ਬਦਲਦੀਆਂ ਨੇ ਸਰਕਾਰਾਂ ਪਰ ਨਹੀਂ ਬਦਲੀ ਕਿਸਾਨਾਂ ਦੀ ਤਕਦੀਰ, ਜੁਲਾਈ 'ਚ ਹੋਈਆਂ 26 ਮੌਤਾਂ

Edited By Cherry,
Updated: 19 Aug, 2019 01:04 PM

farmers laborers suicide chief minister capt amarinder singh

ਬਠਿੰਡਾ (ਰਾਜਵੰਤ) : ਸਮੇਂ-ਸਮੇਂ 'ਤੇ ਵੱਖ-ਵੱਖ ਸਰਕਾਰਾਂ ਪੰਜਾਬ ਦੀ ਵਾਗਡੋਰ ਸੰਭਾਲਦੀਆਂ ਰਹੀਆਂ ਹਨ ਤੇ ਮੌਜੂਦਾ ਸਮੇਂ 'ਚ ਸੰਭਾਲ ਰਹੀਆਂ ਹਨ ਪਰ ਸੂਬੇ ਦੇ ਕਿਸਾਨਾਂ-ਮਜ਼ਦੂਰਾਂ ਦੀਆਂ ਹੋ ਰਹੀਆਂ ਖੁਦਕੁਸ਼ੀਆਂ ਹਰ ਸਰਕਾਰ ਦੇ ਰਾਜਭਾਗ ਲਈ ਇਕ ਸਵਾਲ ਖੜ੍ਹਾ ਕਰਦੀਆਂ ਹਨ। ਸੂਬੇ ਦੇ ਮੌਜੂਦਾ ਹਾਲਾਤ ਵੀ ਅਜਿਹੇ ਹੀ ਹਨ। ਹਰ ਮਹੀਨੇ ਸੂਬੇ ਭਰ 'ਚ ਕਿਸਾਨ-ਮਜ਼ਦੂਰ ਕਰਜ਼ੇ ਤੇ ਪ੍ਰੇਸ਼ਾਨੀ ਕਾਰਣ ਜਹਾਨ ਨੂੰ ਅਲਵਿਦਾ ਆਖ ਰਹੇ ਹਨ, ਜਦੋਂਕਿ ਸਰਕਾਰਾਂ ਦੇ ਵਾਅਦੇ ਸਿਰਫ਼ ਕਾਗਜ਼ੀ ਕਾਰਵਾਈ ਤੱਕ ਹੀ ਸੀਮਤ ਰਹਿ ਜਾਂਦੇ ਹਨ, ਜਿਸ ਕਰ ਕੇ ਆਪਣੇ ਮੈਂਬਰ ਗੁਆ ਚੁੱਕੇ ਪੀੜਤ ਪਰਿਵਾਰਾਂ 'ਚ ਸਰਕਾਰਾਂ ਖ਼ਿਲਾਫ਼ ਰੋਹ ਭਖ਼ਦਾ ਰਹਿੰਦਾ ਹੈ। ਮੀਡੀਆ ਦੀ ਰਿਪੋਰਟ ਅਨੁਸਾਰ ਪਿਛਲੇ ਮਹੀਨੇ ਜੁਲਾਈ 2019 'ਚ ਸੂਬੇ ਭਰ ਦੇ 26 ਕਿਸਾਨ-ਮਜ਼ਦੂਰ ਖੁਦਕੁਸ਼ੀ ਕਰ ਚੁੱਕੇ ਹਨ, ਜਿਨ੍ਹਾਂ ਸਿਰ ਲੱਖਾਂ ਦਾ ਕਰਜ਼ਾ ਸੀ ਤੇ ਕਈ ਘਰ ਦੇ ਮਾੜੇ ਹਾਲਾਤ ਤੋਂ ਦੁਖੀ ਪਾਏ ਗਏ ਹਨ। ਸੱਤਾ 'ਤੇ ਕਾਬਜ਼ ਰਹਿਣ ਵਾਲੀਆਂ ਸਰਕਾਰਾਂ ਚੋਣਾਂ ਵੇਲੇ ਕਿਸਾਨਾਂ-ਮਜ਼ਦੂਰਾਂ ਨਾਲ ਤਰ੍ਹਾਂ-ਤਰ੍ਹਾਂ ਦੇ ਵਾਅਦੇ ਕਰਦੀਆਂ ਹਨ ਪਰ ਸੱਤਾ ਹਾਸਲ ਕਰਨ ਤੋਂ ਬਾਅਦ ਵਾਅਦਿਆਂ ਨੂੰ ਪੂਰਾ ਨਹੀਂ ਕੀਤਾ ਜਾਂਦਾ। ਸਾਲ 2017 'ਚ ਵੀ ਚੋਣ ਮੈਨੀਫੈਸਟੋ ਦੌਰਾਨ ਸੂਬੇ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਸੂਬੇ ਦੇ ਸਮੂਹ ਕਿਸਾਨਾਂ ਦਾ ਕਰਜ਼ਾ ਮੁਆਫ਼ ਕਰਨ ਦਾ ਵਾਅਦਾ ਕੀਤਾ ਸੀ ਪਰ ਜ਼ਮੀਨੀ ਹਕੀਕਤ ਕੁੱਝ ਹੋਰ ਹੀ ਬਿਆਨ ਕਰ ਰਹੀ ਹੈ। ਸਰਕਾਰ ਵੱਲੋਂ ਕਰਜ਼ਾ ਮੁਆਫ਼ੀ ਦੀਆਂ ਪੇਸ਼ ਕੀਤੀਆਂ ਗਈਆਂ ਲਿਸਟਾਂ 'ਚ ਬਹੁਤੇ ਕਿਸਾਨ ਕਰਜ਼ਾ ਮੁਆਫ਼ੀ ਯੋਜਨਾ ਤੋਂ ਵਾਂਝੇ ਰਹੇ, ਜਦੋਂਕਿ ਕਈ ਥਾਵਾਂ 'ਤੇ ਕਰਜ਼ਾ ਮੁਆਫ਼ੀ ਰਾਸ਼ੀ ਵੀ ਹਾਸੋ-ਹੀਣੀ ਬਣਦੀ ਰਹੀ।

ਕਿਸਾਨ ਕਰਜ਼ੇ ਤੇ ਮਜ਼ਦੂਰ ਗੁਰਬਤ ਕਾਰਣ ਛੱਡ ਰਹੇ ਨੇ ਜਹਾਨ
ਪਿਛਲੇ ਲੰਬੇ ਸਮੇਂ ਤੋਂ ਪੰਜਾਬ 'ਚ ਕਿਸਾਨਾਂ-ਮਜ਼ਦੂਰਾਂ ਦੀਆਂ ਖੁਦਕੁਸ਼ੀਆਂ ਦਾ ਗ੍ਰਾਫ ਵਧਦਾ ਜਾ ਰਿਹਾ ਹੈ। ਆਏ ਮਹੀਨੇ ਪੰਜਾਬ ਭਰ 'ਚੋਂ 30-40 ਦੇ ਕਰੀਬ ਕਿਸਾਨ-ਮਜ਼ਦੂਰ ਜਹਾਨ ਤੋਂ ਰੁਖ਼ਸਤ ਹੋ ਰਹੇ ਹਨ। ਇਸ ਵਾਰ ਜੁਲਾਈ ਮਹੀਨੇ ਦੀ ਜੇਕਰ ਗੱਲ ਕੀਤੀ ਜਾਵੇ ਤਾਂ ਇਸ ਮਹੀਨੇ ਸੂਬੇ ਭਰ 'ਚ 14 ਕਿਸਾਨਾਂ ਤੇ 12 ਦੇ ਕਰੀਬ ਮਜ਼ਦੂਰਾਂ ਦੇ ਘਰ ਸੱਥਰ ਵਿਛ ਚੁੱਕੇ ਹਨ, ਜੋ ਕਰਜ਼ੇ ਤੇ ਘਰ ਦੀ ਗੁਰਬਤ ਤੋਂ ਪ੍ਰੇਸ਼ਾਨ ਸਨ, ਜਦੋਂਕਿ ਇਨ੍ਹਾਂ ਮਾਮਲਿਆਂ 'ਚੋਂ ਬਹੁਤਿਆਂ ਪਰਿਵਾਰਾਂ ਨੂੰ ਅਜੇ ਤਕ ਮੁਆਵਜ਼ਾ ਤਕ ਵੀ ਨਸੀਬ ਨਹੀਂ ਹੋ ਸਕਿਆ ਹੈ।

3 ਜੁਲਾਈ ਦੇ ਦਿਨ ਬਠਿੰਡਾ ਜ਼ਿਲੇ ਦੇ ਪਿੰਡ ਕੋਟਲੀ ਖ਼ੁਰਦ ਵਿਖੇ ਮਜ਼ਦੂਰ ਵਿੰਦਰ ਸਿੰਘ (32) ਨੇ ਪ੍ਰੇਸ਼ਾਨੀ ਕਾਰਣ ਆਪਣੇ ਘਰ ਅੰਦਰ ਪੱਖੇ ਨਾਲ ਫਾਹ ਲਾ ਲਿਆ ਸੀ।
4 ਜੁਲਾਈ ਨੂੰ ਬਠਿੰਡਾ ਜ਼ਿਲੇ ਦੇ ਪਿੰਡ ਸੇਖੂ ਵਿਖੇ ਕਰਜ਼ੇ ਤੋਂ ਪ੍ਰੇਸ਼ਾਨ ਕਿਸਾਨ ਉਜਾਗਰ ਸਿੰਘ ਪੁੱਤਰ ਜੁਗਿੰਦਰ ਸਿੰਘ ਨੇ ਆਪਣੇ ਘਰ 'ਚ ਸਲਫ਼ਾਸ ਦੀਆਂ ਗੋਲੀਆਂ ਖ਼ਾ ਕੇ ਜੀਵਨ ਲੀਲਾ ਖ਼ਤਮ ਕਰ ਲਈ ਸੀ। ਕਿਸਾਨ ਸਿਰ ਬੈਂਕ ਤੇ ਸ਼ਾਹੂਕਾਰਾਂ ਦਾ 7 ਲੱਖ ਦਾ ਕਰਜ਼ਾ ਸੀ, ਜਦੋਂਕਿ ਉਹ 2 ਏਕੜ ਜ਼ਮੀਨ ਦਾ ਮਾਲਕ ਸੀ।
6 ਜੁਲਾਈ ਨੂੰ ਰਾਏਕੋਟ ਜ਼ਿਲੇ ਦੇ ਪਿੰਡ ਬੁਰਜ ਹਰੀ ਸਿੰਘ ਵਿਖੇ ਕਿਸਾਨ ਜਿੰਦਰਪਾਲ ਸਿੰਘ (31), ਜਿਸ 'ਤੇ 5 ਲੱਖ ਦੇ ਕਰੀਬ ਕਰਜ਼ਾ ਸੀ, ਨੇ ਕਰਜ਼ੇ ਦੀ ਪ੍ਰੇਸ਼ਾਨੀ ਕਾਰਣ ਕੀਟਨਾਸ਼ਕ ਦਵਾਈ ਪੀ ਕੇ ਖੁਦਕੁਸ਼ੀ ਕਰ ਲਈ ਸੀ।
8 ਜੁਲਾਈ ਨੂੰ ਫਰੀਦਕੋਟ ਜ਼ਿਲੇ ਦੇ ਕਸਬੇ ਸਾਦਿਕ ਅਧੀਨ ਆਉਂਦੇ ਪਿੰਡ ਸੰਗਤਪੁਰਾ ਵਿਖੇ ਕਿਸਾਨ ਜੋਗਿੰਦਰ ਸਿੰਘ (45) ਪੁੱਤਰ ਬਲਵੀਰ ਸਿੰਘ ਨੇ ਕਰਜ਼ੇ ਤੋਂ ਚਿੰਤਤ ਹੁੰਦਿਆਂ ਖੁਦਕੁਸ਼ੀ ਕਰ ਲਈ ਸੀ। ਕਿਸਾਨ ਸਿਰ ਬੈਂਕਾਂ ਤੇ ਆੜ੍ਹਤੀਆਂ ਦਾ 10 ਲੱਖ ਦਾ ਕਰਜ਼ਾ ਸੀ।
9 ਜੁਲਾਈ ਦੇ ਦਿਨ ਬੰਗਾ ਦੇ ਪਿੰਡ ਘੁੰਮਣਾਂ ਦੇ ਕਿਸਾਨ ਗੁਰਮੁਖ ਸਿੰਘ (56) ਨੇ ਕਰਜ਼ੇ ਕਾਰਣ ਖੁਦਕੁਸ਼ੀ ਕਰ ਲਈ ਸੀ।
13 ਜੁਲਾਈ ਵਾਲੇ ਦਿਨ ਪਠਾਨਕੋਟ ਦੇ ਪਿੰਡ ਦਾਰੋਸਲਾਮ ਵਿਖੇ ਮਜ਼ਦੂਰ ਗੋਪਾਲ ਪੁੱਤਰ ਚਿਮਨ ਲਾਲ ਨੇ ਘਰ ਦੀ ਤੰਗੀ ਕਾਰਣ ਜ਼ਹਿਰੀਲੀ ਚੀਜ਼ ਨਿਗਲ ਲਈ ਸੀ, ਜਿਸ ਕਰ ਕੇ ਇਲਾਜ ਦੌਰਾਨ ਉਸਦੀ ਮੌਤ ਹੋ ਗਈ ਸੀ।
14 ਜੁਲਾਈ ਨੂੰ ਬੋਹਾ ਦੇ ਪਿੰਡ ਸੈਦੇਵਾਲਾ ਵਿਖੇ ਮਜ਼ਦੂਰ ਬਿਕਰਮਜੀਤ ਸਿੰਘ ਨੇ ਘਰ ਦੀ ਗੁਰਬਤ ਤੋਂ ਤੰਗ ਆ ਕੇ ਘਰ 'ਚ ਫਾਹ ਲਾ ਲਿਆ ਸੀ।
16 ਜੁਲਾਈ ਨੂੰ ਬਠਿੰਡਾ ਜ਼ਿਲੇ ਦੇ ਪਿੰਡ ਰਾਜਗੜ੍ਹ ਕੁੱਬੇ ਵਿਖੇ ਕਰਜ਼ੇ ਤੋਂ ਪ੍ਰੇਸ਼ਾਨ ਨੌਜਵਾਨ ਗੁਰਮੀਤ ਸਿੰਘ (33) ਪੁੱਤਰ ਭੋਲਾ ਸਿੰਘ ਨੇ ਸਲਫ਼ਾਸ ਨਿਗਲ ਕੇ ਆਤਮ-ਹੱਤਿਆ ਕੀਤੀ ਸੀ।
17 ਜੁਲਾਈ ਨੂੰ ਦੀਨਾਨਗਰ ਨਜ਼ਦੀਕ ਪਿੰਡ ਕੋਹਲੀਆਂ ਵਿਖੇ ਕਰਜ਼ੇ ਦੇ ਸਤਾਏ ਕਿਸਾਨ ਤਰਲੋਕ ਸਿੰਘ (63) ਪੁੱਤਰ ਜਗਤਾਰ ਸਿੰਘ, ਜੋ ਤਿੰਨ ਏਕੜ ਜ਼ਮੀਨ ਦਾ ਮਾਲਕ ਸੀ ਤੇ ਸਿਰ 'ਤੇ 5 ਲੱਖ ਦਾ ਕਰਜ਼ਾ ਸੀ, ਨੇ ਖੇਤ 'ਚ ਮੋਟਰ ਵਾਲੇ ਕਮਰੇ 'ਚ ਫ਼ਾਹ ਲਾ ਲਿਆ ਸੀ। ਇਸੇ ਦਿਨ ਹੁਸ਼ਿਆਰਪੁਰ ਦੇ ਪਿੰਡ ਸਿੰਗੜੀਵਾਲਾ ਦੇ ਰਹਿਣ ਵਾਲੇ ਮਜ਼ਦੂਰ ਮਨਦੀਪ ਸਿੰਘ (40) ਪੁੱਤਰ ਇਕਬਾਲ ਸਿੰਘ ਨੇ ਮਾਨਸਿਕ ਪ੍ਰੇਸ਼ਾਨੀ ਕਾਰਣ ਫਾਹ ਲਾ ਲਿਆ ਸੀ। ਇਸ ਤੋਂ ਇਲਾਵਾ ਬਠਿੰਡਾ ਜ਼ਿਲੇ ਦੇ ਪਿੰਡ ਰਾਮਾਂ ਮੰਡੀ ਦੇ ਮਜ਼ਦੂਰ ਅਸ਼ੋਕ ਕੁਮਾਰ (27) ਪੁੱਤਰ ਸਵਨੰਦ ਕਿਸ਼ੋਰ ਨੇ ਘਰ ਦੀ ਗਰੀਬੀ ਤੋਂ ਤੰਗ ਆ ਕੇ ਖ਼ੁਦ ਨੂੰ ਫਾਹ ਲਾ ਲਿਆ ਸੀ।
18 ਜੁਲਾਈ ਦੇ ਦਿਨ ਮਾਨਸਾ ਦੇ ਪਿੰਡ ਬੁਰਜ ਭਲਾਈਕੇ ਦੇ ਖੇਤ ਮਜ਼ਦੂਰ ਸਰਦੂਲ ਸਿੰਘ (40) ਨੇ ਸਲਫਾਸ ਨਿਗਲ ਕੇ ਖੁਦਕੁਸ਼ੀ ਕਰ ਲਈ ਸੀ। ਮ੍ਰਿਤਕ ਕਰਜ਼ੇ ਤੋਂ ਚਿੰਤਤ ਸੀ।
22 ਜੁਲਾਈ ਨੂੰ ਨਵਾਂਸ਼ਹਿਰ ਦੇ ਮੁਹੱਲਾ ਰੌਂਤਾ ਦੇ ਰਹਿਣ ਵਾਲੇ ਨੌਜਵਾਨ ਜਗਜੀਤ ਸਿੰਘ (30) ਪੁੱਤਰ ਭੁਪਿੰਦਰ ਸਿੰਘ ਨੇ ਫਾਹ ਲਾ ਲਿਆ ਸੀ। ਮ੍ਰਿਤਕ ਸਿਰ ਢਾਈ ਲੱਖ ਦੇ ਕਰੀਬ ਕਰਜ਼ਾ ਸੀ। ਇਸੇ ਦਿਨ ਬਰੇਟਾ ਨੇੜੇ ਪਿੰਡ ਬਹਾਦਰਪੁਰ ਵਿਖੇ ਕਰਜ਼ਾਈ ਕਿਸਾਨ ਪ੍ਰੀਤਮ ਸਿੰਘ ਪੁੱਤਰ ਜ਼ੋਰਾ ਸਿੰਘ ਨੇ ਕਰਜ਼ੇ ਤੋਂ ਚਿੰਤਤ ਹੁੰਦਿਆਂ ਖੁਦਕੁਸ਼ੀ ਕਰ ਲਈ ਸੀ। ਮ੍ਰਿਤਕ ਕਿਸਾਨ ਸਿਰ 8 ਲੱਖ ਦਾ ਕਰਜ਼ਾ ਸੀ, ਜਦੋਂਕਿ ੳਹ 5 ਏਕੜ ਜ਼ਮੀਨ ਦਾ ਮਾਲਕ ਸੀ।
23 ਜੁਲਾਈ ਨੂੰ ਫ਼ਰੀਦਕੋਟ ਜ਼ਿਲੇ ਦੇ ਕਸਬੇ ਸਾਦਿਕ ਦੇ ਪਿੰਡ ਸ਼ੇਰ ਸਿੰਘ ਵਾਲਾ ਵਿਖੇ ਕਰਜ਼ੇ ਤੋਂ ਚਿੰਤਤ ਕਿਸਾਨ ਜਸਵੀਰ ਸਿੰਘ (49) ਪੁੱਤਰ ਨੈਬ ਸਿੰਘ, ਜਿਸ ਸਿਰ ਬੈਂਕਾਂ ਤੇ ਆੜ੍ਹਤੀਆਂ ਦਾ 7 ਲੱਖ ਦਾ ਕਰਜ਼ਾ ਸੀ, ਨੇ ਕੀਟਨਾਸ਼ਕ ਦਵਾਈ ਪੀ ਕੇ ਆਤਮਹੱਤਿਆ ਕਰ ਲਈ ਸੀ। ਇਸੇ ਦਿਨ ਦਸੂਹਾ ਦੇ ਪਿੰਡ ਉਸਮਾਨ ਸ਼ਹੀਦਾਂ ਵਿਖੇ ਕਰਜ਼ੇ ਦੀ ਪ੍ਰੇਸ਼ਾਨੀ ਕਾਰਣ ਕਿਸਾਨ ਅਜੀਤ ਸਿੰਘ ਪੁੱਤਰ ਮੋਹਿੰਦਰ ਸਿੰਘ ਨੇ ਸਲਫਾਸ ਨਿਗਲ ਲਈ ਸੀ, ਜਿਸ ਕਾਰਣ ਉਸਦੀ ਮੌਤ ਹੋ ਗਈ ਸੀ।
24 ਜੁਲਾਈ ਨੂੰ ਮੁਕੰਦਪੁਰ ਦੇ ਪਿੰਡ ਔਜਲਾ ਵਿਖੇ ਕਰਜ਼ਾਈ ਕਿਸਾਨ ਸੁਖਦੇਵ ਸਿੰਘ ਨੇ ਪੱਖੇ ਨਾਲ ਲਟਕ ਕੇ ਖੁਦਕੁਸ਼ੀ ਕਰ ਲਈ ਸੀ।
26 ਜੁਲਾਈ ਵਾਲੇ ਦਿਨ ਸਮਾਣਾ ਦੇ ਪਿੰਡ ਨਨਹੇੜਾ ਤੋਂ ਲਾਪਤਾ ਹੋਏ 85 ਸਾਲਾ ਕਿਸਾਨ ਜੰਗ ਸਿੰਘ ਦੀ ਲਾਸ਼ ਭਾਖੜਾ ਨਹਿਰ ਤੋਂ ਬਰਾਮਦ ਹੋਈ ਸੀ, ਪਰਿਵਾਰਿਕ ਮੈਂਬਰਾਂ ਅਨੁਸਾਰ ਮ੍ਰਿਤਕ ਆਰਥਿਕ ਤੰਗੀ ਕਰ ਕੇ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਰਹਿ ਰਿਹਾ ਸੀ।
27 ਜੁਲਾਈ ਨੂੰ ਘੁਮਾਣ ਦੇ ਪਿੰਡ ਪੈਰੋਸ਼ਾਹ ਵਿਖੇ ਕਿਸਾਨ ਅਮਨਦੀਪ ਸਿੰਘ (38), ਜਿਸਦੇ ਸਿਰ ਬੈਂਕ ਦਾ ਕਰੀਬ 13 ਲੱਖ ਦਾ ਕਰਜ਼ਾ ਸੀ, ਨੇ ਮਾਨਸਿਕ ਪ੍ਰੇਸ਼ਾਨੀ ਕਾਰਣ ਟਰੇਨ ਥੱਲੇ ਆ ਕੇ ਖੁਦਕੁਸ਼ੀ ਕਰ ਲਈ ਸੀ। ਇਸੇ ਦਿਨ ਮੋਗਾ ਜ਼ਿਲੇ ਦੇ ਪਿੰਡ ਕਾਵਾਂ ਵਾਲਾ ਦੇ ਰਹਿਣ ਵਾਲੇ ਨੌਜਵਾਨ ਕੁਲਦੀਪ ਸਿੰਘ (18) ਨੇ ਆਰਥਿਕ ਤੰਗੀ ਕਾਰਣ ਖ਼ੁਦ ਨੂੰ ਫਾਹ ਲਾ ਲਿਆ ਸੀ।
28 ਜੁਲਾਈ ਨੂੰ ਬਠਿੰਡਾ ਦੇ ਗੋਨਿਆਣਾ ਮੰਡੀ (ਬਠਿੰਡਾ) ਕਸਬੇ ਅੰਦਰ ਆਉਂਦੇ ਪਿੰਡ ਕੋਠੇ ਸਪੂਰਾ ਸਿੰਘ ਵਾਲਾ ਵਿਖੇ ਕਿਸਾਨ ਸਤਨਾਮ ਸਿੰਘ ਪੁੱਤਰ ਮਲਕੀਤ ਸਿੰਘ ਨੇ ਸਪ੍ਰੇਅ ਪੀ ਕੇ ਆਤਮਹੱਤਿਆ ਕੀਤੀ ਸੀ। ਕਿਸਾਨ ਦਾ 14 ਹਜ਼ਾਰ ਏਕੜ ਝੋਨਾ ਪਾਣੀ ਨਾਲ ਡੁੱਬ ਗਿਆ ਸੀ, ਜਿਸ ਕਾਰਣ ਉਹ ਪ੍ਰੇਸ਼ਾਨ ਸੀ। ਇਸੇ ਦਿਨ ਨਵਾਂਸ਼ਹਿਰ ਦੇ ਪਿੰਡ ਬਸਿਆਲਾ ਦੇ ਨੌਜਵਾਨ ਸੁਖਵਿੰਦਰ (24) ਨੇ ਆਰਥਿਕ ਤੰਗੀ ਕਾਰਣ ਸਲਫਾਸ ਨਿਗਲ ਲਈ ਸੀ।
29 ਜੁਲਾਈ ਨੂੰ ਬਰਨਾਲਾ ਸ਼ਹਿਰ ਦੇ ਜੋਗਿੰਦਰ ਸਿੰਘ (60) ਪੁੱਤਰ ਬਾਬੂ ਸਿੰਘ ਨੇ ਘਰ ਦਾ ਮਾੜੇ ਹਾਲਾਤ ਤੋਂ ਪ੍ਰੇਸ਼ਾਨ ਹੁੰਦਿਆਂ ਜ਼ਹਿਰੀਲੀ ਚੀਜ਼ ਨਿਕਲ ਕੇ ਖੁਦਕੁਸ਼ੀ ਕਰ ਲਈ ਸੀ। ਮ੍ਰਿਤਕ ਕਰਜ਼ਾਈ ਸੀ, ਜਿਸ ਕਰ ਕੇ ਬੈਂਕ ਵੱਲੋਂ ਉਸ ਨੂੰ ਨੋਟਿਸ ਕੱਢ ਦਿੱਤਾ ਗਿਆ ਸੀ।
31 ਜੁਲਾਈ ਨੂੰ ਪੰਜਾਬ 'ਚ ਦੋ ਥਾਵਾਂ 'ਚ ਮਜ਼ਦੂਰ ਤੇ ਕਿਸਾਨ ਵੱਲੋਂ ਖੁਦਕੁਸ਼ੀ ਕੀਤੀ ਗਈ ਸੀ। ਭਗਤਾ ਭਾਈਕਾ (ਬਠਿੰਡਾ) ਵਿਖੇ ਮਜ਼ਦੂਰ ਦਰਸ਼ਨ ਸਿੰਘ (34) ਵਾਸੀ ਕੋਠਾਗੁਰੂ ਜੋ ਰੇਹੜੀ-ਫੜ੍ਹੀ ਦਾ ਕੰਮ ਕਰਦਾ ਸੀ ਤੇ ਡੇਢ ਲੱਖ ਦਾ ਕਰਜ਼ਾਈ ਸੀ, ਜਿਸ ਕਰ ਕੇ ਉਸ ਨੇ ਫਾਹ ਲਾ ਲਿਆ ਸੀ। ਇਸੇ ਦਿਨ ਲਹਿਰਾਗਾਗਾ ਦੇ ਪਿੰਡ ਰਾਮਪੁਰਾ ਜਵਾਹਰਵਾਲਾ ਵਿਖੇ ਕਿਸਾਨ ਜਗਦੇਵ ਸਿੰਘ, ਜਿਸ ਦੇ ਸਿਰ ਬੈਂਕ ਤੇ ਕੋਆਪ੍ਰੇਟਿਵ ਸੋਸਾਇਟੀ ਦਾ 5 ਲੱਖ ਦੇ ਕਰੀਬ ਕਰਜ਼ਾ ਸੀ, ਨੇ ਕਰਜ਼ ਪ੍ਰੇਸ਼ਾਨੀ ਕਾਰਣ ਸਪ੍ਰੇਅ ਪੀ ਕੇ ਆਪਣੀ ਜੀਵਨ ਲੀਲਾ ਖਤਮ ਕਰ ਲਈ ਸੀ।

ਸਰਕਾਰ ਨਿਭਾਏ ਵਾਅਦੇ ਤਾਂ ਘੱਟ ਸਕਦੈ ਖੁਦਕੁਸ਼ੀਆਂ ਦਾ ਰੁਝਾਨ : ਸਿੱਧੂ
ਕੈਪਟਨ ਸਰਕਾਰ ਵੱਲੋਂ ਚੋਣਾਂ ਸਮੇਂ ਹਰ ਕਿਸਾਨ ਦਾ ਕਰਜ਼ਾ ਮੁਆਫ਼ ਕੀਤੇ ਜਾਣ ਦਾ ਵਾਅਦਾ ਕੀਤਾ ਗਿਆ ਸੀ ਪਰ ਇਹ ਵਾਅਦਾ ਅਮਲੀ ਤੌਰ 'ਤੇ ਪੂਰਾ ਨਹੀਂ ਹੋ ਸਕਿਆ। ਅੱਜ ਪੰਜਾਬ ਦੇ ਹਾਲਾਤ ਇਸ ਕਦਰ ਬਦਤਰ ਹੋ ਗਏ ਹਨ ਕਿ ਕਿਸਾਨ-ਮਜ਼ਦੂਰ ਕਰਜ਼ਿਆਂ ਕਾਰਣ ਖੁਦਕੁਸ਼ੀਆਂ ਕਰ ਰਹੇ ਹਨ ਕਿਉਂਕਿ ਉਨ੍ਹਾਂ ਕੋਲ ਹੋਰ ਕੋਈ ਚਾਰਾ ਨਹੀਂ, ਜਦੋਂਕਿ ਸਰਕਾਰ ਵੀ ਅਜਿਹੇ ਕਿਸਾਨਾਂ ਦੀ ਬਾਂਹ ਨਹੀਂ ਫੜ ਰਹੀ। ਇਸ ਤੋਂ ਇਲਾਵਾ ਕੁਦਰਤੀ ਕਰੋਪੀਆਂ ਕਰ ਕੇ ਹਰ ਸੀਜ਼ਨ ਦੌਰਾਨ ਫਸਲਾਂ ਦੀ ਬਰਬਾਦੀ ਹੁੰਦੀ ਹੈ, ਜਿਸਦੇ ਮੁਆਵਜ਼ਿਆਂ ਲਈ ਕਿਸਾਨ ਸਰਕਾਰਾਂ ਤੋਂ ਗੁਹਾਰ ਤਾਂ ਲਾਉਂਦੇ ਹਨ ਪਰ ਉਨ੍ਹਾਂ ਦੀ ਸਾਰ ਨਹੀਂ ਲਈ ਜਾਂਦੀ। ਜੇਕਰ ਸਰਕਾਰ ਆਪਣੇ ਵਾਅਦੇ ਚੰਗੀ ਤਰ੍ਹਾਂ ਪੂਰੇ ਕਰੇ ਤਾਂ ਸ਼ਾਇਦ ਕਿਰਸਾਨੀ ਨੂੰ ਬਚਾਇਆ ਜਾ ਸਕਦਾ ਹੈ।