ਨਵੀਂ ਦਿੱਲੀ (ਏਜੰਸੀ)- ਡੀ.ਐਸ.ਜੀ.ਐਮ.ਸੀ. ਦੇ ਪ੍ਰਧਾਨ ਮਨਜੀਤ ਸਿੰਘ ਜੀਕੇ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਇਹ ਦੋਸ਼ ਲਗਾਏ ਕਿ ਸਿੱਖ ਫਾਰ ਜਸਟਿਸ, ਕਾਂਗਰਸ ਪਾਰਟੀ ਅਤੇ ਪਾਕਿਸਤਾਨ ਦੀ ਖੁਫੀਆ ਏਜੰਸੀ ਆਈਐੱਸਆਈ ਵਿਚਾਲੇ ਸਬੰਧ ਹਨ। ਜੀ.ਕੇ. ਨੇ ਕਿਹਾ ਕਿ 1984 ਸਿੱਖ ਕਤਲੇਆਮ ਦੇ ਕਥਿਤ ਦੋਸ਼ੀ ਜਗਦੀਸ਼ ਟਾਈਟਲਰ ਖ਼ਿਲਾਫ਼ ਗਵਾਹ ਹੋਣ ਦਾ ਦਾਅਵਾ ਕਰਨ ਵਾਲੇ ਜਸਬੀਰ ਸਿੰਘ ਅਤੇ ਉਸ ਦਾ ਪੁੱਤ ਗਗਨਦੀਪ ਸਿੰਘ ਸਿੱਖ ਫਾਰ ਜਸਟਿਸ ਦੇ ਸਰਗਰਮ ਵਰਕਰ ਹਨ।
ਜਸਬੀਰ ਆਪਣੇ ਮੁਲਕ ਤੋਂ ਇੱਕ ਮਾਮਲੇ ’ਚ ਭਗੌੜਾ ਹੈ। ਕਤਲੇਆਮ ਦੀ ਗਵਾਹ ਬੀਬੀ ਦਰਸ਼ਨ ਕੌਰ ਦੀ ਗਵਾਹੀ ਵਿਕਵਾਉਣ ਦਾ ਜਸਬੀਰ ’ਤੇ ਕਥਿਤ ਦੋਸ਼ ਹੈ। ਉਨ੍ਹਾਂ ਦੱਸਿਆ ਕਿ ਜਦੋਂ ਮੈਂ ਟਾਈਟਲਰ ਖ਼ਿਲਾਫ਼ ਖੁਲਾਸੇ ਕਰਦਾ ਹਾਂ ਤਾਂ ਉਹ ਮੈਨੂੰ ਚੁੱਪ ਕਰਾਉਣ ਲਈ ਕਾਨੂੰਨੀ ਨੋਟਿਸ ਭੇਜਦਾ ਹੈ ਅਤੇ ਦੂਜੇ ਪਾਸੇ ਸਿੱਖ ਫਾਰ ਜਸਟਿਸ ਦਾ ਮੁਖੀ ਗੁਰਪਤਵੰਤ ਸਿੰਘ ਪੰਨੂ ਮੈਨੂੰ ਡਰਾਉਣ ਤੇ ਚੁੱਪ ਕਰਾਉਣ ਲਈ ਕਾਨੂੰਨੀ ਤਿਕੜਮਾਂ ਅਤੇ ਮਾਰਕੁੱਟ ਦਾ ਸਹਾਰਾ ਲੈਂਦਾ ਹੈ।’
ਉਨ੍ਹਾਂ ਕਿਹਾ ਕਿ ਸਿੱਖ ਫਾਰ ਜਸਟਿਸ ਸਿੱਧੇ ਤੌਰ ’ਤੇ ਆਈਐੱਸਆਈ ਤੋਂ ਪੈਸਾ ਲੈਣ ਦੀ ਦੋਸ਼ੀ ਨੇ ਤੇ ਇਹ ਸਿੱਖਾਂ ਦੇ ਕਾਤਲਾਂ ਨੂੰ ਬਚਾਉਣ ਵਾਲਿਆਂ ਦੀ ਪੁਸ਼ਤਪਨਾਹੀ ਕਰ ਰਹੀ ਹੈ। ਇਸ ਕਰਕੇ ਟਾਈਟਲਰ, ਪਨੂੰ ਅਤੇ ਆਈਐੱਸਆਈ ਵਿਚਾਲੇ ਰਿਸ਼ਤਿਆਂ ਦੀ ਜਾਂਚ ਹੋਣੀ ਲਾਜ਼ਮੀ ਹੈ। ਜਸਬੀਰ ਨੇ ਝੂਠਾ ਹਲਫ਼ਨਾਮਾ ਦੇ ਕੇ ਅਮਰੀਕਾ ਦੀ ਨਾਗਰਿਕਤਾ ਹਾਸਲ ਕੀਤੀ ਹੋਈ ਹੈ ਕਿਉਂਕਿ ਉਸ ਨੇ ਹਲਫ਼ਨਾਮੇ ’ਚ ਦਾਅਵਾ ਕੀਤਾ ਹੈ ਕਿ ਉਸ ਵਿਰੁੱਧ ਕਿਸੇ ਦੇਸ਼ ’ਚ ਕੋਈ ਕੇਸ ਨਹੀਂ ਹੈ, ਜਦੋਂ ਕਿ ਜਸਬੀਰ ਸਿੰਘ ਦਰਸ਼ਨ ਕੌਰ ਦੇ ਮਾਮਲੇ ਵਿੱਚ ਜੇਲ੍ਹ ਕੱਟਣ ਤੋਂ ਬਾਅਦ ਭਗੌੜਾ ਹੈ। ਇਸ ਲਈ ਭਾਰਤ ਸਰਕਾਰ ਨੂੰ ਜਸਬੀਰ ਸਿੰਘ ਨੂੰ ਵਾਪਸ ਲਿਆਉਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ।
ਮਾਲਿਆ ਵਿਵਾਦ: ਰਾਹੁਲ ਨੇ ਸੀ.ਬੀ.ਆਈ. ਨੋਟਿਸ ਦੇ ਬਹਾਨੇ ਪੀ.ਐੱਮ ਮੋਦੀ 'ਤੇ ਉਠਾਏ ਸਵਾਲ
NEXT STORY 
