ਸੋਨਮ ਅਤੇ ਉਸ ਦੇ ਮਿੱਤਰ ਰਾਜ ਵਲੋਂ ਪਤੀ ਰਾਜਾ ਦੇ ਕਥਿਤ ਕਤਲ-ਕਾਂਡ ਨੂੰ ਲੋਕ ਅਜੇ ਭੁੱਲੇ ਨਹੀਂ ਹਨ। ਕਿਸ ਤਰ੍ਹਾਂ ਰਾਜਾ ਨੂੰ ਧੱਕਾ ਦੇ ਕੇ ਹੇਠਾਂ ਸੁੱਟ ਦਿੱਤਾ ਗਿਆ ਸੀ ਅਤੇ ਸੋਨਮ ਲਗਾਤਾਰ ਆਪਣੇ ਪ੍ਰੇਮੀ ਦੇ ਸੰਪਰਕ ’ਚ ਸੀ। ਅਜਿਹਾ ਹੀ ਇਕ ਕਾਂਡ ਸੀਆ, ਕੇਤਨ ਅਤੇ ਉਸ ਦੇ ਪ੍ਰੇਮੀ ਮਿੱਤਰ ਚੇਤਨ ਦਾ ਹੈ। ਜਿੱਥੇ ਕੇਤਨ ਨੂੰ ਸੀਆ ਅਤੇ ਉਸ ਦੇ ਪ੍ਰੇਮੀ ਨੇ ਲੋਹਗੜ੍ਹ ਕਿਲ੍ਹੇ ਦੀ ਪਹਾੜੀ ਤੋਂ ਚਾਰ ਸੌ ਮੀਟਰ ਹੇਠਾਂ ਖੱਡ ’ਚ ਧੱਕਾ ਦੇ ਦਿੱਤਾ। ਸੋਨਮ ਅਤੇ ਸੀਆ ਦੇ ਮਾਮਲੇ ’ਚ ਲੜਕਿਆਂ ਦੇ ਪਰਿਵਾਰ ਵਾਲਿਆਂ ਨੇ ਸ਼ੁਰੂ ’ਚ ਇਨ੍ਹਾਂ ਨੂੰ ਦੋਸ਼ੀ ਨਹੀਂ ਮੰਨਿਆ ਪਰ ਬਾਅਦ ’ਚ ਜਦੋਂ ਸੱਚਾਈ ਪਤਾ ਚੱਲੀ, ਤਾਂ ਉਹ ਹੈਰਾਨ ਰਹਿ ਗਏ ਕਿਉਂਕਿ ਦੋਵੇਂ ਹੀ ਕੁੜੀਆਂ ਦਾ ਵਿਵਹਾਰ ਆਪਣੇ ਸਹੁਰੇ ਪਰਿਵਾਰ ਵਾਲਿਆਂ ਨਾਲ ਬਹੁਤ ਚੰਗਾ ਸੀ। ਆਪਣੇ-ਆਪਣੇ ਪੁੱਤਾਂ ਨੂੰ ਖੋਹਣ ਤੋਂ ਬਾਅਦ ਦੋਵਾਂ ਹੀ ਪਰਿਵਾਰਾਂ ਨੇ ਇਕ ਸਵਾਲ ਪੁੱਛਿਆ ਕਿ ਜੇਕਰ ਵਿਆਹ ਨਹੀਂ ਕਰਨਾ ਸੀ, ਤਾਂ ਨਾਂਹ ਕਰ ਦਿੰਦੀਆਂ ਪਰ ਮਾਰਿਆ ਕਿਉਂ। ਕੇਤਨ ਦੀ ਭੈਣ ਨੇ ਜਦੋਂ ਸੀਆ ਨਾਲ ਗੱਲ ਕੀਤੀ ਤਾਂ ਉਸ ਨੂੰ ਉਸ ਦੀਆਂ ਗੱਲਾਂ ’ਚ ਵਾਰ-ਵਾਰ ਫੇਰਬਦਲ ਮਿਲਿਆ। ਇੱਥੋਂ ਹੀ ਉਸ ਦਾ ਸ਼ੱਕ ਡੂੰਘਾ ਹੋ ਗਿਆ। ਬਾਅਦ ’ਚ ਇਹ ਵੀ ਪਤਾ ਲੱਗਾ ਕਿ ਸੀਆ ਅਤੇ ਉਸ ਦੇ ਪ੍ਰੇਮੀ ਚੇਤਨ ਨੇ ਗੂਗਲ ’ਤੇ ਇਹ ਵੀ ਸਰਚ ਕੀਤਾ ਸੀ ਕਿ ਮਰਡਰ ਨੂੰ ਟ੍ਰੈਕਿੰਗ ਮੂਵਮੈਂਟ ਕਿਵੇਂ ਬਣਾਈਏ।
ਸੀਆ ਅਤੇ ਸੋਨਮ ਨੇ ਇਕ ਹੀ ਤਰਕ ਦਿੱਤਾ ਕਿ ਉਹ ਆਪਣੇ ਪਰਿਵਾਰ ਵਾਲਿਆਂ ਦੀ ਇੱਜ਼ਤ ਦੀ ਖ਼ਾਤਰ ਵਿਆਹ ਲਈ ਮਨ੍ਹਾ ਨਹੀਂ ਕਰ ਸਕੀਆਂ। ਕਮਾਲ ਹੈ ਨਾ ਕਿ ਕਿਸੇ ਰਿਸ਼ਤੇ ਨੂੰ ਨਾ ਮੰਨਣਾ ਪਰਿਵਾਰ ਦੀ ਇੱਜ਼ਤ ਨੂੰ ਘਟਾਉਂਦਾ ਹੈ, ਕਿਸੇ ਦਾ ਕਤਲ ਕਰਨਾ ਨਹੀਂ।
ਇਸ ਮਾਮਲੇ ਅਤੇ ਅਜਿਹੇ ਹੀ ਮਾਮਲਿਆਂ ’ਚ ਸੋਸ਼ਲ ਮੀਡੀਆ ’ਤੇ ਜੋ ਕੁਝ ਹੁੰਦਾ ਹੈ, ਉਹੀ ਹੋਣ ਲੱਗਾ। ਕੁਝ ਲੋਕ ਕਹਿਣ ਲੱਗੇ ਕਿ ਆਉਣ ਵਾਲੇ ਦਿਨ ਅਜਿਹੇ ਹੋਣਗੇ ਕਿ ਕੋਈ ਲੜਕਾ ਵਿਆਹ ਨਹੀਂ ਕਰੇਗਾ। ਆਖ਼ਰ ਕਿਸ ’ਤੇ ਭਰੋਸਾ ਕਰੀਏ। ਇਕ ਲੜਕਾ ਜੋ ਹਨੀਮੂਨ ’ਤੇ ਆਪਣੇ ਪੂਰੇ ਪਰਿਵਾਰ ਨੂੰ ਨਾਲ ਲੈ ਗਿਆ ਸੀ, ਇਸ ਕਾਰਨ ਪਤਨੀ ਨੇ ਤਲਾਕ ਮੰਗ ਲਿਆ, ਉਸ ਬਾਰੇ ਕਿਹਾ ਗਿਆ ਕਿ ਚੰਗਾ ਕੀਤਾ ਜੋ ਲੜਕਾ ਆਪਣਿਆਂ ਨੂੰ ਨਾਲ ਲੈ ਗਿਆ ਸੀ, ਨਹੀਂ ਤਾਂ ਕੀ ਪਤਾ ਕਿ ਵਾਪਸ ਪਰਤਦਾ ਕਿ ਨਹੀਂ। ਕਿਸੇ ਨੇ ਲਿਖਿਆ ਕਿ ਉਸ ਦੇ ਸਾਹਮਣਿਓਂ ਇਕ ਬਾਰਾਤ ਜਾ ਰਹੀ ਸੀ। ਲਾੜੇ ਨੂੰ ਦੇਖ ਕੇ ਉਸ ਨੇ ਪੁੱਛਿਆ ਕਿ ਅਜੇ ਕੁਝ ਦਿਨ ਪਹਿਲਾਂ ਹੀ ਤਾਂ ਇਹ ਇੱਥੋਂ ਬਾਰਾਤ ਲੈ ਕੇ ਗਿਆ ਸੀ, ਤਾਂ ਲੋਕਾਂ ਨੇ ਕਿਹਾ ਕਿ ਨਹੀਂ, ਇਹ ਹਨੀਮੂਨ ਤੋਂ ਜ਼ਿੰਦਾ ਪਰਤਣ ਤੋਂ ਬਾਅਦ ਦੀ ਖੁਸ਼ੀ ਹੈ। ਕਈਆਂ ਨੇ ਇਸ ਘਟਨਾ ਦਾ ਉਦਾਹਰਣ ਦਿੰਦੇ ਹੋਏ ਲਿਖਿਆ ਕਿ ਅਕਸਰ ਅਖ਼ਬਾਰਾਂ ’ਚ ਪਤਨੀ ਵਲੋਂ ਪਤੀ ਨੂੰ ਮਾਰਨ ਦੀਆਂ ਖ਼ਬਰਾਂ ਹੁਣ ਆਉਂਦੀਆਂ ਰਹਿੰਦੀਆਂ ਹਨ ਪਰ ਕਿਉਂਕਿ ਇਹ ਲੜਕੇ ਆਮ ਆਰਥਿਕ ਸਥਿਤੀ ਦੇ ਹੁੰਦੇ ਹਨ, ਇਸ ਲਈ ਇਨ੍ਹਾਂ ਦੀ ਜਾਨ ਦੀ ਕੋਈ ਕੀਮਤ ਨਹੀਂ ਹੁੰਦੀ। ਇਹ ਖ਼ਬਰ ਨਹੀਂ ਬਣਦੀ।
ਸੀਆ ਦਾ ਪੱਖ ਲੈਣ ਵਾਲੇ ਕਹਿਣ ਲੱਗੇ ਕਿ ਅਜਿਹੀਆਂ ਘਟਨਾਵਾਂ ਲਈ ਕੁੜੀਆਂ ਦੇ ਮਾਤਾ-ਪਿਤਾ ਜ਼ਿੰਮੇਵਾਰ ਹੁੰਦੇ ਹਨ। ਜਿਨ੍ਹਾਂ ਨਾਲ ਕੁੜੀਆਂ ਕਦੇ ਆਪਣੇ ਮਨ ਦੀ ਗੱਲ ਨਹੀਂ ਕਹਿ ਸਕਦੀਆਂ। ਸਮਾਜਿਕ ਦਬਾਅ ’ਚ ਉਹ ਅਜਿਹੇ ਫੈਸਲੇ ਲੈਂਦੀਆਂ ਹਨ, ਜਿਨ੍ਹਾਂ ਦੇ ਕਾਰਨ ਕਈ ਵਾਰ ਉਹ ਮੁਸੀਬਤ ’ਚ ਫਸ ਜਾਂਦੀਆਂ ਹਨ। ਕਈ ਔਰਤਾਂ ਕਹਿਣ ਲੱਗੀਆਂ ਕਿ ਇਕ ਲੜਕਾ ਕਿਉਂ ਮਰਿਆ, ਪੂਰੀ ਇਸਤਰੀ ਜਾਤੀ ਅਤੇ ਨਾਰੀਵਾਦ ਨੂੰ ਕੋਸਿਆ ਜਾਣ ਲੱਗਾ। ਨਾਰੀਵਾਦ ਥੋੜ੍ਹੇ ਹੀ ਕਹਿੰਦਾ ਹੈ ਕਿ ਕਿਸੇ ਦਾ ਕਤਲ ਕਰੋ। ਇੱਥੇ ਹੀ ਨਹੀਂ, ਇੰਨੀਆਂ ਔਰਤਾਂ ਮਾਰੀਆਂ ਜਾਂਦੀਆਂ ਹਨ, ਸਤਾਈਆਂ ਜਾਂਦੀਆਂ ਹਨ, ਕੋਈ ਮੀਡੀਆ ਚੌਵੀ ਘੰਟੇ ਉਨ੍ਹਾਂ ਨੂੰ ਨਹੀਂ ਦਿਖਾਉਂਦਾ। ਔਰਤਾਂ ਤਾਂ ਸਦੀਆਂ ਤੋਂ ਇਹ ਸਭ ਭੋਗ ਰਹੀਆਂ ਹਨ, ਹੁਣ ਲੜਕਿਆਂ ਦੀ ਵਾਰੀ ਆਈ ਤਾਂ ਰੋਣ ਲੱਗੇ। ਇਨ੍ਹਾਂ ਦਿਨਾਂ ’ਚ ਗੰਭੀਰ ਵਿਚਾਰ ਵਟਾਂਦਰੇ ਦਾ ਚਸ਼ਮਾ ਸਾਡੀਆਂ ਅੱਖਾਂ ’ਤੇ ਇੰਨਾ ਗੂੜ੍ਹਾ ਹੈ ਕਿ ਕਿਸੇ ਦੇ ਕਤਲ ’ਤੇ ਵੀ ਅਸੀਂ ਕਤਲ ਨੂੰ ਸਹੀ ਠਹਿਰਾਉਣ ਦੀ ਕੋਸ਼ਿਸ਼ ਕਰਨ ਲੱਗਦੇ ਹਾਂ।
ਸੋਨਮ ਅਤੇ ਸੀਆ ਦੇ ਸਹੁਰੇ ਪਰਿਵਾਰ ਵਾਲੇ ਬਹੁਤ ਅਮੀਰ ਸਨ। ਇਹ ਕੁੜੀਆਂ ਖ਼ੁਦ ਵੀ ਪੜ੍ਹੀਆਂ-ਲਿਖੀਆਂ ਸਨ। ਸੀਆ ਦੇ ਘਰ ਵਾਲੇ ਵੀ ਕੇਤਨ ਦੇ ਘਰ ਵਾਲਿਆਂ ਦੀ ਤਰ੍ਹਾਂ ਵੱਡੇ ਕਾਰੋਬਾਰੀ ਸਨ। ਕੇਤਨ ਵਿਦੇਸ਼ ’ਚ ਪੜ੍ਹਿਆ ਸੀ ਅਤੇ ਛੇ ਸੌ ਕਰੋੜ ਦੀ ਕੰਪਨੀ ਦਾ ਮਾਲਕ ਸੀ। ਸੀਆ ਦਾ ਬੁਆਏਫ੍ਰੈਂਡ ਬੀ. ਬੀ. ਏ. ਤੱਕ ਪੜ੍ਹਿਆ ਹੈ ਅਤੇ ਸੁੱਕੇ ਮੇਵਿਆਂ ਦਾ ਕਾਰੋਬਾਰ ਕਰਦਾ ਹੈ। ਸੋਨਮ ਦੇ ਪਤੀ ਰਾਜਾ ਦਾ ਵੀ ਇਹੀ ਹਾਲ ਸੀ ਅਤੇ ਉਸ ਦਾ ਬੁਆਏਫ੍ਰੈਂਡ ਵੀ ਨਾ ਜ਼ਿਆਦਾ ਪੜ੍ਹਿਆ-ਲਿਖਿਆ ਸੀ, ਨਾ ਹੀ ਉਸ ਦੀ ਆਰਥਿਕ ਸਥਿਤੀ ਚੰਗੀ ਸੀ।
ਜਦੋਂ ਵੀ ਅਜਿਹੇ ਘਟਨਾਕ੍ਰਮ ਸਾਹਮਣੇ ਆਉਂਦੇ ਹਨ, ਤਾਂ ਕਈ ਵਾਰ ਲੱਗਦਾ ਹੈ ਕਿ ਪੁਲਸ ਅਤੇ ਜਾਂਚ ਏਜੰਸੀਆਂ ਦਾ ਕੰਮ ਵਾਕਈ ਕਿੰਨਾ ਔਖਾ ਹੈ। ਪੁਲਸ ਨੇ ਦੱਸਿਆ ਕਿ ਜਦੋਂ ਉਨ੍ਹਾਂ ਨੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ ਤਾਂ ਲੋਹਗੜ੍ਹ ਕਿਲ੍ਹੇ ਦੀਆਂ ਪੌੜੀਆਂ ’ਤੇ ਚੜ੍ਹਦਾ ਇਕ ਅਜਿਹਾ ਨੌਜਵਾਨ ਨਜ਼ਰ ਆਇਆ ਜੋ ਹੁਡੀ ਪਹਿਨੀ ਹੋਇਆ ਸੀ। ਤੁਰੰਤ ਉਸ ਜਗ੍ਹਾ ਦੇ ਤਾਪਮਾਨ ਨੂੰ ਚੈੱਕ ਕੀਤਾ, ਜੋ ਕਿ 33 ਡਿਗਰੀ ਸੀ। ਇੰਨੀ ਗਰਮੀ ’ਚ ਆਖ਼ਰ ਕੋਈ ਹੁਡੀ ਕਿਉਂ ਪਹਿਨੇਗਾ ਅਤੇ ਲਗਾਤਾਰ ਆਪਣੇ ਚਿਹਰੇ ਨੂੰ ਲੁਕਾਉਣ ਦੀ ਕੋਸ਼ਿਸ਼ ਕਰੇਗਾ।
ਚੇਤਨ ਅਤੇ ਸੀਆ ਨੂੰ ਜਦੋਂ ਫੜਿਆ ਗਿਆ, ਉਨ੍ਹਾਂ ਦੇ ਕਾਲ ਡਿਟੇਲਸ ਖੰਗਾਲੇ ਗਏ, ਤਾਂ ਪਤਾ ਚੱਲਿਆ ਕਿ ਕੁਝ ਹੀ ਦਿਨਾਂ ’ਚ ਉਨ੍ਹਾਂ ਨੇ ਇਕ-ਦੂਜੇ ਨਾਲ ਦੋ ਹਜ਼ਾਰ ਵਾਰ ਗੱਲ ਕੀਤੀ ਸੀ। ਸੀਆ ਪਿਛਲੇ ਅੱਠ ਮਹੀਨਿਆਂ ਤੋਂ ਇਸ ਲੜਕੇ ਚੇਤਨ ਦੇ ਸੰਪਰਕ ’ਚ ਸੀ। ਉਸ ਨੇ ਵਿਆਹ ਪੱਕਾ ਹੋ ਜਾਣ ਤੋਂ ਬਾਅਦ ਵੀ ਇਸ ਨਾਲ ਸੰਪਰਕ ਲਗਾਤਾਰ ਜਾਰੀ ਰੱਖਿਆ। ਕੇਤਨ ਦੇ ਪਰਿਵਾਰ ਵਾਲਿਆਂ ਦਾ ਕਹਿਣਾ ਹੈ ਕਿ ਉਸ ਨੂੰ ਉਚਾਈ ਤੋਂ ਡਰ ਲੱਗਦਾ ਸੀ ਪਰ ਸੀਆ ਦੇ ਕਹਿਣ ’ਤੇ ਉਹ ਵਾਰ-ਵਾਰ ਲੋਹਗੜ੍ਹ ਕਿਲ੍ਹੇ ਦੇ ਉੱਪਰ ਗਿਆ। ਉਸ ਨੂੰ ਪਹਿਲਾਂ ਵੀ ਧੱਕਾ ਦਿੱਤਾ ਗਿਆ ਸੀ ਪਰ ਉਹ ਬਚ ਗਿਆ।
ਕੱਲ ਸੀਆ ਦਾ ਕੀ ਹੋਵੇਗਾ, ਕਿਹਾ ਨਹੀਂ ਜਾ ਸਕਦਾ। ਕੀ ਪਤਾ ਸੋਨਮ ਵਾਂਗ ਉਸ ਨੂੰ ਵੀ ਜ਼ਮਾਨਤ ਮਿਲ ਜਾਵੇ। ਮਾਮਲਾ ਇੰਨਾ ਲੰਬਾ ਖਿੱਚੋ ਕਿ ਸਭ ਦੀਆਂ ਯਾਦਾਂ ’ਚੋਂ ਇਹ ਕੇਸ ਗਾਇਬ ਹੀ ਹੋ ਜਾਵੇ। ਜੋ ਵੀ ਹੈ, ਭਾਵੇਂ ਲੜਕਾ ਹੋਵੇ ਜਾਂ ਲੜਕੀ, ਇਸ ਤਰ੍ਹਾਂ ਕਿਸੇ ਦੀ ਜਾਨ ਜਾਣਾ ਬਹੁਤ ਦੁਖਦਾਈ ਹੈ।
—ਸ਼ਮਾ ਸ਼ਰਮਾ
ਸਿਲੈਕਟਿਵ ਗੁੱਸੇ ਨਾਲ ਕਾਂਗਰਸ ਦਾ ਇਤਿਹਾਸ ਨਹੀਂ ਮਿਟ ਸਕਦਾ
NEXT STORY 
