ਸਮੇਂ ਦੇ ਨਾਲ-ਨਾਲ ਕੁਝ ਬਾਬਿਆਂ ਦੀ ਪੋਲ ਖੁੱਲ੍ਹ ਰਹੀ ਹੈ। ਸਵਾਮੀ ਪ੍ਰੇਮਾਨੰਦ, ਸਵਾਮੀ ਸਦਾਚਾਰੀ, ਸਵਾਮੀ ਭੀਮਾਨੰਦ, ਸੰਤ ਆਸਾਰਾਮ, ਗੁਰਮੀਤ ਰਾਮ ਰਹੀਮ, ਨਾਰਾਇਣ ਸਾਈ, ਵੀਰੇਂਦਰ ਦੇਵ ਦੀਕਸ਼ਿਤ, ਕੌਸ਼ਲੇਂਦਰ ਫਲਾਹਾਰੀ ਮਹਾਰਾਜ, ਮਦਨ ਦਾਤੀ (ਦਾਤੀ ਮਹਾਰਾਜ), ਸਹਸਤਰਧਾਰਾ ਸਥਿਤ ਪਰਮਧਾਮ ਨਿਆਸ ਆਸ਼ਰਮ ਦੇ ਸੰਚਾਲਕ ਚੰਦਰਮੋਹਨ ਮਹਾਰਾਜ ਆਦਿ ਵਿਰੁੱਧ ਬਲਾਤਕਾਰ ਅਤੇ ਹੋਰ ਦੋਸ਼ਾਂ ਤੋਂ ਸਮਾਜ ਹੈਰਾਨ ਹੈ।
ਇਸੇ ਲੜੀ ਵਿਚ ਹੁਣ 'ਨਿੱਤਿਆਨੰਦ ਧਿਆਨਪੀਠਮ' ਦੇ ਨਾਂ ਨਾਲ ਦੇਸ਼ ਵਿਚ ਅਨੇਕ ਮੰਦਰਾਂ, ਗੁਰੂਕੁਲਾਂ ਅਤੇ ਆਸ਼ਰਮਾਂ ਦਾ ਸੰਚਾਲਨ ਕਰਨ ਵਾਲੇ ਅਤੇ ਇਸ ਦੇ ਸੰਸਥਾਪਕ ਆਪੇ ਬਣੇ ਬਾਬਾ ਸਵਾਮੀ ਨਿੱਤਿਆਨੰਦ ਵਿਰੁੱਧ ਅਹਿਮਦਾਬਾਦ ਵਿਚ 19 ਨਵੰਬਰ ਨੂੰ ਅਹਿਮਦਾਬਾਦ ਪੁਲਸ ਨੇ ਕੇਸ ਦਰਜ ਕੀਤਾ।
ਪੁਲਸ ਵਲੋਂ ਸਵਾਮੀ ਨਿੱਤਿਆਨੰਦ ਵਿਰੁੱਧ ਅਹਿਮਦਾਬਾਦ ਵਿਚ 'ਯੋਗਿਨੀ ਸਰਵਪੀਠਮ' ਦੇ ਨਾਂ ਨਾਲ ਆਪਣਾ ਆਸ਼ਰਮ ਚਲਾਉਣ ਲਈ 2 ਬੱਚਿਆਂ ਨੂੰ ਕਥਿਤ ਤੌਰ 'ਤੇ ਅਗਵਾ ਕਰਨ ਅਤੇ ਉਨ੍ਹਾਂ ਨੂੰ ਬੰਧਕ ਬਣਾ ਕੇ ਰੱਖਣ ਦੇ ਦੋਸ਼ 'ਚ ਕੇਸ ਦਰਜ ਕੀਤਾ ਗਿਆ ਹੈ। ਬੱਚਿਆਂ ਵਲੋਂ ਦੋਸ਼ ਲਾਇਆ ਗਿਆ ਹੈ ਕਿ ਉਨ੍ਹਾਂ ਨਾਲ ਕੁੱਟਮਾਰ ਕੀਤੀ ਜਾਂਦੀ ਸੀ। ਆਸ਼ਰਮ ਨਾਲ ਸਬੰਧਤ ਸਾਧਵੀਆਂ ਨੂੰ ਵੀ ਚੰਦਾ ਇਕੱਠਾ ਕਰਨ ਲਈ ਮਜਬੂਰ ਕੀਤਾ ਜਾਂਦਾ ਸੀ।
ਪੁਲਸ ਨੇ ਇਸ ਸਿਲਸਿਲੇ ਵਿਚ ਅਹਿਮਦਾਬਾਦ ਆਸ਼ਰਮ ਦੀਆਂ 2 ਸੰਚਾਲਿਕਾਵਾਂ ਸਾਧਵੀ ਪ੍ਰਾਣਪ੍ਰਿਆਨੰਦ ਅਤੇ ਪ੍ਰਿਆਤਤਵ ਨੂੰ ਵੀ ਗ੍ਰਿਫਤਾਰ ਕੀਤਾ ਹੈ ਅਤੇ ਇਸ ਤੋਂ ਪਹਿਲਾਂ ਇਕ ਸਾਧਕ ਨੇ 19 ਨਵੰਬਰ ਨੂੰ ਆਪਣੀਆਂ 2 ਬੇਟੀਆਂ ਨੂੰ ਕਸਟਡੀ ਵਿਚ ਲੈਣ ਲਈ ਬੰਦੀ ਪ੍ਰਤੱਖੀਕਰਨ ਪਟੀਸ਼ਨ ਦਾਇਰ ਕੀਤੀ ਸੀ, ਜਿਸ 'ਤੇ ਅਜੇ ਸੁਣਵਾਈ ਹੋਣੀ ਬਾਕੀ ਹੈ। ਕਿਹਾ ਜਾਂਦਾ ਹੈ ਕਿ ਗੁੰਮ ਹੋਈ ਇਕ ਮਹਿਲਾ ਤ੍ਰਿਨੀਦਾਦ 'ਚ ਹੈ।
ਇਸ ਦੌਰਾਨ ਬਾਬਾ ਨਿੱਤਿਆਨੰਦ ਦੇਸ਼ ਛੱਡ ਕੇ ਫਰਾਰ ਹੋ ਗਿਆ ਹੈ। ਅਪੁਸ਼ਟ ਖ਼ਬਰਾਂ ਅਨੁਸਾਰ ਅਜਿਹਾ ਸਮਝਿਆ ਜਾਂਦਾ ਹੈ ਕਿ ਉਹ ਤ੍ਰਿਨੀਦਾਦ ਐਂਡ ਟੋਬੈਗੋ ਜਾਂ ਇਕਵਾਡੋਰ 'ਚ ਕਿਤੇ ਲੁਕਿਆ ਹੋਇਆ ਹੈ। ਪੁਲਸ ਅਨੁਸਾਰ ਨਿੱਤਿਆਨੰਦ ਕਰਨਾਟਕ ਵਿਚ ਉਸ ਦੇ ਵਿਰੁੱਧ ਬਲਾਤਕਾਰ ਦਾ ਕੇਸ ਦਰਜ ਹੋਣ ਤੋਂ ਬਾਅਦ ਹੀ ਦੇਸ਼ ਛੱਡ ਕੇ ਦੌੜ ਗਿਆ ਸੀ।
ਤਾਮਿਲਨਾਡੂ ਸੂਬੇ ਵਿਚ ਜਨਮੇ ਨਿੱਤਿਆਨੰਦ ਦੇ ਜਨਮ ਦਾ ਨਾਂ ਏ. ਰਾਜਸ਼ੇਖਰਨ ਹੈ ਅਤੇ ਉਸ ਵਿਰੁੱਧ ਆਪਣੇ ਆਸ਼ਰਮ ਦੀ ਚੇਲੀ ਦਾ 5 ਸਾਲਾਂ ਤੋਂ ਵੱਧ ਸਮੇਂ ਤਕ ਬਲਾਤਕਾਰ ਕਰਨ ਤੋਂ ਇਲਾਵਾ ਗੈਰ-ਕੁਦਰਤੀ ਸੈਕਸ, ਧੋਖਾਦੇਹੀ ਆਦਿ ਦੇ ਦੋਸ਼ਾਂ 'ਚ ਅਨੇਕ ਕੇਸ ਦਰਜ ਹਨ।
2010 'ਚ ਸਨ ਟੀ. ਵੀ. ਨੇ ਨਿੱਤਿਆਨੰਦ ਅਤੇ ਅਭਿਨੇਤਰੀ ਰੰਜੀਤਾ ਦਾ ਇਕ ਸੈਕਸ ਟੇਪ ਜਾਰੀ ਕੀਤਾ ਸੀ, ਜਿਸ ਨੂੰ ਨਿੱਤਿਆਨੰਦ ਅਤੇ ਰੰਜੀਤਾ ਦੋਹਾਂ ਨੇ ਹੀ ਫਰਜ਼ੀ ਦੱਸਿਆ ਪਰ ਬਾਅਦ ਵਿਚ ਨਿੱਤਿਆਨੰਦ ਦੇ ਸਾਬਕਾ ਡਰਾਈਵਰ ਲੈਨਿਨ ਕਰੁੱਪਨ ਨੇ ਹੀ ਨਿੱਤਿਆਨੰਦ ਅਤੇ ਰੰਜੀਤਾ ਦੇ ਝੂਠ ਦੀ ਪੋਲ ਖੋਲ੍ਹ ਦਿੱਤੀ ਅਤੇ ਕਿਹਾ ਕਿ ਉਸੇ ਨੇ ਇਹ ਵੀਡੀਓ ਬਣਾਇਆ ਸੀ। ਲੈਨਿਨ ਨੇ ਇਹ ਵੀ ਕਿਹਾ ਕਿ ਉਹ ਆਪਣੇ ਆਪ ਨੂੰ ਗੁਰੂ ਦਾ ਵਫ਼ਾਦਾਰ ਅਤੇ ਸਮਰਪਿਤ ਚੇਲਾ ਮੰਨਦਾ ਸੀ ਪਰ ਜਦੋਂ ਉਸ ਨੇ ਆਪਣੇ ਗੁਰੂ ਨੂੰ ਇਕ ਹੋਰ ਮਹਿਲਾ ਨਾਲ ਸੁੱਤੇ ਹੋਏ ਦੇਖਿਆ ਤਾਂ ਆਪਣੇ ਗੁਰੂ ਤੋਂ ਉਸ ਦੀ ਨਿਸ਼ਠਾ ਉੱਠ ਗਈ।
ਨਿੱਤਿਆਨੰਦ ਨੇ ਸਮੇਂ-ਸਮੇਂ ਉੱਤੇ ਅਨੇਕ ਵਾਦ-ਵਿਵਾਦ ਵਾਲੇ ਦਾਅਵੇ ਵੀ ਕੀਤੇ। ਉਸ ਨੇ ਆਈਨਸਟੀਨ ਦੇ ਪ੍ਰਸਿੱਧ ਸਾਪੇਖਤਾ ਦੇ ਨਿਯਮ ਸਬੰਧੀ ਫਾਰਮੂਲੇ ਨੂੰ ਗਲਤ ਦੱਸਿਆ ਅਤੇ ਇਕ ਵਾਰ ਇਹ ਦਾਅਵਾ ਵੀ ਕੀਤਾ ਸੀ ਕਿ ਉਹ ਗਊਆਂ, ਬੈਲਾਂ, ਸ਼ੇਰਾਂ, ਬਾਘਾਂ ਅਤੇ ਬਾਂਦਰਾਂ ਨਾਲ ਤਮਿਲ ਅਤੇ ਸੰਸਕ੍ਰਿਤ 'ਚ ਗੱਲਾਂ ਕਰਵਾ ਸਕਦਾ ਹੈ।
ਉਸ ਨੇ ਇਹ ਦਾਅਵਾ ਵੀ ਕੀਤਾ ਕਿ ਇਕ ਵਾਰ ਉਸ ਨੇ ਸੂਰਜ ਨੂੰ 40 ਮਿੰਟਾਂ ਤਕ ਉਦੈ ਹੋਣ ਤੋਂ ਇਹ ਕਹਿੰਦੇ ਹੋਏ ਰੋਕ ਦਿੱਤਾ ਸੀ ਕਿ ''ਜਦੋਂ ਤਕ ਮੈਂ ਝੰਡਾ ਪੂਰੀ ਤਰ੍ਹਾਂ ਲਹਿਰਾ ਨਾ ਲਵਾਂ, ਉਦੋਂ ਤਕ ਉਹ ਉਦੈ ਨਾ ਹੋਵੇ।''
ਉਸ ਨੇ ਇਹ ਦਾਅਵਾ ਵੀ ਕੀਤਾ ਕਿ ਉਹ ਆਪਣਾ ਭੇਤ-ਭਰਿਆ ਤੀਸਰਾ ਨੇਤਰ ਵੀ ਖੋਲ੍ਹ ਸਕਦਾ ਹੈ, ਜਿਸ ਨੂੰ ਅੱਜ ਤਕ ਵਿਗਿਆਨ ਮਨੁੱਖੀ ਸਰੀਰ 'ਚ ਤਰਾਸ਼ ਨਹੀਂ ਸਕਿਆ।
ਕੇਂਦਰੀ ਮਾਧਿਅਮਿਕ ਸਿੱਖਿਆ ਬੋਰਡ (ਸੀ. ਬੀ. ਐੱਸ. ਈ.) ਨੇ ਅਹਿਮਦਾਬਾਦ ਵਿਚ ਨਿੱਤਿਆਨੰਦ ਦੇ ਆਸ਼ਰਮ ਲਈ ਸਕੂਲ ਦੀ ਜ਼ਮੀਨ ਬਿਨਾਂ ਇਜਾਜ਼ਤ ਪਟੇ 'ਤੇ ਦੇਣ ਦੇ ਮਾਮਲੇ ਵਿਚ ਗੁਜਰਾਤ ਸਿੱਖਿਆ ਵਿਭਾਗ ਤੋਂ ਰਿਪੋਰਟ ਤਲਬ ਕੀਤੀ ਹੈ।
ਬਿਨਾਂ ਸ਼ੱਕ ਭਾਰਤ ਸਾਧੂ-ਸੰਤਾਂ ਅਤੇ ਰਿਸ਼ੀ-ਮੁਨੀਆਂ ਦਾ ਦੇਸ਼ ਹੈ ਪਰ ਅੱਜ ਧਰਮ ਦੀ ਓਟ 'ਚ ਨਿੱਤਿਆਨੰਦ ਵਰਗੇ ਕੁਝ ਸਾਧੂ-ਮਹਾਤਮਾ ਜਨ-ਆਸਥਾ ਨਾਲ ਖਿਲਵਾੜ ਕਰ ਕੇ ਪਵਿੱਤਰ ਸੰਤ ਭੇਸ ਅਤੇ ਸੰਤ ਸਮਾਜ ਦੀ ਬਦਨਾਮੀ ਦਾ ਕਾਰਣ ਬਣ ਰਹੇ ਹਨ।
ਅਜਿਹੇ ਲੋਕ ਸਾਧੂ-ਸੰਤਾਂ ਦੇ ਨਾਂ 'ਤੇ ਧੱਬਾ ਹਨ ਅਤੇ ਜੇਕਰ ਸੰਤ ਸਮਾਜ ਨੇ ਅਜਿਹੇ ਲੋਕਾਂ ਦੇ ਸੰਤ ਸਮਾਜ ਵਿਚ ਦਾਖਲ ਹੋਣ 'ਤੇ ਰੋਕ ਨਾ ਲਾਈ ਤਾਂ ਸਾਧੂ-ਸੰਤਾਂ ਉੱਤੋਂ ਲੋਕਾਂ ਦਾ ਵਿਸ਼ਵਾਸ ਹੀ ਉੱਠਣਾ ਸ਼ੁਰੂ ਹੋ ਜਾਵੇਗਾ।
ਲਿਹਾਜ਼ਾ ਅਜਿਹੇ ਲੋਕਾਂ ਨਾਲ ਵੀ ਹੋਰ ਗੰਭੀਰ ਅਪਰਾਧੀਆਂ ਵਰਗਾ ਵਿਵਹਾਰ ਕੀਤਾ ਜਾਣਾ ਚਾਹੀਦਾ ਹੈ ਅਤੇ ਇਸਲਾਮਿਕ ਦੇਸ਼ਾਂ ਵਾਂਗ ਹੀ ਸਖਤ ਤੋਂ ਸਖਤ ਸਜ਼ਾ ਦਿੱਤੀ ਜਾਣੀ ਚਾਹੀਦੀ ਹੈ, ਜਿਸ ਨਾਲ ਦੂਜਿਆਂ ਨੂੰ ਵੀ ਸਬਕ ਮਿਲੇ। ਜਦੋਂ ਤਕ ਇਨ੍ਹਾਂ ਨਾਲ ਅਜਿਹਾ ਵਿਵਹਾਰ ਨਹੀਂ ਹੋਵੇਗਾ, ਉਦੋਂ ਤਕ ਇਹ ਆਪਣੀਆਂ ਕਰਤੂਤਾਂ ਤੋਂ ਬਾਜ਼ ਆਉਣ ਵਾਲੇ ਨਹੀਂ।
ਇਸ ਬਾਰੇ ਸਾਡਾ ਸਰਕਾਰ ਨੂੰ ਸੁਝਾਅ ਹੈ ਕਿ ਜਿਵੇਂ ਹੀ ਸੰਤ ਸਮਾਜ ਦੇ ਕਿਸੇ ਮੈਂਬਰ ਵਿਰੁੱਧ ਕਿਸੇ ਗੰਭੀਰ ਮਾਮਲੇ ਵਿਚ ਕੇਸ ਦਰਜ ਹੋਵੇ, ਉਸ ਦਾ ਪਾਸਪੋਰਟ ਜ਼ਬਤ ਕਰ ਲਿਆ ਜਾਣਾ ਚਾਹੀਦਾ ਹੈ, ਤਾਂ ਕਿ ਉਹ ਦੇਸ਼ 'ਚੋਂ ਦੌੜ ਨਾ ਸਕੇ।
—ਵਿਜੇ ਕੁਮਾਰ
ਮਤਭੇਦ ਛੱਡ ਕੇ ਰਾਮ ਮੰਦਿਰ ਦੀ ਉਸਾਰੀ ’ਤੇ ਧਿਆਨ ਕੇਂਦਰਿਤ ਕਰੇ ਟਰੱਸਟ
NEXT STORY 
