ਸਪੋਰਟਸ ਡੈਸਕ: ਲਖਨਊ ਸੁਪਰ ਜਾਇੰਟਸ (LSG) ਦੇ ਬੱਲੇਬਾਜ਼ ਨਿਕੋਲਸ ਪੂਰਨ IPL 2025 'ਚ ਬੱਲੇ ਨਾਲ ਅੱਗ ਕੱਢ ਰਹੇ ਹਨ। ਪੂਰਨ ਨੇ ਹੁਣ ਤੱਕ ਸਭ ਤੋਂ ਵੱਧ ਦੌੜਾਂ ਬਣਾਈਆਂ ਹਨ। ਪਰ ਇਸ ਵਾਰ ਪੂਰਨ ਆਪਣੀ ਬੱਲੇਬਾਜ਼ੀ ਕਰਕੇ ਨਹੀਂ ਸਗੋਂ ਇੱਕ ਹਿੰਦੀ ਗਾਣੇ ਕਰਕੇ ਸੁਰਖੀਆਂ 'ਚ ਹੈ। ਉਸਨੇ ਹਿੰਦੀ 'ਚ ਇੱਕ ਗੀਤ ਗਾਇਆ ਹੈ ਜਿਸਦੀ ਵੀਡੀਓ ਲਖਨਊ ਨੇ ਆਪਣੇ ਅਧਿਕਾਰਤ ਸੋਸ਼ਲ ਮੀਡੀਆ ਹੈਂਡਲ 'ਤੇ ਪੋਸਟ ਕੀਤੀ ਹੈ।
ਪੂਰਨ ਨਾਲ LSG ਦੇ ਕਪਤਾਨ ਰਿਸ਼ਭ ਪੰਤ, ਨੌਜਵਾਨ ਅਬਦੁਲ ਸਮਦ ਅਤੇ ਹੋਰ ਸਾਥੀ ਸੰਗੀਤਕ ਸੈਸ਼ਨ 'ਚ ਸ਼ਾਮਲ ਹੋਏ ਜੋ ਸੋਮਵਾਰ ਨੂੰ ਚੇਨਈ ਸੁਪਰ ਕਿੰਗਜ਼ (CSK) ਦੇ ਖਿਲਾਫ ਆਪਣੇ ਮਹੱਤਵਪੂਰਨ ਮੈਚ ਤੋਂ ਪਹਿਲਾਂ ਕੁਝ ਪਲਾਂ ਦਾ ਆਨੰਦ ਮਾਣ ਰਹੇ ਸਨ। ਪੂਰਨ ਦੇ ਨਾਲ ਕੁਝ ਹੋਰ ਕ੍ਰਿਕਟਰ ਵੀ ਮੌਜੂਦ ਸਨ, ਜਿਨ੍ਹਾਂ 'ਚ ਕਪਤਾਨ ਰਿਸ਼ਭ ਪੰਤ ਵੀ ਸ਼ਾਮਲ ਸਨ। ਪ੍ਰਸ਼ੰਸਕਾਂ ਨੂੰ ਵੀਡੀਓ ਬਹੁਤ ਪਸੰਦ ਆਇਆ ਅਤੇ ਉਨ੍ਹਾਂ ਨੇ ਪੂਰਨ ਦੀ ਆਵਾਜ਼ ਦੀ ਵੀ ਪ੍ਰਸ਼ੰਸਾ ਕੀਤੀ।
ਮੈਚ ਦੀ ਗੱਲ ਕਰੀਏ ਤਾਂ ਮਹਿੰਦਰ ਸਿੰਘ ਧੋਨੀ ਇੱਕ ਵਾਰ ਫਿਰ ਫਿਨਿਸ਼ਰ ਦੀ ਭੂਮਿਕਾ 'ਚ ਵਾਪਸ ਆਏ ਅਤੇ ਚੇਨਈ ਸੁਪਰ ਕਿੰਗਜ਼ ਨੂੰ ਪਲੇਆਫ ਦੀ ਦੌੜ 'ਚ ਬਣੇ ਰਹਿਣ ਲਈ ਇੱਕ ਮਹੱਤਵਪੂਰਨ ਜਿੱਤ ਦਿਵਾਈ। ਜਦੋਂ ਧੋਨੀ ਕ੍ਰੀਜ਼ 'ਤੇ ਆਏ ਤਾਂ ਚੇਨਈ ਨੂੰ ਜਿੱਤ ਲਈ 5 ਓਵਰਾਂ 'ਚ 53 ਦੌੜਾਂ ਦੀ ਲੋੜ ਸੀ। ਧੋਨੀ ਨੇ ਇੱਕ ਸਿਰਾ ਫੜਿਆ ਅਤੇ 11 ਗੇਂਦਾਂ 'ਚ ਚਾਰ ਚੌਕੇ ਅਤੇ ਇੱਕ ਛੱਕੇ ਦੀ ਮਦਦ ਨਾਲ 26 ਦੌੜਾਂ ਬਣਾਈਆਂ। ਸ਼ਿਵਮ ਦੂਬੇ ਨੇ ਵੀ 37 ਗੇਂਦਾਂ 'ਤੇ 43 ਦੌੜਾਂ ਬਣਾ ਕੇ ਉਸਦਾ ਸਾਥ ਦਿੱਤਾ ਅਤੇ 20ਵੇਂ ਓਵਰ 'ਚ ਟੀਮ ਨੂੰ ਪੰਜ ਵਿਕਟਾਂ ਨਾਲ ਜਿੱਤ ਦਿਵਾਈ। ਇਹ ਲਗਾਤਾਰ ਪੰਜ ਹਾਰਾਂ ਤੋਂ ਬਾਅਦ ਚੇਨਈ ਦੀ ਪਹਿਲੀ ਜਿੱਤ ਹੈ। ਇਸ ਤੋਂ ਪਹਿਲਾਂ, ਚੇਨਈ ਸੁਪਰ ਕਿੰਗਜ਼ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਲਖਨਊ ਨੇ ਰਿਸ਼ਭ ਪੰਤ ਦੀਆਂ 63 ਦੌੜਾਂ ਅਤੇ ਮਿਸ਼ੇਲ ਮਾਰਸ਼ ਦੀਆਂ 30 ਦੌੜਾਂ ਦੀ ਬਦੌਲਤ 6 ਵਿਕਟਾਂ 'ਤੇ 166 ਦੌੜਾਂ ਬਣਾਈਆਂ।
ਪੂਰਨ ਆਪਣੇ ਗਾਣੇ ਲਈ ਸੋਸ਼ਲ ਮੀਡੀਆ 'ਤੇ ਟ੍ਰੈਂਡ ਕਰ ਰਿਹਾ ਹੈ। ਨਿਕੋਲਸ ਪੂਰਨ ਦੇ ਇਸ ਅੰਦਾਜ਼ ਨੂੰ ਸੋਸ਼ਲ ਮੀਡੀਆ 'ਤੇ ਬਹੁਤ ਪਸੰਦ ਕੀਤਾ ਜਾ ਰਿਹਾ ਹੈ। ਇੱਕ ਪ੍ਰਸ਼ੰਸਕ ਨੇ ਉਸਨੂੰ 'ਯੋ ਯੋ ਪੂਰਨ ਸਿੰਘ' ਵੀ ਕਿਹਾ।
ਸਾਨੂੰ ਬਿਹਤਰ ਪਿੱਚਾਂ 'ਤੇ ਖੇਡਣ ਦੀ ਲੋੜ ਹੈ ਤਾਂ ਜੋ ਬੱਲੇਬਾਜ਼ਾਂ ਨੂੰ ਆਤਮਵਿਸ਼ਵਾਸ ਮਿਲੇ: ਧੋਨੀ
NEXT STORY 
