ਸੱਤਾ ਨਾਲ ਜੁੜੇ ਕੁਝ ਕੁ ਲੋਕਾਂ, ਸਿਆਸਤਦਾਨਾਂ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਤੋਂ ਆਸ ਕੀਤੀ ਜਾਂਦੀ ਹੈ ਕਿ ਉਹ ਕੋਈ ਵੀ ਕਾਨੂੰਨ ਵਿਰੋਧੀ ਕੰਮ ਨਹੀਂ ਕਰਨਗੇ ਅਤੇ ਖੁਦ ਨੂੰ ਆਮ ਲੋਕਾਂ ਦੀਆਂ ਮੁਸ਼ਕਲਾਂ ਨੂੰ ਹੱਲ ਕਰਨ ’ਚ ਮਦਦ ਕਰਨਗੇ ਪਰ ਅੱਜ ਇਹੀ ਲੋਕ ਵੱਡੇ ਪੱਧਰ ’ਤੇ ਦਬੰਗਈ ਅਤੇ ਗਲਤ ਕੰਮਾਂ ’ਚ ਸ਼ਾਮਲ ਪਾਏ ਜਾ ਰਹੇ ਹਨ, ਜਿਸ ਦੀਆਂ ਸਿਰਫ 1 ਮਹੀਨੇ ਦੀਆਂ ਉਦਾਹਰਣਾਂ ਹੇਠਾਂ ਦਰਜ ਹਨ :
* 13 ਜੂਨ ਨੂੰ ਇਕ ਠੇਕੇਦਾਰ ਵੱਲੋਂ ਆਪਣਾ ਕੰਮ ਸਹੀ ਢੰਗ ਨਾਲ ਨਾ ਕਰਨ ਤੋਂ ਨਾਰਾਜ਼ ਮੁੰਬਈ ਦੇ ਚਾਂਦੀਵੜੀ ਇਲਾਕੇ ’ਚ ਸ਼ਿਵ ਸੈਨਾ ਵਿਧਾਇਕ ‘ਦਿਲੀਪ ਲਾਂਡੇ’ ਨੇ ਗੁੱਸੇ ’ਚ ਆ ਕੇ ਸਜ਼ਾ ਦੇਣ ਲਈ ਨਾਲੀ ਦੇ ਚਿੱਕੜ ਵਾਲੇ ਗੰਦੇ ਪਾਣੀ ’ਚ ਬਿਠਾ ਦਿੱਤਾ ਅਤੇ ਕੁਝ ਲੋਕਾਂ ਕੋਲੋਂ ਉਸ ਦੇ ਸਿਰ ’ਤੇ ਕੂੜਾ ਵੀ ਸੁਟਵਾਇਆ।
* 13 ਜੂਨ ਨੂੰ ਉੱਤਰਾਖੰਡ ’ਚ ਦੇਹਰਾਦੂਨ ਦੇ ਕਲੇਮਨ ਟਾਊਨ ਥਾਣਾ ਇਲਾਕੇ ’ਚ ਭਾਜਪਾ ਮਹਿਲਾ ਮੋਰਚਾ ਦੀ ਸੂਬਾ ਮੰਤਰੀ ਰੇਣੂ ਗੋਇਲ ’ਤੇ ਕਰੋੜਾਂ ਰੁਪਏ ਦੀ ਜਾਇਦਾਦ ’ਤੇ ਕਬਜ਼ਾ ਕਰਨ ਦੇ ਦੋਸ਼ ’ਚ ਕੇਸ ਦਰਜ ਕਰ ਕੇ ਉਸ ਨੂੰ ਗ੍ਰਿਫਤਾਰ ਕੀਤਾ ਗਿਆ।
* 19 ਜੂਨ ਨੂੰ ਮੁਜ਼ੱਫਰਨਗਰ ਜ਼ਿਲੇ ਦੇ ਪਿੰਡ ਮੋਰਨਾ ’ਚ ਭਾਕਿਯੂ ਨੇਤਾ ਅਤੇ ਪਿੰਡ ਦੇ ਪ੍ਰਧਾਨ ਰਵਿੰਦਰ ਚੌਧਰੀ ਨੇ ਸ਼ਰਾਬ ਦੇ ਠੇਕੇ ਦੇ ਇਕ ਸੇਲਜ਼ਮੈਨ ਨੂੰ ਬੁਰੀ ਤਰ੍ਹਾਂ ਕੁੱਟ ਸੁੱਟਿਆ ਅਤੇ ਠੇਕੇ ’ਤੇ ਤਾਲਾ ਲਗਾ ਕੇ ਚਾਬੀ ਆਪਣੇ ਨਾਲ ਲੈ ਗਿਆ।
* 23 ਜੂਨ ਨੂੰ ਚੰਦੌਲੀ ਜ਼ਿਲੇ ਦੇ ਸਵੱਈਆ ਪਿੰਡ ਦੇ ਨੇੜੇ ਭਾਜਪਾ ਜ਼ਿਲਾ ਉਪ-ਪ੍ਰਧਾਨ ਹਰਿਸ਼ਰਨ ਸਿੰਘ ਦੇ ਬੇਟੇ ਅੰਕਿਤ ਸਿੰਘ ਅਤੇ ਉਸ ਦੇ ਸਾਥੀਆਂ ਨੇ ਇਕ ਢਾਬੇ ’ਤੇ ਖੁੱਲ੍ਹ ਕੇ ਹੰਗਾਮਾ ਕੀਤਾ ਅਤੇ ਭੰਨ-ਤੋੜ ਤੇ ਕੁੱਟ-ਮਾਰ ਕੀਤੀ।
* 27 ਜੂਨ ਨੂੰ ਬੰਗਾਲ ਦੇ ਹੁਗਲੀ ਜ਼ਿਲੇ ’ਚ ਤ੍ਰਿਣਮੂਲ ਕਾਂਗਰਸ ਦੇ ਦੋ ਨੇਤਾਵਾਂ ਸਵਪਨ ਮੰਡਲ ਅਤੇ ਕਾਸ਼ੀਨਾਥ ਹਲਦਰ ’ਤੇ ਬਾਲਾਗੜ੍ਹ ਬਲਾਕ ਦੇ ਬੀ. ਡੀ. ਓ. ਦਫਤਰ ’ਚ ਆਫਤ ਪ੍ਰਬੰਧਨ ਅਧਿਕਾਰੀ ਦੇ ਦਫਤਰ ’ਚ ਵੜ ਕੇ ਦਾਦਾਗਿਰੀ ਕਰਨ ਅਤੇ ਉਸ ਨੂੰ ਕੁੱਟਣ ਦੇ ਇਲਾਵਾ ਬਾਲਾਗੜ੍ਹ ’ਚ ਨਾ ਵੜਨ ਦੇਣ ਦੀ ਧਮਕੀ ਦੇਣ ਦੇ ਦੋਸ਼ ’ਚ ਕੇਸ ਦਰਜ ਕੀਤਾ ਗਿਆ।
* 1 ਜੁਲਾਈ ਨੂੰ ਮੱਧ ਪ੍ਰਦੇਸ਼ ’ਚ ਬਾਲੋਦ ਜ਼ਿਲੇ ਦੇ ਦੇਵਰੀ ਥਾਣਾ ਇਲਾਕੇ ਦੇ ਪਿੰਡ ਜੇਵਰਤਲਾ ’ਚ ਇਕ ਲੜਕੀ ਨਾਲ ਛੇੜਛਾੜ ਕਰਨ ਦੇ ਮਾਮਲੇ ’ਚ ਸ਼ਾਮਲ ਪੰਚਾਇਤ ਮੈਂਬਰ ਰਾਜੇਸ਼ ਸਾਹੂ ਅਤੇ ਉਸ ਦੇ ਸਾਥੀਆਂ ਨੇ ਆਪਣੀ ਹੀ ਪਾਰਟੀ (ਕਾਂਗਰਸ ਦੇ ਨੇਤਾ) ਛੱਕਨ ਸਾਹੂ ਵੱਲੋਂ ਪੀੜਤਾ ਦਾ ਪੱਖ ਲੈਣ ’ਤੇ, ਉਸ ਨੂੰ ਇਕ ਖੰਭੇ ਨਾਲ ਬੰਨ੍ਹ ਕੇ ਬੁਰੀ ਤਰ੍ਹਾਂ ਕੁੱਟ ਕੇ ਗੰਭੀਰ ਰੂਪ ’ਚ ਜ਼ਖਮੀ ਕਰ ਦਿੱਤਾ।
* 1 ਜੁਲਾਈ ਨੂੰ ਗੁਜਰਾਤ ਪੁਲਸ ਨੇ ਪੰਚਮਹਾਲ ਜ਼ਿਲੇ ਦੇ ਇਕ ਰਿਜ਼ੋਰਟ ’ਚ ਇਕ ਸ਼ਰਾਬ ਪਾਰਟੀ ’ਤੇ ਛਾਪਾ ਮਾਰ ਕੇ ਭਾਜਪਾ ਵਿਧਾਇਕ ਕੇਸਰੀ ਸਿੰਘ ਸੋਲੰਕੀ ਨੂੰ ਔਰਤਾਂ ਅਤੇ ਹੋਰ ਲੋਕਾਂ ਨਾਲ ਜੂਆ ਖੇਡਦੇ ਹੋਏ ਫੜਿਆ।
* 2 ਜੁਲਾਈ ਨੂੰ ਹਰਿਦੁਆਰ ਦੀ ਜਵਾਲਾਪੁਰ ਸੀਟ ਤੋਂ ਭਾਜਪਾ ਵਿਧਾਇਕ ਸੁਰੇਸ਼ ਰਾਠੌਰ ’ਤੇ ਉਨ੍ਹਾਂ ਦੀ ਪਾਰਟੀ ਦੀ ਇਕ ਮਹਿਲਾ ਨੇਤਾ ਵੱਲੋਂ ਜਬਰ-ਜ਼ਨਾਹ ਕਰਨ ਦਾ ਦੋਸ਼ ਲਗਾਉਣ ’ਤੇ ਬਹਾਦਰਾਬਾਦ ਥਾਣੇ ਦੀ ਪੁਲਸ ਨੇ ਕੇਸ ਦਰਜ ਕੀਤਾ।
* 4 ਜੁਲਾਈ ਨੂੰ ਮੱਧ ਪ੍ਰਦੇਸ਼ ’ਚ ਛਤਰਪੁਰ ਦੇ ਪਿੰਡ ਲਲੋਨੀ ’ਚ ਭਾਜਪਾ ਨੇਤਾ ‘ਦੱਦਾ ਲਲੋਨੀ’ ਅਤੇ ਉਸ ਦੇ ਸਾਥੀਆਂ ਨੇ ਆਪਣੇ ਘਰ ਦੇ ਨੇੜੇ ਸੜਕ ਨਾ ਬਣਾਉਣ ’ਤੇ ਪੀ. ਡਬਲਿਊ. ਡੀ. ਦੇ ਸਬ ਇੰਜੀਨੀਅਰ ਨੂੰ ਆਪਣੇ ਸਾਥੀਆਂ ਨਾਲ ਰਲ ਕੇ ਇੰਨਾ ਕੁੱਟਿਆ ਕਿ ਉਸ ਦੀ ਲੱਤ ਟੁੱਟ ਗਈ।
* 5 ਜੁਲਾਈ ਨੂੰ ਛੱਤੀਸਗੜ੍ਹ ਦੇ ਬਿਲਾਸਪੁਰ ’ਚ ਇਕ ਠੇਕੇਦਾਰ ਵੱਲੋਂ ਕਾਂਗਰਸ ਦੇ ਇਕ ਨੇਤਾ ਹਰਮੇਂਦਰ ਸ਼ੁਕਲਾ ਨੂੰ ਦੋ ਸਾਲ ਪਹਿਲਾਂ ਦਿੱਤੇ ਪੈਸੇ ਮੰਗਣ ’ਤੇ ਨੇਤਾ ਨੂੰ ਇੰਨਾ ਗੁੱਸਾ ਆ ਗਿਆ ਕਿ ਉਸ ਨੇ ਠੇਕੇਦਾਰ ਨੂੰ ਬੁਰੀ ਤਰ੍ਹਾਂ ਕੁੱਟ ਕੇ ਜ਼ਖਮੀ ਕਰ ਦਿੱਤਾ।
* 7 ਜੁਲਾਈ ਨੂੰ ਆਗਰਾ ’ਚ ਚੈਕਿੰਗ ਦੇ ਦੌਰਾਨ ਭਾਜਪਾ ਨੇਤਾ ਸੱਤਿਆਦੇਵ ਦੁਬੇ ਦੇ ਜਾਣਕਾਰ ਦੀ ਫੜੀ ਗਈ ਬਾਈਕ ਦਾ ਚਲਾਨ ਕਰਨ ’ਤੇ ਦੁਬੇ ਨੇ ਪਹਿਲਾਂ ਤਾਂ ਫੋਨ ਕਰ ਕੇ ਮੱਲਪੁਰਾ ਦੇ ਥਾਣਾ ਇੰਚਾਰਜ ਨੂੰ ਬਾਈਕ ਛੱਡਣ ਲਈ ਕਿਹਾ ਅਤੇ ਧਮਕੀ ਦਿੱਤੀ ਕਿ ‘‘ਚਲਾਨ ਹੋ ਗਿਆ ਹੈ ਤਾਂ ਵੀ ਬਾਈਕ ਛੱਡੋ ਜੇਕਰ ਨਾ ਛੱਡੀ ਤਾਂ ਮੈਂ ਨੌਕਰੀ ਕਰਨੀ ਸਿਖਾ ਦਿਆਂਗਾ।’’ ਪਰ ਨਾ ਮੰਨਣ ’ਤੇ ਉਸ ਦੇ ਨਾਲ ਗਾਲੀ-ਗਲੋਚ ਕੀਤਾ ਜਿਸ ’ਤੇ ਥਾਣਾ ਮੱਲਪੁਰਾ ’ਚ ਦੁਬੇ ਵਿਰੁੱਧ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ।
* 9 ਜੁਲਾਈ ਨੂੰ ਪੁੰਡਰੀ ਤੋਂ ਆਜ਼ਾਦ ਵਿਧਾਇਕ ਅਤੇ ਹਰਿਆਣਾ ਸੈਰ-ਸਪਾਟਾ ਨਿਗਮ ਦੇ ਚੇਅਰਮੈਨ ਰਣਧੀਰ ਸਿੰਘ ਗੋਲਾਨ ਅਤੇ ਉਸ ਦੇ 2 ਬੇਟਿਆਂ ਅਤੇ ਪਤਨੀ ਦੇ ਵਿਰੁੱਧ ਉਨ੍ਹਾਂ ਦੀ ਨੂੰਹ ਦੀ ਸ਼ਿਕਾਇਤ ’ਤੇ ਦਾਜ ਲਈ ਤੰਗ-ਪ੍ਰੇਸ਼ਾਨ ਕਰਨ ਦੇ ਦੋਸ਼ ’ਚ ਕੇਸ ਦਰਜ ਕੀਤਾ ਗਿਆ।
* 10 ਜੁਲਾਈ ਨੂੰ ਕਰਨਾਟਕ ਕਾਂਗਰਸ ਦੇ ਪ੍ਰਧਾਨ ਡੀ. ਕੇ. ਸ਼ਿਵਕੁਮਾਰ ਨੇ ਕਿਸੇ ਗੱਲ ’ਤੇ ਨਾਰਾਜ਼ ਹੋ ਕੇ ਆਪਣੀ ਹੀ ਪਾਰਟੀ ਦੇ ਇਕ ਵਰਕਰ ਨੂੰ ਥੱਪੜ ਮਾਰ ਦਿੱਤਾ ਅਤੇ ਉੱਥੇ ਮੌਜੂਦ ਕੈਮਰਾਮੈਨ ਨੂੰ ਘਟਨਾ ਦੀ ਵੀਡੀਓ ਡਿਲੀਟ ਕਰਨ ਲਈ ਵੀ ਕਿਹਾ।
ਉਕਤ ਘਟਨਾਵਾਂ ਤੋਂ ਸਪੱਸ਼ਟ ਹੈ ਕਿ ਲਗਭਗ ਸਾਰੀਆਂ ਪਾਰਟੀਆਂ ’ਚ ਅਜਿਹੇ ਤੱਤ ਮੌਜੂਦ ਹਨ ਜੋ ਆਪਣੀ ਪੁਜ਼ੀਸ਼ਨ ਦਾ ਅਣਉਚਿਤ ਲਾਭ ਉਠਾ ਰਹੇ ਹਨ ਅਤੇ ਆਪਣੀ ਪਾਰਟੀ ਦੇ ਲਈ ਪ੍ਰੇਸ਼ਾਨੀ ਦਾ ਕਾਰਨ ਬਣ ਰਹੇ ਹਨ।
ਯਕੀਨਨ ਹੀ ਇਹ ਇਕ ਖਤਰਨਾਕ ਰੁਝਾਨ ਹੈ। ਜੇਕਰ ਇਸ ਨੂੰ ਨਾ ਰੋਕਿਆ ਗਿਆ ਤਾਂ ਆਮ ਲੋਕ ਵੀ ਪ੍ਰਤੀਕਿਰਿਆ ਵਜੋਂ ਇਨ੍ਹਾਂ ਦੇ ਵਾਂਗ ਕਾਨੂੰਨ ਆਪਣੇ ਹੱਥ ’ਚ ਲੈਣ ਲਈ ਮਜਬੂਰ ਹੋਣਗੇ ਅਤੇ ਇਸ ਕਾਰਨ ਬੇਕਾਬੂ ਹੋਈ ਕਾਨੂੰਨ-ਵਿਵਸਥਾ ਨੂੰ ਵੱਸ ’ਚ ਕਰਨਾ ਔਖਾ ਹੋ ਜਾਵੇਗਾ ਜਿਸ ਦਾ ਨਤੀਜਾ ਸਾਰਿਆਂ ਲਈ ਦੁਖਦਾਈ ਹੀ ਹੋਵੇਗਾ।
-ਵਿਜੇ ਕੁਮਾਰ
ਜੰਮੂ-ਕਸ਼ਮੀਰ ਦੇ ਦੇਸ਼ ਵਿਰੋਧੀ ਸਰਗਰਮੀਆਂ ’ਚ ਸ਼ਾਮਲ ਮੁਲਾਜ਼ਮਾਂ ਦੀ ਬਰਤਰਫੀ ਸਹੀ ਪਰ ਦੇਰ ਨਾਲ
NEXT STORY 
