ਸਪੋਰਟਸ ਡੈਸਕ : ਖੇਡ ਮੰਤਰੀ ਮਨਸੁਖ ਮਾਂਡਵੀਆ ਨੇ ਅੱਜ ਐਲਾਨ ਕੀਤਾ ਹੈ ਕਿ 'ਖੇਲੋ ਇੰਡੀਆ ਵਿੰਟਰ ਗੇਮਜ਼' (Khelo India Winter Games) ਦਾ ਦੂਜਾ ਪੜਾਅ 23 ਤੋਂ 26 ਫਰਵਰੀ ਤੱਕ ਜੰਮੂ-ਕਸ਼ਮੀਰ ਦੇ ਮਸ਼ਹੂਰ ਸੈਰ-ਸਪਾਟਾ ਸਥਾਨ ਗੁਲਮਰਗ ਵਿੱਚ ਕਰਵਾਇਆ ਜਾਵੇਗਾ। ਇਸ ਰੋਮਾਂਚਕ ਟੂਰਨਾਮੈਂਟ ਵਿੱਚ ਦੇਸ਼ ਭਰ ਦੇ ਲਗਭਗ 400 ਖਿਡਾਰੀ ਹਿੱਸਾ ਲੈਣਗੇ। ਮਾਂਡਵੀਆ ਅਨੁਸਾਰ, ਲੇਹ ਵਿੱਚ ਕਰਵਾਇਆ ਗਿਆ ਪਹਿਲਾ ਪੜਾਅ ਬਹੁਤ ਸਫਲ ਰਿਹਾ ਸੀ ਅਤੇ ਹੁਣ ਗੁਲਮਰਗ ਵਿੱਚ ਹੋਣ ਵਾਲੀਆਂ ਇਹ ਖੇਡਾਂ ਸਰਦੀਆਂ ਦੇ ਓਲੰਪਿਕ ਤੋਂ ਤੁਰੰਤ ਬਾਅਦ ਹੋ ਰਹੀਆਂ ਹਨ, ਜਿਸ ਲਈ ਇਹ ਬਿਲਕੁਲ ਸਹੀ ਸਮਾਂ ਹੈ।
ਇਨ੍ਹਾਂ ਚਾਰ ਖੇਡਾਂ ਦੇ ਹੋਣਗੇ ਮੁਕਾਬਲੇ ਗੁਲਮਰਗ ਪੜਾਅ ਦੌਰਾਨ ਚਾਰ ਪ੍ਰਮੁੱਖ ਮੈਡਲ ਖੇਡਾਂ ਦੇ ਮੁਕਾਬਲੇ ਕਰਵਾਏ ਜਾਣਗੇ, ਜਿਨ੍ਹਾਂ ਵਿੱਚ ਸਕੀ ਮਾਉਂਟੇਨੀਅਰਿੰਗ, ਅਲਪਾਈਨ ਸਕੀਇੰਗ, ਨੋਰਡਿਕ ਸਕੀਇੰਗ (ਕਰੌਸਕੰਟਰੀ) ਅਤੇ ਸਨੋਬੋਰਡਿੰਗ ਸ਼ਾਮਲ ਹਨ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਲੇਹ (ਲਦਾਖ) ਵਿੱਚ 20 ਤੋਂ 26 ਜਨਵਰੀ ਤੱਕ ਪਹਿਲਾ ਪੜਾਅ ਆਯੋਜਿਤ ਕੀਤਾ ਗਿਆ ਸੀ, ਜਿਸ ਵਿੱਚ 'ਫਿਗਰ ਸਕੇਟਿੰਗ' ਮੁੱਖ ਖਿੱਚ ਦਾ ਕੇਂਦਰ ਰਹੀ ਸੀ।
ਪਿਛਲੀਆਂ ਵਿੰਟਰ ਗੇਮਜ਼ ਦੇ ਪ੍ਰਦਰਸ਼ਨ 'ਤੇ ਨਜ਼ਰ ਮਾਰੀਏ ਤਾਂ ਭਾਰਤੀ ਫੌਜ ਨੇ ਸਭ ਤੋਂ ਵੱਧ 18 ਤਗਮੇ ਜਿੱਤ ਕੇ ਪਹਿਲਾ ਸਥਾਨ ਹਾਸਲ ਕੀਤਾ ਸੀ। ਹਿਮਾਚਲ ਪ੍ਰਦੇਸ਼ ਦੂਜੇ ਸਥਾਨ 'ਤੇ ਰਿਹਾ ਸੀ, ਜਦਕਿ ਲਦਾਖ, ਮਹਾਰਾਸ਼ਟਰ ਅਤੇ ਤਾਮਿਲਨਾਡੂ ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ ਸੀ। ਪ੍ਰਸ਼ਾਸਨ ਅਤੇ ਖੇਡ ਮੰਤਰਾਲੇ ਨੂੰ ਉਮੀਦ ਹੈ ਕਿ ਇਸ ਵਾਰ ਵੀ ਮੁਕਾਬਲੇ ਬੇਹੱਦ ਸਖ਼ਤ ਅਤੇ ਦਿਲਚਸਪ ਹੋਣਗੇ।
ਮੈਚ ਖੇਡਣ ਪੁੱਜੀ ਪਾਕਿ ਟੀਮ ਨਾਲ ਹੋਈ ਮਾੜੀ! ਹੋਟਲ 'ਚ ਨਹੀਂ ਮਿਲੇ ਕਮਰੇ, ਸੜਕ 'ਤੇ ਖੱਜਲ ਹੋਏ ਖਿਡਾਰੀ
NEXT STORY 
