ਅੰਮ੍ਰਿਤਸਰ, (ਇੰਦਰਜੀਤ)- ਪੈਟਰੋਲ-ਡੀਜ਼ਲ ਦੇ ਹਰ ਦਿਨ ਵੱਧ ਰਹੇ ਰੇਟਾਂ ਕਾਰਨ ਮੱਧ ਤੇ ਛੋਟੇ ਵਰਗ ਦੇ ਵਪਾਰੀ ਦੀ ਲਾਗਤ ਹਰ ਦਿਨ ਵੱਧਦੀ ਜਾ ਰਹੀ, ਜਿਸ ਕਾਰਨ ਘਰੇਲੂ ਬਾਜ਼ਾਰ 'ਚ ਮਹਿੰਗਾਈ ਆਖਰੀ ਸੀਮਾ 'ਤੇ ਹੈ। ਇਹ ਸ਼ਬਦ ਪੰਜਾਬ ਪ੍ਰਦੇਸ਼ ਵਪਾਰ ਮੰਡਲ ਦੇ ਪ੍ਰਧਾਨ ਪਿਆਰੇ ਲਾਲ ਸੇਠ ਤੇ ਸਮੀਰ ਜੈਨ ਨੇ ਪ੍ਰਗਟਾਏ। ਕੱਚੇ ਤੇਲ ਦੇ ਵੱਧਦੇ ਮੁੱਲ ਅਤੇ ਡਾਲਰ ਦੇ ਸਾਹਮਣੇ ਰੁਪਏ ਦੇ ਕਮਜ਼ੋਰ ਹੋਣ ਨਾਲ ਪੈਟਰੋਲ-ਡੀਜ਼ਲ ਦੇ ਮੁੱਲ ਬੇਕਾਬੂ ਹੋ ਰਹੇ ਹਨ ਪਰ ਜਦੋਂ 2014 ਵਿਚ ਕੱਚੇ ਤੇਲ ਦੀ ਕੀਮਤ ਘੱਟ ਕੇ 30 ਡਾਲਰ ਪ੍ਰਤੀ ਬੈਰਲ ਹੋਈ ਸੀ ਤਦ ਸਰਕਾਰ ਨੇ 9 ਵਾਰ ਐਕਸਾਈਜ਼ ਡਿਊਟੀ ਵਧਾ ਕੇ ਮੁਨਾਫਾਖੋਰੀ ਕੀਤੀ ਤੇ ਅੱਜ ਜਦੋਂ ਪੈਟਰੋਲ-ਡੀਜ਼ਲ ਦੇ ਮੁੱਲ ਆਸਮਾਨ ਨੂੰ ਛੂਹ ਰਹੇ ਹਨ ਤਾਂ ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਟੈਕਸਾਂ ਵਿਚ ਕਟੌਤੀ ਕਰ ਕੇ ਜਨਤਾ ਨੂੰ ਰਾਹਤ ਦਿੱਤੀ ਜਾਵੇ।
ਪਿਛਲੀਆਂ ਸਰਕਾਰਾਂ ਨੇ ਵੀ ਕੱਚੇ ਤੇਲ ਦੇ ਮੁੱਲ ਡਾਲਰ 120 ਪ੍ਰਤੀ ਬੈਰਲ ਛੂਹਣ ਦੇ ਬਾਵਜੂਦ ਪੈਟਰੋਲ-ਡੀਜ਼ਲ ਦੇ ਰੇਟਾਂ ਨੂੰ ਕਾਬੂ ਵਿਚ ਰੱਖਿਆ ਸੀ। ਇਕਨਾਮਿਕ ਸਰਵੇ ਮੁਤਾਬਕ 10 ਡਾਲਰ ਕੱਚੇ ਤੇਲ ਵਿਚ ਉਛਾਲ ਤੋਂ ਵਾਧਾ ਦਰ 'ਚ 0.2 ਤੋਂ 0.3 ਫ਼ੀਸਦੀ ਦੀ ਗਿਰਾਵਟ ਹੁੰਦੀ ਹੈ। ਮਹਿੰਗਾਈ ਦਰ 'ਚ 1.7 ਫ਼ੀਸਦੀ ਦਾ ਵਾਧਾ ਹੁੰਦਾ ਹੈ, ਕਰੰਟ ਅਕਾਊਂਟ ਡੈਫਸਿਟ 'ਚ 9 ਤੋਂ 10 ਬਿਲੀਅਨ ਡਾਲਰ ਦਾ ਫਰਕ ਆ ਜਾਂਦਾ ਹੈ। ਅਜਿਹੇ 'ਚ ਸਾਨੂੰ ਕੱਚੇ ਤੇਲ ਲਈ ਆਤਮ-ਨਿਰਭਰ ਹੋਣ ਲਈ ਠੋਸ ਕਦਮ ਚੁੱਕਣੇ ਹੋਣਗੇ। ਪੈਟਰੋਲ ਦੇ ਮੁੱਲ ਵਿਚ ਲਗਭਗ 19.48 ਰੁਪਏ ਪ੍ਰਤੀ ਲਿਟਰ ਐਕਸਾਈਜ਼ ਡਿਊਟੀ ਅਤੇ ਲਗਭਗ 16.21 ਰੁਪਏ ਪ੍ਰਤੀ ਲਿਟਰ ਵੈਟ ਜੁੜਿਆ ਹੋਇਆ ਹੈ। ਇਸ ਤਰ੍ਹਾਂ ਡੀਜ਼ਲ ਦੇ ਮੁੱਲ ਵਿਚ 15.33 ਪ੍ਰਤੀ ਲਿਟਰ ਐਕਸਾਈਜ਼ ਅਤੇ ਲਗਭਗ 9.91 ਪ੍ਰਤੀ ਲਿਟਰ ਵੈਟ ਜੁੜਿਆ ਹੋਇਆ ਹੈ।
ਸਰਕਾਰ ਆਮ ਜਨਤਾ ਅਤੇ ਵਪਾਰ ਨੂੰ ਰਾਹਤ ਦੇਣ ਲਈ ਪੈਟਰੋਲ-ਡੀਜ਼ਲ ਨੂੰ ਕਿਉਂ ਨਹੀਂ ਜੀ. ਐੱਸ. ਟੀ. ਦੇ ਦਾਇਰੇ ਵਿਚ ਲਿਆ ਕੇ ਆਪਣੀ ਨੇਕਦਿਲੀ ਦਾ ਸਬੂਤ ਦਿੰਦੀ। ਹਰ ਰੋਜ਼ ਪੈਟਰੋਲ-ਡੀਜ਼ਲ ਦੇ ਮੁੱਲ ਵੱਧ ਰਹੇ ਹਨ ਪਰ ਸਰਕਾਰ ਅੱਖਾਂ ਬੰਦ ਕਰ ਕੇ ਬੇਹਾਲ ਜਨਤਾ ਨੂੰ ਨਜ਼ਰ-ਅੰਦਾਜ਼ ਕਰ ਰਹੀ ਹੈ। ਅੱਜ ਮੱਧ ਵਰਗ ਵਪਾਰੀ, ਮਜ਼ਦੂਰ, ਕਾਰਖ਼ਾਨੇਦਾਰ ਜ਼ਿਆਦਾਤਰ ਦੋਪਹੀਆ ਵਾਹਨ ਦਾ ਪ੍ਰਯੋਗ ਕਰਦੇ ਹਨ, ਅਜਿਹੇ 'ਚ ਮੱਧ ਵਰਗ ਦਾ ਖ਼ਰਚ ਵੱਧ ਰਿਹਾ ਹੈ ਅਤੇ ਮਹਿੰਗਾਈ, ਅਰਾਜਕਤਾ ਤੇ ਬੇਰੋਜ਼ਗਾਰੀ ਵਰਗੀਆਂ ਸਮੱਸਿਆਵਾਂ ਪੈਦਾ ਹੋ ਰਹੀਆਂ ਹਨ। ਵਪਾਰ ਮੰਡਲ ਸਰਕਾਰ ਤੋਂ ਮੰਗ ਕਰਦਾ ਹੈ ਕਿ 16 ਦਿਨਾਂ ਤੋਂ ਲਗਾਤਾਰ ਵੱਧ ਰਹੇ ਪੈਟਰੋਲ-ਡੀਜ਼ਲ ਦੇ ਰੇਟਾਂ ਨੂੰ ਤੁਰੰਤ ਵਾਪਸ ਲੈ ਕੇ ਵਪਾਰ ਜਗਤ ਨੂੰ ਰਾਹਤ ਦਿੱਤੀ ਜਾਵੇ।
ਸਿਹਤ ਵਿਭਾਗ ਵੱਲੋਂ ਕੋਟਪਾ ਐਕਟ ਤਹਿਤ ਤੰਬਾਕੂਨੋਸ਼ੀ ਦੇ ਕੱਟੇ ਚਲਾਨ
NEXT STORY 
