ਵਾਸ਼ਿੰਗਟਨ, (ਇੰਟ.)- ਅਮਰੀਕਾ ਵਿਚ ਉੱਚ ਸਿੱਖਿਆ ਦਾ ਸੁਪਨਾ ਦੇਖਣ ਵਾਲੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਨਿਯਮ ਪਹਿਲਾਂ ਨਾਲੋਂ ਕਿਤੇ ਵੱਧ ਸਖ਼ਤ ਹੋ ਗਏ ਹਨ। ਟਰੰਪ ਪ੍ਰਸ਼ਾਸਨ ਨੇ ਦਹਾਕਿਆਂ ਤੋਂ ਲਾਗੂ ‘ਡਿਊਰੇਸ਼ਨ ਆਫ਼ ਸਟੇਟਸ (ਡੀ/ਐੱਸ)’ ਵਿਵਸਥਾ ਨੂੰ ਖ਼ਤਮ ਕਰ ਦਿੱਤਾ ਹੈ। ਹੁਣ ਐੱਫ-1 ਸਟੂਡੈਂਟ ਵੀਜ਼ਾ ’ਤੇ ਆਉਣ ਵਾਲੇ ਵਿਦਿਆਰਥੀਆਂ ਨੂੰ ਅਮਰੀਕਾ ਵਿਚ ਰਹਿਣ ਦੀ ਇਜਾਜ਼ਤ ਸਿਰਫ ਉਨ੍ਹਾਂ ਦੇ ਵਿਦਿਅਕ ਪ੍ਰੋਗਰਾਮ ਦੀ ਮਿਆਦ ਜਾਂ ਵੱਧ ਤੋਂ ਵੱਧ ਚਾਰ ਸਾਲਾਂ ਤੱਕ ਹੀ ਮਿਲੇਗੀ। ਇਸ ਤੋਂ ਬਾਅਦ ਅਮਰੀਕਾ ’ਚ ਬਣੇ ਰਹਿਣ ਲਈ ਵੱਖਰੇ ਤੌਰ ’ਤੇ ਇਮੀਗ੍ਰੇਸ਼ਨ ਮਨਜ਼ੂਰੀ ਲੈਣੀ ਹੋਵੇਗੀ।
ਵੀਜ਼ਾ ਨਹੀਂ, ਰਹਿਣ ਦੇ ਨਿਯਮ ਬਦਲੇ
ਇਮੀਗ੍ਰੇਸ਼ਨ ਮਾਹਿਰਾਂ ਦੇ ਅਨੁਸਾਰ, ਸਭ ਤੋਂ ਵੱਡਾ ਬਦਲਾਅ ਵੀਜ਼ੇ ਦੀ ਮਿਆਦ ਵਿਚ ਨਹੀਂ ਬਲਕਿ ਅਮਰੀਕਾ ’ਚ ਰਹਿਣ ਦੀ ਇਜਾਜ਼ਤ (ਇਮੀਗ੍ਰੇਸ਼ਨ ਸਟੇਟਸ) ਵਿਚ ਕੀਤਾ ਗਿਆ ਹੈ। ਪਹਿਲਾਂ ਵਿਦਿਆਰਥੀ ਪੜ੍ਹਾਈ ਜਾਰੀ ਰੱਖਣ ਤੱਕ ਬਿਨਾਂ ਕਿਸੇ ਵਾਧੂ ਅਰਜ਼ੀ ਦੇ ਅਮਰੀਕਾ ਵਿਚ ਰਹਿ ਸਕਦੇ ਸਨ। ਹੁਣ ਐਂਟਰੀ ਦੇ ਸਮੇਂ ਹੀ ਰਹਿਣ ਦੀ ਇਕ ਨਿਸ਼ਚਿਤ ਮਿਆਦ ਤੈਅ ਕਰ ਦਿੱਤੀ ਜਾਵੇਗੀ, ਜੋ ਆਈ-94 ਰਿਕਾਰਡ ’ਚ ਦਰਜ ਹੋਵੇਗੀ।
ਹਰ ਵਿਦਿਆਰਥੀ ਨੂੰ ਨਹੀਂ ਮਿਲਣਗੇ ਚਾਰ ਸਾਲ
ਚਾਰ ਸਾਲ ਦੀ ਹੱਦ ਨੂੰ ਲੈ ਕੇ ਵੀ ਭੁਲੇਖੇ ਦੀ ਸਥਿਤੀ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਚਾਰ ਸਾਲ ਵੱਧ ਤੋਂ ਵੱਧ ਹੱਦ ਹੈ, ਕੋਈ ਨਿਸ਼ਚਿਤ ਮਿਆਦ ਨਹੀਂ। ਜੇ ਕੋਈ ਵਿਦਿਆਰਥੀ ਦੋ ਸਾਲਾ ਮਾਸਟਰਜ਼ ਕੋਰਸ ਵਿਚ ਦਾਖਲਾ ਲੈਂਦਾ ਹੈ ਤਾਂ ਉਸ ਨੂੰ ਸਿਰਫ ਦੋ ਸਾਲ ਅਤੇ ਪੜ੍ਹਾਈ ਪੂਰੀ ਹੋਣ ਤੋਂ ਬਾਅਦ 30 ਦਿਨਾਂ ਦੀ ਵਾਧੂ ਮਿਆਦ ਹੀ ਮਿਲੇਗੀ।
ਨਵੀਂ ਡਿਗਰੀ ਸ਼ੁਰੂ ਕਰਨ ’ਤੇ ਵਧੇਗਾ ਕਾਗਜ਼ੀ ਕੰਮ
ਪਹਿਲਾਂ ਗ੍ਰੈਜੂਏਸ਼ਨ ਤੋਂ ਬਾਅਦ ਮਾਸਟਰਜ਼ ਜਾਂ ਕਿਸੇ ਹੋਰ ਕੋਰਸ ਵਿਚ ਦਾਖਲਾ ਲੈਣ ’ਤੇ ਯੂਨੀਵਰਸਿਟੀ ਸਿਰਫ ਐੱਸ. ਈ. ਵੀ. ਆਈ. ਐੱਸ. ਰਿਕਾਰਡ ਅਪਡੇਟ ਕਰ ਦਿੰਦੀ ਸੀ। ਹੁਣ ਜੇ ਵਿਦਿਆਰਥੀ ਨੂੰ ਵਧੇਰੇ ਸਮਾਂ ਚਾਹੀਦਾ ਹੈ ਤਾਂ ਉਸ ਨੂੰ ਯੂ. ਐੱਸ. ਸੀ. ਆਈ. ਐੱਸ. ਵਿਚ ਫਾਰਮ ਆਈ-539 ਦਾਖਲ ਕਰ ਕੇ ਸਟੇਟਸ ਵਧਾਉਣ ਦੀ ਇਜਾਜ਼ਤ ਲੈਣੀ ਹੋਵੇਗੀ। ਭਾਵ ਉੱਚ ਸਿੱਖਿਆ ਜਾਰੀ ਰੱਖਣ ਲਈ ਹੁਣ ਵਾਧੂ ਅਰਜ਼ੀ, ਦਸਤਾਵੇਜ਼ ਅਤੇ ਫੀਸ ਦੇਣੀ ਪਵੇਗੀ।
ਪੜ੍ਹੋ ਇਹ ਅਹਿਮ ਖ਼ਬਰ- 'ਭਾਰਤੀ ਨਾਗਰਿਕ ਤੁਰੰਤ ਛੱਡ ਦੇਣ ਈਰਾਨ' ! ਦੂਤਾਵਾਸ ਨੇ ਜਾਰੀ ਕੀਤੀ ਨਵੀਂ ਐਡਵਾਇਜ਼ਰੀ
ਪੀ. ਐੱਚ. ਡੀ. ਵਿਦਿਆਰਥੀਆਂ ’ਤੇ ਪਵੇਗਾ ਸਭ ਤੋਂ ਵੱਧ ਅਸਰ
ਨਵੀਂ ਵਿਵਸਥਾ ਦਾ ਸਭ ਤੋਂ ਵੱਡਾ ਅਸਰ ਪੀ.ਐੱਚ.ਡੀ. ਕਰਨ ਵਾਲੇ ਵਿਦਿਆਰਥੀਆਂ ’ਤੇ ਪਵੇਗਾ। ਅਮਰੀਕਾ ਵਿਚ ਜ਼ਿਆਦਾਤਰ ਪੀ.ਐੱਚ.ਡੀ. ਪ੍ਰੋਗਰਾਮ ਪੰਜ ਤੋਂ ਸੱਤ ਸਾਲ ਤੱਕ ਚੱਲਦੇ ਹਨ, ਜਦਕਿ ਨਵੀਂ ਵਿਵਸਥਾ ਵਿਚ ਵੱਧ ਤੋਂ ਵੱਧ ਚਾਰ ਸਾਲ ਤੱਕ ਹੀ ਐਂਟਰੀ ਮਿਲੇਗੀ। ਅਜਿਹੇ ਵਿਚ ਹਰ ਪੀ.ਐੱਚ.ਡੀ. ਵਿਦਿਆਰਥੀ ਨੂੰ ਸਮਾਂ ਰਹਿੰਦੇ ਸਟੇਟਸ ਵਧਾਉਣ ਲਈ ਅਰਜ਼ੀ ਦੇਣੀ ਹੋਵੇਗੀ। ਇਸ ਦੇ ਨਾਲ ਹੀ ਬਾਇਓਮੈਟ੍ਰਿਕ ਪ੍ਰਕਿਰਿਆ, ਵਾਧੂ ਦਸਤਾਵੇਜ਼ ਅਤੇ ਸਰਕਾਰੀ ਫੀਸ ਵੀ ਦੇਣੀ ਪਵੇਗੀ।
ਓ.ਪੀ.ਟੀ. ਲਈ ਵੀ ਵਧੇਗਾ ਅਰਜ਼ੀ ਦਾ ਬੋਝ
ਪੜ੍ਹਾਈ ਪੂਰੀ ਹੋਣ ਤੋਂ ਬਾਅਦ ਆਪਸ਼ਨਲ ਪ੍ਰੈਕਟੀਕਲ ਟ੍ਰੇਨਿੰਗ (ਓ.ਪੀ.ਟੀ.) ਦੇ ਤਹਿਤ ਨੌਕਰੀ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਵੀ ਹੁਣ ਵਾਧੂ ਪ੍ਰਕਿਰਿਆ ’ਚੋਂ ਲੰਘਣਾ ਹੋਵੇਗਾ। ਪਹਿਲਾਂ ਸਿਰਫ ਕੰਮ ਦੀ ਇਜਾਜ਼ਤ ਲਈ ਅਰਜ਼ੀ ਦੇਣੀ ਹੀ ਕਾਫ਼ੀ ਸੀ ਪਰ ਹੁਣ ਕਈ ਵਿਦਿਆਰਥੀਆਂ ਨੂੰ ਰੁਜ਼ਗਾਰ ਦੀ ਇਜਾਜ਼ਤ ਦੇ ਨਾਲ-ਨਾਲ ਸਟੇਟਸ ਵਧਾਉਣ ਲਈ ਵੱਖਰੀ ਅਰਜ਼ੀ ਵੀ ਦੇਣੀ ਪਵੇਗੀ।
60 ਦਿਨਾਂ ਦੀ ਥਾਂ ਹੁਣ ਸਿਰਫ਼ 30 ਦਿਨਾਂ ਦਾ ਸਮਾਂ
ਪੜ੍ਹਾਈ ਪੂਰੀ ਹੋਣ ਤੋਂ ਬਾਅਦ ਪਹਿਲਾਂ ਵਿਦਿਆਰਥੀਆਂ ਨੂੰ ਅਮਰੀਕਾ ਛੱਡਣ, ਨਵਾਂ ਕੋਰਸ ਸ਼ੁਰੂ ਕਰਨ ਜਾਂ ਇਮੀਗ੍ਰੇਸ਼ਨ ਸਟੇਟਸ ਬਦਲਣ ਲਈ 60 ਦਿਨ ਮਿਲਦੇ ਸਨ। ਨਵੇਂ ਨਿਯਮਾਂ ਵਿਚ ਇਹ ਮਿਆਦ ਘਟਾ ਕੇ 30 ਦਿਨ ਕਰ ਦਿੱਤੀ ਗਈ ਹੈ। ਇਸ ਨਾਲ ਯੂਨੀਵਰਸਿਟੀ ਬਦਲਣ, ਨਵਾਂ ਦਾਖਲਾ ਲੈਣ ਜਾਂ ਯਾਤਰਾ ਦੀ ਤਿਆਰੀ ਲਈ ਵਿਦਿਆਰਥੀਆਂ ਕੋਲ ਕਾਫ਼ੀ ਘੱਟ ਸਮਾਂ ਰਹੇਗਾ।
ਵਿਦੇਸ਼ ਯਾਤਰਾ ’ਤੇ ਫਿਰ ਲੈਣਾ ਪੈ ਸਕਦਾ ਹੈ ਵੀਜ਼ਾ
ਜੇ ਕਿਸੇ ਵਿਦਿਆਰਥੀ ਦਾ ਵੀਜ਼ਾ ਖ਼ਤਮ ਹੋ ਚੁੱਕਾ ਹੈ ਅਤੇ ਉਹ ਅਮਰੀਕਾ ਤੋਂ ਬਾਹਰ ਜਾਂਦਾ ਹੈ, ਤਾਂ ਵਾਪਸ ਪਰਤਣ ਲਈ ਉਸ ਨੂੰ ਨਵਾਂ ਵੀਜ਼ਾ ਲੈਣਾ ਹੋਵੇਗਾ। ਹਾਲਾਂਕਿ, ਜੇ ਸਟੇਟਸ ਵਧਾਉਣ ਦੀ ਅਰਜ਼ੀ ਮਨਜ਼ੂਰ ਹੋ ਚੁੱਕੀ ਹੈ ਅਤੇ ਵਿਦਿਆਰਥੀ ਅਮਰੀਕਾ ਦੇ ਅੰਦਰ ਹੀ ਰਹਿੰਦਾ ਹੈ, ਤਾਂ ਨਵਾਂ ਵੀਜ਼ਾ ਜ਼ਰੂਰੀ ਨਹੀਂ ਹੋਵੇਗਾ।
ਅੰਡਰਗ੍ਰੈਜੂਏਟ ਵਿਦਿਆਰਥੀਆਂ ’ਤੇ ਘੱਟ, ਲੰਬੇ ਕੋਰਸਾਂ ਵਾਲਿਆਂ ’ਤੇ ਜ਼ਿਆਦਾ ਅਸਰ
ਮਾਹਿਰਾਂ ਦਾ ਮੰਨਣਾ ਹੈ ਕਿ ਚਾਰ ਸਾਲ ਜਾਂ ਉਸ ਤੋਂ ਘੱਟ ਮਿਆਦ ਵਾਲੇ ਅੰਡਰਗ੍ਰੈਜੂਏਟ ਅਤੇ ਜ਼ਿਆਦਾਤਰ ਮਾਸਟਰਜ਼ ਪ੍ਰੋਗਰਾਮਾਂ ’ਤੇ ਤੁਰੰਤ ਪ੍ਰਭਾਵ ਸੀਮਤ ਰਹੇਗਾ ਪਰ ਪੀ.ਐੱਚ.ਡੀ., ਦੂਜੇ ਡਿਗਰੀ ਪ੍ਰੋਗਰਾਮਾਂ ਜਾਂ ਓ.ਪੀ.ਟੀ. ਰਾਹੀਂ ਲੰਬੇ ਸਮੇਂ ਤੱਕ ਅਮਰੀਕਾ ਵਿਚ ਰਹਿਣ ਦੀ ਯੋਜਨਾ ਬਣਾਉਣ ਵਾਲੇ ਲੱਗਭਗ ਸਾਰੇ ਵਿਦਿਆਰਥੀਆਂ ਨੂੰ ਹੁਣ ਪਹਿਲਾਂ ਦੇ ਮੁਕਾਬਲੇ ਵਧੇਰੇ ਕਾਗਜ਼ੀ ਕਾਰਵਾਈ, ਵਾਧੂ ਖਰਚੇ ਅਤੇ ਸਖ਼ਤ ਸਮਾਂ-ਹੱਦ ਦਾ ਸਾਹਮਣਾ ਕਰਨਾ ਪਵੇਗਾ।
ਨਵੇਂ ਨਿਯਮਾਂ ਦੀਆਂ ਖ਼ਾਸ ਗੱਲਾਂ
ਪ੍ਰੋਗਰਾਮ ਦੀ ਮਿਆਦ ਜਾਂ ਵੱਧ ਤੋਂ ਵੱਧ 4 ਸਾਲਾਂ ਤੱਕ ਹੀ ਐਂਟਰੀ
ਕੋਰਸ ਵਧਣ ’ਤੇ ਯੂ.ਐੱਸ. ਸੀ. ਆਈ. ਐੱਸ. ਤੋਂ ਵੱਖਰੀ ਮਨਜ਼ੂਰੀ ਜ਼ਰੂਰੀ
ਪੀ. ਐੱਚ. ਡੀ. ਵਿਦਿਆਰਥੀਆਂ ਨੂੰ ਵਿਚਕਾਰ ਹੀ ਸਟੇਟਸ ਐਕਸਟੈਂਸ਼ਨ ਕਰਵਾਉਣੀ ਹੋਵੇਗੀ
ਓ.ਪੀ.ਟੀ. ਲਈ ਵਾਧੂ ਇਮੀਗ੍ਰੇਸ਼ਨ ਅਰਜ਼ੀ
ਪੋਸਟ-ਸਟੱਡੀ ਗ੍ਰੇਸ ਪੀਰੀਅਡ 60 ਦਿਨਾਂ ਤੋਂ ਘਟ ਕੇ 30 ਦਿਨ
ਵਿਦੇਸ਼ ਯਾਤਰਾ ਤੋਂ ਬਾਅਦ ਵੀਜ਼ਾ ਖ਼ਤਮ ਹੋਣ ’ਤੇ ਨਵਾਂ ਵੀਜ਼ਾ ਲਾਜ਼ਮੀ
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
US ਰਿਸ਼ਵਤਖੋਰੀ ਮਾਮਲੇ ’ਚ ਗੌਤਮ ਅਡਾਣੀ ਨੂੰ ਰਾਹਤ, ਜਾਣੋ ਕਰੀਬ 600 ਪੰਨਿਆਂ ਦੀਆਂ ਕਾਨੂੰਨੀ ਦਲੀਲਾਂ ਬਾਰੇ
NEXT STORY 
