂ ਅਨੁਸਾਰ, ਈਰਾਨ ਜੰਗ ਕਾਰਨ ਕੱਚੇ ਤੇਲ ਦੀ ਸਪਲਾਈ 'ਚ ਵਿਘਨ ਪਿਆ ਹੈ, ਜਿਸ ਕਾਰਨ ਕੀਮਤਾਂ 120 ਡਾਲਰ ਦੇ ਕਰੀਬ ਪਹੁੰਚ ਗਈਆਂ ਸਨ ਅਤੇ ਹਾਲੇ ਵੀ 100 ਡਾਲਰ ਪ੍ਰਤੀ ਬੈਰਲ ਤੋਂ ਪਾਰ ਬਣੀਆਂ ਹੋਈਆਂ ਹਨ। ਈਰਾਨ ਨੇ ਧਮਕੀ ਦਿੱਤੀ ਹੈ ਕਿ ਜੇਕਰ ਤਣਾਅ ਜਾਰੀ ਰਿਹਾ ਤਾਂ ਤੇਲ ਦੀਆਂ ਕੀਮਤਾਂ 200 ਡਾਲਰ ਪ੍ਰਤੀ ਬੈਰਲ ਤੱਕ ਜਾ ਸਕਦੀਆਂ ਹਨ। ਜ਼ਿਕਰਯੋਗ ਹੈ ਕਿ ਦੁਨੀਆ ਦਾ 20 ਫੀਸਦੀ ਤੇਲ ਹੋਰਮੁਜ਼ ਦੀ ਖਾੜੀ ਰਾਹੀਂ ਗੁਜ਼ਰਦਾ ਹੈ, ਜੋ ਜੰਗ ਕਾਰਨ ਇਸ ਵੇਲੇ ਬੰਦ ਹੈ।
ਡਿਸਕਾਊਂਟ ਖਤਮ, ਹੁਣ 'ਪ੍ਰੀਮੀਅਮ' 'ਤੇ ਵਿਕ ਰਿਹਾ ਰੂਸੀ ਤੇਲ
ਈਰਾਨ ਜੰਗ ਤੋਂ ਪਹਿਲਾਂ ਰੂਸੀ ਤੇਲ ਡਿਸਕਾਊਂਟ 'ਤੇ ਮਿਲ ਰਿਹਾ ਸੀ, ਪਰ ਹੁਣ ਮੰਗ ਵਧਣ ਕਾਰਨ ਰੂਸ ਆਪਣਾ ਤੇਲ ਬ੍ਰੈਂਟ ਕਰੂਡ ਦੇ ਮੁਕਾਬਲੇ 5 ਡਾਲਰ ਪ੍ਰਤੀ ਬੈਰਲ ਦੇ ਪ੍ਰੀਮੀਅਮ 'ਤੇ ਵੇਚ ਰਿਹਾ ਹੈ,। ਫਰਵਰੀ 'ਚ ਰੂਸ ਰੋਜ਼ਾਨਾ 3.18 ਮਿਲੀਅਨ ਬੈਰਲ ਤੇਲ ਭੇਜ ਰਿਹਾ ਸੀ, ਜੋ ਮਾਰਚ 'ਚ ਵਧ ਕੇ 4.56 ਮਿਲੀਅਨ ਬੈਰਲ ਹੋ ਗਿਆ ਹੈ। ਰੂਸ ਦੀ ਤੇਲ ਅਤੇ ਗੈਸ ਤੋਂ ਵਾਧੂ ਕਮਾਈ ਇਸ ਮਹੀਨੇ ਦੇ ਅੰਤ ਤੱਕ 4 ਅਰਬ ਡਾਲਰ ਅਤੇ ਕੁੱਲ ਮਿਲਾ ਕੇ 10 ਅਰਬ ਡਾਲਰ ਤੱਕ ਪਹੁੰਚਣ ਦੀ ਉਮੀਦ ਹੈ, ਜਿਸ ਦੀ ਵਰਤੋਂ ਉਹ ਯੂਕਰੇਨ ਜੰਗ ਲਈ ਕਰ ਸਕਦਾ ਹੈ।
ਭਾਰਤ ਲਈ ਅਮਰੀਕਾ ਵੱਲੋਂ ਰਾਹਤ
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਭਾਰਤ ਸਮੇਤ ਕਈ ਦੇਸ਼ਾਂ ਨੂੰ ਰੂਸੀ ਤੇਲ ਖਰੀਦਣ ਲਈ 30 ਦਿਨਾਂ ਦੀ ਛੋਟ ਦਿੱਤੀ ਹੈ। ਇਸ ਛੋਟ ਤੋਂ ਬਾਅਦ ਭਾਰਤੀ ਕੰਪਨੀਆਂ ਨੇ 30 ਮਿਲੀਅਨ ਬੈਰਲ ਤੋਂ ਵੱਧ ਰੂਸੀ ਤੇਲ ਖਰੀਦਿਆ ਹੈ। ਹਾਲਾਂਕਿ ਰੂਸ ਭਾਰਤ ਕੋਲੋਂ ਹਰ ਬੈਰਲ 'ਤੇ 8 ਡਾਲਰ ਤੱਕ ਦਾ ਪ੍ਰੀਮੀਅਮ ਵਸੂਲ ਰਿਹਾ ਹੈ, ਫਿਰ ਵੀ ਰੂਸ ਭਾਰਤ ਦਾ ਸਭ ਤੋਂ ਵੱਡਾ ਤੇਲ ਸਪਲਾਇਰ ਬਣਿਆ ਹੋਇਆ ਹੈ।
ਆਉਣ ਵਾਲੇ ਸਮੇਂ 'ਚ ਹੋਰ ਵਧ ਸਕਦੀਆਂ ਹਨ ਕੀਮਤਾਂ
ਸ਼ੁੱਕਰਵਾਰ ਨੂੰ ਬ੍ਰੈਂਟ ਕਰੂਡ 103.1 ਡਾਲਰ ਪ੍ਰਤੀ ਬੈਰਲ 'ਤੇ ਬੰਦ ਹੋਇਆ। ਅਮਰੀਕਾ ਵੱਲੋਂ ਈਰਾਨ ਦੇ ਤੇਲ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਉਣ ਦੀਆਂ ਧਮਕੀਆਂ ਕਾਰਨ ਆਉਣ ਵਾਲੇ ਦਿਨਾਂ 'ਚ ਤੇਲ ਹੋਰ ਮਹਿੰਗਾ ਹੋਣ ਦੀ ਸੰਭਾਵਨਾ ਹੈ, ਜਿਸ ਨਾਲ ਆਮ ਜਨਤਾ ਦੀਆਂ ਮੁਸ਼ਕਲਾਂ ਵਧ ਸਕਦੀਆਂ ਹਨ।
ਅਮਰੀਕਾ 'ਚ 10 ਭਾਰਤੀ ਗ੍ਰਿਫ਼ਤਾਰ ਤੇ 1 ਡਿਪੋਰਟ ! ਕਾਰਾ ਜਾਣ ਤੁਸੀਂ ਵੀ ਰਹਿ ਜਾਓਗੇ ਦੰਗ
NEXT STORY 
