ਜਲੰਧਰ (ਖੁਰਾਣਾ)-ਸ਼ਹਿਰ ਦੇ ਪ੍ਰਸਿੱਧ ਜਲੰਧਰ ਜਿਮਖਾਨਾ ਕਲੱਬ ਦੀਆਂ ਚੋਣਾਂ ਨੂੰ ਲੈ ਕੇ ਇੰਤਜ਼ਾਰ ਦੀਆਂ ਘੜੀਆਂ ਹੁਣ ਖ਼ਤਮ ਹੋ ਗਈਆਂ ਹਨ। ਅੱਜ ਸਵੇਰੇ 8 ਵਜੇ ਤੋਂ ਵੋਟਿੰਗ ਜਾਰੀ ਹੈ ਅਤੇ ਦੇਰ ਸ਼ਾਮ ਤੱਕ ਸਾਰੇ ਨਤੀਜੇ ਐਲਾਨ ਦਿੱਤੇ ਜਾਣਗੇ। ਕਲੱਬ ਦਾ ਅਗਲਾ ਸੈਕ੍ਰੇਟਰੀ ਕੌਣ ਬਣੇਗਾ, ਇਸ ’ਤੇ ਸਭ ਤੋਂ ਵੱਧ ਨਜ਼ਰਾਂ ਟਿਕੀਆਂ ਹੋਈਆਂ ਹਨ। ਇਸ ਤੋਂ ਇਲਾਵਾ ਵਾਈਸ ਪ੍ਰੈਜ਼ੀਡੈਂਟ ਅਤੇ ਕੈਸ਼ੀਅਰ ਦੇ ਅਹੁਦੇ ’ਤੇ ਵੀ ਇਸ ਵਾਰ ਸਖਤ ਮੁਕਾਬਲਾ ਹੈ।
ਜ਼ਿਕਰਯੋਗ ਹੈ ਕਿ ਐਗਜ਼ੀਕਿਊਟਿਵ ਪੋਸਟ ਲਈ 16 ਉਮੀਦਵਾਰ ਮੈਦਾਨ ਵਿਚ ਹਨ, ਜਿਨ੍ਹਾਂ ਵਿਚੋਂ 10 ਦੀ ਚੋਣ ਹੋਣੀ ਹੈ। ਕਈ ਨਵੇਂ ਉਮੀਦਵਾਰਾਂ ਨੇ ਇਸ ਵਾਰ ਕਾਫ਼ੀ ਮਿਹਨਤ ਕੀਤੀ ਹੈ, ਇਸ ਲਈ ਮੰਨਿਆ ਜਾ ਰਿਹਾ ਹੈ ਕਿ 2-3 ਨਵੇਂ ਚਿਹਰਿਆਂ ਦੀ ਐਗਜ਼ੀਕਿਊਟਿਵ ਵਿਚ ਐਂਟਰੀ ਹੋ ਸਕਦੀ ਹੈ, ਜਦਕਿ ਕੁਝ ਪੁਰਾਣੇ ਉਮੀਦਵਾਰਾਂ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਅਜਿਹੇ ਵਿਚ ਐਗਜ਼ੀਕਿਊਟਿਵ ਦੇ ਨਤੀਜੇ ਵੀ ਕਾਫ਼ੀ ਦਿਲਚਸਪ ਰਹਿਣ ਦੀ ਸੰਭਾਵਨਾ ਹੈ।
ਇਹ ਵੀ ਪੜ੍ਹੋ: ਜਲੰਧਰ 'ਚ ਖਾਲੀ ਪਲਾਟ 'ਚੋਂ ਨੌਜਵਾਨ ਦੀ ਲਾਸ਼ ਮਿਲਣ ਨਾਲ ਮਚਿਆ ਹੜਕੰਪ! ਕਤਲ ਦਾ ਖ਼ਦਸ਼ਾ
ਕੋਈ ਵੀ ਜਾਇਜ਼ ਆਈ. ਡੀ. ਵਿਖਾ ਕੇ ਪਾਈ ਜਾ ਸਕੇਗੀ ਵੋਟ
ਰਿਟਰਨਿੰਗ ਅਫ਼ਸਰ ਵੱਲੋਂ ਵੋਟਰਾਂ ਲਈ ਨਿਯਮ ਜਾਰੀ ਕੀਤੇ ਗਏ ਹਨ। ਹਰੇਕ ਵੋਟਰ ਨੂੰ ਫੋਟੋ ਵਾਲੀ ਵੋਟਰ ਸਲਿਪ ਮਿਲੇਗੀ। ਪਛਾਣ ਲਈ ਕਲੱਬ ਆਈ.ਕਾਰਡ ਤੋਂ ਇਲਾਵਾ ਆਧਾਰ ਕਾਰਡ, ਪੈਨ ਕਾਰਡ, ਪਾਸਪੋਰਟ, ਡਰਾਈਵਿੰਗ ਲਾਇਸੈਂਸ ਅਤੇ ਹੋਰ ਸਰਕਾਰੀ ਆਈ. ਡੀ. ਕਾਰਡ ਦਿਖਾ ਕੇ ਵੀ ਵੋਟ ਪਾਈ ਜਾ ਸਕੇਗੀ। ਪੋਲਿੰਗ ਸਟੇਸ਼ਨ ਦੇ 100 ਮੀਟਰ ਦੇ ਘੇਰੇ ਵਿਚ ਸਭ ਤਰ੍ਹਾਂ ਦੇ ਫੋਨ ਬੈਨ ਰਹਿਣਗੇ। ਕਲੱਬ ਵਿਚ ਦਾਖ਼ਲਾ ਸਿਰਫ਼ ਵੋਟਰ, ਉਮੀਦਵਾਰ ਅਤੇ ਉਨ੍ਹਾਂ ਦੇ ਏਜੰਟਾਂ ਨੂੰ ਹੀ ਮਿਲੇਗਾ। ਚੋਣਾਂ ਨੂੰ ਲੈ ਕੇ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਹਨ। ਸਕਾਈਲਾਰਕ ਚੌਕ ਤੋਂ ਮਿਸ਼ਨ ਚੌਕ ਤੱਕ ਦਾ ਰਸਤਾ ਟ੍ਰੈਫਿਕ ਲਈ ਬੰਦ ਕੀਤਾ ਜਾ ਰਿਹਾ ਹੈ। ਕਲੱਬ ਕੰਪਲੈਕਸ ਦੇ ਸਾਹਮਣੇ ਵਾਲੀ ਸੜਕ ’ਤੇ ਸ਼ਨੀਵਾਰ ਨੂੰ ਵੱਡੀ ਗਿਣਤੀ ਵਿਚ ਉਮੀਦਵਾਰਾਂ ਦੇ ਹੋਰਡਿੰਗਜ਼ ਨਜ਼ਰ ਆਏ।
ਕਲੱਬ ਮੈਨੇਜਮੈਂਟ ਵਿਚ ਫਾਈਨਾਂਸ਼ੀਅਲ ਐਕਸਪਰਟ ਵਜੋਂ ਜਾਣੇ ਜਾਂਦੇ ਹਨ ਸੀ. ਏ. ਰਾਜੀਵ ਬਾਂਸਲ
ਕਲੱਬ ਮੈਨੇਜਮੈਂਟ ਵਿਚ ਪਿਛਲੀਆਂ ਤਿੰਨ ਟਰਮਾਂ ਵਿਚ ਸ਼ਾਨਦਾਰ ਜਿੱਤ ਹਾਸਲ ਕਰਨ ਵਾਲੇ ਸੀ. ਏ. ਰਾਜੀਵ ਬਾਂਸਲ ਫਾਈਨਾਂਸ਼ੀਅਲ ਐਕਸਪਰਟ ਵਜੋਂ ਆਪਣੀ ਵੱਖਰੀ ਪਛਾਣ ਰੱਖਦੇ ਹਨ। ਮੈਨੇਜਮੈਂਟ ਵਿਚ ਇਕੱਲੇ ਚਾਰਟਰਡ ਅਕਾਊਂਟੈਂਟ ਹੋਣ ਕਰਕੇ ਟੈਕਸੇਸ਼ਨ ਅਤੇ ਫਾਈਨਾਂਸ਼ੀਅਲ ਮਾਮਲਿਆਂ ਵਿਚ ਉਨ੍ਹਾਂ ਤੋਂ ਅਕਸਰ ਸਲਾਹ-ਮਸ਼ਵਰਾ ਲਿਆ ਜਾਂਦਾ ਰਿਹਾ ਹੈ। ਇਸ ਵਾਰ ਵੀ ਉਨ੍ਹਾਂ ਦੀ ਚੋਣ ਸਥਿਤੀ ਮਜ਼ਬੂਤ ਮੰਨੀ ਜਾ ਰਹੀ ਹੈ ਅਤੇ ਸਮਰਥਕਾਂ ਨੂੰ ਰਿਕਾਰਡ ਵੋਟਾਂ ਨਾਲ ਜਿੱਤ ਦੀ ਉਮੀਦ ਹੈ। ਰਾਜੀਵ ਬਾਂਸਲ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਕਈ ਫਾਈਨਾਂਸ਼ੀਅਲ ਇੰਸਟੀਚਿਊਸ਼ਨਜ਼ ਅਤੇ ਐਸੋਸੀਏਸ਼ਨਜ਼ ਨਾਲ ਜੁੜੇ ਹੋਏ ਹਨ, ਜਿਸ ਨਾਲ ਉਨ੍ਹਾਂ ਦਾ ਆਧਾਰ ਮਜ਼ਬੂਤ ਮੰਨਿਆ ਜਾਂਦਾ ਹੈ। ਸ਼ਹਿਰ ਦੇ ਪ੍ਰਮੁੱਖ ਚਾਰਟਰਡ ਅਕਾਊਂਟੈਂਟਸ, ਟੈਕਸ ਪ੍ਰੋਫੈਸ਼ਨਲਜ਼ ਅਤੇ ਇਨਕਮ ਟੈਕਸ ਬਾਰ ਆਦਿ ਵੀ ਮਤਾ ਪਾਸ ਕਰਕੇ ਉਨ੍ਹਾਂ ਨੂੰ ਸਮਰਥਨ ਦੇਣ ਦਾ ਐਲਾਨ ਕਰ ਚੁੱਕੇ ਹਨ।
ਇਹ ਵੀ ਪੜ੍ਹੋ: ਜਲੰਧਰ: ਨੇਹਾ ਕਤਲ ਕਾਂਡ 'ਚ ਵੱਡਾ ਖ਼ੁਲਾਸਾ! ਕਰੋੜਾਂ ਦੀ ਕੋਠੀ ਚਰਚਾ 'ਚ, ਪਤੀ ਉਮੰਗ ਦੀ ਗਰਲਫਰੈਂਡ ਨੇ...
ਕਲੱਬ ਵਿਚ ਵੂਮੈਨ ਕ੍ਰਿਕਟ ਸ਼ੁਰੂ ਕਰਨ ਦਾ ਸਿਹਰਾ ਸ਼ਾਲਿਨੀ ਕਾਲੜਾ ਨੂੰ
ਪਹਿਲਾਂ ਜਿਮਖਾਨਾ ਕਲੱਬ ਵਿਚ ਸਿਰਫ਼ ਮਰਦਾਂ ਦਾ ਦਬਦਬਾ ਹੁੰਦਾ ਸੀ ਅਤੇ ਮੈਨੇਜਮੈਂਟ ਵਿਚ ਕਦੇ ਕੋਈ ਮਹਿਲਾ ਮੈਂਬਰ ਨਹੀਂ ਰਹੀ। ਅਨੂ ਮਾਟਾ ਨੇ ਐਗਜ਼ੀਕਿਊਟਿਵ ਵਜੋਂ ਐਂਟਰੀ ਲੈ ਕੇ ਇਸ ਦਬਦਬੇ ਨੂੰ ਤੋੜਿਆ ਅਤੇ ਲਗਾਤਾਰ ਕਈ ਸਾਲ ਮੈਨੇਜਮੈਂਟ ਵਿਚ ਰਹੇ। ਪਿਛਲੀ ਵਾਰ ਸ਼ਾਲਿਨੀ ਕਾਲੜਾ ਅਤੇ ਵਿਨੀ ਸ਼ਰਮਾ ਧਵਨ ਨੇ ਵੀ ਮੈਨੇਜਮੈਂਟ ਵਿਚ ਐਂਟਰੀ ਕੀਤੀ ਅਤੇ ਚੰਗੇ ਫਰਕ ਨਾਲ ਜਿੱਤ ਹਾਸਲ ਕੀਤੀ।
ਸ਼ਾਲਿਨੀ ਕਾਲੜਾ ਨੇ ਵੂਮੈਨ ਇੰਪਾਵਰਮੈਂਟ ਦੇ ਖੇਤਰ ਵਿਚ ਆਪਣੀ ਵਿਸ਼ੇਸ਼ ਪਛਾਣ ਬਣਾਈ ਹੈ ਅਤੇ ਕਲੱਬ ਵਿਚ ਵੂਮੈਨ ਕ੍ਰਿਕਟ ਸ਼ੁਰੂ ਕਰਨ ਦਾ ਸਿਹਰਾ ਵੀ ਉਨ੍ਹਾਂ ਨੂੰ ਜਾਂਦਾ ਹੈ। ਜਿਮਖਾਨਾ ਪ੍ਰੀਮੀਅਰ ਲੀਗ (ਜੀ. ਪੀ. ਐੱਲ.) ਨਾਈਟ ਕ੍ਰਿਕਟ ਟੂਰਨਾਮੈਂਟ ਕਈ ਸਾਲਾਂ ਤੋਂ ਹੋ ਰਿਹਾ ਹੈ, ਪਰ ਪਹਿਲਾਂ ਇਸ ਵਿਚ ਮਹਿਲਾ ਕ੍ਰਿਕਟ ਟੀਮ ਨਹੀਂ ਖੇਡਦੀ ਸੀ। ਸ਼ਾਲਿਨੀ ਕਾਲੜਾ ਦੇ ਯਤਨਾਂ ਨਾਲ ਲਗਾਤਾਰ ਦੋ ਵਾਰ ਮਹਿਲਾ ਕ੍ਰਿਕਟ ਟੀਮ ਦੀ ਐਂਟਰੀ ਹੋ ਚੁੱਕੀ ਹੈ ਅਤੇ ਇਸ ਵਾਰ ਜੇਤੂ ਟੀਮ ਨੂੰ ਵੱਡਾ ਕੈਸ਼ ਪ੍ਰਾਈਜ਼ ਵੀ ਮਿਲਿਆ। ਮੰਨਿਆ ਜਾ ਰਿਹਾ ਹੈ ਕਿ ਅਗਲੇ ਜੀ. ਪੀ. ਐੱਲ. ਵਿਚ ਵੀ ਮਹਿਲਾ ਟੀਮਾਂ ਵਿਚਾਲੇ ਰੋਮਾਂਚਕ ਮੁਕਾਬਲੇ ਦੇਖਣ ਨੂੰ ਮਿਲਣਗੇ ਅਤੇ ਕਲੱਬ ਵਿਚ ਵੂਮੈਨ ਕ੍ਰਿਕਟ ਦਾ ਦਾਇਰਾ ਹੋਰ ਵਧੇਗਾ। ਇਸ ਤੋਂ ਇਲਾਵਾ ਸ਼ਾਲਿਨੀ ਕਾਲੜਾ ਨੇ ਕਲੱਬ ਦੀ ਤਰੱਕੀ ਅਤੇ ਸੁਧਾਰ ਲਈ ਵੀ ਕਈ ਕੰਮ ਕੀਤੇ ਹਨ, ਜਿਸ ਕਰਕੇ ਇਸ ਵਾਰ ਫਿਰ ਉਨ੍ਹਾਂ ਦੀ ਐਗਜ਼ੀਕਿਊਟਿਵ ਟੀਮ ਵਿਚ ਐਂਟਰੀ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ।
ਇਹ ਵੀ ਪੜ੍ਹੋ: ਪੰਜਾਬ ਵਾਸੀ ਦੇਣ ਧਿਆਨ! ਪਿੰਡਾਂ ’ਚ ਫ਼ੈਲਣ ਲੱਗੀਆਂ ਗੰਭੀਰ ਬੀਮਾਰੀਆਂ, 7 ਸਤੰਬਰ ਲਈ ਅਹਿਮ ਐਲਾਨ
ਕਲੱਬ ਨੂੰ ਮਾਡਰਨ ਅਤੇ ਮੈਂਬਰਜ਼ ਫ੍ਰੈਂਡਲੀ ਬਣਾਵਾਂਗੇ : ਅਮਿਤ ਕੁਕਰੇਜਾ
ਕਲੱਬ ਚੋਣਾਂ ਵਿਚ ਸੈਕਟਰੀ ਅਹੁਦੇ ਦੇ ਉਮੀਦਵਾਰ ਅਮਿਤ ਕੁਕਰੇਜਾ ਨੇ ਕਿਹਾ ਹੈ ਕਿ ਅਚੀਵਰਜ਼ ਗਰੁੱਪ ਦੇ ਮੈਨੀਫੈਸਟੋ ਵਿਚ ਕੀਤੇ ਗਏ ਸਾਰੇ ਵਾਅਦੇ ਪੂਰੀ ਇਮਾਨਦਾਰੀ ਨਾਲ ਪੂਰੇ ਕੀਤੇ ਜਾਣਗੇ ਅਤੇ ਕਲੱਬ ਨੂੰ ਮਾਡਰਨ ਤੇ ਮੈਂਬਰਜ਼ ਫ੍ਰੈਂਡਲੀ ਬਣਾਇਆ ਜਾਵੇਗਾ।
ਉਨ੍ਹਾਂ ਕਿਹਾ ਕਿ ਫੂਡ ਦੀ ਕੁਆਲਿਟੀ, ਕੁਆਂਟਿਟੀ ਅਤੇ ਸਰਵਿਸ ਬਿਹਤਰ ਕਰਨ ਦੇ ਨਾਲ ਲਿਕਰ ਰੇਟ ਸਬਸਿਡਾਈਜ਼ਡ ਕਰਨ ਦਾ ਯਤਨ ਹੋਵੇਗਾ। ਸੀਨੀਅਰ ਸਿਟੀਜ਼ਨ ਉਪਹਾਰ ਸਕੀਮ ਦੀ ਉਮਰ 70 ਤੋਂ ਘਟਾ ਕੇ 65 ਸਾਲ ਕਰਨ, ਵਿਸ਼ੇਸ਼ ਸੀਨੀਅਰ ਸਿਟੀਜ਼ਨ ਕਾਰਡ, ਫ੍ਰੀ ਐਂਟਰੀ, ਗਜ਼ੇਬੋ ਅਤੇ ਡੈਡੀਕੇਟਿਡ ਵਾਕਿੰਗ ਟ੍ਰੈਕ ਦੀ ਸਹੂਲਤ ਦੇਣ ਦਾ ਵਾਅਦਾ ਪੂਰਾ ਕੀਤਾ ਜਾਵੇਗਾ। ਪਿਕਲਬਾਲ, ਪੈਡਲ ਅਤੇ ਬਾਕਸ ਕ੍ਰਿਕਟ ਦੇ ਰੇਟ ਸਬਸਿਡਾਈਜ਼ਡ ਕਰਨ, ਮਾਡਰਨ ਜਿਮ ਇਕੁਇਪਮੈਂਟ ਅਤੇ ਕਵਰਡ ਸਵਿਮਿੰਗ ਪੂਲ ਤਿਆਰ ਕਰਨ ਦੀ ਯੋਜਨਾ ਹੈ। ਕਲੱਬ ਵਿਚ ਆਰਗਨ ਡੋਨੇਸ਼ਨ ਇਨੀਸ਼ੀਏਟਿਵ ਵੀ ਸ਼ੁਰੂ ਕੀਤਾ ਜਾਵੇਗਾ।
ਅਮਿਤ ਕੁਕਰੇਜਾ ਨੇ ਕਿਹਾ ਕਿ ਫਾਈਨਾਂਸ਼ੀਅਲ ਟ੍ਰਾਂਸਪੇਰੈਂਸੀ, ਸਹੀ ਬਜਟਿੰਗ ਅਤੇ ਪ੍ਰਾਜੈਕਟ ਕਾਸਟਿੰਗ ’ਤੇ ਵਿਸ਼ੇਸ਼ ਧਿਆਨ ਦਿੱਤਾ ਜਾਵੇਗਾ। ਡਿਜੀਟਲ ਜਿਮਖਾਨਾ ਰਾਹੀਂ ਬੁਕਿੰਗ, ਪੇਮੈਂਟ, ਸਪੋਰਟਸ ਸਲਾਟ ਅਤੇ ਸ਼ਿਕਾਇਤਾਂ ਦੀ ਆਨਲਾਈਨ ਸਹੂਲਤ ਮਿਲੇਗੀ।
ਉਨ੍ਹਾਂ ਕਿਹਾ ਕਿ ਬੱਚਿਆਂ, ਨੌਜਵਾਨਾਂ, ਲੇਡੀਜ਼ ਅਤੇ ਸੀਨੀਅਰ ਸਿਟੀਜ਼ਨਾਂ ਲਈ ਵੱਖ-ਵੱਖ ਪ੍ਰੋਗਰਾਮ ਕਰਵਾਉਣ ਦੇ ਨਾਲ ਕਲੱਬ ਨੂੰ ਗ੍ਰੀਨ ਅਤੇ ਸਸਟੇਨੇਬਲ ਬਣਾਉਣ ’ਤੇ ਵੀ ਕੰਮ ਹੋਵੇਗਾ। ਮੈਂਬਰਾਂ ਦੀਆਂ ਸਮੱਸਿਆਵਾਂ ਦੇ ਹੱਲ ਲਈ ਨਿਯਮਿਤ ‘ਮੀਟ ਦਿ ਸੈਕ੍ਰੇਟਰੀ’ ਪ੍ਰੋਗਰਾਮ ਸ਼ੁਰੂ ਕੀਤਾ ਜਾਵੇਗਾ।
ਇਹ ਵੀ ਪੜ੍ਹੋ: ਪੰਜਾਬ: ਨਸ਼ੇ ਨੇ ਉਜਾੜਿਆ ਘਰ! ਨੌਜਵਾਨ ਪੁੱਤ ਦੀ ਮੌਤ, ਦੋਸਤਾਂ ਨੇ ਖੇਤਾਂ 'ਚ ਦੱਬੀ ਲਾਸ਼
ਗਰੁੱਪ ਨਹੀਂ, ਜਿਮਖਾਨਾ ਲਈ ਵੋਟ ਕਰੋ : ਵਾਈਬ੍ਰੈਂਟ ਸੀਨੀਅਰਜ਼
ਜਿਮਖਾਨਾ ਕਲੱਬ ਚੋਣਾਂ ਤੋਂ ਠੀਕ ਪਹਿਲਾਂ ਵਾਈਬ੍ਰੈਂਟ ਸੀਨੀਅਰਜ਼ ਨੇ ਕਲੱਬ ਦੇ ਸਾਰੇ ਮੈਂਬਰਾਂ ਨੂੰ ਅਪੀਲ ਕੀਤੀ ਗਈ ਕਿ ਉਹ ਗਰੁੱਪਬਾਜ਼ੀ ਤੋਂ ਉੱਪਰ ਉੱਠ ਕੇ ਆਪਣੀ ਸਮਝਦਾਰੀ ਨਾਲ ਵੋਟ ਕਰਨ। ਸੰਸਥਾ ਦੇ ਚੇਅਰਮੈਨ ਐਡਵੋਕੇਟ ਪੀ. ਪੀ. ਸਿੰਘ ਅਹਲੂਵਾਲੀਆ ਅਤੇ ਕਨਵੀਨਰ ਅਨਿਲ ਨਿਸ਼ਚਲ ਨੇ ਕਿਹਾ ਕਿ ਵੋਟ ਕਿਸੇ ਗਰੁੱਪ ਨੂੰ ਨਹੀਂ, ਬਲਕਿ ਜਿਮਖਾਨਾ ਕਲੱਬ ਦੇ ਹਿੱਤ ਵਿਚ ਯੋਗ ਉਮੀਦਵਾਰ ਨੂੰ ਦਿੱਤੀ ਜਾਣੀ ਚਾਹੀਦੀ ਹੈ।
ਉਨ੍ਹਾਂ ਕਿਹਾ ਕਿ ਹਰੇਕ ਉਮੀਦਵਾਰ ਨੂੰ ਉਸ ਦੀ ਆਪਣੀ ਯੋਗਤਾ, ਕਲੱਬ ਲਈ ਕੀਤੇ ਗਏ ਪਿਛਲੇ ਕੰਮ ਅਤੇ ਕਲੱਬ ਦੀ ਸੇਵਾ ਕਰਨ ਦੀ ਸਮਰੱਥਾ ਦੇ ਆਧਾਰ ’ਤੇ ਪਰਖਿਆ ਜਾਵੇ। ਮੈਂਬਰਾਂ ਨੂੰ ਉਮੀਦਵਾਰਾਂ ਦੇ ਮੈਨੀਫੈਸਟੋ ਨੂੰ ਵੀ ਧਿਆਨ ਵਿਚ ਰੱਖਣਾ ਚਾਹੀਦਾ ਹੈ ਅਤੇ ਕਿਸੇ ਵੀ ਤਰ੍ਹਾਂ ਦੇ ਦਬਾਅ ਜਾਂ ਅਨੁਮਾਨ ਤੋਂ ਪ੍ਰਭਾਵਿਤ ਹੋਏ ਬਿਨਾਂ ਆਪਣੀ ਵੋਟ ਪਾਉਣੀ ਚਾਹੀਦੀ ਹੈ। ਵਾਈਬ੍ਰੈਂਟ ਸੀਨੀਅਰਜ਼ ਨੇ ਕਿਹਾ ਕਿ ਇਸ ਸਮੇਂ ਕਲੱਬ ਨੂੰ ਅਜਿਹੀ ਮੈਨੇਜਮੈਂਟ ਦੀ ਲੋੜ ਹੈ ਜੋ ਪਾਰਦਰਸ਼ਤਾ ਅਤੇ ਬਿਹਤਰ ਗਵਰਨੈਂਸ ਨਾਲ ਹਰ ਮੈਂਬਰ ਦੇ ਹਿੱਤ ਵਿਚ ਕੰਮ ਕਰੇ। ਉਨ੍ਹਾਂ ਮੈਂਬਰਾਂ ਨੂੰ ਅਪੀਲ ਕੀਤੀ ਕਿ ਅਜਿਹੀ ਟੀਮ ਦੀ ਚੋਣ ਕਰਨ ਜੋ ਹਰ ਮੈਂਬਰ ਦਾ ਸਤਿਕਾਰ ਕਰੇ, ਆਪਣੇ ਵਾਅਦਿਆਂ ਨੂੰ ਪੂਰਾ ਕਰੇ ਅਤੇ ਜਿਮਖਾਨਾ ਕਲੱਬ ਦੀ ਸ਼ਾਨ ਅਤੇ ਵਿਰਾਸਤ ਨੂੰ ਬਣਾਏ ਰੱਖੇ। ਉਨ੍ਹਾਂ ਕਿਹਾ ਕਿ ਹਰੇਕ ਮੈਂਬਰ ਦੀ ਇੱਕ ਵੋਟ ਅਗਲੇ ਦੋ ਸਾਲਾਂ ਲਈ ਜਿਮਖਾਨਾ ਕਲੱਬ ਦੀ ਦਿਸ਼ਾ ਤੈਅ ਕਰ ਸਕਦੀ ਹੈ, ਇਸ ਲਈ ਸਾਰੇ ਮੈਂਬਰ ਆਪਣੀ ਵੋਟ ਦਾ ਸਮਝਦਾਰੀ ਨਾਲ ਇਸਤੇਮਾਲ ਕਰਨ ਅਤੇ ‘ਗਰੁੱਪ ਲਈ ਨਹੀਂ, ਜਿਮਖਾਨਾ ਲਈ ਵੋਟ ਕਰਨ’।
ਇਹ ਵੀ ਪੜ੍ਹੋ: ਪੰਜਾਬ: ਸਹੁਰਿਆਂ ਤੋਂ ਵਾਪਸ ਜਾ ਰਹੇ ਪਤੀ ਨੇ ਰਸਤੇ 'ਚ ਹੀ ਕਤਲ ਕੀਤੀ ਪਤਨੀ! ਫਿਰ ਲਾਸ਼ ਨੂੰ...
ਚੋਣ ਪ੍ਰਬੰਧਾਂ ’ਤੇ ਉਮੀਦਵਾਰ ਨੇ ਚੋਣ ਅਧਿਕਾਰੀਆਂ ਨੂੰ ਭੇਜਿਆ ਸੰਦੇਸ਼
ਜਿਮਖਾਨਾ ਕਲੱਬ ਚੋਣਾਂ ਨੂੰ ਲੈ ਕੇ ਇਕ ਉਮੀਦਵਾਰ ਨੇ ਵੋਟਿੰਗ ਦੇ ਪ੍ਰਬੰਧਾਂ ’ਤੇ ਸਵਾਲ ਚੁੱਕਦਿਆਂ ਚੋਣ ਅਧਿਕਾਰੀਆਂ ਨੂੰ ਸੰਦੇਸ਼ ਭੇਜ ਕੇ ਤੁਰੰਤ ਜ਼ਰੂਰੀ ਬਦਲਾਅ ਕਰਨ ਦੀ ਮੰਗ ਕੀਤੀ ਹੈ। ਉਮੀਦਵਾਰ ਨੇ ਕਿਹਾ ਕਿ ਪਹਿਲਾਂ ਜਿੱਥੇ ਲਗਭਗ 3500 ਵੋਟਰਾਂ ਲਈ 10 ਪੋਲਿੰਗ ਬੂਥ ਬਣਾਏ ਗਏ ਸਨ, ਉੱਥੇ ਹੀ ਇਸ ਵਾਰ ਲਗਭਗ 4078 ਵੋਟਰਾਂ ਦੇ ਹੋਣ ਦੇ ਬਾਵਜੂਦ ਬੂਥਾਂ ਦੀ ਗਿਣਤੀ ਘਟਾ ਕੇ 8 ਕਰ ਦਿੱਤੀ ਗਈ ਹੈ। ਇਸ ਨਾਲ ਵੋਟਿੰਗ ਦੌਰਾਨ ਭੀੜ ਵਧਣ ਦਾ ਖ਼ਦਸ਼ਾ ਹੈ।
ਉਮੀਦਵਾਰ ਨੇ ਇਹ ਵੀ ਇਤਰਾਜ਼ ਜਤਾਇਆ ਕਿ ਵੋਟਰ ਸਲਿਪ ਜਾਰੀ ਕਰਨ ਦੇ ਕਾਊਂਟਰ ਖੁੱਲ੍ਹੇ ਲਾਅਨ ਵਿਚ ਬਣਾਏ ਗਏ ਹਨ, ਜਿਸ ਨਾਲ ਵੋਟਿੰਗ ਪ੍ਰਕਿਰਿਆ ਪ੍ਰਭਾਵਿਤ ਹੋਣ ਅਤੇ ਵੋਟਰਾਂ ’ਤੇ ਪ੍ਰਭਾਵ ਪਾਉਣ ਦੀ ਸੰਭਾਵਨਾ ਬਣੀ ਰਹੇਗੀ। ਇਸ ਤੋਂ ਇਲਾਵਾ ਉਮੀਦਵਾਰਾਂ ਲਈ ਲਾਊਂਜ ਬਾਰ ਵਿਚ ਅਤੇ ਮੀਡੀਆ ਲਈ ਕਾਰਡ ਰੂਮ ਵਿਚ ਵਿਵਸਥਾ ਕੀਤੇ ਜਾਣ ’ਤੇ ਵੀ ਸਵਾਲ ਚੁੱਕੇ ਗਏ ਹਨ। ਉਨ੍ਹਾਂ ਪੋਲਿੰਗ ਬੂਥ ਦੇ ਦਾਖਲੇ ਅਤੇ ਨਿਕਾਸ ਲਈ ਲਗਾਏ ਗਏ ਸਟੀਲ ਬੈਰੀਕੇਡਾਂ ਨੂੰ ਲੈ ਕੇ ਵੀ ਚਿੰਤਾ ਜਤਾਈ ਅਤੇ ਕਿਹਾ ਕਿ ਛੋਟੇ ਰਸਤੇ ਕਰਕੇ ਸੀਨੀਅਰ ਮੈਂਬਰਾਂ ਅਤੇ ਵ੍ਹੀਲਚੇਅਰ ’ਤੇ ਆਉਣ ਵਾਲੇ ਵੋਟਰਾਂ ਨੂੰ ਵੋਟ ਪਾਉਣ ਵਿਚ ਪ੍ਰੇਸ਼ਾਨੀ ਹੋ ਸਕਦੀ ਹੈ। ਉਮੀਦਵਾਰ ਨੇ ਚੋਣ ਅਧਿਕਾਰੀਆਂ ਤੋਂ ਵੋਟਿੰਗ ਨੂੰ ਸੁਚਾਰੂ ਅਤੇ ਨਿਰਪੱਖ ਬਣਾਉਣ ਲਈ ਇਨ੍ਹਾਂ ਵਿਵਸਥਾਵਾਂ ਦੀ ਤੁਰੰਤ ਸਮੀਖਿਆ ਕਰਨ ਦੀ ਮੰਗ ਕੀਤੀ ਹੈ।
ਇਹ ਵੀ ਪੜ੍ਹੋ: ਰਾਸ਼ਨ ਕਾਰਡ ਧਾਰਕ ਦੇਣ ਧਿਆਨ! ਆਪਣਾ ਨਾਮ ਦਰਜ ਕਰਵਾਉਣ ਨੂੰ ਲੈ ਕੇ ਪੰਜਾਬ 'ਚ...
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਪੰਜਾਬ: ਮਾਮੇ ਦੇ ਟਰੈਕਟਰ ਹੇਠ ਆਉਣ ਕਾਰਨ ਭਾਣਜੇ ਦੀ ਦਰਦਨਾਕ ਮੌਤ, ਨਾਨਕੇ ਆਇਆ ਸੀ ਜਵਾਕ (video)
NEXT STORY 
