ਅਸ਼ਵਨੀ ਵੈਸ਼ਣਵ ਦੇ ਰੇਲ ਮੰਤਰੀ ਦਾ ਕਾਰਜਭਾਰ ਸੰਭਾਲਣ ਦੇ ਬਾਅਦ ਤੋਂ ਰੇਲ ਸੇਵਾਵਾਂ ਦੇ ਸੁਧਾਰ ਅਤੇ ਵਿਸਥਾਰ ਦੇ ਲਈ ਰੇਲਵੇ ’ਚ ਦਹਾਕਿਆਂ ਤੋਂ ਲਟਕਦੀ ਆ ਰਹੀ ਕਰਮਚਾਰੀਆਂ ਦੀ ਭਰਤੀ ’ਚ ਤੇਜ਼ੀ ਲਿਆਂਦੀ ਗਈ ਹੈ ਅਤੇ ਇਸ ਸਮੇਂ 1.40 ਲੱਖ ਕਰਮਚਾਰੀਆਂ ਦੀ ਭਰਤੀ ਦੀ ਪ੍ਰਕਿਰਿਆ ਜਾਰੀ ਹੈ, ਜਿਸ ਨੂੰ ਬਹੁਤ ਜਲਦੀ ਹੀ ਪੂਰਾ ਕਰ ਲਿਆ ਜਾਵੇਗਾ। ਸ਼੍ਰੀ ਅਸ਼ਵਨੀ ਵੈਸ਼ਣਵ ਦੇ ਅਨੁਸਾਰ ਪਿਛਲੇ 8 ਸਾਲਾਂ ’ਚ ਰੇਲਵੇ ਨੇ 3.50 ਲੱਖ ਤੋਂ ਵੱਧ ਲੋਕਾਂ ਨੂੰ ਰੋਜ਼ਗਾਰ ਮੁਹੱਈਆ ਕਰਵਾਇਆ ਹੈ।
ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਤੇਜ਼ ਰਫਤਾਰ ‘ਵੰਦੇ ਭਾਰਤ’ ਰੇਲਗੱਡੀਆਂ ਸਮੇਤ ਅਨੇਕ ਨਵੀਆਂ ਰੇਲਗੱਡੀਆਂ ਵੀ ਚਲਾਈਆਂ ਹਨ ਅਤੇ ਅਗਲੇ ਕੁਝ ਸਮੇਂ ’ਚ 150 ਤੋਂ ਵੱਧ ਨਵੀਆਂ ਰੇਲਗੱਡੀਆਂ ਚਲਾਉਣ ਦੀ ਯੋਜਨਾ ਹੈ।
ਨਵੀਆਂ ਰੇਲਗੱਡੀਆਂ ਸ਼ੁਰੂ ਕਰਨ ਦੇ ਸਿਲਸਿਲੇ ’ਚ ਸ਼੍ਰੀ ਵੈਸ਼ਣਵ ਨੇ 30 ਅਪ੍ਰੈਲ 2026 ਨੂੰ ਜੰਮੂ-ਕਸ਼ਮੀਰ ’ਚ ਜੰਮੂ ਤਵੀ ਰੇਲਵੇ ਸਟੇਸ਼ਨ ਤੋਂ ਸ਼੍ਰੀਨਗਰ (ਕਸ਼ਮੀਰ ਘਾਟੀ) ਦੇ ਲਈ ਸਿੱਧੀ ‘ਵੰਦੇ ਭਾਰਤ ਐਕਸਪ੍ਰੈੱਸ ਸੇਵਾ’ ਦਾ ਉਦਘਾਟਨ ਵੀ ਕੀਤਾ ਹੈ।
ਸ਼੍ਰੀ ਅਸ਼ਵਨੀ ਵੈਸ਼ਣਵ ਨੇ ਕਿਹਾ ਕਿ ਇਹ ਰੇਲ ਲਿੰਕ ਜੰਮੂ ਅਤੇ ਕਸ਼ਮੀਰ ਘਾਟੀ ਵਿਚਾਲੇ ਇਕ ਅਟੁੱਟ ਅਤੇ ਸਿੱਧਾ ਸੰਪਰਕ ਸਥਾਪਤ ਕਰੇਗਾ। ਯਾਤਰੀਆਂ ਦੀ ਭਾਰੀ ਮੰਗ ਨੂੰ ਦੇਖਦੇ ਹੋਏ ਇਸ ਮਾਰਗ ’ਤੇ 8 ਦੀ ਬਜਾਏ 20 ਕੋਚ ਵਾਲੀ ਆਧੁਨਿਕ ‘ਵੰਦੇ ਭਾਰਤ ਟ੍ਰੇਨ’ ਸ਼ੁਰੂ ਕੀਤੀ ਗਈ ਹੈ। ਇਸ ਦੀ ਨਿਯਮਿਤ ਸੇਵਾ 2 ਮਈ ਤੋਂ ਸ਼ੁਰੂ ਹੋਵੇਗੀ।
‘ਵਿੰਟਰਾਈਜ਼ੇਸ਼ਨ ਤਕਨੀਕ’ ਨਾਲ ਲੈਸ ਇਸ ਟ੍ਰੇਨ ’ਚ ‘ਗਰਮ ਵਿੰਡਸ਼ੀਲਡ’ ਅਤੇ ਵਿਸ਼ੇਸ਼ ਹੀਟਿੰਗ ਸਿਸਟਮ ਲੱਗੇ ਹਨ ਤਾਂ ਕਿ ਜ਼ੀਰੋ ਤੋਂ ਹੇਠਾਂ ਦੇ ਤਾਪਮਾਨ ਅਤੇ ਭਾਰੀ ਬਰਫਬਾਰੀ ’ਚ ਵੀ ਇਸ ਦੇ ਪਰਿਚਾਲਨ ’ਚ ਰੁਕਾਵਟ ਨਾ ਆਵੇ।
ਇਹ ਸਿੱਧੀ ਸੇਵਾ ਨਾ ਸਿਰਫ ਸੈਲਾਨੀਆਂ ਲਈ ਆਕਰਸ਼ਣ ਦਾ ਕੇਂਦਰ ਬਣੇਗੀ, ਸਗੋਂ ਇਸ ਟ੍ਰੇਨ ਰਾਹੀਂ ਜੰਮੂ ਤਵੀ ਅਤੇ ਸ਼੍ਰੀਨਗਰ ਵਿਚਾਲੇ 267 ਕਿਲੋਮੀਟਰ ਦੀ ਦੂਰੀ ਹੁਣ ਸਿਰਫ 4 ਤੋਂ 5 ਘੰਟਿਆਂ ’ਚ ਤੈਅ ਹੋਣ ਨਾਲ ਸਮੇਂ ਦੀ ਬੱਚਤ ਹੋਵੇਗੀ ਅਤੇ ਸਥਾਨਕ ਵਪਾਰ, ਸੈਰ-ਸਪਾਟੇ ਅਤੇ ਅਰਥਵਿਵਸਥਾ ਨੂੰ ਨਵੀਂ ਰਫਤਾਰ ਮਿਲੇਗੀ।
ਰੇਲ ਸੇਵਾਵਾਂ ਦਾ ਵਿਸਥਾਰ ਸ਼ਲਾਘਾਯੋਗ ਹੈ ਪਰ ਇਸ ਦੇ ਨਾਲ ਹੀ ਕਿਤੇ-ਕਿਤੇ ਇਨ੍ਹਾਂ ’ਚ ਸੁਧਾਰ ਕਰਨ ਦੀ ਵੀ ਲੋੜ ਹੈ, ਜਿਨ੍ਹਾਂ ’ਚ ਰੇਲਗੱਡੀਆਂ ਦੀ ਲੇਟ-ਲਤੀਫੀ ਮੁੱਖ ਹੈ। ਪਿਛਲੇ ਕਈ ਮਹੀਨਿਆਂ ਤੋਂ ਲਗਾਤਾਰ ਦਿੱਲੀ ਤੋਂ ਪੰਜਾਬ ਅਤੇ ਜੰਮੂ-ਕਸ਼ਮੀਰ ਵੱਲ ਜਾਣ-ਆਉਣ ਵਾਲੀਆਂ ਰੇਲਗੱਡੀਆਂ ਕਈ-ਕਈ ਘੰਟੇ ਲੇਟ ਚੱਲ ਰਹੀਆਂ ਹਨ।
* 30 ਅਪ੍ਰੈਲ ਨੂੰ ਜੰਮੂ ਅਤੇ ਕਟੜਾ ਰੂਟ ’ਤੇ ਜਾਣ ਵਾਲੀਆਂ ਪ੍ਰਮੱੁਖ ਰੇਲਗੱਡੀਆਂ ਦੀ ਦੇਰੀ ਨੇ ਯਾਤਰੀਆਂ ਦੀ ਪ੍ਰੇਸ਼ਾਨੀ ਵਧਾ ਦਿੱਤੀ। ਵਿਸ਼ੇਸ਼ ਤੌਰ ’ਤੇ ਵੈਸ਼ਨੋ ਦੇਵੀ, ਵੰਦੇ ਭਾਰਤ ਸਮੇਤ ਕਈ ਟ੍ਰੇਨਾਂ 2 ਤੋਂ 5 ਘੰਟੇ ਤੱਕ ਲੇਟ ਰਹੀਆਂ।
* ਵੈਸ਼ਨੋ ਦੇਵੀ ਕਟੜਾ ਤੋਂ ਰੀਸ਼ੈਡਿਊਲ ਹੋ ਕੇ ਚੱਲਣ ਵਾਲੀ ਵੰਦੇ ਭਾਰਤ ਐਕਸਪ੍ਰੈੱਸ ਸ਼ਾਮ 6.51 ਵਜੇ ਤੋਂ 2 ਘੰਟੇ ਲੇਟ ਰਹਿੰਦੇ ਹੋਏ 9 ਵਜੇ ਜਲੰਧਰ ਛਾਉਣੀ ਪਹੁੰਚੀ। ਵੈਸ਼ਨੋ ਦੇਵੀ ਜਾਣ ਵਾਲੀ ਨਵੀਂ ਦਿੱਲੀ ‘ਵੈਸ਼ਨੋ ਦੇਵੀ-ਕਟੜਾ ਸਪੈਸ਼ਲ’ ਟ੍ਰੇਨ ਪੌਣੇ 3 ਘੰਟੇ ਦੀ ਦੇਰੀ ਨਾਲ ਸਵਾ 8 ਵਜੇ ਜਲੰਧਰ ਛਾਉਣੀ ਪਹੁੰਚੀ।
* ਵੈਸ਼ਨੋ ਦੇਵੀ ਜਾਣ ਵਾਲੀ ‘ਮਾਲਵਾ ਐਕਸਪ੍ਰੈੱਸ’ ਸਵੇਰੇ ਸਾਢੇ 10 ਵਜੇ ਦੀ ਬਜਾਏ ਿਤੰਨ ਘੰਟੇ ਦੇਰੀ ਨਾਲ 1.30 ਵਜੇ ਦੇ ਬਾਅਦ ਜਲੰਧਰ ਛਾਉਣੀ ਪਹੁੰਚੀ। ਜੰਮੂ ਜਾਣ ਵਾਲੀ ‘ਜੇਹਲਮ ਐਕਸਪ੍ਰੈੱਸ’ ਸਾਢੇ 5 ਘੰਟੇ ਦੀ ਦੇਰੀ ਨਾਲ ਪੌਣੇ 11 ਵਜੇ ਜਲੰਧਰ ਛਾਉਣੀ ਪਹੁੰਚੀ।
* 30 ਅਪ੍ਰੈਲ ਨੂੰ ਹੀ ਜੰਮੂ ਰੂਟ ਦੀਆਂ ਟ੍ਰੇਨਾਂ ਦੇ ਇਲਾਵਾ ਅੰਮ੍ਰਿਤਸਰ ਵੱਲ ਜਾਣ ਵਾਲੀਆਂ ਟ੍ਰੇਨਾਂ ਦਾ ਸੰਚਾਲਨ ਵੀ ਪ੍ਰਭਾਵਿਤ ਰਿਹਾ। ਅੰਮ੍ਰਿਤਸਰ ਜਾਣ ਵਾਲੀ ‘ਸ਼ਹੀਦ ਐਕਸਪ੍ਰੈੱਸ’ ਢਾਈ ਘੰਟੇ ਦੇਰੀ ਨਾਲ ਸ਼ਾਮ 6 ਵਜੇ ਜਲੰਧਰ ਸ਼ਹਿਰ ਪਹੁੰਚੀ। ਅੰਮ੍ਰਿਤਸਰ ਤੋਂ ਰੀਸ਼ੈਡਿਊਲ ਹੋ ਕੇ ਚੱਲਣ ਵਾਲੀ ਦੁਰਗਿਆਣਾ ਐਕਸਪ੍ਰੈੱਸ ਸਾਢੇ ਤਿੰਨ ਘੰਟੇ ਦੀ ਦੇਰੀ ਨਾਲ ਸਾਢੇ 10 ਵਜੇ ਜਲੰਧਰ ਸ਼ਹਿਰ ਪਹੁੰਚੀ। ‘ਅੰਮ੍ਰਿਤਸਰ ਜਨ ਸੇਵਾ ਐਕਸਪ੍ਰੈੱਸ’ ਦੁਪਹਿਰ 3 ਵਜੇ ਦੀ ਬਜਾਏ ਢਾਈ ਘੰਟੇ ਦੀ ਦੇਰੀ ਨਾਲ ਸ਼ਾਮ ਸਾਢੇ 5 ਵਜੇ ਜਲੰਧਰ ਸ਼ਹਿਰ ਪਹੁੰਚੀ।
ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਦਿੱਲੀ ਤੋਂ ਚੱਲ ਕੇ ਅੰਮ੍ਰਿਤਸਰ ਜਾਣ ਅਤੇ ਆਉਣ ਵਾਲੀਆਂ ‘ਸ਼ਤਾਬਦੀ ਐਕਸਪ੍ਰੈੱਸ’ ਵਰਗੀਆਂ ਰੇਲਗੱਡੀਆਂ ਸਹੀ ਸਮੇਂ ਚੱਲ ਸਕਦੀਆਂ ਹਨ ਤਾਂ ਹੋਰ ਰੇਲਗੱਡੀਆਂ ਸਮੇਂ ਸਿਰ ਕਿਉਂ ਨਹੀਂ ਚੱਲ ਸਕਦੀਆਂ ਕਿਉਂਕਿ ਉਨ੍ਹਾਂ ਦੇ ਲੇਟ ਚੱਲਣ ਨਾਲ ਲੋਕਾਂ ਨੂੰ ਭਾਰੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
* ਰੱਖ-ਰਖਾਅ ਦੀ ਘਾਟ, ਤਕਨੀਕੀ ਖਰਾਬੀ ਅਤੇ ਰੇਲ ਦੁਰਘਟਨਾਵਾਂ ਨੂੰ ਰੋਕਣ ਵੱਲ ਧਿਆਨ ਦੇਣ ਦੀ ਵੀ ਤੁਰੰਤ ਲੋੜ ਹੈ।
* ਸਮੇਂ-ਸਮੇਂ ’ਤੇ ਰੇਲਗੱਡੀਆਂ ’ਚ ਹੋਣ ਵਾਲੇ ਅਗਨੀਕਾਂਡ ਵੀ ਚਿੰਤਾ ਦਾ ਵਿਸ਼ਾ ਹਨ, ਜੋ ਕਈ ਵਾਰ ਯਾਤਰੀਆਂ ਦੀ ਪ੍ਰਾਣ ਹਾਨੀ ਦਾ ਕਾਰਨ ਵੀ ਬਣ ਜਾਂਦੇ ਹਨ।
ਰੇਲ ਮੰਤਰੀ ਨੂੰ ਇਸ ਤਰ੍ਹਾਂ ਦੀਆਂ ਖਾਮੀਆਂ ਵੱਲ ਤੁਰੰਤ ਧਿਆਨ ਦੇਣ ਦੀ ਲੋੜ ਹੈ, ਤਾਂ ਕਿ ਯਾਤਰੀਆਂ ਦੀ ਯਾਤਰਾ ਸੁਵਿਧਾਜਨਕ ਹੋਣ ਦੇ ਨਾਲ-ਨਾਲ ਸੁਰੱਖਿਅਤ ਅਤੇ ਸਮੇਂ ਸਿਰ ਪੂਰੀ ਹੋਣ ਵਾਲੀ ਸਿੱਧ ਹੋਵੇ।
–ਵਿਜੇ ਕੁਮਾਰ
ਅਮਰੀਕਾ ’ਚ ਉੱਚ ਸਿੱਖਿਆ ਦੀਆਂ ਸਮੱਸਿਆਵਾਂ ਲਈ ਕਾਲਜ ਹੀ ਜ਼ਿੰਮੇਵਾਰ
NEXT STORY 
