ਵੈੱਬ ਡੈਸਕ : ਵੈਸਟਰਨ ਆਸਟ੍ਰੇਲੀਆ 'ਚ ਇੱਕ ਜੰਗਲੀ ਸਮੁੰਦਰੀ ਪੰਛੀ ਵਿਚ ਉੱਚ ਪੱਧਰੀ ਘਾਤਕ ਬਰਡ ਫਲੂ (H5N1) ਦੇ ਪਾਏ ਜਾਣ ਤੋਂ ਬਾਅਦ ਨਿਊਜ਼ੀਲੈਂਡ ਕਿਸੇ ਵੀ ਸੰਭਾਵੀ ਖਤਰੇ ਲਈ ਪੂਰੀ ਤਰ੍ਹਾਂ ਤਿਆਰ ਹੋ ਗਿਆ ਹੈ। ਬਾਇਓਸਕਿਉਰਿਟੀ ਅਤੇ ਫੂਡ ਸੇਫਟੀ ਮੰਤਰੀ ਐਂਡਰਿਊ ਹੌਗਾਰਡ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਕਈ ਸਰਕਾਰੀ ਵਿਭਾਗਾਂ ਨੇ ਨਿਗਰਾਨੀ ਅਤੇ ਤਿਆਰੀ ਦੇ ਯਤਨ ਤੇਜ਼ ਕਰ ਦਿੱਤੇ ਹਨ। ਉਨ੍ਹਾਂ ਅਨੁਸਾਰ, ਨਿਊਜ਼ੀਲੈਂਡ ਦੀ ਭੂਗੋਲਿਕ ਦੂਰੀ ਨੇ ਹੁਣ ਤੱਕ ਇਸ ਦੀ ਰੱਖਿਆ ਕੀਤੀ ਹੈ ਅਤੇ ਤਿਆਰੀ ਕਰਨ ਲਈ ਲੋੜੀਂਦਾ ਸਮਾਂ ਦਿੱਤਾ ਹੈ।
ਆਸਟ੍ਰੇਲੀਆ ਨੇ ਇੱਕ ਪ੍ਰਵਾਸੀ ਸਮੁੰਦਰੀ ਪੰਛੀ ਵਿਚ H5N1 2.3.4.4b ਬਰਡ ਫਲੂ ਸਟ੍ਰੇਨ ਦੀ ਪੁਸ਼ਟੀ ਕੀਤੀ ਹੈ ਤੇ ਇੱਕ ਹੋਰ ਪੰਛੀ (ਜਾਇੰਟ ਪੈਟਰਲ) ਦੇ ਵੀ ਪ੍ਰਭਾਵਿਤ ਹੋਣ ਦਾ ਖਦਸ਼ਾ ਹੈ। ਹੌਗਾਰਡ ਨੇ ਸਪੱਸ਼ਟ ਕੀਤਾ ਕਿ ਨਿਊਜ਼ੀਲੈਂਡ ਜੰਗਲੀ ਪੰਛੀਆਂ ਰਾਹੀਂ ਵਾਇਰਸ ਦੇ ਆਉਣ ਨੂੰ ਨਹੀਂ ਰੋਕ ਸਕਦਾ ਅਤੇ ਜੇਕਰ ਇਹ ਸਥਾਨਕ ਪੰਛੀਆਂ ਦੀ ਆਬਾਦੀ ਵਿਚ ਫੈਲ ਜਾਂਦਾ ਹੈ ਤਾਂ ਇਸ ਦਾ ਖਾਤਮਾ ਮੁਸ਼ਕਲ ਹੋਵੇਗਾ। ਮੰਤਰੀ ਨੇ ਕਿਸਾਨਾਂ ਅਤੇ ਪੰਛੀ ਪਾਲਕਾਂ ਨੂੰ ਬਾਇਓਸਕਿਉਰਿਟੀ ਮਜ਼ਬੂਤ ਕਰਨ ਅਤੇ ਬਿਮਾਰ ਜਾਂ ਮਰੇ ਹੋਏ ਪੰਛੀਆਂ ਦੀ ਸੂਚਨਾ ਦੇਣ ਦੀ ਅਪੀਲ ਕੀਤੀ ਹੈ, ਹਾਲਾਂਕਿ ਮਨੁੱਖੀ ਸਿਹਤ ਅਤੇ ਭੋਜਨ ਦੀ ਸੁਰੱਖਿਆ ਲਈ ਖਤਰਾ ਘੱਟ ਦੱਸਿਆ ਗਿਆ ਹੈ।
ਇਹ ਆਸਟ੍ਰੇਲੀਆਈ ਮੁੱਖ ਭੂਮੀ 'ਤੇ ਇਸ ਘਾਤਕ ਸਟ੍ਰੇਨ ਦਾ ਪਹਿਲਾ ਪੁਸ਼ਟੀ ਹੋਇਆ ਕੇਸ ਹੈ, ਜਿਸ ਨੇ 2020 ਤੋਂ ਦੁਨੀਆ ਭਰ ਵਿਚ ਲੱਖਾਂ ਪੰਛੀਆਂ ਤੇ ਜਾਨਵਰਾਂ ਦੀ ਜਾਨ ਲਈ ਹੈ। ਆਸਟ੍ਰੇਲੀਆਈ ਸਰਕਾਰ ਨੇ ਇਸ ਸੰਭਾਵੀ ਪ੍ਰਕੋਪ ਨਾਲ ਨਜਿੱਠਣ ਲਈ 113 ਮਿਲੀਅਨ ਆਸਟ੍ਰੇਲੀਆਈ ਡਾਲਰ (ਲਗਭਗ 79.2 ਮਿਲੀਅਨ ਅਮਰੀਕੀ ਡਾਲਰ) ਦੇ ਫੰਡ ਜਾਰੀ ਕੀਤੇ ਹਨ। ਅਧਿਕਾਰੀ ਆਉਣ ਵਾਲੇ ਦਿਨਾਂ ਵਿਚ ਇਹ ਪਤਾ ਲਗਾਉਣਗੇ ਕਿ ਕੀ ਇਹ ਵਾਇਰਸ ਆਸਟ੍ਰੇਲੀਆਈ ਆਬਾਦੀ ਵਿਚ ਜੜ੍ਹਾਂ ਜਮਾ ਚੁੱਕਾ ਹੈ।
ਆਸਟ੍ਰੇਲੀਆ ਪਹਿਲਾਂ ਇਕਲੌਤਾ ਅਜਿਹਾ ਮਹਾਂਦੀਪ ਸੀ ਜਿੱਥੇ H5N1 ਸਟ੍ਰੇਨ ਨਹੀਂ ਪਾਇਆ ਗਿਆ ਸੀ। ਇਹ ਵਾਇਰਸ ਪੋਲਟਰੀ ਅਤੇ ਜੰਗਲੀ ਪੰਛੀਆਂ ਵਿਚ ਤੇਜ਼ੀ ਨਾਲ ਫੈਲ ਸਕਦਾ ਹੈ, ਪਰ ਇਨਸਾਨਾਂ ਵਿੱਚ ਇਸ ਦੇ ਮਾਮਲੇ ਬਹੁਤ ਘੱਟ ਹਨ। ਇਸ ਤੋਂ ਪਹਿਲਾਂ ਅਕਤੂਬਰ ਵਿੱਚ, ਇਹ ਵਾਇਰਸ ਦੂਰ-ਦੁਰਾਡੇ ਦੇ ਆਸਟ੍ਰੇਲੀਆਈ ਖੇਤਰਾਂ ਜਿਵੇਂ ਕਿ ਹਰਡ ਅਤੇ ਮੈਕਡੋਨਲਡ ਟਾਪੂਆਂ ਵਿਚ ਪਾਇਆ ਗਿਆ ਸੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਭਾਰਤ ਨੇ ਸੰਯੁਕਤ ਰਾਸ਼ਟਰ ’ਚ ਪਾਕਿਸਤਾਨ ਨੂੰ ‘ਭਸਮਾਸੁਰ ਦੇਸ਼’ ਕਰਾਰ ਦਿੱਤਾ
NEXT STORY 
