17 ਜੁਲਾਈ, 2026 ਦਾ ਦਿਨ ਦੇਸ਼ ਦੇ ਇਤਿਹਾਸ ’ਚ ਸੁਨਹਿਰੀ ਅੱਖਰਾਂ ਨਾਲ ਲਿਖਿਆ ਜਾਵੇਗਾ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਜੀਂਦ ਤੋਂ ਦੇਸ਼ ਦੀ ਪਹਿਲੀ ਹਾਈਡ੍ਰੋਜਨ ਟ੍ਰੇਨ ਨੂੰ ਹਰੀ ਝੰਡੀ ਦਿਖਾ ਕੇ ਵਿਸ਼ਵ ਨੂੰ ਭਾਰਤ ਦੇ ਮਜ਼ਦੂਰਾਂ, ਇੰਜੀਨੀਅਰਾਂ ਦੀ ਮਿਹਨਤ ਦੀ ਸਿਖਰ, ਪਰਾਕ੍ਰਮ ਅਤੇ ਤਕਨੀਕ ਦੀ ਧਮਕ ਸੁਣਾਈ, ਕੁਰੂਕਸ਼ੇਤਰ ’ਚ ਸ਼ਾਨਦਾਰ ਸਿੱਖ ਅਜਾਇਬ ਘਰ ਦਾ ਨੀਂਹ ਪੱਥਰ ਰੱਖ ਕੇ ਗੁਰੂ ਪ੍ਰੰਪਰਾ ਨੂੰ ਆਉਣ ਵਾਲੀਆਂ ਪੀੜ੍ਹੀਆਂ ਤੱਕ ਪਹੁੰਚਾਉਣ ਦਾ ਸੰਕਲਪ ਦੁਹਰਾਇਆ ਅਤੇ ਫਿਰ ਜਲੰਧਰ ਦੀ ਪਾਵਨ ਧਰਤੀ ਤੋਂ ਪੰਜਾਬ ਨੂੰ 5,470 ਕਰੋੜ ਰੁਪਏ ਤੋਂ ਵੱਧ ਦੀਆਂ ਰੇਲ ਅਤੇ ਸੜਕ ਪ੍ਰਾਜੈਕਟਾਂ ਦੀ ਸੌਗਾਤ ਦਿੱਤੀ। ਸੰਤ ਸ਼੍ਰੋਮਣੀ ਗੁਰੂ ਰਵਿਦਾਸ ਜੀ ਮਹਾਰਾਜ ਦੇ ਕਰੋੜਾਂ ਸ਼ਰਧਾਲੂਆਂ ਦੀ ਦਹਾਕਿਆਂ ਪੁਰਾਣੀ ਮੰਗ ਪੂਰੀ ਕਰਦੇ ਹੋਏ ਬੇਗਮਪੁਰਾ ਤੋਂ ਬਾਅਦ ਹੁਣ ਦੂਜੀ ਟ੍ਰੇਨ ਛੇਹਰਟਾ (ਅੰਮ੍ਰਿਤਸਰ) ਤੋਂ ਕਾਸ਼ੀ ਤੱਕ ‘ਸੰਤ ਗੁਰੂ ਰਵਿਦਾਸ ਐਕਸਪ੍ਰੈੱਸ’ ਦਾ ਸ਼ੁਭਾਰੰਭ ਹੋਇਆ ਅਤੇ 100 ਕਰੋੜ ਦੀ ਲਾਗਤ ਨਾਲ ਬਣਿਆ ਹੋਇਆ ਜਲੰਧਰ ਕੈਂਟ ਦਾ ਏਅਰਪੋਰਟ ਵਰਗਾ ਸ਼ਾਨਦਾਰ ਰੇਲਵੇ ਸਟੇਸ਼ਨ ਰਾਸ਼ਟਰ ਨੂੰ ਸਮਰਪਿਤ ਹੋਇਆ।
ਅੱਜ ਜਦੋਂ ਪੰਜਾਬ 2027 ਦੀ ਦਹਿਲੀਜ਼ ’ਤੇ ਖੜ੍ਹਾ ਹੋ ਕੇ ਅੰਗੜਾਈ ਲੈ ਰਿਹਾ ਹੈ, ਤਾਂ ਹਰ ਪੰਜਾਬੀ ਦੇ ਮਨ ’ਚ 3 ਸਵਾਲ ਹਨ - ਬੀਤੇ 12 ਸਾਲਾਂ ’ਚ ਮੋਦੀ ਜੀ ਨੇ ਪੰਜਾਬ ਨੂੰ ਕੀ ਦਿੱਤਾ? ‘ਆਪ’ ਦੇ ਕੁਸ਼ਾਸਨ ਨੇ ਪੰਜਾਬ ਦਾ ਕੀ ਹਾਲ ਕਰ ਦਿੱਤਾ ਅਤੇ ਪੰਜਾਬ ਦਾ ਭਵਿੱਖ ਕਿਸ ਦੇ ਹੱਥਾਂ ’ਚ ਸੁਰੱਖਿਅਤ ਹੈ? ਇਨ੍ਹਾਂ ਹੀ 3 ਸਵਾਲਾਂ ਦੇ ਉੱਤਰ ਪੰਜਾਬ ਦੀ ਦਿਸ਼ਾ ਅਤੇ ਦਸ਼ਾ ਤੈਅ ਕਰਨਗੇ।
26 ਮਈ, 2014 ਨੂੰ ਪ੍ਰਧਾਨ ਮੰਤਰੀ ਅਹੁਦੇ ਦੀ ਸਹੁੰ ਚੁੱਕਣ ਦੇ ਦਿਨ ਤੋਂ ਹੀ ਮੋਦੀ ਜੀ ਨੇ ਪੰਜਾਬ ਨੂੰ ਸਿਰਫ਼ ਇਕ ਸਰਹੱਦੀ ਸੂਬਾ ਨਹੀਂ, ਸਗੋਂ ਗੁਰੂਆਂ, ਮਹਾਤਮਾਵਾਂ, ਸੰਤਾਂ, ਰਾਸ਼ਟਰ ਭਗਤਾਂ ਅਤੇ ਸ਼ਹੀਦਾਂ ਦੀ ਪਵਿੱਤਰ ਭੂਮੀ ਮੰਨਿਆ ਹੈ। ਇਸ ਦਾ ਸਭ ਤੋਂ ਵੱਡਾ ਪ੍ਰਮਾਣ ਕਰਤਾਰਪੁਰ ਸਾਹਿਬ ਕੋਰੀਡੋਰ ਹੈ। ਨਵੰਬਰ 2019 ’ਚ ਕੋਰੀਡੋਰ ਖੁੱਲ੍ਹਿਆ ਅਤੇ ਅੱਜ ਲੱਖਾਂ ਸ਼ਰਧਾਲੂ ਬਿਨਾਂ ਵੀਜ਼ਾ ਦੇ ਦਰਸ਼ਨ ਕਰ ਕੇ ਘਰ ਪਰਤਦੇ ਹਨ। ਸਤੰਬਰ 2020 ’ਚ ਸ੍ਰੀ ਹਰਿਮੰਦਰ ਸਾਹਿਬ ਅੰਮ੍ਰਿਤਸਰ ਨੂੰ ਐੱਫ. ਸੀ. ਆਰ. ਏ. ਰਜਿਸਟ੍ਰੇਸ਼ਨ ਮਿਲੀ, ਜਿਸ ਨਾਲ 1984 ਦੇ 36 ਸਾਲਾਂ ਤੋਂ ਬਾਅਦ ਪਹਿਲੀ ਵਾਰ ਵਿਦੇਸ਼ਾਂ ’ਚ ਬੈਠੀ ਸੰਗਤ ਸਿੱਧੀ ਗੁਰੂ ਘਰ ਦੀ ਸੇਵਾ ’ਚ ਦਾਨ ਭੇਜ ਰਹੀ ਹੈ। ਸੇਵਾ ਭੋਜ ਯੋਜਨਾ ਦੇ ਅਧੀਨ ਲੰਗਰ ਦੀ ਸਮੱਗਰੀ ’ਤੇ ਲੱਗਣ ਵਾਲੇ ਜੀ. ਐੱਸ. ਟੀ. ਦੀ ਪੂਰਤੀ ਕਰ ਕੇ ਕੇਂਦਰ ਸਰਕਾਰ ਨੇ ਐੱਸ. ਜੀ. ਪੀ. ਸੀ. ਅਤੇ ਦੁਰਗਿਆਣਾ ਤੀਰਥ ਨੂੰ ਕਰੋੜਾਂ ਰੁਪਏ ਮੋੜੇ, ਗੁਰੂ ਦੇ ਲੰਗਰ ਨੂੰ ਕਰ-ਮੁਕਤ ਕੀਤਾ।
ਗੁਰੂ ਨਾਨਕ ਦੇਵ ਜੀ ਦਾ 550ਵਾਂ ਪ੍ਰਕਾਸ਼ ਪੁਰਬ, ਗੁਰੂ ਗੋਬਿੰਦ ਸਿੰਘ ਜੀ ਦਾ 350ਵਾਂ ਪ੍ਰਕਾਸ਼ ਪੁਰਬ ਅਤੇ ਗੁਰੂ ਤੇਗ ਬਹਾਦਰ ਜੀ ਦਾ 400ਵਾਂ ਪ੍ਰਕਾਸ਼ ਪੁਰਬ ਸਿਰਫ਼ ਭਾਰਤ ’ਚ ਨਹੀਂ, ਪੂਰੇ ਵਿਸ਼ਵ ’ਚ ਲਾਸਾਨੀ ਢੰਗ ਨਾਲ ਮਨਾਏ ਗਏ, ਸੁਲਤਾਨਪੁਰ ਲੋਧੀ ਦਾ ਵਿਕਾਸ, ਯਾਦਗਾਰੀ ਸਿੱਕੇ, ਡਾਕ ਟਿਕਟ ਅਤੇ ਅੰਤਰਰਾਸ਼ਟਰੀ ਆਯੋਜਨ ਗੁਰੂਆਂ ਦੀ ਬਾਣੀ ਨੂੰ ਵਿਸ਼ਵ ਮੰਚ ਤੱਕ ਲੈ ਗਏ। 26 ਦਸੰਬਰ ਨੂੰ ‘ਵੀਰ ਬਾਲ ਦਿਵਸ’ ਘੋਸ਼ਿਤ ਕਰ ਕੇ ਸਾਹਿਬਜ਼ਾਦਿਆਂ ਬਾਬਾ ਜ਼ੋਰਾਵਰ ਸਿੰਘ ਜੀ ਅਤੇ ਬਾਬਾ ਫ਼ਤਿਹ ਸਿੰਘ ਜੀ ਦੀ ਲਾਸਾਨੀ ਸ਼ਹਾਦਤ ਅਤੇ ਦੋਵਾਂ ਸਾਹਿਬਜ਼ਾਦਿਆਂ ਦੀ ਵੀਰਤਾ ਅਤੇ ਆਪਣੇ ਧਰਮ ਪ੍ਰਤੀ ਵਚਨਬੱਧਤਾ ਨੂੰ ਰਾਸ਼ਟਰੀ ਸਮ੍ਰਿਤੀ ਦਾ ਅੰਗ ਬਣਾਇਆ ਗਿਆ। ਜਲਿਆਂਵਾਲਾ ਬਾਗ ਰਾਸ਼ਟਰੀ ਸਮਾਰਕ ਦਾ ਸ਼ਾਨਦਾਰ ਮੁੜ-ਵਿਕਾਸ ਹੋਇਆ। ਦਹਾਕਿਆਂ ਪੁਰਾਣੀ ਬਲੈਕਲਿਸਟ ਦੇ 314 ’ਚੋਂ 312 ਨਾਂ ਹਟਾ ਕੇ ਪ੍ਰਵਾਸੀ ਸਿੱਖ ਪਰਿਵਾਰਾਂ ਲਈ ਵਤਨ ਦੇ ਦਰਵਾਜ਼ੇ ਖੋਲ੍ਹ ਵੱਡੀ ਰਾਹਤ ਦਿੱਤੀ। ਕਾਂਗਰਸ ਪਾਰਟੀ ਦੁਆਰਾ ਗਾਂਧੀ ਨਹਿਰੂ ਪਰਿਵਾਰ ਦੇ ਇਸ਼ਾਰੇ ’ਤੇ 1984 ਦੇ ਸਿੱਖ ਵਿਰੋਧੀ ਕਤਲੇਅਾਮ ’ਚ ਐੱਸ.ਆਈ.ਟੀ. ਦੇ ਮਾਧਿਅਮ ਨਾਲ ਸਾਢੇ 3 ਦਹਾਕਿਆਂ ਤੋਂ ਬਾਅਦ ਪਹਿਲੀ ਵਾਰ ਦੋਸ਼ੀਆਂ ਨੂੰ ਸਜ਼ਾ ਦਿਵਾ ਕੇ ਇਨਸਾਫ਼ ਦੀ ਜੋਤ ਜਗਾਈ ਗਈ।
925 ਕਰੋੜ ਰੁਪਏ ਦੀ ਲਾਗਤ ਨਾਲ 750 ਬਿਸਤਰਿਆਂ ਵਾਲਾ ਏਮਜ਼ ਬਠਿੰਡਾ, ਮੋਹਾਲੀ ’ਚ ਟਾਟਾ ਕੈਂਸਰ ਸੰਸਥਾਨ, ਆਈ. ਆਈ. ਐੱਮ. ਅੰਮ੍ਰਿਤਸਰ, ਆਈ. ਆਈ. ਟੀ. ਰੋਪੜ ਦਾ ਵਿਸਤਾਰ, ਪੀ. ਜੀ. ਆਈ. ਐੱਮ. ਈ. ਆਰ. ਚੰਡੀਗੜ੍ਹ ਦਾ ਲੱਗਭਗ 1,000 ਕਰੋੜ ਰੁਪਏ ਦਾ ਸਾਰੰਗਪੁਰ ਵਿਸਤਾਰ ਕੰਪਲੈਕਸ ਅਤੇ ਹੁਸ਼ਿਆਰਪੁਰ ਕਪੂਰਥਲਾ ’ਚ ਨਵੇਂ ਮੈਡੀਕਲ-ਨਰਸਿੰਗ ਕਾਲਜ - ਮੋਦੀ ਜੀ ਨੇ ਪੰਜਾਬ ’ਚ ਸਿਹਤ ਅਤੇ ਸਿੱਖਿਆ ਦੀ ਪੂਰੀ ਕ੍ਰਾਂਤੀ ਖੜ੍ਹੀ ਕਰ ਦਿੱਤੀ। ਕਨੈਕਟੀਵਿਟੀ ’ਚ ਤਾਂ ਯੁੱਗ ਬਦਲ ਗਿਆ - 40,000 ਕਰੋੜ ਰੁਪਏ ਦਾ ਦਿੱਲੀ-ਅੰਮ੍ਰਿਤਸਰ-ਕਟੜਾ ਐਕਸਪ੍ਰੈੱਸਵੇਅ ਦਿੱਲੀ ਤੋਂ ਮਾਤਾ ਵੈਸ਼ਨੋ ਦੇਵੀ ਦਾ 16 ਘੰਟੇ ਦਾ ਸਫ਼ਰ ਘਟਾ ਕੇ ਲੱਗਭਗ 6 ਘੰਟੇ ਅਤੇ ਅੰਮ੍ਰਿਤਸਰ ਦਾ ਸਫ਼ਰ ਲੱਗਭਗ 4 ਘੰਟੇ ਕਰ ਦੇਵੇਗਾ। ਬਿਆਸ ਦਰਿਆ ’ਤੇ ਦੇਸ਼ ਦਾ ਸਭ ਤੋਂ ਲੰਮਾ ਕੇਬਲ-ਸਟੇਡ ਪੁਲ ਬਣ ਰਿਹਾ ਹੈ। ਪੰਜਾਬ ’ਚ 43,527 ਕਰੋੜ ਰੁਪਏ ਦੇ ਰਾਸ਼ਟਰੀ ਰਾਜਮਾਰਗ ਅਤੇ ਲੱਗਭਗ 34,000 ਕਰੋੜ ਰੁਪਏ ਦਾ ਰੇਲ ਢਾਂਚੇ ਦਾ ਨਿਰਮਾਣ ਚੱਲ ਰਿਹਾ ਹੈ। ਅੰਮ੍ਰਿਤ ਭਾਰਤ ਸਟੇਸ਼ਨ ਯੋਜਨਾ ’ਚ ਪੰਜਾਬ ਦੇ 30 ਸਟੇਸ਼ਨ ਸ਼ਾਮਲ ਹਨ।
ਅੰਨਦਾਤਾ ਦੇ ਸਤਿਕਾਰ ’ਚ ਪੰਜਾਬ ਦੇ 11 ਲੱਖ ਕਿਸਾਨਾਂ ਦੇ ਖ਼ਾਤਿਆਂ ’ਚ ਪੀ.ਐੱਮ.-ਕਿਸਾਨ ਦੀ ਰਾਸ਼ੀ ਸਿੱਧੀ ਪਹੁੰਚ ਰਹੀ ਹੈ, ਗ਼ਰੀਬ ਕਲਿਆਣ ਦੇ ਤਹਿਤ ਪ੍ਰਧਾਨ ਮੰਤਰੀ ਮੋਦੀ ਦੁਆਰਾ ਲੱਗਭਗ 1.40 ਕਰੋੜ ਲਾਭਪਾਤਰੀਆਂ ਨੂੰ ਮੁਫ਼ਤ ਰਾਸ਼ਨ ਮਿਲ ਰਿਹਾ ਹੈ, ਸ਼ੌਚਾਲਿਆ, ਪੱਕੇ ਘਰ, ਉੱਜਵਲਾ ਅਤੇ ਆਯੁਸ਼ਮਾਨ ਨੇ ਆਮ ਪਰਿਵਾਰਾਂ ਦਾ ਜੀਵਨ ਬਦਲਿਆ ਹੈ।
ਹੁਣ ਦੂਜੀ ਤਸਵੀਰ ਦੇਖੋ, ਜੋ ਹਰ ਪੰਜਾਬੀ ਦਾ ਕਲੇਜਾ ਚੀਰ ਦਿੰਦੀ ਹੈ। ਜਿਸ ਪੰਜਾਬ ਨੂੰ ਕੇਂਦਰ ਸਰਕਾਰ ਗੱਫ਼ੇ ਦੇ ਰਹੀ ਹੈ, ਉਸੇ ਪੰਜਾਬ ਨੂੰ ਭਗਵੰਤ ਮਾਨ ਸਰਕਾਰ ਨੇ ਹਰ ਖੇਤਰ ’ਚ ਪਿੱਛੇ ਧੱਕ ਦਿੱਤਾ ਹੈ। ਸਭ ਤੋਂ ਵੱਡਾ ਜ਼ਖ਼ਮ ਨਸ਼ੇ ਦਾ ਹੈ - ਅੱਜ ਪੰਜਾਬ ਡਰੱਗਜ਼ ਦੇ ਦਰਿਆ ’ਚ ਡੁੱਬਾ ਕਰਾਹ ਰਿਹਾ ਹੈ। ਗਲੀ-ਗਲੀ ’ਚ ਮਾਤਮ ਹੈ। ਜੋ ਲੋਕ ਨਸ਼ਾ ਖ਼ਤਮ ਕਰਨ ਦੀਆਂ ਕਸਮਾਂ ਖਾ ਕੇ ਸੱਤਾ ’ਚ ਆਏ ਸਨ, ਉਨ੍ਹਾਂ ਦੇ ਰਾਜ ’ਚ ਨਸ਼ੇ ਦਾ ਕਾਰੋਬਾਰ ਹੋਰ ਵਧਿਆ, ਕਈ ਗੁਣਾ ਹੋਰ ਜਗ੍ਹਾ ਉਪਲਬਧ ਹੋਇਆ ਹੈ। ਸਮਗੱਲਰਾਂ ’ਤੇ ਪ੍ਰਭਾਵਸ਼ਾਲੀ ਕਾਰਵਾਈ ਦੀ ਇੱਛਾ-ਸ਼ਕਤੀ ਹੀ ਨਹੀਂ ਹੈ, ਕਿਉਂਕਿ ਜਿਨ੍ਹਾਂ ’ਤੇ ਰੋਕਣ ਦੀ ਜ਼ਿੰਮੇਵਾਰੀ ਸੀ, ਉੱਥੇ ਰੱਖਿਅਕ ਹੀ ਭਕਸ਼ਕ ਬਣ ਬੈਠੇ ਹਨ।
ਕਾਨੂੰਨ-ਵਿਵਸਥਾ ਦਾ ਆਲਮ ਇਹ ਹੈ ਕਿ ਗੈਂਗਵਾਰ, ਫਿਰੌਤੀ ਅਤੇ ਟਾਰਗੈੱਟ ਕਿਲਿੰਗ ਰੋਜ਼ ਦੀ ਖ਼ਬਰ ਬਣ ਗਈ ਹੈ। ਵਪਾਰੀ ਅਸੁਰੱਖਿਅਤ ਹੈ, ਉਦਯੋਗਪਤੀ ਹਿਜਰਤ ਕਰ ਰਿਹਾ ਹੈ ਅਤੇ ਨਿਵੇਸ਼ਕ ਪੰਜਾਬ ਦਾ ਨਾਂ ਸੁਣ ਕੇ ਦੂਰ ਭੱਜਦਾ ਹੈ। ਖ਼ਜ਼ਾਨੇ ਦਾ ਹਾਲ ਹੋਰ ਵੀ ਬੁਰਾ ਹੈ - ਪੰਜਾਬ ਇਤਿਹਾਸ ਦੇ ਸਭ ਤੋਂ ਵੱਡੇ ਕਰਜ਼ੇ ਦੇ ਬੋਝ ਹੇਠ ਦਬਦਾ ਜਾ ਰਿਹਾ ਹੈ, ਸਰਕਾਰ ਤਨਖ਼ਾਹ ਦੇਣ ਤੱਕ ਲਈ ਉਧਾਰ ’ਤੇ ਉਧਾਰ ਲੈ ਰਹੀ ਹੈ ਅਤੇ ਹਰ ਪੰਜਾਬੀ ਦੇ ਸਿਰ ’ਤੇ ਕਰਜ਼ੇ ਦਾ ਬੋਝ ਰੋਜ਼ ਵਧ ਰਿਹਾ ਹੈ। ਜਿਨ੍ਹਾਂ ਨੇ ਖਨਣ ਤੋਂ ਖ਼ਜ਼ਾਨੇ ’ਚ 20,000 ਕਰੋੜ ਰੁਪਏ ਲਿਆਉਣ ਦਾ ਦਾਅਵਾ ਕੀਤਾ ਸੀ, ਉਨ੍ਹਾਂ ਦੇ ਰਾਜ ’ਚ ਉਲਟਾ ਪੰਜਾਬ ਦੀ ਧਰਤੀ ਲੁੱਟੀ ਜਾ ਰਹੀ ਹੈ - ਸਵੇਰੇ-ਸਵੇਰੇ ਨਹਿਰਾਂ ਅਤੇ ਦਰਿਆਵਾਂ ਦੇ ਕਿਨਾਰੇ ਟਿੱਪਰਾਂ-ਟੈਂਕਰਾਂ ਦੀਆਂ ਕਤਾਰਾਂ ਪੰਜਾਬ ਦਾ ਸੀਨਾ ਛੱਲਨੀ ਕਰ ਰਹੀਆਂ ਹਨ, ਗੈਰ-ਕਾਨੂੰਨੀ ਖਨਣ ਦਾ ਪੈਸਾ ਖ਼ਜ਼ਾਨੇ ’ਚ ਨਹੀਂ, ਦਲਾਲਾਂ ਅਤੇ ਦਲਾਲਾਂ ਦੇ ਰਾਖਿਆਂ ਦੀਆਂ ਜੇਬਾਂ ’ਚ ਜਾ ਰਿਹਾ ਹੈ।
ਅਟਲ ਬਿਹਾਰੀ ਵਾਜਪਾਈ ਜੀ ਦੇ ਸਮੇਂ ਬਣੇ ਧੁੱਸੀ ਬੰਨ੍ਹ ਨੇ 25 ਸਾਲਾਂ ਤੱਕ ਪੰਜਾਬ ਦੀ ਰੱਖਿਆ ਕੀਤੀ ਪਰ ਬੰਨ੍ਹਾਂ ਦੇ ਆਸ-ਪਾਸ ਤੱਕ ਗੈਰ-ਕਾਨੂੰਨੀ ਖੁਦਾਈ ਕਰ ਕੇ ਇਨ੍ਹਾਂ ਨੇ ਪੰਜਾਬ ਦੀ ਢਾਲ ਨੂੰ ਹੀ ਕਮਜ਼ੋਰ ਕਰ ਦਿੱਤਾ, ਨਤੀਜਾ ਇਹ ਕਿ ਪਾਣੀ ਨੇ ਰਸਤਾ ਬਦਲਿਆ ਅਤੇ 2,100 ਪਿੰਡ ਡੁੱਬ ਗਏ। ਜੋ ਕਹਿੰਦੇ ਸਨ ਕਿ ਬੱਕਰੀ ਤੱਕ ਦਾ ਮੁਆਵਜ਼ਾ ਪਹੁੰਚੇਗਾ, ਉਨ੍ਹਾਂ ਦੇ ਰਾਜ ’ਚ ਸਾਲ ਭਰ ਬਾਅਦ ਵੀ ਪੀੜਤਾਂ ਤੱਕ ਮੁਆਵਜ਼ਾ ਨਹੀਂ ਪਹੁੰਚਿਆ। ਇਸ ਸੰਕਟ ’ਚ ਪ੍ਰਧਾਨ ਮੰਤਰੀ ਮੋਦੀ ਜੀ ਦਿੱਲੀ ਤੋਂ ਆ ਕੇ ਕਿਸਾਨਾਂ ਨੂੰ ਮਿਲੇ, ਕੇਂਦਰ ਦਾ ਇਕ-ਇਕ ਮੰਤਰੀ ਪੰਜਾਬ ਦੇ ਜ਼ਿਲਿਆਂ-ਪਿੰਡਾਂ ’ਚ ਪਹੁੰਚਿਆ, ਕੇਂਦਰੀ ਆਫ਼ਤ ਟੀਮਾਂ ਨੇ ਜਾਨਾਂ ਬਚਾਈਆਂ ਪਰ ਹੰਕਾਰ ’ਚ ਡੁੱਬੀ ਮਾਨ ਸਰਕਾਰ ਦੇ ਨਾ ਮੁੱਖ ਮੰਤਰੀ ਪੀੜਤਾਂ ਦੇ ਹੰਝੂ ਪੂੰਝਣ ਗਏ, ਨਾ ਕੋਈ ਮੰਤਰੀ। ਸਿਹਤ ਕ੍ਰਾਂਤੀ ਦੇ ਨਾਅਰੇ ’ਤੇ ਸੱਤਾ ’ਚ ਆਏ ਲੋਕ ਹਸਪਤਾਲ ਜਾਂ ਇੰਸਟੀਚਿਊਟ ਬਣਾਉਣਾ ਤਾਂ ਛੱਡੋ ਕਿਸੇ ਹਸਪਤਾਲ ’ਚ ਇਕ ਨਵਾਂ ਵਾਰਡ ਬਣਾਇਆ ਹੋਵੇ, ਉਹ ਤੱਕ ਨਹੀਂ ਗਿਣਾ ਸਕਦੇ, ਮੈਡੀਕਲ ਕਾਲਜ ਅਤੇ ਹਸਪਤਾਲ ਤਾਂ ਦੂਰ ਦੀ ਗੱਲ, ਇਨ੍ਹਾਂ ਦੀ ਪੂਰੀ ਰਾਜਨੀਤੀ ਕੇਂਦਰ ਦੀਆਂ ਯੋਜਨਾਵਾਂ ’ਤੇ ਆਪਣਾ ਸਟੀਕਰ ਚਿਪਕਾ ਕੇ ਜਨਤਾ ਨੂੰ ਭਰਮਾਉਣ ਤੱਕ ਸਿਮਟ ਗਈ ਹੈ।
ਮੈਨੂੰ ਪੂਰਾ ਵਿਸ਼ਵਾਸ ਹੈ ਕਿ ਗੁਰੂਆਂ ਦੀ ਕਿਰਪਾ ਅਤੇ ਜਨਤਾ ਦੇ ਆਸ਼ੀਰਵਾਦ ਨਾਲ 2027 ’ਚ ਪੰਜਾਬ ‘ਡਬਲ ਇੰਜਣ ਸਰਕਾਰ’ ਚੁਣੇਗਾ ਅਤੇ ਤਦ ਕਰਜ਼ੇ, ਨਸ਼ੇ ਅਤੇ ਡਰ ਦੇ ਹਨੇਰੇ ’ਚੋਂ ਨਿਕਲ ਕੇ ਪੰਜਾਬ ਫਿਰ ਦੇਸ਼ ਦਾ ਨੰਬਰ ਵਨ ਸੂਬਾ ਬਣੇਗਾ - ਵਿਕਸਤ ਭਾਰਤ ਦੇ ਸੰਕਲਪ ਦਾ ਸਭ ਤੋਂ ਤੇਜ਼ ਇੰਜਣ, ਸੁਨਹਿਰੀ ਪੰਜਾਬ, ਹਰਿਆ-ਭਰਿਆ ਪੰਜਾਬ, ਖ਼ੁਸ਼ਹਾਲ ਪੰਜਾਬ। ਜੈ ਹਿੰਦ, ਜੈ ਪੰਜਾਬ।
ਤਰੁਣ ਚੁੱਘ
(ਭਾਜਪਾ ਦੇ ਰਾਸ਼ਟਰੀ ਜਨਰਲ ਸਕੱਤਰ ਅਤੇ ਰਾਜ ਸਭਾ ਮੈਂਬਰ)
‘ਕੁਝ ਸਰਕਾਰੀ ਸਕੂਲਾਂ ਦੀ ਖ਼ਸਤਾ ਹਾਲਤ’ ਟੀਚਰਾਂ ਅਤੇ ਬੁਨਿਆਦੀ ਢਾਂਚੇ ਦੀ ਘਾਟ!
NEXT STORY 
