ਲੰਡਨ : ਇੰਗਲੈਂਡ ਦੇ ਵੋਕਿੰਗ (Woking) ਸ਼ਹਿਰ ਦੇ ਰਹਿਣ ਵਾਲੇ ਇੱਕ ਸੇਵਾਮੁਕਤ (ਰਿਟਾਇਰਡ) ਡੈਕੋਰੇਟਰ ਦੀ ਕਿਸਮਤ ਉਸ ਵੇਲੇ ਚਮਕ ਗਈ, ਜਦੋਂ ਉਸ ਦੇ ਘਰ ਦੀ ਛੱਤ (ਅਟਾਰੀ) ਵਿੱਚ 15 ਸਾਲਾਂ ਤੋਂ ਪਏ ਪੁਰਾਣੇ 'ਪੋਕੇਮੋਨ ਕਾਰਡ' (Pokémon Cards) ਕਰੋੜਾਂ ਰੁਪਏ ਵਿੱਚ ਨਿਲਾਮ ਹੋ ਗਏ। ਜਿਸ ਸੰਗ੍ਰਹਿ (ਕਲੈਕਸ਼ਨ) ਨੂੰ ਉਸ ਨੇ ਸਾਲਾਂ ਤੋਂ ਸੰਭਾਲ ਕੇ ਰੱਖਿਆ ਹੋਇਆ ਸੀ, ਉਸ ਦੀ ਬੋਲੀ ਲੱਗਣ 'ਤੇ ਉਹ ਰਾਤੋ-ਰਾਤ ਕਰੋੜਪਤੀ ਬਣ ਗਿਆ।
ਬੀ.ਬੀ.ਸੀ. (BBC) ਦੀ ਰਿਪੋਰਟ ਅਨੁਸਾਰ, ਸਰੀ (Surrey) ਵਿੱਚ ਸਥਿਤ 'ਯੂਬੈਂਕਸ ਆਕਸ਼ਨ ਹਾਊਸ' ਵਿਖੇ ਹੋਈ ਨਿਲਾਮੀ ਦੌਰਾਨ ਇਹ ਕਾਰਡ ਸੰਗ੍ਰਹਿ 15.6 ਲੱਖ ਪਾਊਂਡ (ਲਗਭਗ 20 ਕਰੋੜ ਰੁਪਏ) ਵਿੱਚ ਵਿਕਿਆ। ਖ਼ਾਸ ਗੱਲ ਇਹ ਹੈ ਕਿ ਇਸ ਵਿਅਕਤੀ ਨੂੰ ਇਨ੍ਹਾਂ ਕਾਰਡਾਂ ਦੀ ਅਸਲ ਕੀਮਤ ਦਾ ਪਤਾ ਇੱਕ ਸਥਾਨਕ ਅਖ਼ਬਾਰ ਵਿੱਚ ਛਪੀ ਖ਼ਬਰ ਪੜ੍ਹ ਕੇ ਲੱਗਾ। ਅਖ਼ਬਾਰ ਵਿੱਚ ਲਿਖਿਆ ਸੀ ਕਿ ਪੋਕੇਮੋਨ ਦਾ ਇੱਕ ਕਾਰਡ 6,000 ਪਾਊਂਡ ਤੋਂ ਵੱਧ ਵਿੱਚ ਵਿਕਿਆ ਹੈ, ਜਿਸ ਤੋਂ ਬਾਅਦ ਉਸ ਨੇ ਆਪਣੇ ਕੋਲ ਪਏ ਕਾਰਡਾਂ ਦੀ ਜਾਂਚ ਕਰਵਾਉਣ ਦਾ ਫੈਸਲਾ ਕੀਤਾ।
ਇਸ ਵਿਅਕਤੀ ਨੇ ਦੱਸਿਆ ਕਿ 1990 ਦੇ ਦਹਾਕੇ ਦੇ ਅੰਤ ਵਿੱਚ ਜਦੋਂ ਉਸ ਦਾ ਬੇਟਾ ਛੋਟਾ ਸੀ, ਤਾਂ ਉਹ ਸਕੂਲ ਦੇ ਦੋਸਤਾਂ ਨਾਲ ਇਹ ਕਾਰਡ ਇਕੱਠੇ ਕਰਦਾ ਸੀ। ਉਸ ਨੇ ਆਪਣੇ ਬੇਟੇ ਦੇ ਖੇਡਣ ਤੋਂ ਅਲੱਗ, ਭਵਿੱਖ ਵਿੱਚ ਚੰਗਾ ਨਿਵੇਸ਼ ਸਮਝ ਕੇ ਈ-ਬੇਅ (eBay) ਰਾਹੀਂ ਮਲੇਸ਼ੀਆ ਦੇ ਇੱਕ ਵਿਅਕਤੀ ਤੋਂ ਕਾਰਡਾਂ ਦੇ ਕੁਝ ਪੂਰੇ ਸੈੱਟ ਖਰੀਦ ਲਏ ਸਨ। ਉਸ ਸਮੇਂ ਉਨ੍ਹਾਂ ਵਿੱਚੋਂ ਇੱਕ ਸੈੱਟ 300 ਪਾਊਂਡ ਵਿੱਚ ਖਰੀਦਿਆ ਗਿਆ ਸੀ, ਜੋ ਹੁਣ ਨਿਲਾਮੀ ਦੌਰਾਨ 75,000 ਪਾਊਂਡ (ਲਗਭਗ ₹80 ਲੱਖ) ਵਿੱਚ ਵਿਕਿਆ ਹੈ।
ਸਾਰੇ ਕਾਰਡਾਂ ਨੂੰ ਵਿਸ਼ੇਸ਼ ਪੋਕੇਮੋਨ ਬਾਈਂਡਰਾਂ ਵਿੱਚ ਸੀਲਬੰਦ ਸੁਰੱਖਿਅਤ ਰੱਖਿਆ ਗਿਆ ਸੀ। ਜਦੋਂ ਬੇਟੇ ਦਾ ਇਨ੍ਹਾਂ ਵਿੱਚ ਸ਼ੌਕ ਘਟ ਗਿਆ, ਤਾਂ ਇਹ ਸੰਗ੍ਰਹਿ ਅਟਾਰੀ ਵਿੱਚ ਰੱਖ ਦਿੱਤਾ ਗਿਆ ਅਤੇ 15 ਸਾਲ ਤੱਕ ਉੱਥੇ ਹੀ ਪਿਆ ਰਿਹਾ। 'ਯੂਬੈਂਕਸ ਆਕਸ਼ਨ ਹਾਊਸ' ਅਨੁਸਾਰ ਬ੍ਰਿਟੇਨ ਵਿੱਚ ਕਿਸੇ ਵੀ ਟ੍ਰੇਡਿੰਗ ਕਾਰਡ ਸੰਗ੍ਰਹਿ ਦੀ ਇਹ ਹੁਣ ਤੱਕ ਦੀ ਸਭ ਤੋਂ ਮਹਿੰਗੀ ਨਿਲਾਮੀ ਹੈ, ਜੋ ਕਿ ਯੂਰਪ ਵਿੱਚ ਵੀ ਇੱਕ ਨਵਾਂ ਰਿਕਾਰਡ ਹੈ।
ਯੂਰਪ ’ਚ ਇਸ ਸਾਲ ਭਿਆਨਕ ਗਰਮੀ ਨਾਲ 50 ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ
NEXT STORY 
