ਨਵੀਂ ਦਿੱਲੀ— ਬਾਜ਼ਾਰ 'ਚ ਜਲਦ ਹੀ ਦੋ ਜਾਂ ਇਸ ਤੋਂ ਵੱਧ ਦਵਾਈਆਂ ਦੇ ਮਿਸ਼ਰਣ ਨਾਲ ਬਣੀ ਦਵਾਈ ਮਿਲਣੀ ਬੰਦ ਹੋ ਸਕਦੀ ਹੈ। ਸੂਤਰਾਂ ਮੁਤਾਬਕ, ਸਰਕਾਰ ਇਸ ਤਰ੍ਹਾਂ ਦੇ ਮਿਸ਼ਰਣ ਵਾਲੀਆਂ 150 ਤੋਂ ਵੱਧ ਦਵਾਈਆਂ 'ਤੇ ਪਾਬੰਦੀ ਲਗਾ ਸਕਦੀ ਹੈ। ਮਾਹਰਾਂ ਦੀ ਇਕ ਕਮੇਟੀ ਨੇ ਸਰਕਾਰ ਨੂੰ ਇਨ੍ਹਾਂ 'ਤੇ ਪਾਬੰਦੀ ਲਾਉਣ ਦੀ ਸਿਫਾਰਸ਼ ਕੀਤੀ ਹੈ ਕਿਉਂਕਿ ਇਲਾਜ ਸੰਬੰਧੀ ਇਨ੍ਹਾਂ ਦਾ ਅਸਰ ਬਹੁਤ ਘੱਟ ਹੈ।
ਸੂਤਰਾਂ ਮੁਤਾਬਕ, ਲਗਭਗ 500 ਫਿਕਸਡ ਡੋਜ਼ ਮਿਸ਼ਰਣ (ਐੱਫ. ਡੀ. ਸੀ. ) ਦਵਾਈਆਂ ਦੇ ਪ੍ਰਭਾਵ ਦੀ ਜਾਂਚ ਕਰ ਰਹੀ ਚੰਦਰਕਾਂਤ ਕੋਕਾਟ ਦੀ ਅਗਵਾਈ ਵਾਲੀ ਮਾਹਰ ਕਮੇਟੀ ਨੇ ਬੀਤੀ 2 ਅਪ੍ਰੈਲ ਨੂੰ ਡਰੱਗਜ਼ ਤਕਨੀਕੀ ਸਲਾਹਕਾਰ ਬੋਰਡ (ਡੀ. ਟੀ. ਏ. ਬੀ.) ਨੂੰ ਆਪਣੀ ਰਿਪੋਰਟ ਸੌਂਪ ਦਿੱਤੀ ਸੀ। ਰਿਪੋਰਟ 'ਚ ਇਹ ਗੱਲ ਕਹੀ ਗਈ ਹੈ ਕਿ ਕਾਫੀ ਗਿਣਤੀ 'ਚ ਐੱਫ. ਡੀ. ਸੀ. ਤਰਕਹੀਣ ਹਨ, ਯਾਨੀ ਇਨ੍ਹਾਂ ਦਾ ਫਾਇਦਾ ਨਹੀਂ ਹੈ।
ਦਵਾਈ ਨਿਰਮਾਤਾਵਾਂ ਨੂੰ ਲੱਗੇਗਾ ਝਟਕਾ-
ਸੂਤਰਾਂ ਮੁਤਾਬਕ, ਦਵਾਈਆਂ 'ਤੇ ਸਰਕਾਰ ਦੀ ਉੱਚ ਸਲਾਹਕਾਰ ਸੰਸਥਾ ਡੀ. ਟੀ. ਏ. ਬੀ. ਨੇ ਕਮੇਟੀ ਦੀ ਰਿਪੋਰਟ ਦੀ ਸਮੀਖਿਆ ਕਰਨ ਲਈ ਇਕ 'ਸਬ ਕਮੇਟੀ' ਦਾ ਗਠਨ ਕੀਤਾ ਹੈ, ਤਾਂ ਜੋ ਸਰਕਾਰ ਵੱਲੋਂ ਅੰਤਿਮ ਫੈਸਲਾ ਲੈਣ ਤੋਂ ਪਹਿਲਾਂ ਇਨ੍ਹਾਂ ਦੀ ਚੰਗੀ ਤਰ੍ਹਾਂ ਜਾਂਚ ਕੀਤੀ ਜਾਵੇ। ਜੇਕਰ ਸਰਕਾਰ ਵੱਲੋਂ ਇਹ ਰਿਪੋਰਟ ਸਵੀਕਾਰ ਕੀਤੀ ਜਾਂਦੀ ਹੈ, ਤਾਂ ਘਰੇਲੂ ਦਵਾਈ ਨਿਰਮਾਤਾਵਾਂ ਲਈ ਇਹ ਇਕ ਹੋਰ ਵੱਡਾ ਝਟਕਾ ਹੋਵੇਗਾ। ਇਸ ਤੋਂ ਪਹਿਲਾਂ 2016 'ਚ ਸਰਕਾਰ ਨੇ ਅਜਿਹੇ ਮਿਸ਼ਰਣ ਵਾਲੀਆਂ 344 ਦਵਾਈਆਂ 'ਤੇ ਪਾਬੰਦੀ ਲਗਾਈ ਸੀ। ਜ਼ਿਕਰਯੋਗ ਹੈ ਕਿ ਭਾਰਤ 'ਚ ਕਈ ਐੱਫ. ਡੀ. ਸੀ. ਬਿਨਾਂ ਕਲੀਨੀਕਲ ਟ੍ਰਾਇਲ ਦੇ ਹੀ ਬਾਜ਼ਾਰ 'ਚ ਵਿਕਦੀਆਂ ਹਨ। ਇਨ੍ਹਾਂ 'ਚ ਕੁਝ ਨਾਲ ਸਿਹਤ ਨੂੰ ਵੀ ਨੁਕਸਾਨ ਹੋ ਸਕਦਾ ਹੈ। ਫਿਕਸਡ ਡੋਜ਼ ਮਿਸ਼ਰਣ (ਐੱਫ. ਡੀ. ਸੀ.) ਯਾਨੀ ਦਵਾਈ ਕਿਹੜੇ-ਕਿਹੜੇ ਸਾਲਟ ਦਾ ਮਿਸ਼ਰਣ ਹੈ। ਜਿਵੇਂ ਪੈਰਾਸਿਟਾਮੋਲ ਦੇ ਸਾਲਟ ਨਾਲ ਕਾਫੀ ਐੱਫ. ਡੀ. ਸੀ. ਦਵਾਈਆਂ ਬਣਾਈਆਂ ਜਾਂਦੀਆਂ ਹਨ। ਇਨ੍ਹਾਂ ਦਾ ਨੁਕਸਾਨ ਇਹ ਹੈ ਕਿ ਜੇਕਰ ਇਨ੍ਹਾਂ ਨਾਲ ਅਲਰਜ਼ੀ ਹੋਈ ਤਾਂ ਇਹ ਜਾਣਨਾ ਮੁਸ਼ਕਲ ਹੋਵੇਗਾ ਕਿ ਇਹ ਕਿਸ ਸਾਲਟ ਨਾਲ ਹੋਈ। ਉਸ ਹਾਲਤ 'ਚ ਤੁਰੰਤ ਇਲਾਜ ਮਿਲਣ 'ਚ ਦੇਰੀ ਹੋ ਸਕਦੀ ਹੈ।
ਲੋਨ ਡਿਫਾਲਟ ਦੇ ਬੱਦਲਾਂ 'ਚ ਘਿਰੇ ਜੈੱਟ ਏਅਰਵੇਜ਼ ਦੇ ਬੋਇੰਗ 777 ਜਹਾਜ਼
NEXT STORY 
