ਨੈਸ਼ਨਲ ਡੈਸਕ- ਪਰਮਵੀਰ ਚੱਕਰ ਜੇਤੂ ਕੈਪਟਨ ਵਿਕਰਮ ਬੱਤਰਾ 7 ਜੁਲਾਈ 1999 ਨੂੰ ਕਾਰਗਿਲ ਜੰਗ ਦੌਰਾਨ ਦੁਸ਼ਮਣਾਂ ਨਾਲ ਲੜਦੇ ਹੋਏ ਦੇਸ਼ ਲਈ ਸ਼ਹੀਦ ਹੋ ਗਏ ਸਨ। ਸ਼ਹੀਦ ਕੈਪਟਨ ਬੱਤਰਾ ਨੇ ਕਾਰਗਿਲ ਜੰਗ 'ਚ ਬਹਾਦਰੀ ਦਿਖਾਈ ਸੀ। ਉਨ੍ਹਾਂ ਨੇ ਕਾਰਗਿਲ ਵਿੱਚ ਪੁਆਇੰਟ 4875 ਤੋਂ ਦੁਸ਼ਮਣਾਂ ਨੂੰ ਭਜਾ ਕੇ ਤਿਰੰਗਾ ਲਹਿਰਾਇਆ ਸੀ। ਕੈਪਟਨ ਵਿਕਰਮ ਬੱਤਰਾ ਦੇ ਨਾਂ ਤੋਂ ਦੁਸ਼ਮਣ ਵੀ ਕੰਬਦੇ ਸਨ। ਪਾਕਿਸਤਾਨੀ ਫੌਜ ਨੇ ਵਿਕਰਮ ਬੱਤਰਾ ਨੂੰ ਸ਼ੇਰਸ਼ਾਹ ਨਾਂ ਦਿੱਤਾ ਸੀ। ਕੈਪਟਨ ਬੱਤਰਾ ਨੂੰ ਮਰਨ ਉਪਰੰਤ ਬਹਾਦਰੀ ਪੁਰਸਕਾਰ ਪਰਮਵੀਰ ਚੱਕਰ ਨਾਲ ਸਨਮਾਨਿਤ ਕੀਤਾ ਗਿਆ ਸੀ। ਉਨ੍ਹਾਂ ਦੀ ਅਥਾਹ ਹਿੰਮਤ ਅਤੇ ਬਹਾਦਰੀ ਦੇ ਚਰਚੇ ਗੁਆਂਢੀ ਮੁਲਕ ਪਾਕਿਸਤਾਨ ਵਿੱਚ ਵੀ ਸਨ।
'ਯੇ ਦਿਲ ਮਾਂਗੇ ਮੋਰ’
ਕੈਪਟਨ ਵਿਕਰਮ ਬੱਤਰਾ ਦਾ ਜਨਮ 9 ਸਤੰਬਰ 1974 ਨੂੰ ਹਿਮਾਚਲ ਪ੍ਰਦੇਸ਼ ਦੇ ਪਾਲਮਪੁਰ ਵਿੱਚ ਹੋਇਆ ਸੀ। ਬੱਤਰਾ ਨੂੰ ਪਹਿਲਾਂ ਡੀਏਵੀ ਸਕੂਲ ਅਤੇ ਫਿਰ ਸੈਂਟਰਲ ਸਕੂਲ, ਪਾਲਮਪੁਰ ਵਿੱਚ ਦਾਖਲ ਕਰਵਾਇਆ ਗਿਆ। ਬੱਤਰਾ ਨੂੰ ਬਚਪਨ ਤੋਂ ਹੀ ਫੌਜ ਦੇ ਜਵਾਨਾਂ ਦੀ ਬਹਾਦਰੀ ਦੀਆਂ ਕਹਾਣੀਆਂ ਪਸੰਦ ਸਨ। ਆਪਣੀ 12ਵੀਂ ਜਮਾਤ ਤੋਂ ਬਾਅਦ, ਬੱਤਰਾ ਚੰਡੀਗੜ੍ਹ ਚਲੇ ਗਏ ਅਤੇ ਡੀਏਵੀ ਕਾਲਜ ਤੋਂ ਸਾਇੰਸ ਵਿੱਚ ਗ੍ਰੈਜੂਏਸ਼ਨ ਕੀਤੀ। ਕਾਲਜ ਵਿੱਚ, ਬੱਤਰਾ NCCA ਏਅਰ ਵਿੰਗ ਵਿੱਚ ਸ਼ਾਮਲ ਹੋਏ। 1994 ਵਿੱਚ ਬੱਤਰਾ ਨੂੰ ਇੱਕ ਸ਼ਿਪਿੰਗ ਕੰਪਨੀ ਵਿੱਚ ਮਰਚੈਂਟ ਨੇਵੀ ਲਈ ਚੁਣਿਆ ਗਿਆ ਸੀ, ਪਰ ਉਸਨੇ ਆਪਣਾ ਮਨ ਬਦਲ ਲਿਆ ਅਤੇ 1995 ਵਿੱਚ ਆਪਣੀ ਗ੍ਰੈਜੂਏਸ਼ਨ ਪੂਰੀ ਕਰ ਲਈ। ਉਸਨੇ ਅੰਗਰੇਜ਼ੀ ਵਿੱਚ ਐਮਏ ਕਰਨ ਲਈ ਪੰਜਾਬ ਯੂਨੀਵਰਸਿਟੀ ਵਿੱਚ ਦਾਖਲਾ ਲਿਆ।
19 ਜੂਨ 1999 ਨੂੰ ਕੈਪਟਨ ਬੱਤਰਾ ਦੀ ਟੁਕੜੀ ਨੇ ਪੁਆਇੰਟ 5140 ਦੀ ਚੋਟੀ ‘ਤੇ ਕਬਜ਼ਾ ਕਰ ਲਿਆ। ਇਸ ਸਿਖਰ ਤੋਂ ਬੱਤਰਾ ਨੇ ਰੇਡੀਓ ‘ਤੇ ਸੰਦੇਸ਼ ਦਿੱਤਾ ਕਿ ‘ਯੇ ਦਿਲ ਮਾਂਗੇ ਮੋਰ’ ਇਸ ਆਪਰੇਸ਼ਨ ਦੌਰਾਨ ਬੱਤਰਾ ਨੂੰ ਕੋਡ ਨੇਮ ਸ਼ੇਰਸ਼ਾਹ ਦਿੱਤਾ ਗਿਆ ਸੀ । ਕੈਪਟਨ ਵਿਕਰਮ ਬੱਤਰਾ (Vikram Batra) ਦੀ ਟੀਮ ਨੂੰ ਸ਼੍ਰੀਨਗਰ-ਲੇਹ ਸੜਕ ਦੇ ਬਿਲਕੁਲ ਉੱਪਰ ਸਭ ਤੋਂ ਮਹੱਤਵਪੂਰਨ ਚੋਟੀ 5140 ਨੂੰ ਫਤਹਿ ਕਰਨ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਸੀ। ਸਾਲ 1999 ਵਿੱਚ ਕੈਪਟਨ ਵਿਕਰਮ ਬੱਤਰਾ 13 ਜੰਮੂ-ਕਸ਼ਮੀਰ ਰਾਈਫਲਜ਼ ਦੀ ਟੁਕੜੀ ਨਾਲ ਕਾਰਗਿਲ ਵਿੱਚ ਤਾਇਨਾਤ ਸਨ। ਕੈਪਟਨ ਬੱਤਰਾ ਪੂਰਬ ਤੋਂ ਇਸ ਚੋਟੀ ਵੱਲ ਵਧਿਆ। ਦੁਸ਼ਮਣਾਂ ਨੂੰ ਇਸਦੀ ਕੋਈ ਭਿਣਕ ਵੀ ਨਹੀਂ ਸੀ । ਜਦੋਂ ਇਹ ਫ਼ੌਜ ਦੁਸ਼ਮਣਾਂ ਦੇ ਨੇੜੇ ਪਹੁੰਚੀ ਤਾਂ ਪਾਕਿਸਤਾਨੀਆਂ ਨੂੰ ਇਸ ਦੀ ਭਿਣਕ ਪੈ ਗਈ। ਇਸ ਤੋਂ ਬਾਅਦ ਦੋਵਾਂ ਪਾਸਿਆਂ ਤੋਂ ਗੋਲੀਬਾਰੀ ਹੋਈ। ਬੱਤਰਾ ਦੀ ਟੁਕੜੀ ਨੇ 4 ਦੁਸ਼ਮਣਾਂ ਨੂੰ ਮਾਰ ਮੁਕਾਇਆ।
ਪੁਆਇੰਟ 5140 ਚੋਟੀ ‘ਤੇ ਕਬਜ਼ਾ ਕਰਨ ਤੋਂ ਬਾਅਦ ਕੈਪਟਨ ਬੱਤਰਾ ਦੀ ਟੀਮ ਨੂੰ ਪੁਆਇੰਟ 4875 ਚੋਟੀ ‘ਤੇ ਕਬਜ਼ਾ ਕਰਨ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਸੀ। 7 ਜੁਲਾਈ ਨੂੰ ਟੁਕੜੀ ਨੇ ਮੁਹਿੰਮ ਸ਼ੁਰੂ ਕੀਤੀ। ਇਸ ਸਿਖਰ ‘ਤੇ ਪਹੁੰਚਣਾ ਬਹੁਤ ਔਖਾ ਸੀ। ਇਸ ਦੇ ਦੋਵੇਂ ਪਾਸੇ ਖੜ੍ਹੀਆਂ ਢਲਾਣਾਂ ਸਨ। ਉੱਪਰੋਂ ਦੁਸ਼ਮਣਾਂ ਦੀ ਨਾਕਾਬੰਦੀ ਨੇ ਮੁਸ਼ਕਲਾਂ ਹੋਰ ਵੀ ਵਧਾ ਦਿੱਤੀਆਂ ਸਨ। ਇਸ ਹੱਥੋ-ਹੱਥ ਲੜਾਈ ਦੌਰਾਨ, ਕੈਪਟਨ ਬੱਤਰਾ ਨੇ ਪੁਆਇੰਟ ਬਲੈਂਕ ਰੇਂਜ ‘ਤੇ 5 ਦੁਸ਼ਮਣਾਂ ਨੂੰ ਮਾਰ ਦਿੱਤਾ। ਇਸ ਦੌਰਾਨ ਬੱਤਰਾ ਵੀ ਦੁਸ਼ਮਣਾਂ ਦੀ ਗੋਲੀ ਦੀ ਲਪੇਟ ਵਿੱਚ ਆ ਗਿਆ ਅਤੇ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਿਆ। ਇਸ ਦੇ ਬਾਵਜੂਦ ਬੱਤਰਾ ਨੇ ਹਿੰਮਤ ਨਹੀਂ ਹਾਰੀ ਅਤੇ ਰੇਂਗਦੇ ਹੋਏ ਦੁਸ਼ਮਣਾਂ ‘ਤੇ ਗ੍ਰਨੇਡ ਨਾਲ ਹਮਲਾ ਕਰ ਦਿੱਤਾ। ਇਸ ਮੁਹਿੰਮ ਵਿੱਚ ਬੁਰੀ ਤਰ੍ਹਾਂ ਜ਼ਖਮੀ ਹੋਏ ਕੈਪਟਨ ਬੱਤਰਾ 25 ਸਾਲ ਦੀ ਉਮਰ ਵਿੱਚ ਸ਼ਹੀਦ ਹੋ ਗਏ ਸਨ।
ਛਤੀਸਗੜ੍ਹ 'ਚ ਕਾਂਗਰਸ 'ਤੇ ਵਰ੍ਹੇ PM ਮੋਦੀ, ਕਿਹਾ- ਸੂਬੇ ਦੇ ਵਿਕਾਸ 'ਚ ਕੰਧ ਬਣ ਕੇ ਖੜ੍ਹਾ ਹੈ ਪਾਰਟੀ ਦਾ ਪੰਜਾ
NEXT STORY 
