ਨੈਸ਼ਨਲ ਡੈਸਕ- ਕੌਮੀ ਹਾਈਵੇਅ 'ਤੇ ਯਾਤਰਾ ਨੂੰ ਸੁਰੱਖਿਅਤ ਅਤੇ ਸੁਖਾਲਾ ਬਣਾਉਣ ਲਈ ਕੇਂਦਰ ਸਰਕਾਰ ਇਕ ਨਵੀਂ ਯੋਜਨਾ 'ਤੇ ਕੰਮ ਕਰ ਰਹੀ ਹੈ। ਇਸ ਤਹਿਤ, ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ (NHAI) ਨੇ ਹਾਈਵੇਅ 'ਤੇ ਟੈਲੀਕਾਮ-ਅਧਾਰਿਤ ਸੁਰੱਖਿਆ ਅਲਰਟ ਸਿਸਟਮ ਸ਼ੁਰੂ ਕਰਨ ਲਈ ਰਿਲਾਇੰਸ ਜੀਓ ਨਾਲ ਇਕ ਸਮਝੌਤਾ (MoU) ਸਾਈਨ ਕੀਤਾ ਹੈ।
ਇਸ ਪ੍ਰਣਾਲੀ ਦੇ ਤਹਿਤ, ਯਾਤਰੀਆਂ ਨੂੰ ਹਾਈਵੇਅ 'ਤੇ ਖ਼ਤਰਨਾਕ ਮੋੜਾਂ, ਸੰਘਣੀ ਧੁੰਦ ਨਾਲ ਪ੍ਰਭਾਵਿਤ ਇਲਾਕਿਆਂ, ਆਵਾਰਾ ਪਸ਼ੂਆਂ ਦੀ ਮੌਜੂਦਗੀ ਜਾਂ ਅਚਾਨਕ ਬਣੇ ਡਾਇਵਰਸ਼ਨਾਂ ਬਾਰੇ ਪਹਿਲਾਂ ਹੀ ਪਤਾ ਚੱਲ ਜਾਵੇਗਾ। ਇਸ ਪਹਿਲਕਦਮੀ ਦਾ ਮੁੱਖ ਉਦੇਸ਼ ਸੜਕ ਸੁਰੱਖਿਆ ਨੂੰ ਮਜ਼ਬੂਤ ਕਰਨਾ ਹੈ ਤਾਂ ਜੋ ਯਾਤਰੀ ਡਰਾਈਵਿੰਗ ਦੌਰਾਨ ਸੂਚਨਾ ਮਿਲਣ 'ਤੇ ਆਪਣੀ ਗਤੀ ਅਤੇ ਵਾਹਨ ਚਲਾਉਣ ਦੇ ਵਿਵਹਾਰ ਨੂੰ ਪਹਿਲਾਂ ਹੀ ਠੀਕ ਕਰ ਸਕਣ।
ਸਿਸਟਮ ਕਿਵੇਂ ਕੰਮ ਕਰੇਗਾ:
1. ਨੈੱਟਵਰਕ ਦੀ ਵਰਤੋਂ: ਇਹ ਸਿਸਟਮ ਰਿਲਾਇੰਸ ਜੀਓ ਦੇ ਮੌਜੂਦਾ 4G ਅਤੇ 5G ਨੈੱਟਵਰਕ ਦੀ ਵਰਤੋਂ ਕਰੇਗਾ, ਜਿਸ ਲਈ ਕਿਸੇ ਨਵੇਂ ਹਾਰਡਵੇਅਰ ਦੀ ਜ਼ਰੂਰਤ ਨਹੀਂ ਹੋਵੇਗੀ, ਇਸ ਤਕਨੀਕ ਦੀ ਮਦਦ ਨਾਲ ਇਸ ਨੂੰ ਤੇਜ਼ੀ ਨਾਲ ਅਤੇ ਵੱਡੇ ਪੱਧਰ 'ਤੇ ਲਾਗੂ ਕੀਤਾ ਜਾ ਸਕਦਾ ਹੈ।
2. ਅਲਰਟ ਪ੍ਰਣਾਲੀ: ਇਹ ਸਿਸਟਮ ਪੂਰੀ ਤਰ੍ਹਾਂ ਆਟੋਮੇਟਿਡ ਹੋਵੇਗਾ। ਹਾਈਵੇਅ ਦੇ ਨੇੜੇ ਜਾਂ ਹਾਈਵੇਅ 'ਤੇ ਚੱਲ ਰਹੇ ਸਾਰੇ ਯੂਜ਼ਰਸ ਨੂੰ SMS, WhatsApp ਅਤੇ ਉੱਚ-ਪਹਿਲ ਵਾਲੀਆਂ ਕਾਲਾਂ ਰਾਹੀਂ ਅਲਰਟ ਭੇਜੇ ਜਾਣਗੇ।
3. ਏਕੀਕਰਣ: ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ ਨੇ ਦੱਸਿਆ ਕਿ ਇਸ ਸਿਸਟਮ ਨੂੰ NHAI ਦੇ ਡਿਜੀਟਲ ਪਲੇਟਫਾਰਮਾਂ, ਜਿਵੇਂ ਕਿ 'ਰਾਜਮਾਰਗ ਯਾਤਰਾ' (Rajmargyatra) ਮੋਬਾਈਲ ਐਪਲੀਕੇਸ਼ਨ ਅਤੇ ਐਮਰਜੈਂਸੀ ਹੈਲਪਲਾਈਨ ਨੰਬਰ 1033 ਨਾਲ ਵੀ ਜੋੜਿਆ ਜਾਵੇਗਾ।
NHAI ਦੇ ਚੇਅਰਮੈਨ ਸੰਤੋਸ਼ ਕੁਮਾਰ ਯਾਦਵ ਨੇ ਕਿਹਾ ਕਿ ਇਹ ਪਹਿਲਕਦਮੀ ਯਾਤਰੀਆਂ ਨੂੰ ਸਮੇਂ ਸਿਰ ਅਤੇ ਸਹੀ ਜਾਣਕਾਰੀ ਪ੍ਰਦਾਨ ਕਰੇਗੀ, ਜਿਸ ਨਾਲ ਉਹ ਆਪਣੀ ਡਰਾਈਵਿੰਗ ਨੂੰ ਬਦਲ ਸਕਣਗੇ। ਇਸ ਤਕਨਾਲੋਜੀ ਦਾ ਉਦੇਸ਼ ਸੜਕ ਹਾਦਸਿਆਂ ਨੂੰ ਘਟਾਉਣਾ ਅਤੇ ਯਾਤਰਾ ਨੂੰ ਵਧੇਰੇ ਸੁਰੱਖਿਅਤ, ਸਮਾਰਟ ਅਤੇ ਕੁਸ਼ਲ ਬਣਾਉਣਾ ਹੈ।
ਅੱਗੇ ਦੀ ਯੋਜਨਾ:
ਇਸ ਪ੍ਰਾਜੈਕਟ ਨੂੰ ਸ਼ੁਰੂਆਤ ਵਿੱਚ NHAI ਦੇ ਕੁਝ ਖੇਤਰੀ ਦਫ਼ਤਰਾਂ 'ਚ ਪਾਇਲਟ ਪ੍ਰਾਜੈਕਟ ਵਜੋਂ ਸ਼ੁਰੂ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ, ਜਿੱਥੇ ਖ਼ਤਰਨਾਕ ਖੇਤਰਾਂ ਦੀ ਪਛਾਣ ਕਰਕੇ ਅਲਰਟ ਦੀ ਸੀਮਾ ਤੈਅ ਕੀਤੀ ਜਾਵੇਗੀ। NHAI ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਉਹ ਭਵਿੱਖ ਵਿੱਚ ਇਸ ਸੇਵਾ ਦਾ ਦਾਇਰਾ ਵਧਾਉਣ ਲਈ ਦੂਜੇ ਟੈਲੀਕਾਮ ਸਰਵਿਸ ਪ੍ਰੋਵਾਈਡਰਾਂ ਨਾਲ ਵੀ ਕੰਮ ਕਰੇਗੀ।
ਆਖ਼ਿਰ ਕਿੰਨੀ ਕਮਾਈ ਕਰਦੇ ਹਨ ਮੋਦੀ, ਪੁਤਿਨ ਤੇ ਟਰੰਪ ? ਤਨਖ਼ਾਹ ਜਾਣ ਰਹਿ ਜਾਓਗੇ ਹੈਰਾਨ
NEXT STORY 
