ਜਲੰਧਰ - ਕੋਰੋਨਾ ਵਾਇਰਸ ਨੇ ਜਿੱਥੇ ਚੀਨ ਦੇ ਅਕਸ ਨੂੰ ਦੁਨੀਆ ਵਿਚ ਧੁੰਦਲਾ ਕਰ ਦਿੱਤਾ ਹੈ, ਉਥੇ ਹੀ ਖੇਡ ਜਗਤ ਵਿਚ ਵੀ ਇਸ ਨਾਲ ਤਹਿਲਕਾ ਮਚਣ ਲੱਗਾ ਹੈ। ਦੂਜੇ ਪਾਸੇ ਓਲੰਪਿਕ 2020 ਦੇ ਮੇਜ਼ਬਾਨ ਜਾਪਾਨ ਵਿਚ ਵੀ ਇਨ੍ਹਾਂ ਖੇਡਾਂ ਦੇ ਆਯੋਜਨ 'ਤੇ ਖਤਰਾ ਮੰਡਰਾਉਣ ਲੱਗਾ ਹੈ ਕਿਉਂਕਿ ਉਹ ਚੀਨ ਦਾ ਗੁਆਂਢੀ ਦੇਸ਼ ਹੈ। ਉਕਤ ਵਾਇਰਸ ਕਾਰਣ ਚੀਨ ਨੂੰ ਇਹ ਚਿੰਤਾ ਸਤਾ ਰਹੀ ਹੈ ਕਿ ਉਹ ਅਗਸਤ ਵਿਚ ਹੋਣ ਵਾਲੀਆਂ ਟੋਕੀਓ ਓਲੰਪਿਕ ਲਈ ਆਪਣੇ ਖਿਡਾਰੀਆਂ ਨੂੰ ਕਿਵੇਂ ਤਿਆਰ ਕਰੇਗਾ। ਚੀਨ ਦੀ ਚਿੰਤਾ ਇਸ ਲਈ ਵੀ ਜ਼ਿਆਦਾ ਹੈ ਕਿਉਂਕਿ ਵਾਇਰਸ ਨਾਲ ਸਭ ਤੋਂ ਵੱਧ ਪ੍ਰਭਾਵਿਤ ਵੁਹਾਨ ਸ਼ਹਿਰ ਤੋਂ ਹੀ ਉਸਦੇ ਜ਼ਿਆਦਾਤਰ ਖਿਡਾਰੀ ਆਉਂਦੇ ਹਨ। ਇਹ ਸ਼ਹਿਰ ਸਪੋਰਟਸ ਹੱਬ ਦੇ ਤੌਰ 'ਤੇ ਵੀ ਜਾਣਿਆ ਜਾਂਦਾ ਹੈ। ਕਈ ਵੱਡੀਆਂ ਖੇਡਾਂ ਦੇ ਖਿਡਾਰੀ ਇਸੇ ਇਲਾਕੇ ਵਿਚ ਰਹਿੰਦੇ ਹਨ। ਜੇਕਰ ਚੀਨ ਇਸ ਇਲਾਕੇ ਦੇ ਖਿਡਾਰੀਆਂ ਨੂੰ ਵਾਇਰਸ ਤੋਂ ਨਹੀਂ ਬਚਾਅ ਸਕਿਆ ਤਾਂ ਉਸਦੇ ਓਲੰਪਿਕ ਦੇ 37 ਫੀਸਦੀ ਮੈਡਲ ਪ੍ਰਭਾਵਿਤ ਹੋਣ ਦਾ ਖਦਸ਼ਾ ਹੈ। ਦੇਖੋ ਰਿਪੋਰਟ-
ਫੁੱਟਬਾਲਰਾਂ ਤੇ ਗੋਤਾਖੋਰਾਂ ਲਈ ਮਸ਼ਹੂਰ ਹੈ ਵੁਹਾਨ ਸ਼ਹਿਰ
ਚੀਨ ਦਾ ਵੁਹਾਨ ਸ਼ਹਿਰ, ਜਿੱਥੇ ਕੋਰੋਨਾ ਵਾਇਰਸ ਦਾ ਸਭ ਤੋਂ ਵੱਧ ਪ੍ਰਭਾਵ ਦਿਸ ਰਿਹਾ ਹੈ, ਇਹ ਫੁੱਟਬਾਲਰਾਂ ਤੇ ਗੋਤਾਖੋਰਾਂ ਲਈ ਮਸ਼ਹੂਰ ਸ਼ਹਿਰ ਹੈ। ਇਸ ਤੋਂ ਇਲਾਵਾ ਇਹ ਫੁੱਟਬਾਲ, ਟੈਨਿਸ ਤੇ ਬਾਸਕਟਬਾਲ ਦਾ ਵੀ ਹੱਬ ਹੈ। ਇੱਥੋਂ ਦਾ ਵੁਹਾਨ ਜਾਲ ਫੁੱਟਬਾਲ ਕਲੱਬ ਚਾਈਨੀਜ਼ ਸੁਪਰ ਲੀਗ ਦਾ ਨਾਮੀ ਕਲੱਬ ਵੀ ਹੈ। ਇਸ ਤੋਂ ਇਲਾਵਾ ਟਰੈਕ ਐਂਡ ਫੀਲਡ ਈਵੈਂਟਸ ਦੇ ਕਈ ਨਾਮੀ ਓਲੰਪੀਅਨ ਵੀ ਇੱਥੋਂ ਦੇ ਵਸਨੀਕ ਹਨ।
ਇਹ ਅੰਕੜੇ ਸਾਫ ਕਰਦੇ ਹਨ ਕਿ ਚੀਨ ਨੂੰ ਹੁਣ ਤਕ ਓਲੰਪਿਕ ਖੇਡਾਂ ਵਿਚ ਮਿਲੇ 608 ਤਮਗਿਆਂ ਵਿਚੋਂ 228 ਤਮਗੇ (ਤਕਰੀਬਨ 73 ਫੀਸਦੀ) ਉਕਤ 5 ਖੇਡਾਂ 'ਚੋਂ ਹੀ ਮਿਲੇ ਹਨ ਤੇ ਇਹ 5 ਖੇਡਾਂ ਦੇ ਜ਼ਿਆਦਾਤਰ ਖਿਡਾਰੀ ਵੁਹਾਨ ਤੋਂ ਹੀ ਆਉਂਦੇ ਹਨ। ਚੀਨ ਨੇ ਪਿਛਲੀਆਂ ਓਲੰਪਿਕ ਦੀ ਸਵਿਮਿੰਗ ਪ੍ਰਤੀਯੋਗਿਤਾ ਵਿਚ 6, ਵੇਟਲਿਫਟਿੰਗ ਵਿਚ 7, ਜਿਮਨਾਸਟਿਕ ਵਿਚ 5 ਤੇ ਐਥਲੈਟਿਕਸ ਵਿਚ 6 ਤਮਗੇ ਜਿੱਤੇ ਸਨ, ਜਿਹੜੇ ਕਿ ਕੁਲ 70 ਤਮਗਿਆਂ ਦਾ 34 ਫੀਸਦੀ ਹਿੱਸਾ ਬਣਦਾ ਹੈ।
ਹੁਣ ਇਹ ਅੰਕੜੇ ਦੇਖੋ
ਸਵਿਮਿੰਗ :40 ਸੋਨ, 19 ਚਾਂਦੀ,
10 ਕਾਂਸੀ, ਕੁਲ 69
ਵੇਟਲਿਫਟਿੰਗ : 31 ਸੋਨ, 15 ਚਾਂਦੀ,
09 ਕਾਂਸੀ, ਕੁਲ 54
ਜਿਮਨਾਸਟਿਕ : 29 ਸੋਨ, 21 ਚਾਂਦੀ,
22 ਕਾਂਸੀ, ਕੁਲ 72
ਐਥਲੈਟਿਕਸ : 8 ਸੋਨ, 10 ਚਾਂਦੀ,
14 ਕਾਂਸੀ, ਕੁਲ 32
ਅਜੇ ਤਕ ਕਿਸੇ ਚੀਨੀ ਖਿਡਾਰੀ ਦੇ ਕੋਰੋਨਾ ਵਾਇਰਸ ਨਾਲ ਪ੍ਰਭਾਵਿਤ ਹੋਣ ਦੀ ਖਬਰ ਨਹੀਂ ਆਈ ਹੈ ਪਰ ਵੱਡਾ ਸਵਾਲ ਇਹ ਕਿ ਵੁਹਾਨ ਦੇ ਖਿਡਾਰੀ ਉਸੇ ਹੀ ਮਾਨਸਿਕ ਮਜ਼ਬੂਤੀ ਨਾਲ ਪ੍ਰਦਰਸ਼ਨ ਕਰ ਸਕਣਗੇ, ਜਿਵੇਂ ਉਹ ਇਸ ਵਾਇਰਸ ਦੇ ਫੈਲਣ ਤੋਂ ਪਹਿਲਾਂ ਕਰਦੇ ਸਨ।
ਓਲੰਪਿਕ ਨੂੰ ਲੈ ਕੇ ਚੀਨ ਹੀ ਨਹੀਂ, ਨੰਬਰ ਵਨ ਅਮਰੀਕਾ ਵੀ ਚਿੰਤਾ 'ਚ ਫਸਿਆ
ਕੋਰੋਨਾ ਵਾਇਰਸ ਦਾ ਇਕ ਵੱਡਾ ਫਾਇਦਾ ਚੀਨ ਦੇ ਓਲੰਪਿਕ ਵਿਚ ਕੱਟੜ ਵਿਰੋਧੀ ਅਮਰੀਕਾ ਨੂੰ ਹੋਣਾ ਤੈਅ ਹੈ। ਅਮਰੀਕਾ ਨੂੰ ਤਮਗਾ ਸੂਚੀ ਵਿਚ ਹਮੇਸ਼ਾ ਚੀਨ ਹੀ ਟੱਕਰ ਦਿੰਦਾ ਦਿਸਿਆ ਹੈ। ਉਸ ਨੂੰ ਫਾਇਦਾ ਤਾਂ ਹੋਣਾ ਹੀ ਹੈ ਪਰ ਵਾਇਰਸ ਕਾਰਣ ਉਹ ਵੀ (ਅਮਰੀਕਾ ਵੀ) ਚਿੰਤਤ ਹੈ। ਇਹ ਚਿੰਤਾ ਉਸ ਨੂੰ ਚੀਨ ਵਿਚ ਹੋਣ ਵਾਲੇ ਕੁਆਲੀਫਾਇਰ ਨੂੰ ਲੈ ਕੇ ਹੈ।
ਚੀਨ ਦਾ ਪਿਛਲੀਆਂ 5 ਓਲੰਪਿਕ 'ਚ ਰਿਕਾਰਡ
2000 ਸਿਡਨੀ : 28 ਸੋਨ, 16 ਚਾਂਦੀ, 14 ਕਾਂਸੀ, ਕੁਲ 58
2004 ਏਥੇਨਜ਼ : 32 ਸੋਨ, 17 ਚਾਂਦੀ, 14 ਕਾਂਸੀ, ਕੁਲ 63
2008 ਬੀਜਿੰਗ : 48 ਸੋਨ, 22 ਚਾਂਦੀ, 30 ਕਾਂਸੀ, ਕੁਲ 100
2012 ਲੰਡਨ : 38 ਸੋਨ, 31 ਚਾਂਦੀ, 22 ਕਾਂਸੀ, ਕੁਲ 91
2016 ਰੀਓ ਡੀ ਜੇਨੇਰੀਓ : 16 ਸੋਨ, 18 ਚਾਂਦੀ, 26 ਕਾਂਸੀ, ਕੁਲ 70
ਅਮਰੀਕਾ ਦਾ ਪਿਛਲੀਆਂ 5 ਓਲੰਪਿਕ ਦਾ ਰਿਕਾਰਡ
2000 ਸਿਡਨੀ : 37 ਸੋਨ, 24 ਚਾਂਦੀ, 32 ਕਾਂਸੀ, ਕੁਲ 93
2004 ਏਥੇਨਜ਼ : 36 ਸੋਨ, 39 ਚਾਂਦੀ, 26 ਕਾਂਸੀ, ਕੁਲ 101
2008 ਬੀਜਿੰਗ : 36 ਸੋਨ, 39 ਚਾਂਦੀ, 37 ਕਾਂਸੀ, ਕੁਲ 112
2012 ਲੰਡਨ : 46 ਸੋਨ, 28 ਚਾਂਦੀ, 30 ਕਾਂਸੀ, ਕੁਲ 104
2016 ਰੀਓ ਡੀ ਜੇਨੇਰੀਓ : 46 ਸੋਨ, 37 ਚਾਂਦੀ, 38 ਕਾਂਸੀ, ਕੁਲ 101
2008 ਦੀਆਂ ਬੀਜਿੰਗ ਓਲੰਪਿਕ ਵਿਚ ਚੀਨ ਨੇ ਸਰਵਸ੍ਰੇਸ਼ਠ ਪ੍ਰਦਰਸ਼ਨ ਕਰਦਿਆਂ ਤਮਗਿਆਂ ਦਾ ਸੈਂਕੜਾ ਲਾਇਆ ਸੀ। ਵੈਸੇ ਵੀ ਪਿਛਲੇ 5 ਸਾਲਾਂ ਤੋਂ ਚੀਨ ਇਸ ਤਮਗਾ ਸੂਚੀ ਵਿਚ ਟਾਪ-3 ਵਿਚ ਬਣਿਆ ਹੋਇਆ ਹੈ। ਇਸ ਵਾਰ ਕਿਉਂਕਿ ਓਲੰਪਿਕ ਗੁਆਂਢੀ ਦੇਸ਼ ਜਾਪਾਨ ਵਿਚ ਹੋਣੀਆਂ ਹਨ ਤਾਂ ਚੀਨ ਇਕ ਵਾਰ ਫਿਰ ਜ਼ੋਰਦਾਰ ਐਂਟਰੀ ਮਾਰਨ ਦੀ ਕੋਸ਼ਿਸ਼ ਕਰੇਗਾ। ਹਾਲਾਂਕਿ ਕੋਰੋਨਾ ਵਾਇਰਸ ਕਾਰਣ ਉਸਦੀਆਂ ਤਿਆਰੀਆਂ ਸਾਫ ਤੌਰ 'ਤੇ ਪ੍ਰਭਾਵਿਤ ਹੁੰਦੀਆਂ ਦਿਸ ਰਹੀਆਂ ਹਨ। ਚੀਨ ਨੂੰ 85 ਕਿ. ਗ੍ਰਾ. ਭਾਰ ਵਰਗ ਦੇ ਵੇਟਲਿਫਟਰ ਤੇ 2016 ਦੇ ਓਲੰਪਿਕ ਸੋਨ ਤਮਗਾ ਜੇਤੂ ਤਿਆਨ ਤਾਓ ਤੇ 2 ਓਲੰਪਿਕ ਤਮਗਾ ਜੇਤੂ ਵਿਨਰ ਲੂ ਸ਼ਾਜੂਨ ਤੋਂ ਟੋਕੀਓ ਓਲੰਪਿਕ ਵਿਚ ਸੋਨੇ ਦੀ ਉਮੀਦ ਹੈ ਕਿਉਂਕਿ ਇਹ ਦੋਵੇਂ ਖਿਡਾਰੀ ਵੁਹਾਨ ਤੋਂ ਹੀ ਆਉਂਦੇ ਹਨ। ਅਜਿਹੇ ਵਿਚ ਉਸਦੀ ਚਿੰਤਾ ਹੋਰ ਵਧ ਗਈ ਹੈ।
ਅੰਕੜੇ ਸਾਫ ਹਨ-ਅਮਰੀਕਾ ਲਗਾਤਾਰ ਪਹਿਲੇ ਨੰਬਰ 'ਤੇ ਬਣਿਆ ਹੋਇਆ ਹੈ ਕਿਉਂਕਿ ਅਮਰੀਕਾ ਨੂੰ ਹੁਣ ਤਕ ਚੀਨ ਹੀ ਸਖਤ ਟੱਕਰ ਦਿੰਦਾ ਆ ਰਿਹਾ ਹੈ। ਅਜਿਹੇ ਵਿਚ ਵੁਹਾਨ ਦੇ ਖਿਡਾਰੀਆਂ ਦੀ ਸਥਿਤੀ ਚੀਨ ਨੂੰ ਸਿੱਧੇ ਤੌਰ 'ਤੇ ਨੁਕਸਾਨ ਪਹੁੰਚਾ ਸਕਦੀ ਹੈ। ਹਾਲਾਂਕਿ ਅਜਿਹਾ ਨਹੀਂ ਹੈ ਕਿ ਕੋਰੋਨਾ ਵਾਇਰਸ ਨਾਲ ਜੂਝ ਰਹੇ ਚੀਨ ਨੂੰ ਦੇਖ ਕੇ ਅਮਰੀਕਾ ਖੁਸ਼ ਹੈ। ਅਮਰੀਕਾ ਵੀ ਇਸ ਮਾਮਲੇ ਵਿਚ ਚਿੰਤਤ ਹੈ। ਉਹ ਚਿੰਤਤ ਇਸ ਲਈ ਹੈ ਕਿਉਂਕਿ ਉਸਦੇ ਟਰੈਕ ਐੈਂਡ ਫੀਲਡ ਦੇ ਕੁਆਲੀਫਾਇਰ ਦੇ ਚੀਨ ਦੇ ਇਲਾਕੇ ਵਿਚ ਹੋਣੇ ਸਨ ਪਰ ਜੇਕਰ ਇਸ ਦੇ ਸਥਾਨ ਬਦਲਣਗੇ ਤਾਂ ਤਿਆਰੀਆਂ ਵੀ ਪ੍ਰਭਾਵਿਤ ਹੋਣਗੀਆਂ। ਜਿਸ ਨਵੀਂ ਜਗ੍ਹਾ 'ਤੇ ਕੁਆਲੀਫਾਇਰ ਸ਼ਿਫਟ ਹੋਣਗੇ, ਉਥੇ ਕੌਮਾਂਤਰੀ ਪੱਧਰ ਦੀਆਂ ਸਹੂਲਤਾਂ ਮਿਲਣਗੀਆਂ ਜਾਂ ਨਹੀਂ, ਡਾਈਟ ਕਿਸ ਤਰ੍ਹਾਂ ਦੀ ਰਹੇਗੀ ਜਾਂ ਮੌਸਮ ਕਿਸ ਤਰ੍ਹਾਂ ਦਾ ਰਹੇਗਾ, ਸਭ ਚੀਜ਼ਾਂ 'ਤੇ ਅਮਰੀਕੀ ਮੈਨੇਜਮੈਂਟ ਨੂੰ ਦੁਬਾਰਾ ਨਜ਼ਰ ਦੌੜਾਉਣੀ ਪਵੇਗੀ।
ਓਲੰਪਿਕ ਕੁਆਲੀਫਾਇਰ ਮੁਕਾਬਲੇ ਹੋਏ ਰੀ-ਸ਼ਡਿਊਲ
ਕੋਰੋਨਾ ਵਾਇਰਸ ਕਾਰਣ ਟੋਕੀਓ ਓਲੰਪਿਕ ਦੇ ਕਈ ਕੁਆਲੀਫਾਇਰ ਮੁਕਾਬਲੇ ਰੀ-ਸ਼ਡਿਊਲ ਹੋ ਚੁੱਕੇ ਹਨ। ਭਾਵੇਂ ਹੀ ਚੀਨ ਦਾ ਸਭ ਤੋਂ ਪ੍ਰਭਾਵਿਤ ਵੁਹਾਨ ਜਾਪਾਨ ਦੇ ਟੋਕੀਓ ਤੋਂ 1600 ਮੀਲ ਦੂਰ ਹੈ ਪਰ ਬਾਵਜੂਦ ਇਸਦੇ ਕਈ ਕੌਮਾਂਤਰੀ ਈਵੈਂਟ ਦੇ ਸ਼ਡਿਊਲ ਬਦਲੇ ਜਾ ਚੁੱਕੇ ਹਨ। ਫਰਵਰੀ ਵਿਚ ਹੋਣ ਵਾਲੀ ਵਰਲਡ ਇਨਡੋਰ ਐਂਡ ਫੀਲਡ ਚੈਂਪੀਅਨਸ਼ਿਪ ਹੁਣ 2021 ਵਿਚ ਹੋਵੇਗੀ। ਬਾਕੀ ਕੁਆਲੀਫਾਇਰ ਮੁਕਾਬਲੇ ਵੁਹਾਨ ਤੋਂ ਹੁਣ ਜੌਰਡਨ ਦੇ ਉਮਾਨ ਵਿਚ ਸ਼ਿਫਟ ਹੋ ਗਏ ਹਨ। ਮਹਿਲਾ ਫੁੱਟਬਾਲ ਮੁਕਾਬਲੇ ਵੀ ਵੁਹਾਨ ਤੋਂ 130 ਮੀਲ ਦੂਰੀ 'ਤੇ ਹੋਣਗੇ। ਹੋਰ ਤਾਂ ਹੋਰ ਫੀਬਾ ਅਰਥਾਤ ਫੈੱਡਰੇਸ਼ਨ ਆਫ ਬਾਸਕਟਬਾਲ ਐਸੋਸੀਏਸ਼ਨ ਵੀ ਇਸ ਤੋਂ ਚਿੰਤਤ ਦਿਖਾਈ ਦੇ ਰਹੀ ਹੈ। ਉਸ ਨੇ ਮਹਿਲਾ ਓਲੰਪਿਕ ਕੁਆਲੀਫਾਇੰਗ ਟੂਰਨਾਮੈਂਟਾਂ ਨੂੰ ਵੁਹਾਨ ਤੋਂ 600 ਮੀਲ ਦੂਰ ਸਰਬੀਆ ਵਿਚ ਸ਼ਿਫਟ ਕਰ ਲਿਆ ਹੈ।
560 ਲੋਕਾਂ ਦੀ ਹੋ ਚੁੱਕੀ ਹੈ ਮੌਤ ਹੁਣ ਤਕ ਕੋਰੋਨਾ ਵਾਇਰਸ ਕਾਰਨ
400+ ਖਿਡਾਰੀ ਭੇਜਣੇ ਹਨ ਚੀਨ ਨੇ ਟੋਕੀਓ ਓਲੰਪਿਕ ਲਈ
ਸਖਤ ਕਦਮ ਚੁੱਕਾਂਗੇ
ਚੀਨ ਦੇ ਇਨ੍ਹਾਂ ਹਾਲਾਤ 'ਤੇ 5 ਓਲੰਪਿਕ ਤਮਗੇ ਜਿੱਤ ਚੁੱਕੇ ਯੂ. ਐੱਸ. ਏ. ਪੈਟਾਥਲਾਨ ਦੇ ਸੀ. ਈ. ਓ. ਰਾਬਸਟਲ ਕਹਿੰਦੇ ਹਨ ਕਿ ਸਾਨੂੰ ਆਪਣੇ ਖਿਡਾਰੀਆਂ ਦੀ ਸਿਹਤ ਦੀ ਚਿੰਤਾ ਹੈ, ਓਲੰਪਿਕ ਸਾਹਮਣੇ ਹੈ, ਜੇਕਰ ਸਥਿਤੀ ਨਾ ਸੁਧਰੀ ਤਾਂ ਅਸੀਂ ਸਖਤ ਕਦਮ ਚੁੱਕਾਂਗੇ।
PCA ਵਿਚ ਗੜਬੜੀਆਂ ਦਾ ਦੋਸ਼, BCCI ਮੁਖੀ ਕੋਲ ਕੀਤੀ ਸ਼ਿਕਾਇਤ
NEXT STORY