ਨਵੀਂ ਦਿੱਲੀ : ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਆਉਣ ਵਾਲੇ ਦਿਨਾਂ ਵਿੱਚ ਸਾਊਥ ਅਫਰੀਕਾ ਦਾ ਦੌਰਾ ਕਰਨ ਜਾ ਰਹੀ ਹੈ। ਬੀਸੀਸੀਆਈ (BCCI) ਨੇ ਇਸ ਦੌਰੇ 'ਤੇ ਖੇਡੀ ਜਾਣ ਵਾਲੀ ਪੰਜ ਮੈਚਾਂ ਦੀ ਟੀ-20 ਸੀਰੀਜ਼ ਲਈ ਭਾਰਤੀ ਸਕੁਐਡ ਦਾ ਐਲਾਨ ਕਰ ਦਿੱਤਾ ਹੈ। ਅਪ੍ਰੈਲ ਵਿੱਚ ਹੋਣ ਵਾਲੀ ਇਸ ਸੀਰੀਜ਼ ਰਾਹੀਂ ਭਾਰਤੀ ਟੀਮ ਜੂਨ ਵਿੱਚ ਹੋਣ ਵਾਲੇ ਮਹਿਲਾ ਟੀ-20 ਵਿਸ਼ਵ ਕੱਪ ਲਈ ਆਪਣੀਆਂ ਤਿਆਰੀਆਂ ਨੂੰ ਅੰਤਿਮ ਰੂਪ ਦੇਵੇਗੀ।
ਹਰਮਨਪ੍ਰੀਤ ਕੌਰ ਸੰਭਾਲੇਗੀ ਕਮਾਨ
ਇਸ ਟੀ-20 ਸੀਰੀਜ਼ ਵਿੱਚ ਹਰਮਨਪ੍ਰੀਤ ਕੌਰ ਹੀ ਟੀਮ ਇੰਡੀਆ ਦੀ ਕਪਤਾਨੀ ਕਰਦੀ ਨਜ਼ਰ ਆਵੇਗੀ। ਜ਼ਿਕਰਯੋਗ ਹੈ ਕਿ ਹਰਮਨ ਦੀ ਕਪਤਾਨੀ ਹੇਠ ਹੀ ਭਾਰਤੀ ਟੀਮ ਨੇ ਪਿਛਲੇ ਸਾਲ ਵਨਡੇ ਵਿਸ਼ਵ ਕੱਪ ਦਾ ਖ਼ਿਤਾਬ ਜਿੱਤਿਆ ਸੀ। ਸਮ੍ਰਿਤੀ ਮੰਧਾਨਾ ਨੂੰ ਟੀਮ ਦਾ ਉਪ-ਕਪਤਾਨ ਬਣਾਇਆ ਗਿਆ ਹੈ।
ਨੌਜਵਾਨ ਖਿਡਾਰੀਆਂ 'ਤੇ ਭਰੋਸਾ
ਇਸ ਵਾਰ ਟੀਮ ਵਿੱਚ ਕੁਝ ਨਵੇਂ ਚਿਹਰਿਆਂ ਨੂੰ ਮੌਕਾ ਦਿੱਤਾ ਗਿਆ ਹੈ। ਅਨੁਸ਼ਕਾ ਸ਼ਰਮਾ ਨੂੰ ਪਹਿਲੀ ਵਾਰ ਭਾਰਤੀ ਟੀ-20 ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਉਨ੍ਹਾਂ ਦੇ ਨਾਲ ਹੀ ਉਮਾ ਛੇਤਰੀ ਅਤੇ ਕਾਸ਼ਵੀ ਗੌਤਮ ਨੂੰ ਵੀ ਚੁਣਿਆ ਗਿਆ ਹੈ। ਕਾਸ਼ਵੀ ਗੌਤਮ ਨੇ ਹਾਲ ਹੀ ਵਿੱਚ ਆਸਟ੍ਰੇਲੀਆ ਵਿਰੁੱਧ ਵਨਡੇ ਸੀਰੀਜ਼ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਸੀ ਅਤੇ ਹੁਣ ਉਹ ਵਿਸ਼ਵ ਕੱਪ ਲਈ ਆਪਣੀ ਦਾਅਵੇਦਾਰੀ ਪੱਕੀ ਕਰਨਾ ਚਾਹੇਗੀ।
ਕੁਝ ਦਿੱਗਜ ਖਿਡਾਰੀ ਟੀਮ ਤੋਂ ਬਾਹਰ
ਨਵੇਂ ਖਿਡਾਰੀਆਂ ਨੂੰ ਜਗ੍ਹਾ ਦੇਣ ਲਈ ਬੋਰਡ ਨੇ ਸਨੇਹ ਰਾਣਾ, ਅਮਨਜੋਤ ਕੌਰ, ਵੈਸ਼ਨਵੀ ਸ਼ਰਮਾ ਅਤੇ ਜੀ. ਕਮਲੀਨੀ ਨੂੰ ਟੀਮ ਵਿੱਚੋਂ ਬਾਹਰ ਕਰ ਦਿੱਤਾ ਹੈ। ਗੇਂਦਬਾਜ਼ੀ ਵਿਭਾਗ ਵਿੱਚ ਸਪਿਨ ਦਾ ਜ਼ਿੰਮਾ ਦੀਪਤੀ ਸ਼ਰਮਾ, ਸ਼੍ਰੀ ਚਰਨੀ ਅਤੇ ਸ਼੍ਰੇਯੰਕਾ ਪਾਟਿਲ ਸੰਭਾਲਣਗੀਆਂ।
ਟੀ-20 ਸੀਰੀਜ਼ ਦਾ ਸ਼ਡਿਊਲ:
ਪਹਿਲਾ ਮੈਚ: 17 ਅਪ੍ਰੈਲ (ਡਰਬਨ)
ਦੂਜਾ ਮੈਚ: 19 ਅਪ੍ਰੈਲ (ਡਰਬਨ)
ਤੀਜਾ ਮੈਚ: 22 ਅਪ੍ਰੈਲ (ਜੋਹਾਨਸਬਰਗ)
ਚੌਥਾ ਮੈਚ: 25 ਅਪ੍ਰੈਲ (ਜੋਹਾਨਸਬਰਗ)
ਪੰਜਵਾਂ ਮੈਚ: 27 ਅਪ੍ਰੈਲ (ਬੇਨੋਨੀ)
ਸਾਊਥ ਅਫਰੀਕਾ ਸੀਰੀਜ਼ ਲਈ ਭਾਰਤੀ ਸਕੁਐਡ:
ਹਰਮਨਪ੍ਰੀਤ ਕੌਰ (ਕਪਤਾਨ), ਸਮ੍ਰਿਤੀ ਮੰਧਾਨਾ (ਉਪ-ਕਪਤਾਨ), ਸ਼ੈਫਾਲੀ ਵਰਮਾ, ਜੇਮਿਮਾ ਰੌਡਰਿਗਜ਼, ਦੀਪਤੀ ਸ਼ਰਮਾ, ਰਿਚਾ ਘੋਸ਼ (ਵਿਕਟਕੀਪਰ), ਅਰੁੰਧਤੀ ਰੈਡੀ, ਰੇਣੂਕਾ ਸਿੰਘ ਠਾਕੁਰ, ਕ੍ਰਾਂਤੀ ਗੌੜ, ਸ਼੍ਰੀ ਚਰਨੀ, ਸ਼੍ਰੇਯੰਕਾ ਪਾਟਿਲ, ਕਾਸ਼ਵੀ ਗੌਤਮ, ਭਾਰਤੀ ਫੁਲਮਾਲੀ, ਉਮਾ ਛੇਤਰੀ (ਵਿਕਟਕੀਪਰ), ਅਨੁਸ਼ਕਾ ਸ਼ਰਮਾ।
ਅਰੁੰਧਤੀ ਰੈੱਡੀ ਨੂੰ ਫਰਵਰੀ ਮਹੀਨੇ ਦਾ ਮਹਿਲਾ ‘ਪਲੇਅਰ ਆਫ ਦਿ ਮੰਥ’ ਐਵਾਰਡ ਮਿਲਿਆ
NEXT STORY 
