ਚੰਡੀਗੜ੍ਹ (ਅੰਕੁਰ) : ਪੰਜਾਬ ਦੇ ਰੇਲਵੇ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ਵੱਲ ਇਕ ਅਹਿਮ ਕਦਮ ਚੁੱਕਦਿਆਂ ਕੇਂਦਰੀ ਰੇਲ ਮੰਤਰਾਲੇ ਨੇ ਕੌਲੀ ਤੋਂ ਸਰਾਏ ਬੰਜਾਰਾ ਤੱਕ ਨਵੀਂ ਬਾਈਪਾਸ ਰੇਲ ਲਾਈਨ ਬਣਾਉਣ ਲਈ ਫਾਈਨਲ ਲੋਕੇਸ਼ਨ ਸਰਵੇ (ਐੱਫ. ਐੱਲ. ਐੱਸ.) ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਹ ਲਾਈਨ ਰਾਜਪੁਰਾ ਰੇਲਵੇ ਸਟੇਸ਼ਨ ਨੂੰ ਬਾਈਪਾਸ ਕਰੇਗੀ, ਜਿਸ ਨਾਲ ਖੇਤਰ ’ਚ ਰੇਲ ਸੰਚਾਲਣ ਹੋਰ ਸੁਚਾਰੂ ਅਤੇ ਤੇਜ਼ ਹੋਣ ਦੀ ਸੰਭਾਵਨਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕੇਂਦਰੀ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੇ ਕਿਹਾ ਕਿ ਇਹ ਪ੍ਰਾਜੈਕਟ ਪੰਜਾਬ ਲਈ ਰਣਨੀਤਕ ਤੌਰ ’ਤੇ ਬਹੁਤ ਮਹੱਤਵਪੂਰਨ ਹੈ ਅਤੇ ਇਸ ਨਾਲ ਯਾਤਰੀਆਂ ਅਤੇ ਮਾਲ ਗੱਡੀਆਂ ਦੋਹਾਂ ਨੂੰ ਵੱਡਾ ਲਾਭ ਮਿਲੇਗਾ। ਨਵੀਂ ਬਾਈਪਾਸ ਲਾਈਨ ਬਣਨ ਤੋਂ ਬਾਅਦ ਪਟਿਆਲਾ ਅਤੇ ਲੁਧਿਆਣਾ ਦਰਮਿਆਨ ਚੱਲਣ ਵਾਲੀਆਂ ਕਈ ਰੇਲਾਂ ਨੂੰ ਰਾਜਪੁਰਾ ਸਟੇਸ਼ਨ ’ਚ ਦਾਖ਼ਲ ਹੋਣ ਦੀ ਲੋੜ ਨਹੀਂ ਰਹੇਗੀ।
ਇਹ ਵੀ ਪੜ੍ਹੋ : ਪੰਜਾਬੀਆਂ ਲਈ ਚਿੰਤਾ ਭਰੀ ਖ਼ਬਰ! ਪੰਜਾਬ ਸਰਕਾਰ ਦੀਆਂ ਨਵੀਆਂ ਸਕੀਮਾਂ ਨਾਲ ਵਿਗੜਨਗੇ ਵਿੱਤੀ ਹਾਲਾਤ
ਇਸ ਨਾਲ ਰੇਲਾਂ ਦਾ ਰੂਟ ਛੋਟਾ ਹੋਵੇਗਾ ਅਤੇ ਯਾਤਰਾ ਸਮੇਂ ’ਚ ਮਹੱਤਵਪੂਰਨ ਕਮੀ ਆਵੇਗੀ। ਨਾਲ ਹੀ ਰਾਜਪੁਰਾ ਜੰਕਸ਼ਨ ’ਤੇ ਭੀੜਭਾੜ ਵੀ ਘਟੇਗੀ, ਜਿਸ ਨਾਲ ਸਮੁੱਚੀ ਆਪ੍ਰੇਸ਼ਨਲ ਕੁਸ਼ਲਤਾ ’ਚ ਸੁਧਾਰ ਆਵੇਗਾ। ਜੰਕਸ਼ਨਾਂ ’ਤੇ ਵੱਧਦੀ ਟ੍ਰੈਫਿਕ ਕਾਰਨ ਕਈ ਵਾਰ ਰੇਲਾਂ ਨੂੰ ਬੇਵਜ੍ਹਾ ਰੁਕਣਾ ਪੈਂਦਾ ਹੈ। ਬਾਈਪਾਸ ਲਾਈਨ ਇਸ ਸਮੱਸਿਆ ਦਾ ਲੰਬੇ ਸਮੇਂ ਲਈ ਹੱਲ ਸਾਬਤ ਹੋ ਸਕਦੀ ਹੈ। ਇਸ ਬਾਈਪਾਸ ਦੀ ਇਕ ਹੋਰ ਵੱਡੀ ਖ਼ਾਸੀਅਤ ਇਹ ਹੈ ਕਿ ਇਹ ਪਹਿਲਾਂ ਹੀ ਮਨਜ਼ੂਰ ਕੀਤੀ ਗਈ ਰਾਜਪੁਰਾ–ਮੋਹਾਲੀ ਰੇਲ ਲਾਈਨ ਨਾਲ ਸਿੱਧੀ ਅਤੇ ਸੁਚਾਰੂ ਕੁਨੈਕਟੀਵਿਟੀ ਪ੍ਰਦਾਨ ਕਰੇਗੀ। ਇਸ ਨਾਲ ਖੇਤਰੀ ਰੇਲ ਸੰਪਰਕ ਹੋਰ ਮਜ਼ਬੂਤ ਹੋਵੇਗਾ ਤੇ ਨਵੀਆਂ ਯਾਤਰੀ ਅਤੇ ਮਾਲ ਗੱਡੀਆਂ ਚਲਾਉਣ ਦੇ ਬਦਲ ਵੀ ਵਧਣਗੇ। ਇਸ ਨਾਲ ਉਦਯੋਗਿਕ ਤੇ ਵਪਾਰਕ ਗਤੀਵਿਧੀਆਂ ਨੂੰ ਵੀ ਤਾਕਤ ਮਿਲੇਗੀ ਕਿਉਂਕਿ ਤੇਜ਼ ਰੇਲ ਕੁਨੈਕਟੀਵਿਟੀ ਮਾਲ ਢੁਆਈ ਨੂੰ ਹੋਰ ਆਸਾਨ ਤੇ ਘੱਟ ਖ਼ਰਚੀਲਾ ਬਣਾਉਂਦੀ ਹੈ।
ਇਹ ਵੀ ਪੜ੍ਹੋ : ਰੋਪੜ ਦੀ ਅਧਿਆਪਕਾ ਲਈ 'ਚਮਤਕਾਰ'! ਸਾਲਾਂ ਦੀ ਖਾਮੋਸ਼ੀ ਮਗਰੋਂ ਸੁਣੀਆਂ ਆਵਾਜ਼ਾਂ
ਮਾਲ ਢੋਆਈ ਤੇ ਉਦਯੋਗ ਲਈ ਵੀ ਵੱਡਾ ਲਾਭ
ਪੰਜਾਬ ਦੇ ਉਦਯੋਗਿਕ ਖੇਤਰਾਂ ਲਈ ਇਹ ਪ੍ਰਾਜੈਕਟ ਖ਼ਾਸ ਤੌਰ ’ਤੇ ਲਾਭਦਾਇਕ ਮੰਨਿਆ ਜਾ ਰਿਹਾ ਹੈ। ਨਵੀਂ ਬਾਈਪਾਸ ਲਾਈਨ ਨਾਲ ਰੇਲਾਂ ਦੀ ਆਵਾਜਾਈ ਹੋਰ ਤੇਜ਼ ਤੇ ਬਿਨਾਂ ਰੁਕਾਵਟ ਤੋਂ ਹੋ ਸਕੇਗੀ, ਜਿਸ ਨਾਲ ਲਾਜਿਸਟਿਕ ਖ਼ਰਚੇ ਘਟਣ ਦੀ ਸੰਭਾਵਨਾ ਹੈ। ਰੇਲਵੇ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਜਦੋਂ ਜੰਕਸ਼ਨ ਸਟੇਸ਼ਨਾਂ ’ਤੇ ਭੀੜ ਘਟਦੀ ਹੈ ਤਾਂ ਨੈੱਟਵਰਕ ਦੀ ਸਮਰੱਥਾ ਆਪਣੇ ਆਪ ਵੱਧ ਜਾਂਦੀ ਹੈ, ਜਿਸ ਨਾਲ ਹੋਰ ਰੇਲਾਂ ਨੂੰ ਸਮੇਂ ’ਤੇ ਚਲਾਉਣਾ ਆਸਾਨ ਹੋ ਜਾਂਦਾ ਹੈ। ਕੇਂਦਰੀ ਰੇਲ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੇ ਕਿਹਾ ਕਿ ਇਹ ਪਹਿਲ ਪੰਜਾਬ ’ਚ ਰੇਲ ਸੇਵਾਵਾਂ ਨੂੰ ਆਧੁਨਿਕ ਤੇ ਭਰੋਸੇਯੋਗ ਬਣਾਉਣ ਵੱਲ ਇਕ ਮਹੱਤਵਪੂਰਨ ਕਦਮ ਹੈ। ਇਸ ਬਾਈਪਾਸ ਦੇ ਤਿਆਰ ਹੋਣ ਨਾਲ ਯਾਤਰੀਆਂ ਨੂੰ ਘੱਟ ਸਮੇਂ ’ਚ ਤੇਜ਼ ਯਾਤਰਾ ਦਾ ਲਾਭ ਮਿਲੇਗਾ ਤੇ ਰੇਲਾਂ ਦੀ ਸਮਾਂ-ਸਾਰਨੀ ਹੋਰ ਪਾਬੰਦੀ ਨਾਲ ਚੱਲੇਗੀ। ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਪੰਜਾਬ ’ਚ ਰੇਲਵੇ ਬੁਨਿਆਦੀ ਢਾਂਚੇ ਦੇ ਵਿਕਾਸ ਲਈ ਵੱਡੇ ਪੱਧਰ ’ਤੇ ਨਿਵੇਸ਼ ਕਰ ਰਹੀ ਹੈ ਤਾਂ ਜੋ ਆਉਣ ਵਾਲੇ ਸਮੇਂ ’ਚ ਰੇਲ ਯਾਤਰਾ ਹੋਰ ਸੁਵਿਧਾਜਨਕ ਬਣ ਸਕੇ।
ਪੰਜਾਬ ਦੇ ਰੇਲਵੇ ਇਨਫ੍ਰਾਸਟਰਕਚਰ ਦੇ ਵਿਕਾਸ ਲਈ ਮੀਲ ਪੱਥਰ
ਕੌਲੀ–ਸਰਾਏ ਬੰਜਾਰਾ ਬਾਈਪਾਸ ਲਾਈਨ ਨੂੰ ਮਨਜ਼ੂਰੀ ਮਿਲਣਾ ਪੰਜਾਬ ਦੇ ਰੇਲਵੇ ਇਨਫ੍ਰਾਸਟਰਕਚਰ ਦੇ ਵਿਕਾਸ ਲਈ ਇਕ ਮੀਲ ਪੱਥਰ ਵਜੋਂ ਦੇਖਿਆ ਜਾ ਰਿਹਾ ਹੈ। ਇਹ ਪ੍ਰਾਜੈਕਟ ਨਾ ਸਿਰਫ਼ ਯਾਤਰੀ ਆਵਾਜਾਈ ਨੂੰ ਤੇਜ਼ ਕਰੇਗਾ, ਸਗੋਂ ਮਾਲ ਢੁਆਈ, ਉਦਯੋਗਿਕ ਵਿਕਾਸ ਤੇ ਖੇਤਰੀ ਸੰਪਰਕ ਨੂੰ ਵੀ ਨਵੀਂ ਰਫ਼ਤਾਰ ਦੇਵੇਗਾ। ਇਸ ਤਰ੍ਹਾਂ ਦੇ ਬਾਈਪਾਸ ਪ੍ਰਾਜੈਕਟ ਭਵਿੱਖ ’ਚ ਪੰਜਾਬ ਦੇ ਰੇਲ ਨੈੱਟਵਰਕ ਨੂੰ ਹੋਰ ਸਮਰੱਥ ਤੇ ਮੁਕਾਬਲੇਯੋਗ ਬਣਾਉਣ ’ਚ ਅਹਿਮ ਭੂਮਿਕਾ ਨਿਭਾਉਣਗੇ, ਜਿਸ ਨਾਲ ਯਾਤਰੀਆਂ ਨੂੰ ਤੇਜ਼, ਸਰਲ ਤੇ ਹੋਰ ਭਰੋਸੇਯੋਗ ਰੇਲ ਸੇਵਾਵਾਂ ਮਿਲਣ ਦੀ ਉਮੀਦ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਪੰਜਾਬ 'ਚ ਮੌਸਮ ਨੇ ਮਾਰੀ ਪਲਟੀ ! ਵਿਛ ਗਈ ਧੁੰਦ ਦੀ ਚਾਦਰ, ਜਾਣੋ ਆਉਣ ਵਾਲੇ ਦਿਨਾਂ ਦਾ ਹਾਲ
NEXT STORY 
