ਕੋਈ ਜ਼ਮਾਨਾ ਸੀ ਜਦੋਂ ਔਲਾਦ ਮਾਂ ਦੇ ਚਰਨਾਂ 'ਚ ਸਵਰਗ ਅਤੇ ਪਿਤਾ ਦੇ ਚਿਹਰੇ 'ਚ ਭਗਵਾਨ ਦੇਖਦੀ ਸੀ ਪਰ ਅੱਜ ਸਮਾਂ ਬਦਲ ਗਿਆ ਹੈ ਤੇ ਆਮ ਤੌਰ 'ਤੇ ਅਜਿਹਾ ਹੋ ਰਿਹਾ ਹੈ ਕਿ ਆਪਣੇ ਨਾਂ ਜਾਇਦਾਦ ਲਿਖਵਾ ਲੈਣ ਤੋਂ ਬਾਅਦ ਔਲਾਦ ਆਪਣੇ ਬੁੱਢੇ ਮਾਤਾ-ਪਿਤਾ ਵਲੋਂ ਅੱਖਾਂ ਫੇਰ ਕੇ ਉਨ੍ਹਾਂ ਨੂੰ ਬੇਸਹਾਰਾ ਛੱਡ ਦਿੰਦੀ ਹੈ।
ਜੇਕਰ ਔਲਾਦਾਂ ਆਪਣੇ ਬਜ਼ੁਰਗਾਂ ਨੂੰ ਆਪਣੇ ਕੋਲ ਰੱਖਦੀਆਂ ਵੀ ਹਨ ਤਾਂ ਉਨ੍ਹਾਂ ਦੀ ਹੈਸੀਅਤ ਵੀ ਘਰ 'ਚ ਸਿਰਫ ਰੋਟੀ-ਕੱਪੜੇ ਦੇ ਬਦਲੇ 'ਚ ਬਿਨਾਂ ਤਨਖਾਹ ਕੰਮ ਕਰਨ ਵਾਲੇ 24 ਘੰਟੇ ਦੇ ਨੌਕਰ ਵਰਗੀ ਹੋ ਕੇ ਰਹਿ ਜਾਂਦੀ ਹੈ। ਉਨ੍ਹਾਂ ਨੂੰ ਆਪਣੇ ਬੇਟਿਆਂ ਹੀ ਨਹੀਂ, ਨੂੰਹਾਂ ਤੇ ਪੋਤੇ-ਪੋਤੀਆਂ ਤਕ ਦੇ ਹੱਥੋਂ ਅਪਮਾਨ ਦੇ ਘੁੱਟ ਪੀਣੇ ਪੈਂਦੇ ਹਨ।
ਮਾਤਾ-ਪਿਤਾ ਤਾਂ ਇਹ ਸੋਚ ਕੇ ਔਲਾਦਾਂ ਦਾ ਹਰ ਸੰਭਵ ਚੰਗੀ ਤਰ੍ਹਾਂ ਪਾਲਣ-ਪੋਸ਼ਣ ਕਰਦੇ ਹਨ ਕਿ ਉਹ ਉਨ੍ਹਾਂ ਦੇ ਬੁਢਾਪੇ ਦੀ ਲਾਠੀ ਬਣਨਗੀਆਂ ਪਰ ਜਦੋਂ ਇਹ ਲਾਠੀ ਉਨ੍ਹਾਂ ਦੀ ਝੁਕੀ ਹੋਈ ਪਿੱਠ 'ਤੇ ਪੈਂਦੀ ਹੈ ਤਾਂ ਉਹ ਕਰਾਹ ਵੀ ਨਹੀਂ ਸਕਦੇ। ਕੇਂਦਰ ਅਤੇ ਵੱਖ-ਵੱਖ ਸੂਬਾਈ ਸਰਕਾਰਾਂ ਵਲੋਂ ਸਰਪ੍ਰਸਤਾਂ ਤੇ ਸੀਨੀਅਰ ਨਾਗਰਿਕਾਂ ਦੀ ਦੇਖਭਾਲ ਸੰਬੰਧੀ ਕੁਝ ਕਾਨੂੰਨ ਪਾਸ ਕਰਨ ਦੇ ਬਾਵਜੂਦ ਬਜ਼ੁਰਗ ਵੱਡੀ ਗਿਣਤੀ 'ਚ ਅਣਗੌਲੇ ਗਏ ਹਨ ਅਤੇ ਤਸੀਹਿਆਂ ਦੇ ਸ਼ਿਕਾਰ ਹੋ ਰਹੇ ਹਨ।
ਲੁਧਿਆਣਾ ਵਾਸੀ ਸ਼੍ਰੀਮਤੀ ਸੁਖਵਿੰਦਰ ਕੌਰ ਅਤੇ ਉਨ੍ਹਾਂ ਦੇ ਪਤੀ ਮਨਜੀਤ ਸਿੰਘ ਇਸ ਦੀ ਨਵੀਨਤਮ ਉਦਾਹਰਣ ਹਨ। ਉਨ੍ਹਾਂ ਦੀਆਂ ਦੋ ਬੇਟੀਆਂ ਅਤੇ ਇਕੋ-ਇਕ ਬੇਟਾ ਸੰਨੀ ਕੁਮਾਰ ਹੈ। ਉਸ ਨੂੰ ਉਨ੍ਹਾਂ ਨੇ ਵਕਾਲਤ ਪੜ੍ਹਵਾਈ ਅਤੇ ਉਸ ਦੀ ਇੱਛਾ ਅਨੁਸਾਰ ਵਿਆਹ ਕੀਤਾ।
ਮਾਤਾ-ਪਿਤਾ ਦਾ ਕਿਰਾਏ ਦਾ ਮਕਾਨ ਛੋਟਾ ਹੋਣ ਕਾਰਨ ਵਿਆਹ ਤੋਂ ਬਾਅਦ ਉਹ ਆਪਣੀ ਪਤਨੀ ਨਾਲ ਵੱਖ ਰਹਿਣ ਲੱਗਾ। ਸੁਖਵਿੰਦਰ ਆਪਣੇ ਪਤੀ ਅਤੇ ਬੇਟੀਆਂ ਨਾਲ ਰਹਿੰਦੀ ਸੀ ਤੇ ਪਤੀ ਨਾਲ ਕੰਮ ਕਰਦਿਆਂ ਉਨ੍ਹਾਂ ਨੇ ਲੁਧਿਆਣਾ ਦੀ ਸ਼ੰਕਰ ਕਾਲੋਨੀ 'ਚ ਥੋੜ੍ਹੀ ਜ਼ਮੀਨ ਲੈ ਕੇ ਉਸ 'ਤੇ ਮਕਾਨ ਬਣਾ ਲਿਆ।
ਅਗਸਤ 2014 'ਚ ਅਚਾਨਕ ਸੰਨੀ ਅਤੇ ਉਸ ਦੀ ਪਤਨੀ ਨੇ ਜ਼ਬਰਦਸਤੀ ਘਰ 'ਚ ਦਾਖਲ ਹੋ ਕੇ ਕਬਜ਼ਾ ਜਮਾ ਲਿਆ ਅਤੇ ਉਨ੍ਹਾਂ ਨੂੰ ਝੂਠੇ ਕੇਸ 'ਚ ਫਸਾਉਣ ਦੀ ਧਮਕੀ ਦਿੱਤੀ। ਸੁਖਵਿੰਦਰ ਤੇ ਮਨਜੀਤ ਸਿੰਘ ਨੂੰ ਆਪਣਾ ਹੀ ਘਰ ਛੱਡਣਾ ਪਿਆ। ਇਸ 'ਤੇ ਸੁਖਵਿੰਦਰ ਕੌਰ ਨੇ ਜ਼ਿਲਾ ਮੈਜਿਸਟ੍ਰੇਟ-ਕਮ-ਡਿਪਟੀ ਕਮਿਸ਼ਨਰ ਨੂੰ ਅਪੀਲ ਕੀਤੀ, ਜਿਨ੍ਹਾਂ ਨੇ 14 ਅਕਤੂਬਰ 2015 ਨੂੰ ਸੰਨੀ ਨੂੰ ਆਪਣੇ ਮਾਤਾ-ਪਿਤਾ ਦਾ ਮਕਾਨ ਖਾਲੀ ਕਰਨ ਦਾ ਹੁਕਮ ਦਿੱਤਾ।
ਇਸ ਦੇ ਵਿਰੁੱਧ ਸੰਨੀ ਨੇ ਪੰਜਾਬ-ਹਰਿਆਣਾ ਹਾਈਕੋਰਟ 'ਚ ਅਪੀਲ ਕੀਤੀ ਤਾਂ ਸੁਣਵਾਈ ਦੌਰਾਨ ਇਸ ਕੇਸ ਨੂੰ ''ਮਾਤਾ-ਪਿਤਾ ਪ੍ਰਤੀ ਔਲਾਦ ਦੀ ਸੰਵੇਦਨਹੀਣਤਾ ਦੀ ਢੁੱਕਵੀਂ ਉਦਾਹਰਣ'' ਦੱਸਦਿਆਂ ਮਾਣਯੋਗ ਜਸਟਿਸ ਸ਼੍ਰੀ ਪਰਮਜੀਤ ਸਿੰਘ ਨੇ ਸੰਨੀ ਨੂੰ ਵੇਦਾਂ, ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਅਤੇ ਹਿੰਦੂ ਮਾਈਥਾਲੋਜੀ ਤੋਂ ਉਦਾਹਰਣਾਂ ਦੇ ਕੇ ਮਾਤਾ-ਪਿਤਾ ਪ੍ਰਤੀ ਔਲਾਦ ਦੇ ਫਰਜ਼ ਯਾਦ ਦਿਵਾਏ :
ਉਨ੍ਹਾਂ ਨੇ ਵੇਦਾਂ ਦੀ ਉਕਤੀ 'ਮਾਤ੍ਰ ਦੇਵੋ ਭਵ:' ਅਤੇ 'ਪਿਤ੍ਰ ਦੇਵੋ ਭਵ:' (ਆਪਣੇ ਮਾਤਾ-ਪਿਤਾ ਨੂੰ ਭਗਵਾਨ ਸਰੂਪ ਮੰਨੋ) ਅਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਅੰਗ (ਸਫਾ) 1200 'ਤੇ ਦਰਜ ''ਕਾਹੇ ਪੂਤ ਝਗਰਤ ਹਉ ਸੰਗਿ ਬਾਪ ਜਿਨ ਕੇ ਜਣੇ ਬਡੀਰੇ ਤੁਮ ਹਉ ਤਿਨ ਸਿਓ ਝਗਰਤ ਪਾਪ '' (ਪੁੱਤਰ, ਆਪਣੇ ਪਿਤਾ ਨਾਲ ਕਿਉਂ ਝਗੜਦੇ ਹੋ, ਜਿਸ ਨੇ ਤੁਹਾਨੂੰ ਜਨਮ ਦਿੱਤਾ ਅਤੇ ਪਾਲਿਆ-ਪੋਸਿਆ। ਉਸ ਨਾਲ ਝਗੜਨਾ ਪਾਪ ਹੈ) ਦਾ ਵਰਣਨ ਕੀਤਾ।
ਉਨ੍ਹਾਂ ਨੇ ਨੌਜਵਾਨ ਪੀੜ੍ਹੀ ਨੂੰ ਆਪਣੇ ਮਾਤਾ-ਪਿਤਾ ਨੂੰ ਭਗਵਾਨ ਮੰਨਣ ਦੀ ਸਲਾਹ ਦਿੰਦਿਆਂ ਦੁੱਖ ਜਤਾਇਆ ਕਿ ''ਆਧੁਨਿਕਤਾ ਨੇ ਲੋਕਾਂ ਦੀ ਜੀਵਨਸ਼ੈਲੀ ਅਤੇ ਆਦਰਸ਼ਾਂ ਨੂੰ ਬਦਲ ਦਿੱਤਾ ਹੈ। ਔਲਾਦਾਂ ਮਾਤਾ-ਪਿਤਾ ਪ੍ਰਤੀ ਆਪਣੀਆਂ ਜ਼ਿੰਮੇਵਾਰੀਆਂ ਤੋਂ ਦੌੜਨ ਲੱਗੀਆਂ ਹਨ। ਅਸੀਂ ਉਸ ਸਰਵਣ ਕੁਮਾਰ ਨੂੰ ਭੁੱਲ ਗਏ ਹਾਂ, ਜਿਸ ਨੇ ਆਪਣੇ ਅੰਨ੍ਹੇ ਮਾਤਾ-ਪਿਤਾ ਨੂੰ ਦੋ ਟੋਕਰੀਆਂ 'ਚ ਬਿਠਾ ਕੇ ਤੀਰਥ ਯਾਤਰਾ ਕਰਵਾਈ ਸੀ। ਅਸੀਂ ਮਾਤਾ-ਪਿਤਾ ਦਾ ਅਤਿਅੰਤ ਸਨਮਾਨ ਕਰਨ ਦੀਆਂ ਆਪਣੀਆਂ ਪੁਰਾਣੀਆਂ ਰਵਾਇਤਾਂ ਨੂੰ ਪੂਰੀ ਤਰ੍ਹਾਂ ਤਿਲਾਂਜਲੀ ਦੇ ਦਿੱਤੀ ਹੈ।''
ਪਟੀਸ਼ਨ ਰੱਦ ਕਰਦਿਆਂ ਮਾਣਯੋਗ ਜੱਜ ਨੇ ਕਿਹਾ, ''ਪਟੀਸ਼ਨਕਰਤਾ ਹੀ ਮੁਸੀਬਤ ਦੀ ਜੜ੍ਹ ਲੱਗਦਾ ਹੈ ਅਤੇ ਉਸ ਨੂੰ ਆਪਣੇ ਮਾਤਾ-ਪਿਤਾ ਦੀ ਇੱਛਾ ਦੇ ਉਲਟ ਮਕਾਨ 'ਚ ਦਾਖਲ ਹੋਣ ਦਾ ਕੋਈ ਅਧਿਕਾਰ ਨਹੀਂ ਹੈ।''
ਅੱਜ ਜਦਕਿ ਕਾਰਜ ਪਾਲਿਕਾ ਅਤੇ ਵਿਧਾਨ ਪਾਲਿਕਾ ਨਕਾਰਾ ਹੋ ਚੁੱਕੀਆਂ ਹਨ, ਸਿਰਫ ਨਿਆਂ ਪਾਲਿਕਾ ਅਤੇ ਮੀਡੀਆ ਹੀ ਜਨਹਿੱਤ ਨਾਲ ਜੁੜੇ ਮਹੱਤਵਪੂਰਨ ਮੁੱਦਿਆਂ 'ਤੇ ਕੇਂਦਰ ਅਤੇ ਸੂਬਾਈ ਸਰਕਾਰਾਂ ਨੂੰ ਉਨ੍ਹਾਂ ਦੇ ਫਰਜ਼ ਯਾਦ ਦਿਵਾਉਣ ਤੇ ਆਮ ਜਨਤਾ ਦੀ ਪੁਕਾਰ ਸੁਣ ਕੇ ਉਨ੍ਹਾਂ ਦੇ ਦੁੱਖ-ਦਰਦ ਦੂਰ ਕਰਨ 'ਚ ਮਹੱਤਵਪੂਰਨ ਭੂਮਿਕਾ ਨਿਭਾਅ ਰਹੇ ਹਨ ਅਤੇ ਉਕਤ ਫੈਸਲੇ ਲਈ ਜਸਟਿਸ ਸ਼੍ਰੀ ਪਰਮਜੀਤ ਸਿੰਘ ਧੰਨਵਾਦ ਦੇ ਪਾਤਰ ਹਨ।
ਅਸਲ 'ਚ ਆਪਣੇ ਭੌਤਿਕਵਾਦੀ ਦ੍ਰਿਸ਼ਟੀਕੋਣ ਅਤੇ ਪ੍ਰਾਚੀਨ ਉੱਚ ਆਦਰਸ਼ਾਂ ਤੇ ਕਦਰਾਂ-ਕੀਮਤਾਂ ਤੋਂ ਹਿਜਰਤ ਕਾਰਨ ਹੀ ਸਾਡੇ ਸਮਾਜ 'ਚ ਇਸ ਤਰ੍ਹਾਂ ਦੀਆਂ ਵਿਕ੍ਰਿਤੀਆਂ ਆ ਰਹੀਆਂ ਹਨ। ਜੇਕਰ ਅਸੀਂ ਆਪਣੇ ਪ੍ਰਾਚੀਨ ਆਦਰਸ਼ਾਂ ਦੀ ਥੋੜ੍ਹੀ ਜਿਹੀ ਵੀ ਪਾਲਣਾ ਕਰੀਏ ਤਾਂ ਸਮਾਜ 'ਚੋਂ ਅਨੇਕ ਬੁਰਾਈਆਂ ਦੂਰ ਹੋ ਸਕਦੀਆਂ ਹਨ।
—ਵਿਜੇ ਕੁਮਾਰ
ਨਵਾਂ ਵਰ੍ਹਾ 2016 ਸਾਰੇ ਦੇਸ਼ਵਾਸੀਆਂ ਲਈ ਸ਼ੁੱਭ ਹੋਵੇ
NEXT STORY 
