ਨਵੀਂ ਦਿੱਲੀ- ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਣ ਐਤਵਾਰ, 1 ਫਰਵਰੀ 2026 ਨੂੰ ਸਵੇਰੇ 11 ਵਜੇ ਸੰਸਦ ਵਿੱਚ ਕੇਂਦਰੀ ਬਜਟ ਪੇਸ਼ ਕਰਨਗੇ। ਇਹ ਭਾਰਤੀ ਸੰਸਦ ਦੇ ਇਤਿਹਾਸ ਵਿੱਚ ਪਹਿਲਾ ਮੌਕਾ ਹੋਵੇਗਾ ਜਦੋਂ ਬਜਟ ਐਤਵਾਰ ਨੂੰ ਪੇਸ਼ ਕੀਤਾ ਜਾ ਰਿਹਾ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਕਾਰਜਕਾਲ ਦੌਰਾਨ 1 ਫਰਵਰੀ ਨੂੰ ਬਜਟ ਪੇਸ਼ ਕਰਨ ਦੀ ਜੋ ਪਰੰਪਰਾ ਸ਼ੁਰੂ ਹੋਈ ਸੀ, ਉਸ ਨੂੰ ਇਸ ਵਾਰ ਵੀ ਬਰਕਰਾਰ ਰੱਖਿਆ ਜਾਵੇਗਾ।
ਸਭ ਤੋਂ ਵੱਧ ਬਜਟ ਪੇਸ਼ ਕਰਨ ਵਾਲੀ ਵਿੱਤ ਮੰਤਰੀ ਇਸ ਬਜਟ ਦੇ ਨਾਲ ਨਿਰਮਲਾ ਸੀਤਾਰਮਣ ਦੇ ਨਾਮ ਇੱਕ ਵੱਡਾ ਰਿਕਾਰਡ ਦਰਜ ਹੋਣ ਜਾ ਰਿਹਾ ਹੈ। ਉਹ ਦੇਸ਼ ਦੀ ਸਭ ਤੋਂ ਵੱਧ ਵਾਰ ਬਜਟ ਪੇਸ਼ ਕਰਨ ਵਾਲੀ ਵਿੱਤ ਮੰਤਰੀ ਬਣ ਜਾਣਗੇ। ਇਹ ਉਨ੍ਹਾਂ ਦਾ 9ਵਾਂ ਬਜਟ ਹੋਵੇਗਾ। ਇਸ ਤੋਂ ਪਹਿਲਾਂ ਇਹ ਰਿਕਾਰਡ ਮੋਰਾਰਜੀ ਦੇਸਾਈ ਦੇ ਨਾਮ ਸੀ, ਜਿਨ੍ਹਾਂ ਨੇ ਲਗਾਤਾਰ 6 ਬਜਟ ਪੇਸ਼ ਕੀਤੇ ਸਨ।
ਬਜਟ ਸੈਸ਼ਨ ਦਾ ਵੇਰਵਾ ਸੰਸਦ ਦਾ ਬਜਟ ਸੈਸ਼ਨ ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਦੇ ਭਾਸ਼ਣ ਨਾਲ ਸ਼ੁਰੂ ਹੋਵੇਗਾ। ਸੈਸ਼ਨ ਨੂੰ ਦੋ ਪੜਾਵਾਂ ਵਿੱਚ ਵੰਡਿਆ ਗਿਆ ਹੈ:
• ਪਹਿਲਾ ਪੜਾਅ: 28 ਜਨਵਰੀ ਤੋਂ 13 ਫਰਵਰੀ ਤੱਕ।
• ਦੂਜਾ ਪੜਾਅ: 9 ਮਾਰਚ ਤੋਂ 2 ਅਪ੍ਰੈਲ ਤੱਕ।
ਬਜਟ ਭਾਸ਼ਣਾਂ ਦੇ ਦਿਲਚਸਪ ਅੰਕੜੇ ਅਤੇ ਰਿਕਾਰਡ
ਕੇਂਦਰੀ ਬਜਟ ਦੇਸ਼ ਦੀ ਆਰਥਿਕ ਦਿਸ਼ਾ ਤੈਅ ਕਰਦਾ ਹੈ ਅਤੇ ਇਸਦੀ ਪੇਸ਼ਕਾਰੀ ਦੌਰਾਨ ਵਿੱਤ ਮੰਤਰੀ ਦਾ ਭਾਸ਼ਣ ਵੀ ਓਨਾ ਹੀ ਮਹੱਤਵਪੂਰਨ ਹੈ। ਆਮ ਤੌਰ 'ਤੇ ਬਜਟ ਭਾਸ਼ਣ ਡੇਢ ਤੋਂ ਦੋ ਘੰਟੇ ਤੱਕ ਚੱਲਦਾ ਹੈ, ਭਾਰਤੀ ਸੰਸਦ ਨੇ ਕਈ ਵਿਲੱਖਣ ਰਿਕਾਰਡ ਆਪਣੇ ਨਾਮ ਕੀਤੇ ਹਨ। ਕਦੇ ਇਹ ਭਾਸ਼ਣ 162 ਮਿੰਟ ਤੱਕ ਚੱਲਿਆ, ਤਾਂ ਕਦੇ ਬਜਟ ਸਿਰਫ 800 ਸ਼ਬਦਾਂ ਵਿੱਚ ਪੇਸ਼ ਕੀਤਾ ਗਿਆ।
ਸਭ ਤੋਂ ਲੰਬਾ ਭਾਸ਼ਣ (ਸਮਾਂ): ਨਿਰਮਲਾ ਸੀਤਾਰਮਣ ਨੇ ਸਾਲ 2020-21 ਵਿੱਚ ਭਾਰਤ ਦੇ ਇਤਿਹਾਸ ਦਾ ਸਭ ਤੋਂ ਲੰਬਾ ਬਜਟ ਭਾਸ਼ਣ ਦਿੱਤਾ ਸੀ, ਜੋ 2 ਘੰਟੇ 42 ਮਿੰਟ (162 ਮਿੰਟ) ਚੱਲਿਆ ਸੀ। ਇਸ ਭਾਸ਼ਣ ਦੇ ਅੰਤ ਵਿੱਚ ਉਨ੍ਹਾਂ ਦੀ ਤਬੀਅਤ ਖਰਾਬ ਹੋ ਗਈ ਸੀ, ਜਿਸ ਕਾਰਨ ਆਖਰੀ ਦੋ ਪੈਰੇ ਲੋਕ ਸਭਾ ਸਪੀਕਰ ਓਮ ਬਿਰਲਾ ਨੇ ਪੜ੍ਹੇ ਸਨ।
ਸਭ ਤੋਂ ਲੰਬਾ ਭਾਸ਼ਣ (ਸ਼ਬਦ): ਸ਼ਬਦਾਂ ਦੇ ਲਿਹਾਜ਼ ਨਾਲ ਸਭ ਤੋਂ ਲੰਬਾ ਭਾਸ਼ਣ 1991 ਵਿੱਚ ਮਨਮੋਹਨ ਸਿੰਘ ਨੇ ਦਿੱਤਾ ਸੀ, ਜਿਸ ਵਿੱਚ 18,700 ਸ਼ਬਦ ਸਨ।
ਸਭ ਤੋਂ ਛੋਟਾ ਭਾਸ਼ਣ: ਹੁਣ ਤੱਕ ਦਾ ਸਭ ਤੋਂ ਛੋਟਾ ਬਜਟ ਭਾਸ਼ਣ 1977-78 ਵਿੱਚ ਹੀਰੂਭਾਈ ਮੁਲਜੀਭਾਈ ਪਟੇਲ ਨੇ ਦਿੱਤਾ ਸੀ, ਜੋ ਸਿਰਫ਼ 800 ਸ਼ਬਦਾਂ ਦਾ ਸੀ। ਵਿੱਤ ਮੰਤਰੀ ਸੀਤਾਰਮਣ ਦਾ ਸਭ ਤੋਂ ਛੋਟਾ ਭਾਸ਼ਣ ਫਰਵਰੀ 2024 ਵਿੱਚ 56 ਮਿੰਟ ਦਾ ਸੀ।
ਹੋਰ ਪ੍ਰਮੁੱਖ ਭਾਸ਼ਣ: ਜਸਵੰਤ ਸਿੰਘ (2003-04) ਨੇ 2 ਘੰਟੇ 13 ਮਿੰਟ ਅਤੇ ਅਰੁਣ ਜੇਤਲੀ (2014-15) ਨੇ 2 ਘੰਟੇ 10 ਮਿੰਟ ਤੱਕ ਬਜਟ ਭਾਸ਼ਣ ਦਿੱਤਾ ਸੀ।
ਸਾਲ 2025 ਵਿੱਚ ਸੀਤਾਰਮਣ ਦਾ ਬਜਟ ਭਾਸ਼ਣ 1 ਘੰਟਾ 14 ਮਿੰਟ ਦਾ ਰਿਹਾ ਸੀ। ਹੁਣ ਪੂਰੇ ਦੇਸ਼ ਦੀਆਂ ਨਜ਼ਰਾਂ 1 ਫਰਵਰੀ 2026 'ਤੇ ਹਨ ਕਿ ਇਸ ਵਾਰ ਬਜਟ ਰਾਹੀਂ ਆਰਥਿਕਤਾ ਨੂੰ ਕਿਹੜੀ ਨਵੀਂ ਦਿਸ਼ਾ ਮਿਲਦੀ ਹੈ।
ਏਅਰ ਇੰਡੀਆ ਦੀਆਂ ਅਸਮਾਨੀ ਉਡਾਣਾਂ ਨੂੰ ਲੱਗਣਗੇ ਹੋਰ ਖੰਭ: ਬੋਇੰਗ ਨੂੰ ਦਿੱਤਾ 30 ਨਵੇਂ ਜਹਾਜ਼ਾਂ ਦਾ ਆਰਡਰ
NEXT STORY 
