ਆਸਾਰਾਮ ਬਾਪੂ, ਫਲਾਹਾਰੀ ਬਾਬਾ, ਗੁਰਮੀਤ ਰਾਮ ਰਹੀਮ, ਬਾਬਾ ਵੈਰਾਗਿਆ ਨੰਦ ਗਿਰੀ ਉਰਫ ‘ਮਿਰਚੀ ਬਾਬਾ’ ਅਤੇ ਲਿੰਗਾਇਤ ਸਾਧੂ ‘ਸ਼ਿਵਮੂਰਤੀ ਮੁਰੂਘਾ ਸ਼ਰਨਾਰੂ’ ਆਦਿ ਬਾਬਿਆਂ ਦੀ ਸੂਚੀ ’ਚ 2 ਹੋਰ ਨਾਂ ‘ਨਾਸਿਕ’ (ਮਹਾਰਾਸ਼ਟਰ) ਜ਼ਿਲੇ ਦੇ ‘ਅਸ਼ੋਕ ਖਰਾਤ’ ਅਤੇ ‘ਮਹੇਸ਼ ਗਿਰੀ’ ਦੇ ਵੀ ਜੁੜ ਗਏ ਹਨ।
17 ਮਾਰਚ, 2026 ਨੂੰ ਗ੍ਰਿਫਤਾਰ ‘ਅਸ਼ੋਕ ਖਰਾਤ’ ਖੁਦ ਨੂੰ ਆਸਟ੍ਰੇਲੀਆ ਦੀ ਨੇਵੀ ਦਾ ‘ਕੈਪਟਨ’ ਅਤੇ ‘ਕਾਸਮੋਲੋਜੀ’ ਮਾਹਿਰ ਦੱਸਿਆ ਕਰਦਾ ਸੀ ਅਤੇ ਉਸ ਦੇ ਵਿਰੁੱਧ ਮਹਾਰਾਸ਼ਟਰ ਪੁਲਸ ਦੀ ਵਿਸ਼ੇਸ਼ ਜਾਂਚ ਟੀਮ (ਐੱਸ. ਆਈ. ਟੀ.) ਜਿਨਸੀ ਸ਼ੋਸ਼ਣ, ਠੱਗੀ ਅਤੇ ਅੰਧਵਿਸ਼ਵਾਸ ਫੈਲਾਉਣ ਆਦਿ ਕਈ ਗੰਭੀਰ ਦੋਸ਼ਾਂ ਦੀ ਜਾਂਚ ਕਰ ਰਹੀ ਹੈ।
15-16 ਵਰ੍ਹੇ ਪਹਿਲਾਂ ‘ਮਹਾਰਾਸ਼ਟਰ’ ’ਚ ਨਾਸਿਕ ਜ਼ਿਲੇ ਦੇ ‘ਕਹਾਂਡਲਵਾਡੀ’ ਪਿੰਡ ਤੋਂ ਆ ਕੇ ‘ਮਿਰਗਾਂਵ’ ’ਚ ਵਸਣ ਤੋਂ ਬਾਅਦ ਇੱਥੇ ‘ਅਸ਼ੋਕ ਖਰਾਤ’ ਨੇ 17-18 ਏਕੜ ਜ਼ਮੀਨ ਖਰੀਦ ਕੇ ਵਿਸ਼ਾਲ ਮੰਦਰ ਬਣਵਾਇਆ ਜਿੱਥੇ ਭਗਤਾਂ ਦੀ ਭੀੜ ਜੁੜਨ ਲੱਗੀ।
ਉਸ ਨੇ ਇੱਥੇ ‘ਸ਼੍ਰੀ ਸ਼ਿਵਨਿਕਾ ਸੰਸਥਾਨ’ ਦੇ ਨਾਂ ਨਾਲ ਲੱਗਭਗ 3.5 ਏਕੜ ’ਚ ਆਪਣਾ ਮੁੱਖ ਦਫਤਰ ਵੀ ਬਣਾ ਰੱਖਿਆ ਸੀ। ਹੌਲੀ-ਹੌਲੀ ਇੱਥੇ ਉਸ ਕੋਲ ਲੋਕ ਆਪਣੀਆਂ ਸਮੱਸਿਆਵਾਂ ਦੇ ਹੱਲ ਲਈ ਆਉਣ ਲੱਗੇ ਅਤੇ ਉਹ ਇਸ ਬਹਾਨੇ ਔਰਤਾਂ ਦਾ ਜਿਨਸੀ ਸ਼ੋਸ਼ਣ ਕਰਨ ਲੱਗਾ। ਉਹ ਔਰਤਾਂ ਦੀਆਂ ਅਸ਼ਲੀਲ ਵੀਡੀਓਜ਼ ਬਣਾ ਕੇ ਉਨ੍ਹਾਂ ਨੂੰ ਬਲੈਕਮੇਲ ਵੀ ਕਰਦਾ ਸੀ ਜਿਨ੍ਹਾਂ ’ਚੋਂ ਕਈ ਵੀਡੀਓਜ਼ ਪੁਲਸ ਨੇ ਬਰਾਮਦ ਵੀ ਕਰ ਲਈਆਂ ਹਨ।
ਉਸ ਦੇ ਪ੍ਰਤੀ ਔਰਤਾਂ ਦੀ ਅੰਨ੍ਹੇਵਾਹ ਸ਼ਰਧਾ ਇਸੇ ਤੋਂ ਸਪੱਸ਼ਟ ਹੈ ਕਿ ਹਾਲ ਹੀ ’ਚ ਮਹਾਰਾਸ਼ਟਰ ਮਹਿਲਾ ਕਮਿਸ਼ਨ ਦੀ ਪ੍ਰਧਾਨ ‘ਰੂਪਾਲੀ ਚਾਕਣਕਰ’ ਨੂੰ ਵੀ ਉਸ ਨਾਲ ਸਬੰਧਾਂ ਦੇ ਕਾਰਨ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇਣਾ ਪਿਆ ਹੈ। ਕੁਝ ਸਮਾਂ ਪਹਿਲਾਂ ਵਾਇਰਲ ਹੋਈ ਇਕ ਵੀਡੀਓ ’ਚ ‘ਰੂਪਾਲੀ’ ਉਸ ਦਾ ‘ਪਾਦੁਕਾ ਪੂਜਨ’ ਕਰਦੀ ਦਿਖਾਈ ਦੇ ਰਹੀ ਸੀ।
‘ਅਸ਼ੋਕ ਖਰਾਤ’ ’ਤੇ ਇਕ ਔਰਤ ਨਾਲ ਕਈ ਵਾਰ ਜਬਰ-ਜ਼ਨਾਹ ਕਰਕੇ ਗਰਭਵਤੀ ਕਰਨ, ਜਾਦੂ-ਟੂਣਾ ਕਰਨ ਅਤੇ ਗਰਭਪਾਤ ਦੀਆਂ ਦਵਾਈਆਂ ਤੇ ਨਸ਼ੀਲੇ ਪਦਾਰਥ ਖੁਆਉਣ ਦਾ ਵੀ ਦੋਸ਼ ਹੈ। ਅਦਾਲਤ ’ਚ ਉਕਤ ਮਾਮਲੇ ਦੀ ਸੁਣਵਾਈ ਦੌਰਾਨ ਪੀੜਤ ਧਿਰ ਨੇ ਦੋਸ਼ ਲਗਾਇਆ ਕਿ ਉਸ ਨੇ ਸਮੇਂ-ਸਮੇਂ ’ਤੇ ਪੀੜਤ ਔਰਤ ਨੂੰ ਉਸ ਦੇ ਬੱਚਿਆਂ ਦੀ ਸੁਰੱਖਿਆ ਨੂੰ ਲੈ ਕੇ ਵੀ ਧਮਕਾਇਆ।
ਆਪਣੇ ਰਸੂਖਦਾਰ ਭਗਤਾਂ ਨੂੰ ਉਹ ਜਿਨਸੀ ਸ਼ਕਤੀ ਵਧਾਉਣ ਵਾਲੀਆਂ ਦਵਾਈਆਂ ਵੀ ਦਿੰਦਾ ਸੀ ਅਤੇ ‘ਜਿਨਸੀ ਸ਼ਕਤੀਵਰਧਕ ਸ਼ਹਿਦ’ ਦੀ ਇਕ ਕਿਲੋ ਦੀ ਬੋਤਲ 9 ਲੱਖ ਰੁਪਏ ’ਚ ਵੇਚਦਾ ਸੀ। ਉਸ ਦਾ ਕਹਿਣਾ ਸੀ ਕਿ ਉਹ ਇਹ ਸ਼ਹਿਦ ਤੁਰਕੀ ਦੀਆਂ ਸਮੁੰਦਰੀ ਗੁਫਾਵਾਂ ਤੋਂ ਲਿਆਉਂਦਾ ਹੈ।
‘ਅਸ਼ੋਕ ਖਰਾਤ’ ’ਤੇ ‘ਲਲਿਤ ਪੋਫਲੇ’ ਨਾਂ ਦੇ ਆਪਣੇ ਇਕ ਕਰੀਬੀ ਤੋਂ ਉਸ ਦੇ ਮਾਤਾ-ਪਿਤਾ ਦੀ ਮੌਤ ਟਾਲ ਕੇ ਉਨ੍ਹਾਂ ਦੀ ਉਮਰ ਵਧਾਉਣ ਲਈ ‘ਅਵਤਾਰ ਪੂਜਾ’ ਅਤੇ ਵਿਸ਼ੇਸ਼ ਅਨੁਸ਼ਠਾਨ ਕਰਨ ਦਾ ਝਾਂਸਾ ਦੇ ਕੇ 9 ਲੱਖ ਰੁਪਏ ਠੱਗਣ ਦਾ ਵੀ ਦੋਸ਼ ਹੈ। ‘ਲਲਿਤ ਪੋਫਲੇ’ ਨੇ ਉਸ ਦੇ ਵਿਰੁੱਧ ਪੁਲਸ ਥਾਣੇ ’ਚ ਵੀ ਸ਼ਿਕਾਇਤ ਦਰਜ ਕਰਵਾਈ ਹੈ।
ਅਤੇ ਹੁਣ 30 ਅਪ੍ਰੈਲ, 2026 ਨੂੰ ‘ਨਾਸਿਕ’ ਜ਼ਿਲਾ ਅਦਾਲਤ ਨੇ ਔਰਤਾਂ ਦੇ ਜਿਨਸੀ ਸ਼ੋਸ਼ਣ ਦੇ ਇਕ ਹੋਰ ਮਾਮਲੇ ’ਚ ‘ਅਸ਼ੋਕ ਖਰਾਤ’ ਨੂੰ 12 ਮਈ ਤੱਕ ਜੇਲ ਭੇਜ ਦਿੱਤਾ ਹੈ। ‘ਅਸ਼ੋਕ ਖਰਾਤ’ ’ਤੇ ਆਪਣੀਆਂ ਪਰਿਵਾਰਕ ਸਮੱਸਿਆਵਾਂ ਦੇ ਹੱਲ ਲਈ ਆਈ ਇਕ ਹੋਰ ਔਰਤ ਦੇ ਜਿਨਸੀ ਸ਼ੋਸ਼ਣ ਦਾ ਵੀ ਦੋਸ਼ ਹੈ।
ਜ਼ਿਕਰਯੋਗ ਹੈ ਕਿ ‘ਅਸ਼ੋਕ ਖਰਾਤ’ ਦੇ ਮਾਮਲੇ ਤੋਂ ਬਾਅਦ ‘ਨਾਸਿਕ’ ਜ਼ਿਲੇ ’ਚ ਢੋਂਗੀ ਬਾਬਿਆਂ ਵਿਰੁੱਧ ਸ਼ਿਕਾਇਤਾਂ ਵਧੀਆਂ ਹਨ। ਹਾਲ ਹੀ ’ਚ ‘ਧਾਰਣਗਾਂਵ ਮੱਠ’ ਦੇ ਬਾਬਾ ‘ਮਹੇਸ਼ ਗਿਰੀ’ ਵਿਰੁੱਧ ਵੀ ਇਕ ਮੁਟਿਆਰ ਨੇ ਜਿਨਸੀ ਸ਼ੋਸ਼ਣ ਦੀ ਸ਼ਿਕਾਇਤ ਪੁਲਸ ’ਚ ਦਰਜ ਕਰਵਾਈ ਹੈ।
ਪੀੜਤ ਦਾ ਦੋਸ਼ ਹੈ ਕਿ ਉਸ ਦੇ ਵਿਆਹ ’ਚ ਆ ਰਹੀਆਂ ਰੁਕਾਵਟਾਂ ਦੂਰ ਕਰਨ ਦੇ ਨਾਂ ’ਤੇ ਬਾਬੇ ਨੇ ਉਸ ਦਾ ਜਿਨਸੀ ਸ਼ੋਸ਼ਣ ਕੀਤਾ। ਪੁਲਸ ਨੇ ਇਸ ਬਾਬੇ ਵਿਰੁੱਧ ਵੀ ਜਿਨਸੀ ਸ਼ੋਸ਼ਣ ਅਤੇ ਜਾਦੂ-ਟੂਣਾ ਵਿਰੋਧੀ ਕਾਨੂੰਨ ਦੇ ਤਹਿਤ ਕੇਸ ਦਰਜ ਕਰ ਲਿਆ ਹੈ।
ਹਾਲਾਂਕਿ ਸਾਰੇ ਸੰਤ ਅਜਿਹੇ ਨਹੀਂ ਹਨ ਪਰ ਨਿਸ਼ਚਿਤ ਤੌਰ ’ਤੇ ਅਜਿਹੀਆਂ ਘਟਨਾਵਾਂ ਸੰਤ ਸਮਾਜ ਦੀ ਬਦਨਾਮੀ ਦਾ ਕਾਰਨ ਬਣ ਰਹੀਆਂ ਹਨ ਪਰ ਇਸ ਦੇ ਲਈ ਕਿਸੇ ਹੱਦ ਤੱਕ ਔਰਤਾਂ ਵੀ ਦੋਸ਼ੀ ਹਨ, ਜੋ ਇਨ੍ਹਾਂ ਢੋਂਗੀ ਬਾਬਿਆਂ ਦੀ ਭਾਸ਼ਣ ਕਲਾ ਤੋਂ ਪ੍ਰਭਾਵਿਤ ਹੋ ਕੇ ਇਨ੍ਹਾਂ ਦੇ ਝਾਂਸੇ ’ਚ ਆ ਜਾਂਦੀਆਂ ਹਨ ਅਤੇ ਔਲਾਦ ਪ੍ਰਾਪਤੀ, ਘਰੇਲੂ ਸਮੱਸਿਆ ਹੱਲ ਆਦਿ ਦੇ ਲਾਲਚ ’ਚ ਆਪਣਾ ਸਭ ਕੁਝ ਲੁਟਾ ਬੈਠਦੀਆਂ ਹਨ।
ਇਸ ਲਈ ਇਸ ਮਾਮਲੇ ’ਚ ਜਿੱਥੇ ਔਰਤਾਂ ਨੂੰ ਸਾਵਧਾਨੀ ਵਰਤਣ ਦੀ ਲੋੜ ਹੈ, ਉੱਥੇ ਹੀ ਸਮਾਜ ਅਤੇ ਘਰ ਦੇ ਵੱਡੇ-ਬਜ਼ੁਰਗਾਂ ਨੂੰ ਵੀ ਪਰਿਵਾਰ ਦੀਆਂ ਔਰਤਾਂ ਅਤੇ ਬੱਚੀਆਂ ਨੂੰ ਵਿਸ਼ੇਸ਼ ਤੌਰ ’ਤੇ ਬਿਨਾਂ ਜਾਂਚੇ-ਪਰਖੇ ਇਸ ਤਰ੍ਹਾਂ ਦੇ ਬਾਬਿਆਂ ਦੇ ਜਾਲ ’ਚ ਫਸਣ ਤੋਂ ਬਚਣ ਲਈ ਸੁਚੇਤ ਅਤੇ ਜਾਗਰੂਕ ਕਰਦੇ ਰਹਿਣਾ ਚਾਹੀਦਾ ਹੈ।
—ਵਿਜੇ ਕੁਮਾਰ
ਦੇਸ਼ ਸੇਵਾ ਅਤੇ ਸਮਾਜਿਕ ਤਰੱਕੀ ਲਈ ਸਮਰਪਿਤ ਰਾਸ਼ਟਰੀ ਸਵੈਮਸੇਵਕ ਸੰਘ
NEXT STORY 
