ਨੈਸ਼ਨਲ ਡੈਸਕ : ਕਰਨਾਟਕ ਵਿੱਚ ਕਾਂਗਰਸ ਦੀ ਸਰਕਾਰ ਅੰਦਰ ਮੁੱਖ ਮੰਤਰੀ ਦੇ ਅਹੁਦੇ ਨੂੰ ਲੈ ਕੇ ਤਣਾਅ ਸਿਖਰਾਂ 'ਤੇ ਪਹੁੰਚ ਗਿਆ ਹੈ। ਡਿਪਟੀ ਸੀ.ਐਮ. ਅਤੇ ਕਾਂਗਰਸ ਦੇ ਸੀਨੀਅਰ ਲੀਡਰ ਡੀ.ਕੇ. ਸ਼ਿਵਕੁਮਾਰ (DK Shivakumar) ਕਥਿਤ ਤੌਰ 'ਤੇ ਨਾਰਾਜ਼ ਹਨ ਤੇ ਪਾਰਟੀ ਉਨ੍ਹਾਂ ਨੂੰ ਮਨਾਉਣ ਦੀ ਹਰ ਸੰਭਵ ਕੋਸ਼ਿਸ਼ ਕਰ ਰਹੀ ਹੈ। ਇਸ ਸਿਆਸੀ ਰੱਸਾਕਸ਼ੀ ਦੇ ਚੱਲਦਿਆਂ ਸ਼ਿਵਕੁਮਾਰ ਨੇ ਹਾਈ ਕਮਾਂਡ 'ਤੇ ਦਬਾਅ ਬਣਾਉਣ ਲਈ ਵਿਧਾਇਕਾਂ ਦਾ ਇੱਕ ਹੋਰ ਨਵਾਂ ਜਥਾ ਦਿੱਲੀ ਭੇਜਿਆ ਹੈ।
ਡੀ.ਕੇ. ਸ਼ਿਵਕੁਮਾਰ ਦਾ ਅੜੀਅਲ ਰੁਖ
ਸ਼ਿਵਕੁਮਾਰ ਚੰਗੀ ਤਰ੍ਹਾਂ ਜਾਣਦੇ ਹਨ ਕਿ ਜ਼ਿਆਦਾਤਰ ਵਿਧਾਇਕਾਂ ਦੀ ਗਿਣਤੀ ਵਰਤਮਾਨ ਮੁੱਖ ਮੰਤਰੀ ਸਿੱਧਰਮਈਆ ਦੇ ਪੱਖ ਵਿੱਚ ਹੈ। ਇਸ ਲਈ ਉਹ ਕਾਂਗਰਸ ਹਾਈ ਕਮਾਂਡ ਤੋਂ ਉਨ੍ਹਾਂ ਨਾਲ ਕੀਤਾ ਗਿਆ ਵਾਅਦਾ ਪੂਰਾ ਕਰਨ ਦੀ ਮੰਗ ਕਰ ਰਹੇ ਹਨ।
ਰਿਪੋਰਟਾਂ ਮੁਤਾਬਕ ਉਹ ਸੂਬਾਈ ਕਾਂਗਰਸ ਪ੍ਰਧਾਨ ਅਤੇ ਰਾਸ਼ਟਰੀ ਪ੍ਰਧਾਨ ਮੱਲਿਕਾਰਜੁਨ ਖੜਗੇ ਨਾਲ ਮੁਲਾਕਾਤ ਕਰਨ ਤੋਂ ਵੀ ਗੁਰੇਜ਼ ਕਰ ਰਹੇ ਹਨ। ਸ਼ਿਵਕੁਮਾਰ ਦੇ ਸਮਰਥਕ ਵਿਧਾਇਕ ਪਿਛਲੇ ਚਾਰ ਦਿਨਾਂ ਤੋਂ ਵੱਖ-ਵੱਖ ਗਰੁੱਪ ਬਣਾ ਕੇ ਦਿੱਲੀ ਭੇਜੇ ਜਾ ਰਹੇ ਹਨ। ਐਤਵਾਰ ਦੁਪਹਿਰ ਨੂੰ ਜਦੋਂ ਖੜਗੇ ਨੇ ਆਪਣੇ 'ਹੱਥ ਖੜ੍ਹੇ ਕਰ ਦਿੱਤੇ' (ਫੈਸਲਾ ਹਾਈ ਕਮਾਂਡ 'ਤੇ ਛੱਡ ਦਿੱਤਾ), ਤਾਂ ਦੇਰ ਸ਼ਾਮ 6-7 ਵਿਧਾਇਕਾਂ ਦਾ ਇੱਕ ਹੋਰ ਗਰੁੱਪ ਦਿੱਲੀ ਰਵਾਨਾ ਕਰ ਦਿੱਤਾ ਗਿਆ, ਜੋ ਅੱਜ (ਸੋਮਵਾਰ, 24 ਨਵੰਬਰ 2025) ਕੇ.ਸੀ. ਵੇਣੂਗੋਪਾਲ ਨਾਲ ਮੁਲਾਕਾਤ ਕਰਨ ਦਾ ਸਮਾਂ ਮੰਗ ਰਹੇ ਹਨ।
ਜਾਰਜ ਨੇ ਦਿੱਤੀ ਸਬਰ ਰੱਖਣ ਦੀ ਸਲਾਹ, ਪਰ ਸ਼ਿਵਕੁਮਾਰ ਚਾਹੁੰਦੇ ਨੇ 'ਠੋਸ ਭਰੋਸਾ'
ਸੂਬੇ ਦੇ ਊਰਜਾ ਮੰਤਰੀ ਅਤੇ ਸੀਨੀਅਰ ਲੀਡਰ ਕੇ.ਜੇ. ਜਾਰਜ, ਜੋ ਕਿ ਵਿਚੋਲੇ ਦੀ ਭੂਮਿਕਾ ਵਿੱਚ ਹਨ, ਨੇ ਐਤਵਾਰ ਨੂੰ ਸਿੱਧਰਮਈਆ, ਖੜਗੇ ਅਤੇ ਫਿਰ ਸ਼ਾਮ ਨੂੰ ਸ਼ਿਵਕੁਮਾਰ ਨਾਲ ਮੁਲਾਕਾਤ ਕੀਤੀ। ਜਾਰਜ ਨੇ ਸ਼ਿਵਕੁਮਾਰ ਨੂੰ ਸਬਰ ਰੱਖਣ ਅਤੇ ਮਾਰਚ ਵਿੱਚ ਪੇਸ਼ ਹੋਣ ਵਾਲੇ ਬਜਟ ਤੱਕ ਸ਼ਾਂਤ ਰਹਿਣ ਲਈ ਕਿਹਾ।
ਪਾਰਟੀ ਨੇ ਪਿਛਲੇ ਹਫ਼ਤੇ ਦਿੱਲੀ ਵਿੱਚ ਵੀ ਸ਼ਿਵਕੁਮਾਰ ਨੂੰ ਇਹੀ ਗੱਲ ਕਹੀ ਸੀ ਕਿ ਦਸੰਬਰ ਵਿੱਚ ਵਿਧਾਨ ਸਭਾ ਦਾ ਸੈਸ਼ਨ ਹੈ ਅਤੇ ਇਸ ਤੋਂ ਬਾਅਦ ਬਜਟ ਦੀ ਤਿਆਰੀ ਸ਼ੁਰੂ ਹੋ ਜਾਵੇਗੀ, ਇਸ ਲਈ ਕੋਈ ਵੀ ਫੇਰਬਦਲ ਬਜਟ ਤੋਂ ਬਾਅਦ ਵਿਚਾਰਿਆ ਜਾਵੇਗਾ। ਹਾਲਾਂਕਿ, ਸੂਤਰਾਂ ਮੁਤਾਬਕ ਸ਼ਿਵਕੁਮਾਰ ਇਸ ਵਾਰ ਸਿਰਫ਼ ਜ਼ੁਬਾਨੀ ਵਾਅਦੇ (ਮੌਖਿਕ ਵਾਦੇ) ਤੋਂ ਸੰਤੁਸ਼ਟ ਨਹੀਂ ਹਨ ਅਤੇ ਠੋਸ ਭਰੋਸਾ ਚਾਹੁੰਦੇ ਹਨ। ਦੱਸਣਯੋਗ ਹੈ ਕਿ ਪਿਛਲੀ ਵਾਰ ਜਦੋਂ ਕਾਂਗਰਸ ਦੀ ਸਰਕਾਰ ਬਣੀ ਸੀ, ਤਾਂ ਉਨ੍ਹਾਂ ਨੂੰ ਢਾਈ ਸਾਲ ਬਾਅਦ ਮੁੱਖ ਮੰਤਰੀ ਬਣਾਉਣ ਦਾ ਜ਼ੁਬਾਨੀ ਭਰੋਸਾ ਦਿੱਤਾ ਗਿਆ ਸੀ, ਜਿਸ ਨੂੰ ਬਾਅਦ ਵਿੱਚ ਸਿੱਧਰਮਈਆ ਕੈਂਪ ਨੇ ਚੁਣੌਤੀ ਦਿੱਤੀ ਸੀ।
ਸਿੱਧਰਮਈਆ ਨੇ ਪ੍ਰਗਟਾਈ ਨਾਰਾਜ਼ਗੀ, ਮਾਮਲਾ ਹੁਣ ਰਾਹੁਲ ਗਾਂਧੀ ਦੇ ਪਾਲੇ ਵਿੱਚ
ਸੀ.ਐਮ. ਸਿੱਧਰਮਈਆ ਨੇ ਸ਼ਨੀਵਾਰ ਰਾਤ ਨੂੰ ਖੜਗੇ ਨਾਲ ਮੁਲਾਕਾਤ ਕੀਤੀ ਅਤੇ ਡੀ.ਕੇ. ਸ਼ਿਵਕੁਮਾਰ ਵੱਲੋਂ ਸਮਰਥਕ ਵਿਧਾਇਕਾਂ ਨੂੰ ਦਿੱਲੀ ਭੇਜਣ 'ਤੇ ਨਾਰਾਜ਼ਗੀ ਪ੍ਰਗਟਾਈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਪਾਰਟੀ ਦੀ ਛਵੀ ਖਰਾਬ ਹੋ ਰਹੀ ਹੈ ਅਤੇ ਉਨ੍ਹਾਂ ਖੜਗੇ ਨੂੰ CLP ਦੀ ਮੀਟਿੰਗ ਬੁਲਾ ਕੇ ਇਸ ਮਸਲੇ ਨੂੰ ਤੁਰੰਤ ਸੁਲਝਾਉਣ ਲਈ ਕਿਹਾ।
ਖੜਗੇ ਨੇ ਐਤਵਾਰ ਨੂੰ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸਾਫ਼ ਕਰ ਦਿੱਤਾ ਕਿ ਹੁਣ ਇਹ ਮਾਮਲਾ ਉਨ੍ਹਾਂ ਦੇ ਹੱਥ ਵਿੱਚ ਨਹੀਂ ਹੈ, ਸਗੋਂ ਆਲਾਕਮਾਨ ਹੀ ਇਸ 'ਤੇ ਫੈਸਲਾ ਕਰੇਗਾ। ਸੂਤਰਾਂ ਅਨੁਸਾਰ, ਅੱਜ (ਸੋਮਵਾਰ) ਰਾਹੁਲ ਗਾਂਧੀ ਦੇ ਵਿਦੇਸ਼ ਤੋਂ ਪਰਤਣ ਦੀਆਂ ਖ਼ਬਰਾਂ ਹਨ, ਜਿਸ ਤੋਂ ਬਾਅਦ ਦਿੱਲੀ ਵਿੱਚ ਵੱਡੇ ਪੱਧਰ 'ਤੇ ਸਿਆਸੀ ਗਤੀਵਿਧੀਆਂ ਹੋਣ ਅਤੇ ਸੀਨੀਅਰ ਨੇਤਾਵਾਂ ਨੂੰ ਬੁਲਾਏ ਜਾਣ ਦੀ ਉਮੀਦ ਹੈ।
ਦਲਿਤ ਨੇਤਾ ਜੀ. ਪਰਮੇਸ਼ਵਰ ਨੇ ਵੀ ਠੋਕਿਆ ਦਾਅਵਾ
ਇਸ ਸਿਆਸੀ ਉੱਥਲ-ਪੁੱਥਲ ਦੌਰਾਨ, ਗ੍ਰਹਿ ਮੰਤਰੀ ਅਤੇ ਕਾਂਗਰਸ ਦੇ ਦਲਿਤ ਨੇਤਾ ਜੀ. ਪਰਮੇਸ਼ਵਰ (G Parmeshwar) ਨੇ ਵੀ CM ਅਹੁਦੇ ਦੀ ਦੌੜ ਵਿੱਚ ਸ਼ਾਮਲ ਹੋਣ ਦਾ ਸੰਕੇਤ ਦੇ ਕੇ ਸਥਿਤੀ ਨੂੰ ਹੋਰ ਵੀ ਦਿਲਚਸਪ ਬਣਾ ਦਿੱਤਾ ਹੈ। ਹੁਣ ਸਾਰੀ ਗੇਂਦ ਰਾਹੁਲ ਗਾਂਧੀ ਦੇ ਪਾਲੇ ਵਿੱਚ ਹੈ।
ਰੂਹ ਕੰਬਾਊ ਹਾਦਸਾ: ਫਲਾਈਓਵਰ ਤੋਂ ਹੇਠਾਂ ਡਿੱਗੀ ਤੇਜ਼ ਰਫ਼ਤਾਰ ਕਾਰ, 4 ਲੋਕਾਂ ਦੀ ਮੌਤ
NEXT STORY 
