ਖਮਾਣੋਂ (ਬੰਗੜ) - ਆਰਥਿਕ ਪੱਖੋਂ ਡਾਵਾਂਡੋਲ ਹੋਈ ਪੰਜਾਬ ਦੀ ਕਿਸਾਨੀ ਲਈ ਆਉਣ ਵਾਲੇ ਦਿਨਾਂ 'ਚ ਵੀ ਅਜੇ ਕੋਈ ਆਸ ਦੀ ਕਿਰਨ ਨਜ਼ਰ ਨਹੀਂ ਆ ਰਹੀ। ਕਦੇ ਕੁਦਰਤੀ ਆਫਤਾਂ ਤੇ ਕਦੇ ਮੰਦਹਾਲੀ ਨੇ ਪੰਜਾਬ ਦੇ ਕਿਸਾਨਾਂ ਨੂੰ ਆਰਥਿਕ ਪੱਖੋਂ ਝਿੰਜੋੜ ਕੇ ਰੱਖ ਦਿੱਤਾ ਹੈ। ਫਸਲੀ ਚੱਕਰ 'ਚੋਂ ਨਿਕਲ ਕੇ ਆਲੂਆਂ ਦੀ ਪੈਦਾਵਾਰ ਕਰਨ ਵਾਲੇ ਕਿਸਾਨਾਂ ਦੀ ਨਿਰਾਸ਼ਤਾ ਭਰੀ ਦਾਸਤਾਨ ਵੱਡੇ ਦੁਖਾਂਤ ਵੱਲ ਵਧਦੀ ਜਾ ਰਹੀ ਹੈ।
ਇਸ ਦਰਦਨਾਕ ਦਾਸਤਾਨ 'ਚ ਪਿੰਡ ਕੋਟਲਾ ਬਡਲਾ ਦੇ ਇਕ ਕਿਸਾਨ ਦਾ ਅਧਿਆਇ ਸਾਹਮਣੇ ਆਇਆ ਹੈ, ਜਿਸ ਦੀ 22 ਏਕੜ ਆਲੂ ਦੀ ਫਸਲ 'ਚੋਂ ਨਿਕਲੇ 2500 ਕੁਇੰਟਲ ਤੋਂ ਵੱਧ ਆਲੂ ਨਾ ਵਿਕਣ ਦੀ ਹਾਲਤ 'ਚ ਖੇਤ 'ਚ ਹੀ ਗਲ-ਸੜ ਕੇ ਗੰਦਗੀ ਦੇ ਢੇਰ ਵਿਚ ਬਦਲ ਗਏ। ਕਰਜ਼ੇ ਉੱਪਰ ਆਲੂਆਂ ਦੀ ਫਸਲ 'ਤੇ 15 ਲੱਖ ਰੁਪਏ ਤੋਂ ਵੱਧ ਖਰਚ ਕਰਨ ਵਾਲਾ ਬੀ. ਏ. ਪੜ੍ਹਿਆ ਮਾਪਿਆਂ ਦਾ ਇਕਲੌਤਾ ਪੁੱਤ ਭਵਨਜੀਤ ਸਿੰਘ ਖੁਦ ਨੂੰ ਨਿਰਾਸ਼ਤਾ ਦੇ ਹਨੇਰੇ 'ਚ ਡੁੱਬਿਆ ਦੱਸ ਰਿਹਾ ਹੈ। ਉਸਦਾ ਕਹਿਣਾ ਹੈ ਕਿ ਉਹ ਨੁਕਸਾਨੀ ਗਈ ਆਲੂਆਂ ਦੀ ਫਸਲ ਦੇ ਮੁਆਵਜ਼ੇ ਲਈ ਦਰ-ਦਰ ਭਟਕ ਰਿਹਾ ਹੈ ਪਰ ਕਿਸੇ ਪਾਸਿਓਂ ਵੀ ਆਸ ਦੀ ਕੋਈ ਕਿਰਨ ਨਜ਼ਰ ਨਹੀਂ ਆਈ।
ਨਿਰਾਸ਼ੇ ਇਸ ਨੌਜਵਾਨ ਵਲੋਂ ਜੋ ਆਪਣਾ ਅਗਲਾ ਫੈਸਲਾ ਸੁਣਾਇਆ ਗਿਆ ਹੈ, ਉਹ ਰੌਂਗਟੇ ਖੜ੍ਹੇ ਕਰ ਦੇਣ ਵਾਲਾ ਹੈ। ਉਸਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਉਸਨੂੰ ਆਲੂ ਦੀ ਫਸਲ ਨੇ ਬਰਬਾਦ ਕਰ ਦਿੱਤਾ ਹੈ। ਸਰਕਾਰ ਚਾਹੇ ਤਾਂ ਉਸਨੂੰ ਜਿਊਂਦੇ ਜੀਅ ਮਦਦ ਦੇ ਦੇਵੇ, ਨਹੀਂ ਤਾਂ ਮਰੇ ਨੂੰ ਮੁਆਵਜ਼ਾ ਦੇਣ ਲਈ ਘਰ ਆ ਜਾਵੇ ਕਿਉਂਕਿ ਹੁਣ ਉਹ ਖੁਦਕੁਸ਼ੀ ਕਰਨ ਲਈ ਮਜਬੂਰ ਹੋਵੇਗਾ।
ਉਸਨੇ ਦੱਸਿਆ ਕਿ ਉਸਨੇ 22 ਏਕੜ ਜ਼ਮੀਨ ਠੇਕੇ 'ਤੇ ਲਈ ਹੋਈ ਹੈ, ਜਿਸ 'ਚ ਆਲੂਆਂ ਦੀ ਫਸਲ ਇਸ ਆਸ 'ਤੇ ਬੀਜੀ ਸੀ ਕਿ ਉਹ ਕਿਸਾਨੀ ਨੂੰ ਖੇਤੀ ਚੱਕਰ 'ਚੋਂ ਬਾਹਰ ਕੱਢਣ ਲਈ ਅੱਗੇ ਆਏਗਾ। ਸਿੱਟੇ ਵਜੋਂ ਉਸਨੇ 15 ਲੱਖ ਰੁਪਏ ਤੋਂ ਵੱਧ ਦੀ ਰਕਮ ਵੱਖ-ਵੱਖ ਵਸੀਲਿਆਂ ਰਾਹੀ ਉਧਾਰ ਤੇ ਕਰਜ਼ੇ ਦੇ ਰੂਪ 'ਚ ਇਕੱਠੀ ਕੀਤੀ। ਤਿੰਨ ਮਹੀਨਿਆਂ ਦੀ ਇਸ ਫਸਲ ਨੂੰ ਉਸਨੇ ਪੁੱਤਾਂ ਵਾਂਗ ਪਾਲਿਆ। ਜਿਉਂ ਹੀ ਫਸਲ ਪਲ ਕੇ ਤਿਆਰ ਹੋਈ ਤਾਂ ਕੋਈ ਵੀ ਖ੍ਰੀਦਦਾਰ ਨਜ਼ਰ ਨਾ ਆਇਆ।
ਉਸਨੇ 25 ਕੁਇੰਟਲ ਤੋਂ ਵੱਧ ਆਲੂ ਆਪਣੀ 2 ਕਨਾਲ ਜ਼ਮੀਨ 'ਚ ਢੇਰੀ ਕਰ ਲਏ। ਇਨ੍ਹਾਂ ਆਲੂਆਂ ਦੀ ਸੰਭਾਲ ਲਈ ਉਸਨੇ ਡੇਢ ਮਹੀਨਾ ਦਿਨ-ਰਾਤ ਇਕ ਕਰ ਦਿੱਤਾ। ਅਸਮਾਨ 'ਚ ਬੱਦਲ ਆਉਣੇ ਤਾਂ ਝੱਟ ਤਰਪਾਲਾਂ ਨਾਲ ਆਲੂਆਂ ਨੂੰ ਢਕਣਾ ਤੇ ਧੁੱਪ ਆਉਣ 'ਤੇ ਆਲੂਆਂ ਨੂੰ ਨੰਗੇ ਕਰਨਾ। ਆਲੂਆਂ ਦੀ ਸਾਂਭ-ਸੰਭਾਲ ਦੌਰਾਨ ਕੋਈ ਵੀ ਵਪਾਰੀ ਜਾਂ ਦੁਕਾਨਦਾਰ ਆਲੂਆਂ ਦੀ ਖ੍ਰੀਦ ਕਰਨ ਨਾ ਬਹੁੜਿਆ। ਉਸਨੇ ਦੱਸਿਆ ਕਿ 12 ਰੁਪਏ ਦੀ ਖਾਲੀ ਬੋਰੀ, 12 ਰੁਪਏ ਭਰਤੀ ਤੇ 8 ਰੁਪਏ ਕੰਡਾ ਕਰਵਾਉਣ ਦਾ ਖਰਚਾ ਪਾ ਕੇ 32 ਰੁਪਏ ਤੋਂ ਵੱਧ ਦਾ ਖਰਚਾ ਆਉਂਦਾ ਹੈ ਤੇ ਬਾਜ਼ਾਰ 'ਚ ਉਸ ਬੋਰੀ ਦੀ ਕੀਮਤ 30 ਤੋਂ 40 ਰੁਪਏ ਮਿਲਦੀ ਸੀ।
ਪਿੰਡਾਂ 'ਚ ਜਾ ਕੇ ਆਲੂ ਵੇਚਣ ਦੀ ਫੇਰੀ ਵੀ ਦਿੱਤੀ
ਪਿੰਡ ਕੋਟਲਾ ਬਡਲਾ ਦੇ ਨੌਜਵਾਨ ਕਿਸਾਨ ਨੇ ਦੱਸਿਆ ਕਿ ਆਲੂ ਨਾ ਵਿਕਣ ਦੀ ਹਾਲਤ 'ਚ ਉਸ ਵਲੋਂ ਆਪਣੇ ਟਰੈਕਟਰ-ਟਰਾਲੀ 'ਚ ਆਲੂ ਭਰ ਕੇ ਲਾਊਡ ਸਪੀਕਰ ਰਾਹੀਂ ਵੱਖ-ਵੱਖ ਪਿੰਡਾਂ 'ਚ ਪਹੁੰਚ ਕੀਤੀ ਗਈ ਤੇ ਪਿੰਡਾਂ ਦੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਸਾਡੇ ਕੋਲੋਂ ਆਲੂ ਖ੍ਰੀਦ ਲੈਣ। ਉਨ੍ਹਾਂ ਵਲੋਂ ਇਹ ਵੀ ਕਿਹਾ ਗਿਆ ਕਿ ਜਿੰਨਾ ਘੱਟ ਰੇਟ 'ਤੇ ਅਸੀਂ ਆਲੂ ਦੇਵਾਂਗੇ, ਓਨਾ ਘੱਟ ਕਿਤੋਂ ਨਹੀਂ ਮਿਲੇਗਾ। ਬਦਕਿਸਮਤੀ ਨਾਲ ਆਲੂਆਂ ਦੀ ਫੇਰੀ ਦੌਰਾਨ ਉਨ੍ਹਾਂ ਦੇ ਤੇਲ ਖਰਚੇ ਤੇ ਲੇਬਰ ਖਰਚੇ ਹੀ ਪੂਰੇ ਹੁੰਦੇ ਰਹੇ ਤੇ ਉਹ ਸਾਰਾ ਦਿਨ ਤਪਦੀਆਂ ਗਰਮੀਆਂ 'ਚ ਦਰ-ਦਰ ਭਟਕ ਕੇ ਵਾਪਿਸ ਘਰ ਆ ਵੜਦੇ।
ਬੈਂਕ ਵਾਲੇ ਖੜਕਾਉਂਦੇ ਨੇ ਰੋਜ਼ ਕੁੰਡਾ, ਮੈਂ ਕੀ ਕਰਾਂ?
ਪੀੜਤ ਕਿਸਾਨ ਨੇ ਦੱਸਿਆ ਕਿ ਉਸ ਵਲੋਂ ਸਹਿਕਾਰੀ ਖੇਤੀਬਾੜੀ ਸਭਾ ਤੋਂ ਡੇਢ ਲੱਖ ਰੁਪਏ ਦੀ ਖਾਦ ਤੇ 6 ਲੱਖ ਰੁਪਏ ਦਾ ਲੋਨ ਕਰਵਾਇਆ ਗਿਆ ਸੀ। ਇਸ ਤੋਂ ਇਲਾਵਾ ਪਹਿਲਾਂ ਹੀ ਆੜ੍ਹਤੀਏ ਤੋਂ 10 ਲੱਖ ਦਾ ਲਿਆ ਕਰਜ਼ਾ ਸਿਰ ਚੱਲ ਰਿਹਾ ਹੈ ਤੇ ਇਕ ਹੋਰ ਬੈਂਕ ਤੋਂ ਤਿੰਨ ਲੱਖ ਰੁਪਏ ਦੀ ਲਿਮਟ ਕਰਵਾ ਕੇ ਖੇਤੀਬਾੜੀ ਤੇ ਘਰ ਦੇ ਕੰਮ ਨੂੰ ਚੱਲਦਾ ਰੱਖਿਆ ਗਿਆ ਹੈ। ਉਸਨੇ ਭਰੇ ਮਨ ਨਾਲ ਦੱਸਿਆ ਕਿ ਹੁਣ ਬੈਂਕਾਂ ਵਾਲੇ ਉਸਦਾ ਕੁੰਡਾ ਖੜਕਾ ਕੇ ਆਪਣੀ ਰਕਮ ਵਾਪਿਸ ਮੰਗਦੇ ਹਨ ਪਰ ਹਮੇਸ਼ਾ ਆਖਦਾ ਹੈ ਕਿ ਫਸਲ ਵਿਕਣ 'ਤੇ ਪਾਈ-ਪਾਈ ਮੋੜ ਦੇਵਾਂਗਾ ਪਰ ਹੁਣ ਤਾਂ ਫਸਲ ਹੀ ਸੜ ਕੇ ਸੁਆਹ ਹੋ ਗਈ।
ਮਸਲੇ ਦਾ ਹੱਲ ਕੱਢਾਂਗੇ : ਵਿਧਾਇਕ ਜੀ. ਪੀ.
ਵਿਧਾਨਕਾਰ ਗੁਰਪ੍ਰੀਤ ਸਿੰਘ ਜੀ. ਪੀ. ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਪੀੜਤ ਕਿਸਾਨ ਉਨ੍ਹਾਂ ਕੋਲ ਆਇਆ ਸੀ, ਜਿਸ ਨੇ ਸਾਰੀ ਵਿੱਥਿਆ ਉਨ੍ਹਾਂ ਨੂੰ ਦੱਸੀ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨਾਲ ਉਕਤ ਕਿਸਾਨ ਨੂੰ ਐੱਸ. ਡੀ. ਐੱਮ. ਬੱਸੀ ਪਠਾਣਾਂ ਕੋਲ ਭੇਜਿਆ ਸੀ ਪਰ ਐੱਸ. ਡੀ. ਐੱਮ. ਵਲੋਂ ਆਲੂਆਂ ਦੀ ਫਸਲ 'ਤੇ ਕੋਈ ਵੀ ਮੁਆਵਜ਼ੇ ਦਾ ਪ੍ਰਬੰਧ ਨਾ ਹੋਣ ਬਾਰੇ ਕਿਹਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਉਹ ਨੌਜਵਾਨ ਕਿਸਾਨ ਨੂੰ ਮਸਲੇ ਦੇ ਨਿਪਟਾਰੇ ਨੂੰ ਹਿੰਮਤ ਨਾਲ ਸੁਲਝਾਉਣ ਲਈ ਪ੍ਰੇਰਿਤ ਕਰਨਗੇ ਤੇ ਇਸ ਸਬੰਧੀ ਉਹ ਡਿਪਟੀ ਕਮਿਸ਼ਨਰ ਫਤਿਹਗੜ੍ਹ ਸਾਹਿਬ ਨਾਲ ਉਸਦੀ ਮੀਟਿੰਗ ਸੋਮਵਾਰ ਨੂੰ ਕਰਵਾਉਣਗੇ।
ਸਰਕਾਰ ਨੇ ਮਾਰਕਫੈੱਡ ਨੂੰ ਆਲੂਆਂ ਦੀ ਖ੍ਰੀਦ ਕਰਨ ਲਈ ਕਿਹਾ : ਰਾਜੇਵਾਲ
ਪੀੜਤ ਕਿਸਾਨ ਭਵਨਜੀਤ ਸਿੰਘ ਦੀ ਮਦਦ ਲਈ ਲਿਖਿਆ ਜਾਵੇਗਾ ਪੱਤਰ
ਪਿੰਡ ਕੋਟਲਾ ਬਡਲਾ ਦੇ ਨੌਜਵਾਨ ਕਿਸਾਨ ਵਲੋਂ ਆਲੂਆਂ ਦੀ ਖੇਤੀ 'ਚ ਹੋਏ ਲੱਖਾਂ ਦੇ ਨੁਕਸਾਨ ਤੋਂ ਬਾਅਦ ਸਰਕਾਰ ਪਾਸੋਂ ਮਦਦ ਦੀ ਗੁਹਾਰ ਲਾਉਣ ਤੇ ਮੁਆਵਜ਼ੇ ਲਈ ਖੁਦਕੁਸ਼ੀ ਕਰਨ ਦਾ ਬਿਆਨ ਸੁਣ ਕੇ ਭਾਰਤੀ ਕਿਸਾਨ ਯੂਨੀਅਨ ਰਾਜੇਵਾਲ ਦੇ ਪ੍ਰਧਾਨ ਬਲਵੀਰ ਸਿੰਘ ਰਾਜੇਵਾਲ ਉਕਤ ਕਿਸਾਨ ਦੇ ਖੇਤਾਂ 'ਚ ਪੁੱਜੇ, ਜਿਥੇ ਉਨ੍ਹਾਂ ਨੁਕਸਾਨੇ ਗਏ ਆਲੂਆਂ ਦਾ ਜਾਇਜ਼ਾ ਲਿਆ। ਉਨ੍ਹਾਂ ਨੌਜਵਾਨ ਕਿਸਾਨ ਨੂੰ ਹਿੰਮਤ ਦਿੰਦਿਆਂ ਕਿਹਾ ਕਿ ਜਿਸ ਤਰ੍ਹਾਂ ਫਸਲ ਚੁੱਕਣ ਲਈ ਲੜਿਆ ਜਾਂਦਾ ਹੈ, ਉਸੇ ਤਰ੍ਹਾਂ ਫਸਲ ਵੇਚਣ ਲਈ ਵੀ ਸੰਘਰਸ਼ ਕਰਨ ਦੀ ਜ਼ਰੂਰਤ ਹੈ। ਉਨ੍ਹਾਂ ਕਿਹਾ ਕਿ ਜ਼ਿੰਦਗੀ ਤੋਂ ਹਾਰ ਮੰਨ ਲੈਣ ਨਾਲ ਮਸਲਿਆਂ ਦੇ ਹੱਲ ਨਹੀਂ ਹੁੰਦੇ।
ਇਸ ਮੌਕੇ ਰਾਜੇਵਾਲ ਨੇ ਮੁੱਖ ਮੰਤਰੀ ਦਫਤਰ ਚੰਡੀਗੜ੍ਹ ਵਿਖੇ ਟੈਲੀਫੋਨ 'ਤੇ ਗੱਲਬਾਤ ਕੀਤੀ। ਲੰਬੀ ਗੱਲਬਾਤ ਤੋਂ ਬਾਅਦ ਰਾਜੇਵਾਲ ਨੇ ਦੱਸਿਆ ਕਿ ਸੂਬਾ ਸਰਕਾਰ ਵਲੋਂ ਮਾਰਕਫੈੱਡ ਨੂੰ ਕਹਿ ਦਿੱਤਾ ਗਿਆ ਹੈ ਕਿ ਉਹ ਕਿਸਾਨਾਂ ਦੇ ਵਿਕਣਯੋਗ ਪਏ ਆਲੂਆਂ ਦੀ ਖ੍ਰੀਦ ਕਰੇ। ਇਸਦੇ ਨਾਲ ਹੀ ਉਨ੍ਹਾਂ ਦੱਸਿਆ ਕਿ ਕਿਸਾਨ ਭਵਨਜੀਤ ਸਿੰਘ ਦੇ ਜੋ ਲੱਖਾਂ ਰੁਪਏ ਦੇ ਆਲੂ ਨਾ ਵਿਕਣ ਤੋਂ ਬਾਅਦ ਗਲ-ਸੜ ਕੇ ਨਸ਼ਟ ਹੋਏ ਹਨ, ਉਨ੍ਹਾਂ ਦੇ ਮੁਆਵਜ਼ੇ ਲਈ ਸਰਕਾਰ ਵਲੋਂ ਲਿਖਤੀ ਦਰਖਾਸਤ ਦੀ ਮੰਗ ਕੀਤੀ ਗਈ ਹੈ। ਉਨ੍ਹਾਂ ਨੌਜਵਾਨ ਕਿਸਾਨ ਨੂੰ ਭਰੋਸਾ ਦਿਵਾਇਆ ਕਿ ਉਹ ਯੂਨੀਅਨ ਵਲੋਂ ਉਸਨੂੰ ਮੁਆਵਜ਼ਾ ਦਿਵਾਉਣ ਲਈ ਕੋਈ ਕਸਰ ਬਾਕੀ ਨਹੀਂ ਛੱਡਣਗੇ।
ਬਲੈਰੋ-ਕੈਂਟਰ 'ਚ ਟੱਕਰ, 1 ਦੀ ਮੌਤ
NEXT STORY