ਚੰਡੀਗੜ੍ਹ— ਡੀਜ਼ਲ ਦੀਆਂ ਕੀਮਤਾਂ ਵਧਣ ਨਾਲ ਫਲ, ਸਬਜ਼ੀਆਂ ਅਤੇ ਹੋਰ ਖਪਤਕਾਰ ਵਸਤੂਆਂ ਦਾ ਟਰਾਂਸਪੋਰਟੇਸ਼ਨ ਮਹਿੰਗਾ ਹੋ ਗਿਆ ਹੈ, ਜਿਸ ਦੀ ਸਭ ਤੋਂ ਵੱਡੀ ਮਾਰ ਮਹਿਲਾਵਾਂ ਦੀ ਰਸੋਈ 'ਤੇ ਪੈ ਰਹੀ ਹੈ। ਘਰੇਲੂ ਮਹਿਲਾਵਾਂ ਦੀ ਰਸੋਈ ਦਾ ਬਜਟ ਉਨ੍ਹਾਂ 'ਤੇ ਬੋਝ ਬਣਦਾ ਜਾ ਰਿਹਾ ਹੈ। ਪਿਛਲੇ ਤਿੰਨ ਮਹੀਨਿਆਂ 'ਚ ਮਾਲ-ਭਾੜਾ ਤਕਰੀਬਨ 25 ਫੀਸਦੀ ਵਧ ਚੁੱਕਾ ਹੈ ਅਤੇ ਇਸ ਨਾਲ ਫਲ, ਸਬਜ਼ੀਆਂ ਮਹਿੰਗੇ ਹੋ ਗਏ ਹਨ। ਪਿਛਲੇ ਤਿੰਨ ਮਹੀਨਿਆਂ 'ਚ ਡੀਜ਼ਲ ਦੀ ਕੀਮਤ 5-6 ਰੁਪਏ ਪ੍ਰਤੀ ਲਿਟਰ ਵਧੀ ਹੈ। ਦਿੱਲੀ 'ਚ 1 ਜੁਲਾਈ ਨੂੰ ਡੀਜ਼ਲ ਦੀ ਕੀਮਤ 67.38 ਰੁਪਏ ਪ੍ਰਤੀ ਲਿਟਰ ਸੀ, ਜੋ ਕਿ ਹੁਣ 73.78 ਰੁਪਏ ਹੋ ਗਈ ਹੈ। ਹਾਲਾਂਕਿ ਚੰਡੀਗੜ੍ਹ 'ਚ ਡੀਜ਼ਲ (71.82 ਰੁਪਏ) ਦਿੱਲੀ ਤੋਂ ਥੋੜ੍ਹਾ ਸਸਤਾ ਹੈ ਪਰ ਲੁਧਿਆਣਾ 'ਚ ਇਹ 74 ਰੁਪਏ ਪ੍ਰਤੀ ਲਿਟਰ ਹੈ। ਉੱਤਰੀ ਰਾਜਾਂ 'ਚ ਕੰਮ ਕਰਨ ਵਾਲੇ ਟਰਾਂਸਪੋਰਟਰਾਂ ਮੁਤਾਬਕ, ਮੁੰਬਈ 'ਚ ਤੇਲ ਸਭ ਤੋਂ ਮਹਿੰਗਾ ਹੈ, ਇੱਥੇ ਡੀਜ਼ਲ ਦੀ ਕੀਮਤ 78.42 ਰੁਪਏ ਪ੍ਰਤੀ ਲਿਟਰ ਹੈ। ਉੱਤਰੀ ਖੇਤਰ 'ਚ ਕੱਚੇ ਮਾਲ ਅਤੇ ਖਪਤਕਾਰ ਪਦਾਰਥਾਂ ਦੀ ਸਪਲਾਈ ਇੱਥੋਂ ਹੀ ਹੁੰਦੀ ਹੈ।
ਹਿਮਾਚਲ ਦੇ ਸੇਬਾਂ ਦੀ ਸਪਲਾਈ ਲਈ ਟਰੱਕਾਂ ਦੀ ਮੰਗ ਬਹੁਤ ਜ਼ਿਆਦਾ ਹੋਣ ਕਾਰਨ ਚੰਡੀਗੜ੍ਹ 'ਚ ਵੀ ਟਰਾਂਸਪੋਰਟੇਸ਼ਨ ਮਹਿੰਗਾ ਹੋ ਚੁੱਕਾ ਹੈ। ਜੁਲਾਈ 'ਚ ਚੰਡੀਗੜ੍ਹ-ਦਿੱਲੀ ਵਿਚਕਾਰ ਚੱਲਣ ਵਾਲੇ ਟਰੱਕਾਂ (15 ਟਨ) ਦਾ ਮਾਲ-ਭਾੜਾ 9,000 ਰੁਪਏ ਸੀ, ਜੋ ਕਿ ਹੁਣ ਤਕਰੀਬਨ 12,000 ਰੁਪਏ ਹੋ ਗਿਆ ਹੈ। ਇਸ ਵਜ੍ਹਾ ਨਾਲ ਫਲ, ਸਬਜ਼ੀਆਂ ਦੀਆਂ ਕੀਮਤਾਂ 'ਚ 20-30 ਫੀਸਦੀ ਵਾਧਾ ਹੋ ਚੁੱਕਾ ਹੈ, ਜਦੋਂ ਕਿ ਖੇਤਾਂ ਤੋਂ ਸਪਲਾਈ 'ਚ ਕੋਈ ਕਮੀ ਨਹੀਂ ਹੈ। ਸਬਜ਼ੀ ਵਿਕਰੇਤਾਵਾਂ ਦਾ ਕਹਿਣਾ ਹੈ ਕਿ ਆਮ ਤੌਰ 'ਤੇ ਸਤੰਬਰ ਦੇ ਪਹਿਲੇ ਹਫਤੇ 'ਚ ਫਲ ਅਤੇ ਸਬਜ਼ੀਆਂ ਦੀ ਕੀਮਤ ਘਟ ਹੁੰਦੀ ਹੈ ਪਰ ਟਰਾਂਸਪੋਰਟੇਸ਼ਨ ਖਰਚ ਵਧਣ ਕਰਕੇ ਇਹ ਮਹਿੰਗੇ ਹੋ ਗਏ ਹਨ। ਉੱਥੇ ਹੀ ਟਰੇਡਰਾਂ ਦਾ ਕਹਿਣਾ ਹੈ ਕਿ ਮਾਲ-ਭਾੜੇ ਦੇ ਰੇਟ ਵਧਣ ਨਾਲ ਵਾਈਟ ਗੁੱਡਜ਼ ਦੀਆਂ ਕੀਮਤਾਂ 'ਚ ਵੀ ਜਲਦ ਹੀ ਵਾਧਾ ਦੇਖਣ ਨੂੰ ਮਿਲ ਸਕਦਾ ਹੈ।
ਮਿਊਚੁਅਲ ਫੰਡ 'ਚ ਨਿਵੇਸ਼ ਹੋਵੇਗਾ ਸਸਤਾ
NEXT STORY