ਮਈ 1968 ’ਚ ਹੋਏ ਵਿਦਿਆਰਥੀਆਂ ਦੇ ਰੋਸ ਮੁਜ਼ਾਹਰਿਆਂ ਤੋਂ ਬਾਅਦ ਬੀਤੇ ਸੋਮਵਾਰ ਪੈਰਿਸ ’ਚ ਸਭ ਤੋਂ ਵੱਧ ਭਿਆਨਕ ਦੰਗੇ ਦਿਖਾਈ ਦਿੱਤੇ, ਜਿਨ੍ਹਾਂ ਨਾਲ ਨਜਿੱਠਣ ਦੇ ਤਰੀਕਿਆਂ ’ਤੇ ਵਿਚਾਰ ਕਰਨ ਲਈ ਫਰਾਂਸ ਦੇ ਪ੍ਰਧਾਨ ਮੰਤਰੀ ਐਡਵਰਡ ਫਿਲਿਪ ਨੇ ਵਿਰੋਧੀ ਧਿਰ ਨਾਲ ਮੁਲਾਕਾਤ ਕੀਤੀ। ਹਫਤੇ ਦੇ ਅਖੀਰ ਦੌਰਾਨ ਵਿਖਾਵਾਕਾਰੀਆਂ ਦੇ ਝੁੰਡਾਂ ਨੇ ਸੜਕਾਂ ’ਤੇ ਹੁੜਦੰਗ ਮਚਾਉਂਦਿਆਂ ਦੰਗਾ ਵਿਰੋਧੀ ਪੁਲਸ ਨਾਲ ਵੀ ਲੜਾਈ ਕੀਤੀ ਕਿਉਂਕਿ ਉਹ ਪਾਸ਼ ਇਲਾਕਿਆਂ ਅਤੇ ਕੈਫੇਜ਼ ’ਚ ਵੜ ਗਏ ਸਨ। ਉਨ੍ਹਾਂ ਨੇ ਗੱਡੀਆਂ ਨੂੰ ਅੱਗ ਲਾ ਦਿੱਤੀ ਤੇ ਫਰਾਂਸ ਦੀ ਰਾਜਧਾਨੀ ’ਚ ਸਭ ਤੋਂ ਵੱਧ ਪਵਿੱਤਰ ਤੇ ਸੰਸਾਰਕ ਪਛਾਣ ਵਾਲੇ ਲੈਂਡਮਾਰਕਸ ਨੂੰ ਨੁਕਸਾਨ ਪਹੁੰਚਾਇਆ।
ਵੱਡੀ ਗਿਣਤੀ ’ਚ ਬੁਕਿੰਗਜ਼ ਰੱਦ ਹੋਣ ਕਾਰਨ ਹੋਟਲਾਂ ਵਾਲਿਆਂ ਨੂੰ ਭਾਰੀ ਨੁਕਸਾਨ ਹੋਇਆ ਤੇ ਸਟਾਕ ਮਾਰਕੀਟ ਦਾ ਸੂਚਕ ਅੰਕ ਵਧ ਗਿਆ। ਵਿਖਾਵਾਕਾਰੀਆਂ ਨੇ ਤੇਲ ਦੀ ਸਪਲਾਈ ’ਚ ਵਿਘਨ ਪਾਇਆ ਸੀ। ਇਸ ਲਈ ਤੇਲ ਕੰਪਨੀ ‘ਟੋਟਲ’ ਨੇ ਦੱਸਿਆ ਕਿ ਉਸ ਦੇ ਬਹੁਤ ਸਾਰੇ ਫਿਲਿੰਗ ਸਟੇਸ਼ਨ ‘ਡ੍ਰਾਈ’ ਹੋ ਗਏ ਹਨ।
ਬੀਤੇ ਐਤਵਾਰ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨੇ ਮੰਤਰੀ ਮੰਡਲ ਦੀ ਮੀਟਿੰਗ ਸੱਦੀ, ਜਿਸ ਨੇ ਐਮਰਜੈਂਸੀ ਲਾਉਣ ਦਾ ਸੁਝਾਅ ਦਿੱਤਾ। ਨਵੰਬਰ 2015 ’ਚ ਪੈਰਿਸ ’ਚ ਹੋਏ ਅੱਤਵਾਦੀ ਹਮਲਿਆਂ ਤੇ 2005 ’ਚ ਉਪ-ਸ਼ਹਿਰੀ ਗਰੀਬ ਖੇਤਰਾਂ ’ਚ ਨੌਜਵਾਨਾਂ ਦੇ ਮੁਜ਼ਾਹਰਿਆਂ ਦੌਰਾਨ ਵੀ ਐਮਰਜੈਂਸੀ ਲੱਗੀ ਸੀ।
ਸਰਕਾਰ ਦੇ ਇਕ ਮੰਤਰੀ ਨੇ ਸੋਮਵਾਰ ਕਿਹਾ ਕਿ ਇਹ ਬਦਲ ਹੁਣ ਮੇਜ਼ ’ਤੇ ਨਹੀਂ ਹੈ। 17 ਨਵੰਬਰ ਨੂੰ ਦੇਸ਼ ਭਰ ਦੇ ਛੋਟੇ ਸ਼ਹਿਰਾਂ ਤੇ ਦਿਹਾਤੀ ਇਲਾਕਿਆਂ ’ਚ ਲਗਭਗ 3 ਲੱਖ ਲੋਕ ਇਕ ਅਸਾਧਾਰਨ ਮੁਜ਼ਾਹਰੇ ’ਚ ਸ਼ਾਮਲ ਹੋਏ, ਜੋ ਰਹਿਣ-ਸਹਿਣ ਦੀਆਂ ਵਧਦੀਆਂ ਲਾਗਤਾਂ ਤੇ ਖਾਸ ਕਰ ਕੇ ਪੈਟਰੋਲ-ਡੀਜ਼ਲ ’ਤੇ ਉੱਚੇ ਟੈਕਸਾਂ ਨੂੰ ਲੈ ਕੇ ਵਿਰੋਧ ਕਰ ਰਹੇ ਸਨ, ਜਿਨ੍ਹਾਂ ਦਾ ਐਲਾਨ ਮੈਕਰੋਨ ਨੇ ਇਸ ਸਾਲ ਦੇ ਸ਼ੁਰੂ ’ਚ ਕੀਤਾ ਸੀ।
ਸ਼ੁਰੂ ’ਚ ਆਨਲਾਈਨ ਸ਼ੁਰੂ ਹੋਏ ਮੁਜ਼ਾਹਰੇ ਰੁਕੇ ਨਹੀਂ ਸਗੋਂ ਬੀਤੇ ਸ਼ਨੀਵਾਰ ਨੂੰ ਉਦੋਂ ਹੋਰ ਵੀ ਹਿੰਸਕ ਹੋ ਗਏ, ਜਦੋਂ ਵਿਖਾਵਾਕਾਰੀ ਪਾਸ਼ ਇਲਾਕਿਆਂ ਦੀਆਂ ਸੜਕਾਂ ਤੇ ਪੈਰਿਸ ਦੀਆਂ ਅਹਿਮ ਥਾਵਾਂ ’ਤੇ ਨਿਕਲ ਆਏ। ਉਨ੍ਹਾਂ ਨੂੰ ਪੁਲਸ ਵਲੋਂ ਹੰਝੂ ਗੈਸ, ਪਾਣੀ ਦੀਆਂ ਵਾਛੜਾਂ, ਰਬੜ ਦੀਆਂ ਗੋਲੀਆਂ ਤੇ ਸਟੰਨ ਗ੍ਰਨੇਡਜ਼ ਦਾ ਸਾਹਮਣਾ ਕਰਨਾ ਪਿਆ ਪਰ ਉਹ ਡਟੇ ਰਹੇ।
ਫਰਾਂਸੀਸੀ ਟੈਕਸਾਂ ’ਚ ਕਟੌਤੀ ਦੀ ਉਡੀਕ
ਸੋਮਵਾਰ ਨੂੰ ‘ਯੈਲੋ ਵੈਸਟਸ’ (ਪੀਲੇ ਕੱਪੜਿਆਂ ’ਚ) ਨੇ ਕਈ ਹਾਈਵੇਜ਼ ਰੋਕ ਦਿੱਤੇ, ਮੁੱਖ ਤੌਰ ’ਤੇ ਦੱਖਣੀ ਫਰਾਂਸ ’ਚ ਅਤੇ ਮਾਰਸਿਲੇ ਨੇੜੇ ਉਹ ਇਕ ਪ੍ਰਮੁੱਖ ਤੇਲ ਡਿੱਪੂ ਤਕ ਪਹੁੰਚ ਗਏ। ਪ੍ਰਧਾਨ ਮੰਤਰੀ ਫਿਲਿਪ ਨਾਲ ਮੁਲਾਕਾਤ ਕਰਨ ਤੋਂ ਬਾਅਦ ਸੈਂਟਰ ਰਾਈਟ ਲੇਸ ਰਿਪਬਲਿਕਨ ਪਾਰਟੀ ਦੇ ਨੇਤਾ ਲਾਰੈਂਟ ਵਾਕੁਏਜ ਨੇ ਕਿਹਾ ਕਿ ‘‘ਸਰਕਾਰ ਲੋਕਾਂ ਦੇ ਗੁੱਸੇ ਦੀ ਥਾਹ ਪਾਉਣ ’ਚ ਅਸਫਲ ਰਹੀ ਹੈ। ਫਰਾਂਸੀਸੀ ਟੈਕਸਾਂ ’ਚ ਕਟੌਤੀ ਦੀ ਉਡੀਕ ਕਰ ਰਹੇ ਹਨ।’’ ਫਰਾਂਸ ’ਚ ਮੁਜ਼ਾਹਰਿਆਂ ਦੌਰਾਨ ਹੁਣ ਤਕ ਤਿੰਨ ਵਿਅਕਤੀ ਮਾਰੇ ਜਾ ਚੁੱਕੇ ਹਨ ਅਤੇ 260 ਤੋਂ ਜ਼ਿਆਦਾ ਜ਼ਖਮੀ ਹੋਏ ਹਨ, 400 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
ਅੰਦੋਲਨ ਦੇ ਸਮਰਥਕ ਜ਼ਿਆਦਾਤਰ ਉਹ ਲੋਕ ਹਨ, ਜੋ ਦਰਮਿਆਨੇ ਅਤੇ ਮਜ਼ਦੂਰ ਵਰਗ ਨਾਲ ਸਬੰਧ ਰੱਖਦੇ ਹਨ ਪਰ ਇਨ੍ਹਾਂ ’ਚ ਕੁਝ ਅਜਿਹੇ ਅਨਸਰ ਵੀ ਸ਼ਾਮਲ ਹਨ, ਜਿਨ੍ਹਾਂ ਦੀ ਪਛਾਣ ‘ਅੱਤਵਾਦੀ’ ਤੇ ‘ਅਾਵਾਰਾ’ ਵਜੋਂ ਕੀਤੀ ਗਈ ਹੈ। ਮੁਜ਼ਾਹਰੇ ਕਰਨ ਵਾਲਿਆਂ ’ਚ ਹਰ ਉਮਰ ਵਰਗ ਦੇ ਲੋਕ ਸ਼ਾਮਲ ਹਨ ਅਤੇ ਇਨ੍ਹਾਂ ’ਚੋਂ ਜ਼ਿਆਦਾਤਰ ਦੇਸ਼ ਦੇ ਵੱਡੇ ਸ਼ਹਿਰਾਂ ਦੇ ਬਾਹਰੀ ਇਲਾਕਿਆਂ ’ਚੋਂ ਆਏ ਹਨ।
ਉਨ੍ਹਾਂ ਦਾ ਅੰਦੋਲਨ ਅਚਾਨਕ ਸ਼ੁਰੂ ਹੋਇਆ ਸੀ ਤੇ ਤਿੰਨ ਹਫਤਿਆਂ ਵਿਚ ‘ਯੈਲੋ ਵੈਸਟਸ’ ਦਾ ਕੋਈ ਸਪੱਸ਼ਟ ਨੇਤਾ ਨਹੀਂ ਹੈ। ਪਛਾਣੇ ਜਾਣ ਵਾਲੇ ਨੇਤਾਵਾਂ ਦੀ ਘਾਟ ਨੇ ਸਰਕਾਰ ਦਾ ਕੰਮ ਉਨ੍ਹਾਂ ਨਾਲ ਨਜਿੱਠਣ ਨੂੰ ਲੈ ਕੇ ਹੋਰ ਵੀ ਮੁਸ਼ਕਿਲ ਬਣਾ ਦਿੱਤਾ। ਸੰਗਠਿਤ ਹੋਣ ਲਈ ਅੰਦੋਲਨ ਅਜੇ ਵੀ ਜ਼ਿਆਦਾਤਰ ਸੋਸ਼ਲ ਮੀਡੀਆ ’ਤੇ ਨਿਰਭਰ ਹੈ।
ਜੋ ਲੋਕ ਮੁਜ਼ਾਹਰੇ ਕਰ ਰਹੇ ਹਨ, ਯਕੀਨੀ ਤੌਰ ’ਤੇ ਵਧਦੀਆਂ ਕੀਮਤਾਂ ਦਾ ਉਨ੍ਹਾਂ ਦੇ ਜੀਵਨ ’ਤੇ ਬੁਰਾ ਅਸਰ ਪਿਆ ਹੈ। ਹਾਲਾਂਕਿ ਭਾਰਤ ਸਮੇਤ ਕਈ ਦੇਸ਼ਾਂ ’ਚ ਲੱਖਾਂ ਲੋਕਾਂ ਦੇ ਮੁਕਾਬਲੇ ਉਨ੍ਹਾਂ ਨੂੰ ‘ਗਰੀਬ’ ਨਹੀਂ ਕਿਹਾ ਜਾ ਸਕਦਾ। ਸ਼ੁਰੂ ’ਚ ਜੋ ਵਿਖਾਵਾਕਾਰੀ ਬਾਹਰ ਨਿਕਲੇ, ਉਹ ਪੈਟਰੋਲ ਤੇ ਡੀਜ਼ਲ ਦੀਆਂ ਉੱਚੀਆਂ ਕੀਮਤਾਂ ਅਤੇ ਸਮਾਜ ’ਚ ਵਧ ਰਹੀ ਨਾ-ਬਰਾਬਰੀ ਨੂੰ ਲੈ ਕੇ ਗੁੱਸੇ ’ਚ ਸਨ।
ਫਰਾਂਸ ’ਚ ਡੀਜ਼ਲ ਪਿਛਲੇ ਇਕ ਸਾਲ ਦੌਰਾਨ 23 ਫੀਸਦੀ ਮਹਿੰਗਾ ਹੋ ਗਿਆ ਹੈ, ਜਿਸ ਦੀ ਔਸਤਨ ਕੀਮਤ ਲਗਭਗ 121 ਰੁਪਏ ਪ੍ਰਤੀ ਲਿਟਰ ਹੈ। ਜਿਥੇ ਸੰਸਾਰਕ ਪੱਧਰ ’ਤੇ ਤੇਲ ਦੀਆਂ ਕੀਮਤਾਂ ’ਚ ਪਿਛਲੇ ਹਫਤਿਆਂ ਦੌਰਾਨ ਗਿਰਾਵਟ ਆਈ ਹੈ, ਉਥੇ ਹੀ ਮੈਕਰੋਨ ਦੀ ਸਰਕਾਰ ਨੇ ਇਸ ਸਾਲ ਪੈਟਰੋਲ ਤੇ ਡੀਜ਼ਲ ’ਤੇ ਹਾਈਡ੍ਰੋਕਾਰਬਨ ਟੈਕਸ ’ਚ ਕ੍ਰਮਵਾਰ 3.9 ਤੇ 7.6 ਸੈਂਟ ਦਾ ਵਾਧਾ ਕੀਤਾ। ਨਾਲ ਹੀ ਅਗਲੇ ਸਾਲ 1 ਜਨਵਰੀ ਤੋਂ ਡੀਜ਼ਲ ’ਤੇ 6.5 ਸੈਂਟ ਤੇ ਪੈਟਰੋਲ ’ਤੇ 2.9 ਸੈਂਟ ਪ੍ਰਤੀ ਲਿਟਰ ਹੋਰ ਵਾਧਾ ਕਰਨ ਦਾ ਐਲਾਨ ਵੀ ਕੀਤਾ ਤੇ ਵਿਖਾਵਾਕਾਰੀ ਇਸ ਵਾਧੇ ’ਤੇ ਰੋਕ ਲਾਉਣ ਦੀ ਮੰਗ ਨੂੰ ਲੈ ਕੇ ਹੀ ਸੜਕਾਂ ’ਤੇ ਉਤਰੇ।
ਇਸੇ ਦਰਮਿਆਨ ਆਈਆਂ ਖਬਰਾਂ ਮੁਤਾਬਕ ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ ’ਚ ਭਾਰੀ ਵਾਧੇ ਨੂੰ ਲੈ ਕੇ ਹੋਏ ਹਿੰਸਕ ਮੁਜ਼ਾਹਰਿਆਂ ਤੋਂ ਬਾਅਦ ਫਰਾਂਸ ਸਰਕਾਰ ਨੇ ਪੈਟਰੋਲੀਅਮ ਟੈਕਸ ਅਤੇ ਕੀਮਤਾਂ ’ਚ ਵਾਧੇ ਦਾ ਫੈਸਲਾ ਹਾਲ ਦੀ ਘੜੀ ਟਾਲ ਦਿੱਤਾ ਹੈ। ਹਾਲਾਂਕਿ ਵਿਖਾਵਾਕਾਰੀ ਆਪਣੇ ਵਿਰੋਧ ਨੂੰ ਜਾਰੀ ਰੱਖਣ ਦੀ ਗੱਲ ਕਹਿ ਰਹੇ ਹਨ।
ਵਿਖਾਵਾਕਾਰੀਆਂ ਨੂੰ ਸਮਰਥਨ
ਰਾਸ਼ਟਰਪਤੀ ਤੇ ਉਨ੍ਹਾਂ ਦੀਆਂ ਨੀਤੀਆਂ ਵਿਰੁੱਧ ਮੁਜ਼ਾਹਰੇ ਹੋਰ ਹਿੰਸਕ ਹੋ ਗਏ ਤੇ ਵਿਖਾਵਾਕਾਰੀਆਂ ਵਲੋਂ ਉਨ੍ਹਾਂ ਨੂੰ ‘ਅਮੀਰ ਹਿਤੈਸ਼ੀ’ ਦੱਸਿਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਮੈਕਰੋਨ ਨੂੰ ਆਪਣਾ ਅਹੁਦਾ ਛੱਡਣ ਲਈ ਵੀ ਕਿਹਾ ਜਾ ਰਿਹਾ ਹੈ ਤੇ ਨਾਲ ਹੀ ‘ਕ੍ਰਾਂਤੀ’ ਦੀ ਵੀ ਗੱਲ ਹੋ ਰਹੀ ਹੈ।
ਵਿਖਾਵਾਕਾਰੀਆਂ ਨੂੰ ਜਨਤਾ ਤੋਂ ਭਰਪੂਰ ਸਮਰਥਨ ਮਿਲ ਰਿਹਾ ਹੈ। ਬੀਤੇ ਸ਼ਨੀਵਾਰ ਦੀ ਹਿੰਸਾ ਤੋਂ ਬਾਅਦ ਕਰਵਾਏ ਗਏ ਇਕ ਸਰਵੇਖਣ ’ਚ 70 ਫੀਸਦੀ ਲੋਕਾਂ ਨੇ ਕਿਹਾ ਕਿ ਉਹ ਵਿਖਾਵਾਕਾਰੀਆਂ ਦਾ ਸਮਰਥਨ ਕਰਦੇ ਹਨ। ਸਰਵੇਖਣ ’ਚ 50 ਫੀਸਦੀ ਤੋਂ ਜ਼ਿਆਦਾ ਮੈਕਰੋਨ ਦੇ ਵੋਟਰ ਸਨ।
ਬੀਤੇ ਸੋਮਵਾਰ ਨੀਸ ’ਚ ਲਗਭਗ ਇਕ ਹਜ਼ਾਰ ਵਿਦਿਆਰਥੀਆਂ ਨੇ ‘ਮੈਕਰੋਨ ਅਸਤੀਫਾ ਦਿਓ’ ਦੇ ਨਾਅਰੇ ਲਾਏ। ਦੇਸ਼ ਭਰ ’ਚ ਵਿਦਿਆਰਥੀਆਂ ਵਲੋਂ ਲਗਭਗ 100 ਸਕੂਲਾਂ ਨੂੰ ਪੂਰੀ ਤਰ੍ਹਾਂ ਜਾਂ ਅੰਸ਼ਿਕ ਤੌਰ ’ਤੇ ਬੰਦ ਕਰਵਾ ਦਿੱਤਾ ਗਿਆ। ਫਰਾਂਸ ਦੀ ਜਨਤਕ ਖੇਤਰ ਦੀ ਸਭ ਤੋਂ ਵੱਡੀ ਯੂਨੀਅਨ ਸੀ. ਜੀ. ਟੀ. ਨੇ ਘੱਟੋ-ਘੱਟ ਮਜ਼ਦੂਰੀ, ਪੈਨਸ਼ਨ ਤੇ ਸਮਾਜਿਕ ਸਹੂਲਤਾਂ ’ਚ ਤੁਰੰਤ ਵਾਧੇ ਦੀ ਮੰਗ ਨੂੰ ਲੈ ਕੇ 14 ਦਸੰਬਰ ਨੂੰ ਰਾਸ਼ਟਰਵਿਆਪੀ ਮੁਜ਼ਾਹਰੇ ਦਾ ਸੱਦਾ ਵੀ ਦਿੱਤਾ। ਸੀ. ਜੀ. ਟੀ. ਨੇ ਕਿਹਾ ਕਿ ਉਹ ਵਿਖਾਵਾਕਾਰੀਆਂ ਦੇ ਨਾਜਾਇਜ਼ ਗੁੱਸੇ ਨਾਲ ਸਹਿਮਤ ਹੈ ਤੇ ਉਨ੍ਹਾਂ ਨੂੰ ਸਮਰਥਨ ਦਿੰਦੀ ਹੈ।
ਤੇਲ ’ਤੇ ਲਾਏ ਟੈਕਸ ਮੈਕਰੋਨ ਦੀ ‘ਸਵੱਛ ਈਂਧਨ’ ਮੁਹਿੰਮ ਦਾ ਹਿੱਸਾ ਹਨ ਤਾਂ ਕਿ ਡੀਜ਼ਲ ਨਾਲ ਚੱਲਣ ਵਾਲੀਆਂ ਗੱਡੀਆਂ ਨੂੰ ਘੱਟ ਪ੍ਰਦੂਸ਼ਣ ਫੈਲਾਉਣ ਵਾਲੇ ਮਾਡਲਾਂ ਨਾਲ ਬਦਲ ਕੇ ਪੌਣ-ਪਾਣੀ ’ਚ ਤਬਦੀਲੀ ਨਾਲ ਨਜਿੱਠਿਆ ਜਾਵੇ। ਪਹਿਲਾਂ ਝੁਕਣ ਤੋਂ ਇਨਕਾਰ ਕਰਦਿਆਂ ਰਾਸ਼ਟਰਪਤੀ ਨੇ ਸ਼ਨੀਵਾਰ ਕਿਹਾ ਸੀ ਕਿ ਵਿਖਾਵਾਕਾਰੀ ਸਿਰਫ ਹਫੜਾ-ਦਫੜੀ ਫੈਲਾਉਣਾ ਚਾਹੁੰਦੇ ਹਨ। ਅਧਿਕਾਰੀਆਂ ’ਤੇ ਹਮਲੇ ਕਰਨ, ਕਾਰੋਬਾਰੀ ਥਾਵਾਂ ਨੂੰ ਨੁਕਸਾਨ ਪਹੁੰਚਾਉਣ, ਰਾਹਗੀਰਾਂ ਤੇ ਪੱਤਰਕਾਰਾਂ ਨੂੰ ਧਮਕੀਆਂ ਦੇਣ ਨੂੰ ਜਾਇਜ਼ ਨਹੀਂ ਠਹਿਰਾਇਆ ਜਾ ਸਕਦਾ। ਉਨ੍ਹਾਂ ਕਿਹਾ ਕਿ ‘ਆਰਕ ਡੀ ਟ੍ਰਾਯੰਫ’ ਨੂੰ ਨੁਕਸਾਨ ਪਹੁੰਚਾਇਆ ਗਿਆ ਹੈ।
ਵੱਖਰੀ ਕਿਸਮ ਦੀ ਚੁਣੌਤੀ
ਬੀ. ਬੀ. ਸੀ. ਦੀ ਇਕ ਰਿਪੋਰਟ ’ਚ ਕਿਹਾ ਗਿਆ ਕਿ ਜਿਥੇ ਮੈਕਰੋਨ ਨੇ ਦਿਖਾਇਆ ਹੈ ਕਿ ਉਹ ਵਿਖਾਵਾਕਾਰੀਆਂ ਤੋਂ ਨਹੀਂ ਡਰਦੇ ਅਤੇ ਕਰਮਚਾਰੀ ਕਾਨੂੰਨਾਂ, ਰੇਲ ਮੁਲਾਜ਼ਮਾਂ ਦੀਆਂ ਪੈਨਸ਼ਨਾਂ ’ਚ ਸੁਧਾਰਾਂ ਨੂੰ ਅੱਗੇ ਵਧਾ ਰਹੇ ਹਨ, ਉਥੇ ਹੀ ਵਿਖਾਵਾਕਾਰੀਆਂ ਸਾਹਮਣੇ ਇਹ ਦੇਖਦਿਆਂ ਇਕ ਵੱਖਰੀ ਕਿਸਮ ਦੀ ਚੁਣੌਤੀ ਹੈ ਕਿ ਉਨ੍ਹਾਂ ਕੋਲ ਕੋਈ ਅਧਿਕਾਰਤ ਨੇਤਾ ਜਾਂ ਸੰਗਠਨ ਨਹੀਂ ਹੈ ਅਤੇ ਨਾ ਹੀ ਉਹ ਕਿਸੇ ਸਿਆਸੀ ਪਾਰਟੀ ਨਾਲ ਜੁੜੇ ਹੋਏ ਹਨ।
ਰਿਪੋਰਟ ’ਚ ਸਮਾਜ ਵਿਗਿਆਨੀਆਂ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ ਕਿ ਇਹ ਅੰਦੋਲਨ ਸਿਆਸੀ ਮਤਭੇਦਾਂ ਤੋਂ ਅੱਗੇ ਨਿਕਲ ਗਿਆ ਹੈ ਤੇ ਮੈਕਰੋਨ ਲਈ ਖਤਰਨਾਕ ਹੈ ਕਿਉਂਕਿ ਜਦੋਂ ਤਕ ਵਿਰੋਧੀ ਧਿਰ ਲੈਫਟ ਜਾਂ ਰਾਈਟ ’ਚ ਵੰਡੀ ਰਹਿੰਦੀ ਹੈ, ਉਦੋਂ ਤਕ ਉਨ੍ਹਾਂ ਦੀ ਤਾਕਤ ਲਈ ਕੋਈ ਚੁਣੌਤੀ ਨਹੀਂ ਹੋਵੇਗੀ। ਫਰਾਂਸੀਸੀ ਕ੍ਰਾਂਤੀ ਤੋਂ ਪਹਿਲਾਂ ਅਜਿਹਾ ਅੰਦੋਲਨ ਨਹੀਂ ਦੇਖਿਆ ਗਿਆ ਸੀ, ਜੋ ਇਕ ਗੰਭੀਰ ਸਿਆਸੀ ਸਵਾਲ ਖੜ੍ਹਾ ਕਰਦਾ ਹੈ।
ਬੀ. ਬੀ. ਸੀ. ਦੀ ਰਿਪੋਰਟ ਮੁਤਾਬਕ ਸੱਤਾ ਵਿਰੋਧੀ ਗੁੱਸਾ 2019 ਦੀਆਂ ਯੂਰਪੀਅਨ ਚੋਣਾਂ ’ਚ ਮੈਕਰੋਨ ਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ, ਜਿਸ ’ਚ ਦੱਖਣਪੰਥੀਆਂ ਨੇ ਲਗਾਤਾਰ ਚੰਗੀ ਕਾਰਗੁਜ਼ਾਰੀ ਦਿਖਾਈ ਹੈ। ਰਿਪਬਲਿਕਨਜ਼ ਤੋਂ ਇਲਾਵਾ ਖੱਬੇਪੱਖੀ ਜੀਨ-ਲੁਕ-ਮੈਲੇਂਚੋਨ ਅਤੇ ਦੱਖਣਪੰਥੀ ਮੈਰੀਨ ਲੀ ਪੇਨ ਨੇ ਵਿਖਾਵਾਕਾਰੀਆਂ ਦਾ ਸਮਰਥਨ ਕੀਤਾ ਹੈ।
ਚੰਗੇ ਸ਼ਾਸਨ ਦੇ ਸਾਰੇ ਮਾਪਦੰਡਾਂ ਦੀਅਾਂ ਧੱਜੀਅਾਂ ਉਡਾਉਂਦਾ ਯੂ. ਪੀ.
NEXT STORY 
