ਅਬੋਹਰ, (ਸੁਨੀਲ)— ਪਿੰਡ ਸੀਡਫਾਰਮ ਵਾਸੀ ਇਕ ਵਿਅਕਤੀ ਨੇ ਸ਼ਨੀਵਾਰ ਬਾਅਦ ਦੁਪਹਿਰ ਹਨੂਮਾਨਗੜ੍ਹ ਰੋਡ ਵਿਖੇ ਰਾਜਾ ਬਜਾਜ ਮੋਟਰਸਾਈਕਲ ਸ਼ੋਅ ਰੂਮ ਦੇ ਬਾਹਰ ਆਪਣੇ ਮੋਟਰਸਾਈਕਲ ਨੂੰ ਆਪ ਹੀ ਪੈਟਰੋਲ ਛਿੜਕ ਕੇ ਅੱਗ ਲਾ ਦਿੱਤੀ। ਮੋਟਰਸਾਈਕਲ ਮਾਲਕ ਨੇ ਸ਼ੋਅ ਰੂਮ ਸੰਚਾਲਕਾਂ 'ਤੇ ਉਸ ਦਾ ਮੋਟਰਸਾਈਕਲ ਠੀਕ ਨਾ ਕਰ ਕੇ ਦੇਣ ਦੇ ਕਥਿਤ ਦੋਸ਼ ਲਾਏ ਹਨ। ਮੌਕੇ 'ਤੇ ਪਹੁੰਚੀ ਥਾਣਾ ਸਿਟੀ ਨੰ. 1 ਦੀ ਪੁਲਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਸੜੇ ਹੋਏ ਮੋਟਰਸਾਈਕਲ ਨੂੰ ਕਬਜ਼ੇ 'ਚ ਲੈ ਲਿਆ ਹੈ। ਸ਼ੋਅ ਰੂਮ ਸੰਚਾਲਕਾਂ ਨੇ ਮੋਟਰਸਾਈਕਲ ਮਾਲਕ ਦੇ ਬਿਆਨਾਂ ਨੂੰ ਸਿਰੇ ਤੋਂ ਨਕਾਰ ਦਿੱਤਾ ਹੈ।
ਸੁਖਮੰਦਰ ਸਿੰਘ ਪੁੱਤਰ ਮਿਲਖਾ ਸਿੰਘ ਨੇ ਦੱਸਿਆ ਕਿ ਉਸ ਨੇ 2013 'ਚ ਇਸ ਸ਼ੋਅ ਰੂਮ ਤੋਂ ਬਜਾਜ ਡਿਸਕਵਰ ਮੋਟਰਸਾਈਕਲ ਖਰੀਦਿਆ ਸੀ ਅਤੇ ਪੰਜ ਸਾਲ ਦੀ ਗਾਰੰਟੀ ਉਸ ਨੂੰ ਕੰਪਨੀ ਵੱਲੋਂ ਦਿੱਤੀ ਗਈ। ਇਨ੍ਹਾਂ ਸਾਲਾਂ ਦੌਰਾਨ ਉਸ ਦਾ 3 ਵਾਰ ਮੋਟਰਸਾਈਕਲ ਦਾ ਇੰਜਣ ਖਰਾਬ ਹੋ ਚੁੱਕਾ ਹੈ। ਉਸ ਨੇ ਸ਼ੋਅ ਰੂਮ ਕਰਮਚਾਰੀਆਂ 'ਤੇ ਕਥਿਤ ਤੌਰ 'ਤੇ ਦੋਸ਼ ਲਾਇਆ ਕਿ ਉਨ੍ਹਾਂ ਉਸ ਨੂੰ ਕਿਹਾ ਕਿ ਉਹ ਉਸ ਦਾ ਮੋਟਰਸਾਈਕਲ ਠੀਕ ਨਹੀਂ ਕਰ ਸਕਦੇ ਅਤੇ ਚਾਹੇ ਇਸ ਮੋਟਰਸਾਈਕਲ ਨੂੰ ਉਹ ਅੱਗ ਲਾ ਦੇਵੇ, ਉਨ੍ਹਾਂ ਨੂੰ ਕੁਝ ਲੈਣਾ-ਦੇਣਾ ਨਹੀਂ, ਜਿਸ ਤੋਂ ਬਾਅਦ ਉਸ ਨੇ ਪਰਿਵਾਰ ਸਾਹਮਣੇ ਆਪਣੀ ਬੇਇੱਜ਼ਤੀ ਹੁੰਦੀ ਦੇਖ ਮਜਬੂਰਨ ਮੋਟਰਸਾਈਕਲ ਨੂੰ ਸ਼ੋਅ ਰੂਮ ਦੇ ਬਾਹਰ ਹੀ ਅੱਗ ਲਾ ਦਿੱਤੀ। ਇਸ ਤੋਂ ਬਾਅਦ ਸ਼ੋਅ ਰੂਮ ਕਰਮਚਾਰੀਆਂ ਨੇ ਤੁਰੰਤ ਅੱਗ 'ਤੇ ਕਾਬੂ ਪਾਇਆ ਅਤੇ ਪੁਲਸ ਨੂੰ ਸੂਚਨਾ ਦਿੱਤੀ।
ਇਧਰ ਇਸ ਬਾਰੇ ਸ਼ੋਅ ਰੂਮ ਦੇ ਪ੍ਰਬੰਧਕ ਰਵੀ ਗੁਪਤਾ ਨਾਲ ਗੱਲ ਕਰਨ 'ਤੇ ਉਨ੍ਹਾਂ ਦੱਸਿਆ ਕਿ ਉਕਤ ਵਿਅਕਤੀ ਨੇ 2013 'ਚ ਉਨ੍ਹਾਂ ਤੋਂ ਮੋਟਰਸਾਈਕਲ ਕਿਸ਼ਤਾਂ 'ਚ ਖਰੀਦਿਆ ਸੀ ਅਤੇ ਸਮੇਂ 'ਤੇ ਇਸ ਦੀਆਂ ਕਿਸ਼ਤਾਂ ਵੀ ਅਦਾ ਨਹੀਂ ਕੀਤੀਆਂ। ਫਿਰ ਉਨ੍ਹਾਂ ਦੇ ਸ਼ੋਅ ਰੂਮ 'ਤੇ ਨਵਾਂ ਮੋਟਰਸਾਈਕਲ ਲੈਣ ਲਈ ਆਇਆ ਤਾਂ ਸ਼ੋਅ ਰੂਮ 'ਚ ਮੌਜੂਦ ਸ਼੍ਰੀ ਰਾਮ ਫਾਈਨਾਂਸ ਅਤੇ ਬਜਾਜ ਫਾਈਨਾਂਸ ਕਰਮਚਾਰੀਆਂ ਨੇ ਉਸ ਦਾ ਰਿਕਾਰਡ ਦੇਖਦੇ ਹੋਏ ਉਸ ਨੂੰ ਫਿਰ ਤੋਂ ਲੋਨ 'ਤੇ ਮੋਟਰਸਾਈਕਲ ਦੇਣ ਤੋਂ ਇਨਕਾਰ ਕਰ ਦਿੱਤਾ, ਜਿਸ ਤੋਂ ਨਿਰਾਸ਼ ਹੋ ਕੇ ਉਸ ਨੇ ਆਪ ਹੀ ਮੋਟਰਸਾਈਕਲ ਨੂੰ ਅੱਗ ਲਾ ਦਿੱਤੀ। ਰਵੀ ਗੁਪਤਾ ਨੇ ਦੱਸਿਆ ਕਿ ਇਸ ਸਾਰੀ ਘਟਨਾ ਦੇ ਸਮੇਂ ਉਹ ਖੁਦ ਮੀਟਿੰਗ 'ਚ ਸਨ, ਜਦਕਿ ਘਟਨਾ ਤੋਂ ਬਾਅਦ ਉਨ੍ਹਾਂ ਦੇ ਕਰਮਚਾਰੀਆਂ ਨੇ ਇਸ ਸਾਰੀ ਘਟਨਾ ਦੀ ਜਾਣਕਾਰੀ ਉਨ੍ਹਾਂ ਨੂੰ ਦਿੱਤੀ। ਥਾਣਾ ਇੰਚਾਰਜ ਚੰਦਰ ਸ਼ੇਖਰ ਨਾਲ ਗੱਲ ਕਰਨ 'ਤੇ ਉਨ੍ਹਾਂ ਕਿਹਾ ਕਿ ਜਿਵੇਂ ਹੀ ਉਨ੍ਹਾਂ ਨੂੰ ਸੂਚਨਾ ਮਿਲੀ ਤਾਂ ਉਹ ਮੌਕੇ 'ਤੇ ਪਹੁੰਚੇ ਅਤੇ ਦੇਖਿਆ ਕਿ ਕਰਮਚਾਰੀਆਂ ਨੇ ਤਦ ਤੱਕ ਮੋਟਰਸਾਈਕਲ ਦੀ ਅੱਗ ਬੁਝਾ ਦਿੱਤੀ ਸੀ। ਹੁਣ ਉਹ ਮੋਟਰਸਾਈਕਲ ਦੇ ਮਾਲਕ ਅਤੇ ਸ਼ੋਅ ਰੂਮ ਦੇ ਸੰਚਾਲਕਾਂ ਅਤੇ ਕਰਮਚਾਰੀਆਂ ਦੇ ਬਿਆਨ ਕਲਮਬੰਦ ਕਰ ਕੇ ਜਾਂਚ ਕਰ ਰਹੇ ਹਨ।
ਮੈਡੀਕਲ ਸਟੋਰ ਵਾਲੇ ਵਲੋਂ ਕੀਤੇ ਗਲਤ ਇਲਾਜ ਕਾਰਨ 9 ਸਾਲਾ ਬੱਚੇ ਦੀ ਮੌਤ
NEXT STORY 
