ਮੁੰਬਈ- ਮੁੰਬਈ ਦੇ ਵਿਕਰੋਲੀ ਇਲਾਕੇ ਦੇ ਅੰਬੇਡਕਰ ਨਗਰ ਵਿੱਚ ਗਣਤੰਤਰ ਦਿਵਸ ਦੇ ਜਸ਼ਨਾਂ ਦੌਰਾਨ ਇੱਕ ਬਹੁਤ ਹੀ ਦਰਦਨਾਕ ਹਾਦਸਾ ਵਾਪਰਿਆ ਹੈ। ਇੱਥੇ ਇੱਕ ਗਲੀ ਵਿੱਚ ਲੱਗਾ ਭਾਰੀ ਸਪੀਕਰ ਇੱਕ 3 ਸਾਲ ਦੀ ਮਾਸੂਮ ਬੱਚੀ ਉੱਪਰ ਡਿੱਗ ਗਿਆ, ਜਿਸ ਕਾਰਨ ਬੱਚੀ ਦੀ ਮੌਤ ਹੋ ਗਈ। ਇਸ ਸਾਰੀ ਘਟਨਾ ਦੀ ਦਿਲ ਕੰਬਾਊ ਵੀਡੀਓ ਨੇੜੇ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ ਹੈ।
ਕਿਵੇਂ ਵਾਪਰਿਆ ਇਹ ਭਿਆਨਕ ਹਾਦਸਾ?
ਜਾਣਕਾਰੀ ਅਨੁਸਾਰ, ਗਣਤੰਤਰ ਦਿਵਸ ਦੇ ਮੌਕੇ 'ਤੇ ਗਲੀ ਵਿੱਚ ਦੋ ਵੱਡੇ ਸਪੀਕਰ ਲਗਾਏ ਗਏ ਸਨ, ਜਿਨ੍ਹਾਂ ਵਿੱਚ ਦੇਸ਼ ਭਗਤੀ ਦੇ ਗੀਤ ਚੱਲ ਰਹੇ ਸਨ। ਗਲੀ ਵਿੱਚ ਬੱਚੇ ਖੇਡ ਰਹੇ ਸਨ ਅਤੇ ਲੋਕਾਂ ਦੀ ਆਵਾਜਾਈ ਜਾਰੀ ਸੀ। ਇਸੇ ਦੌਰਾਨ ਇੱਕ ਕਬਾੜੀਆ (ਕੂੜਾ ਚੁੱਕਣ ਵਾਲਾ) ਸਿਰ 'ਤੇ ਕੱਪੜਿਆਂ ਦੀ ਭਰੀ ਹੋਈ ਬੋਰੀ ਲੈ ਕੇ ਉੱਥੋਂ ਲੰਘ ਰਿਹਾ ਸੀ। ਜਿਵੇਂ ਹੀ ਉਹ ਸਪੀਕਰਾਂ ਦੇ ਕੋਲ ਪਹੁੰਚਿਆ, ਉਸ ਦੀ ਬੋਰੀ ਸਪੀਕਰ ਦੀ ਤਾਰ ਵਿੱਚ ਅਟਕ ਗਈ, ਜਿਸ ਕਾਰਨ ਦੋਵੇਂ ਭਾਰੀ ਸਪੀਕਰ ਸੰਤੁਲਨ ਵਿਗੜਨ ਕਰਕੇ ਹੇਠਾਂ ਡਿੱਗ ਗਏ।
ਬਦਕਿਸਮਤੀ ਨਾਲ, ਪਿੱਛੇ ਤੋਂ ਆ ਰਹੀ 3 ਸਾਲ ਦੀ ਮਾਸੂਮ ਬੱਚੀ ਸਪੀਕਰ ਦੀ ਲਪੇਟ ਵਿੱਚ ਆ ਗਈ ਅਤੇ ਉਸ ਦੇ ਹੇਠਾਂ ਦਬ ਗਈ। ਘਟਨਾ ਵਾਪਰਦੇ ਹੀ ਗਲੀ ਵਿੱਚ ਹਫੜਾ-ਦਫੜੀ ਮਚ ਗਈ ਅਤੇ ਇੱਕ ਨੌਜਵਾਨ ਤੁਰੰਤ ਬੱਚੀ ਨੂੰ ਗੰਭੀਰ ਹਾਲਤ ਵਿੱਚ ਚੁੱਕ ਕੇ ਉਸ ਦੇ ਘਰ ਵੱਲ ਭੱਜਿਆ। ਪਰਿਵਾਰ ਵਾਲੇ ਉਸ ਨੂੰ ਤੁਰੰਤ ਹਸਪਤਾਲ ਲੈ ਕੇ ਗਏ ਪਰ ਜ਼ਖ਼ਮ ਇੰਨੇ ਗੰਭੀਰ ਸਨ ਕਿ ਬੱਚੀ ਨੇ ਰਸਤੇ ਵਿੱਚ ਹੀ ਦਮ ਤੋੜ ਦਿੱਤਾ। ਦੂਜੇ ਪਾਸੇ, ਹਾਦਸੇ ਤੋਂ ਬਾਅਦ ਕਬਾੜੀਆ ਮੌਕੇ ਤੋਂ ਚੁੱਪਚਾਪ ਫਰਾਰ ਹੋ ਗਿਆ।
ਵਿਕਰੋਲੀ ਥਾਣੇ ਦੀ ਪੁਲਸ ਨੇ ਇਸ ਮਾਮਲੇ ਵਿੱਚ ਐੱਫ.ਆਈ.ਆਰ. ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲਸ ਅਧਿਕਾਰੀਆਂ ਅਨੁਸਾਰ, ਸੀਸੀਟੀਵੀ ਫੁਟੇਜ ਵਿੱਚ ਕਬਾੜੀਏ ਦੀ ਲਾਪਰਵਾਹੀ ਸਾਫ਼ ਨਜ਼ਰ ਆ ਰਹੀ ਹੈ। ਇਸ ਤੋਂ ਇਲਾਵਾ, ਪੁਲਸ ਜਾਂਚ ਤੋਂ ਬਾਅਦ ਗਲੀ ਵਿੱਚ ਸਪੀਕਰ ਲਗਾਉਣ ਵਾਲਿਆਂ ਵਿਰੁੱਧ ਵੀ ਕਾਰਵਾਈ ਕੀਤੀ ਜਾ ਸਕਦੀ ਹੈ। ਇਸ ਘਟਨਾ ਤੋਂ ਬਾਅਦ ਬੱਚੀ ਦੇ ਮਾਤਾ-ਪਿਤਾ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ ਅਤੇ ਪੂਰੇ ਇਲਾਕੇ ਵਿੱਚ ਸੋਗ ਦੀ ਲਹਿਰ ਫੈਲ ਗਈ ਹੈ।
ਮਮਤਾ ਕੁਲਕਰਨੀ ਦਾ ਵੱਡਾ ਫ਼ੈਸਲਾ ! ਕਿੰਨਰ ਅਖਾੜਾ ਦੇ ਮਹਾਮੰਡਲੇਸ਼ਵਰ ਦੇ ਅਹੁਦੇ ਤੋਂ ਦਿੱਤਾ ਅਸਤੀਫ਼ਾ
NEXT STORY 
