ਲੱਗਦਾ ਹੈ ਕਿ ਕੋਰੋਨਾ ਵਾਇਰਸ ਨੇ ਚੀਨ ’ਚ ਆਪਣਾ ਘਰ ਬਣਾ ਲਿਆ ਹੈ। 3 ਸਾਲ ਦੇ ਲੰਬੇ ਲਾਕਡਾਊਨ ਦੇ ਬਾਵਜੂਦ ਜਦੋਂ ਪਿਛਲੇ ਸਾਲ ਲਾਕਡਾਊਨ ਨੂੰ ਹਟਾਇਆ ਗਿਆ ਸੀ ਤਾਂ ਇੰਝ ਲੱਗਾ ਸੀ ਕਿ ਜਲਦੀ ਹੀ ਚੀਨ ’ਚ ਹਾਲਾਤ ਆਮ ਵਰਗੇ ਹੋ ਜਾਣਗੇ ਪਰ ਕੋਰੋਨਾ ਨੇ ਚੀਨ ਦੀ ਆਰਥਿਕ ਰਾਜਧਾਨੀ ਸ਼ੰਘਾਈ ’ਚ ਇਕ ਵਾਰ ਫਿਰ ਦਸਤਕ ਦੇ ਦਿੱਤੀ। 18 ਅਪ੍ਰੈਲ ਨੂੰ ਸ਼ੰਘਾਈ ’ਚ ਆਟੋ ਐਕਸਪੋ ਸ਼ੁਰੂ ਹੋਇਆ ਸੀ ਜੋ ਕਈ ਦਿਨ ਤੱਕ ਚੱਲਿਆ। ਕੁਲ 1000 ਦੇਸੀ ਅਤੇ ਵਿਦੇਸ਼ੀ ਕਾਰ ਕੰਪਨੀਆਂ ਨੇ ਉਸ ’ਚ ਹਿੱਸਾ ਲਿਆ।
ਕਾਰ ਕੰਪਨੀਆਂ ਦੇ ਨਾਲ ਇਸ ਐਕਸਪੋ ’ਚ ਕਾਰਾਂ ਦੇ ਵੱਖ-ਵੱਖ ਪੁਰਜ਼ੇ ਬਣਾਉਣ ਵਾਲੀਆਂ ਕੰਪਨੀਆਂ ਵੀ ਸ਼ਾਮਲ ਹੋਈਆਂ। ਨਾਲ ਹੀ ਇਸ ਐਕਸਪੋ ’ਚ ਦੇਸ਼-ਵਿਦੇਸ਼ ਤੋਂ ਢੇਰ ਸਾਰੇ ਲੋਕਾਂ ਨੇ ਆਪਣੀ ਹਾਜ਼ਰੀ ਦਰਜ ਕਰਵਾਈ। ਇਹ ਆਟੋ ਐਕਸਪੋ ਕੋਰੋਨਾ ਵਾਇਰਸ ਫੈਲਾਉਣ ਦਾ ਕੇਂਦਰ ਬਣ ਗਿਆ। ਇੱਥੇ ਜਿੰਨੇ ਵੀ ਲੋਕ ਆਏ, ਉਨ੍ਹਾਂ ’ਚੋਂ ਕਈਆਂ ਨੂੰ ਕੋਰੋਨਾ ਹੋ ਗਿਆ। ਇਹ ਗੱਲ ਉਦੋਂ ਸਾਹਮਣੇ ਆਈ ਜਦੋਂ ਉਕਤ ਵਿਅਕਤੀਆਂ ਨੂੰ ਖੁਦ ’ਚ ਕੋਰੋਨਾ ਵਰਗੇ ਲੱਛਣ ਨਜ਼ਰ ਆਉਣ ਲੱਗੇ ਅਤੇ ਉਨ੍ਹਾਂ ਡਾਕਟਰਾਂ ਕੋਲੋਂ ਆਪਣੀ ਬਿਮਾਰੀ ਦੀ ਜਾਂਚ ਕਰਵਾਈ। ਉਦੋਂ ਇਸ ਗੱਲ ਦਾ ਖੁਲਾਸਾ ਹੋਇਆ ਕਿ ਜਿੰਨੇ ਲੋਕਾਂ ਨੇ ਕੋਰੋਨਾ ਟੈਸਟਿੰਗ ਕਰਵਾਈ ਸੀ, ਉਹ ਸਭ ਕੋਰੋਨਾ ਪਾਜ਼ੇਟਿਵ ਪਾਏ ਗਏ।
ਚੀਨ ਦੀ ਇਕ ਵੈੱਬਸਾਈਟ ਸੀਨਾ ਫਾਇਨਾਂਸ ’ਚ ਛਪੀ ਖਬਰ ਮੁਤਾਬਕ 24 ਅਪ੍ਰੈਲ ਨੂੰ ਇੱਥੇ ਹੋਏ ਆਟੋ ਸ਼ੋਅ ’ਚੋਂ ਇਕ ਵੱਡੀ ਖਬਰ ਨਿਕਲ ਕੇ ਆਈ ਜਿਸ ’ਚ ਕਈ ਵੀਡੀਓ ਬਲਾਗਰਾਂ, ਸੈਲਾਨੀਆਂ ਅਤੇ ਉਨ੍ਹਾਂ ਮਾਡਲਾਂ ਜਿਨ੍ਹਾਂ ਇਸ ਸ਼ੋਅ ’ਚ ਹਿੱਸਾ ਲਿਆ ਸੀ, ਨੇ ਦੱਸਿਆ ਕਿ ਉਹ ਸਭ ਦੂਜੀ ਵਾਰ ਕੋਵਿਡ-19 ਪਾਜ਼ੇਟਿਵ ਹਨ। ਉਨ੍ਹਾਂ ਨੂੰ ਸਿਰਫ 6 ਮਹੀਨਿਆਂ ਅੰਦਰ ਹੀ ਦੂਜੀ ਵਾਰ ਕੋਰੋਨਾ ਹੋਇਆ ਹੈ। ਉਨ੍ਹਾਂ ਸਭ ਵਿਅਕਤੀਆਂ ’ਚ ਕੋਰੋਨਾ ਵਰਗੇ ਲੱਛਣ ਪਾਏ ਗਏ ਹਨ। ਜਿਸ ਵਾਇਰਸ ਬਾਰੇ ਇਹ ਸਮਝਿਆ ਜਾ ਰਿਹਾ ਸੀ ਕਿ ਉਹ ਚਲਾ ਗਿਆ ਹੈ, ਹੁਣ ਵਾਪਸ ਆ ਗਿਆ ਹੈ।
ਚੀਨ ’ਚ ਕੋਰੋਨਾ ਲਾਕਡਾਊਨ ਖੁੱਲ੍ਹਣ ਪਿੱਛੋਂ ਉਕਤ ਆਟੋ ਸ਼ੋਅ ਚੀਨ ਦਾ ਪਹਿਲਾ ਕੌਮਾਂਤਰੀ ਆਟੋ ਸ਼ੋਅ ਹੈ ਜਿਸ ’ਚ ਕਈ ਵਿਦੇਸ਼ੀ ਮਹਿਮਾਨਾਂ ਨੇ ਹਿੱਸਾ ਲਿਆ। ਇਹ ਆਟੋ ਐਕਸਪੋ 3.60,000 ਵਰਗ ਮੀਟਰ ਦੇ ਖੇਤਰ ’ਚ ਆਯੋਜਿਤ ਕੀਤਾ ਗਿਆ ਸੀ ਅਤੇ ਇਸ ’ਚ ਪੂਰੇ ਚੀਨ ਦੀਆਂ ਬਹੁਤ ਸਾਰੀਆਂ ਕਾਰ ਨਿਰਮਾਤਾ ਕੰਪਨੀਆਂ ਨੇ ਆਪਣੀ ਹਾਜ਼ਰੀ ਲਵਾਈ ਸੀ ਜਿਸ ਤਰ੍ਹਾਂ ਇੱਥੇ ਹਰ ਤਰ੍ਹਾਂ ਦੇ ਲੋਕ ਆ ਰਹੇ ਹਨ, ਉਸ ਕਾਰਨ ਕੋਰੋਨਾ ਪਾਜ਼ੇਟਿਵ ਲੋਕਾਂ ਦੀ ਗਿਣਤੀ ਵੀ 100 ਦੇ ਆਸਪਾਸ ਦੱਸੀ ਜਾ ਰਹੀ ਹੈ।
ਮਹਾਮਾਰੀ ਪਿੱਛੋਂ ਲਾਕਡਾਊਨ ਹਟਣ ਅਤੇ ਹਾਲਾਤ ਦੇ ਆਮ ਵਾਂਗ ਹੋਣ ਪਿੱਛੋਂ ਜਿਸ ਤੇਜ਼ ਰਫਤਾਰ ਨਾਲ ਕੋਰੋਨਾ ਫੈਲ ਰਿਹਾ ਹੈ, ਨੂੰ ਦੇਖਦੇ ਹੋਏ ਚੀਨ ’ਚ ਉੱਥੋਂ ਦੇ ਲੋਕਾਂ ਨੇ ਇਸ ਆਟੋ ਐਕਸਪੋ ਨੂੰ ਗਲੋਬਲ ਵਾਇਰਸ ਐਕਸਚੇਂਜ ਹਾਲ ਦਾ ਨਾਂ ਦਿੱਤਾ ਹੈ ਕਿਉਂਕਿ ਇੱਥੋਂ ਕਈ ਲੋਕਾਂ ਨੂੰ ਕੋਰੋਨਾ ਫੈਲ ਗਿਆ ਹੈ।
ਇਸ ਸਬੰਧੀ ਲੋਕਾਂ ਨੂੰ ਕੋਰੋਨਾ ਦੇ ਨਾਲ ਹੀ ਫਲੂ ਵੀ ਹੋ ਰਿਹਾ ਹੈ। ਸਿਹਤ ਵਿਭਾਗ ਲਈ ਇਹ ਸਾਰਾ ਮਾਮਲਾ ਚਿੰਤਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਇਸ ਆਟੋ ਐਕਸਪੋ ’ਚ ਅਜਨਬੀਆਂ ਦੇ ਨਾਲ-ਨਾਲ ਕਾਰ ਨਿਰਮਾਤਾ ਅਤੇ ਉਨ੍ਹਾਂ ਦੇ ਸਟਾਲਾਂ ’ਚ ਕੰਮ ਕਰਨ ਵਾਲੇ ਲੋਕ ਵੀ ਕੋਰੋਨਾ ਪਾਜ਼ੇਟਿਵ ਪਾਏ ਗਏ ਹਨ। ਕਾਰਾਂ ਦੇ ਨਾਲ ਖੜ੍ਹੀਆਂ ਰਹਿਣ ਵਾਲੀਆਂ ਮਾਡਲਾਂ ਨੇ ਵੀ ਦੱਸਿਆ ਕਿ ਉਹ ਵੀ ਕੋਰੋਨਾ ਪਾਜ਼ੇਟਿਵ ਹਨ ਪਰ ਉਨ੍ਹਾਂ ਦੇ ਏਜੰਟਾਂ ਨੇ ਸਾਨੂੰ ਬੇਨਤੀ ਕੀਤੀ ਹੈ ਕਿ ਉਹ ਆਟੋ ਐਕਸਪੋ ’ਚ ਆਉਣਾ ਜਾਰੀ ਰੱਖਣ ਤੇ ਕਿਸੇ ਨੂੰ ਇਹ ਗੱਲ ਨਾ ਦੱਸਣ।
ਲੋਕਾਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਜਾਣਨ ਵਾਲੇ ਜਿੰਨੇ ਲੋਕਾਂ ਨੇ ਆਟੋ ਐਕਸਪੋ ਦੀ ਯਾਤਰਾ ਕੀਤੀ ਹੈ ਉਨ੍ਹਾਂ ’ਚੋਂ ਲਗਭਗ ਸਾਰੇ ਹੀ ਕੋਰੋਨਾ ਪਾਜ਼ੇਟਿਵ ਪਾਏ ਗਏ ਹਨ। ਜਿਸ ਤਰ੍ਹਾਂ ਲੋਕ ਇਸ ਗੱਲ ਦਾ ਪ੍ਰਗਟਾਵਾ ਕਰ ਰਹੇ ਹਨ ਉਸ ਤੋਂ ਲੱਗਦਾ ਹੈ ਕਿ ਕਿਤੇ ਚੀਨ ’ਚ ਕੋਰੋਨਾ ਮਹਾਮਾਰੀ ਦੀ ਇਕ ਹੋਰ ਲਹਿਰ ਤਾਂ ਨਾ ਆ ਜਾਵੇ। ਆਟੋ ਐਕਸਪੋ ਤੋਂ ਪਰਤਣ ਪਿੱਛੋਂ ਕਈ ਲੋਕਾਂ ਨੇ ਡਾਇਰੀਆ, ਸਰੀਰ ’ਚ ਦਰਜ ਅਤੇ ਗਲੇ ’ਚ ਖਰਾਸ਼ ਆਦਿ ਮਹਿਸੂਸ ਕੀਤੀ, ਜਾਂਚ ਕਰਨ ’ਤੇ ਪਤਾ ਲੱਗਾ ਕਿ ਉਹ ਦੋਹਰੇ ਕੋਰੋਨਾ ਪਾਜ਼ੇਟਿਵ ਹਨ ਭਾਵ ਉਨ੍ਹਾਂ ’ਚ ਕੋਰੋਨਾ ਦੇ ਦੁੱਗਣੇ ਸ਼ਕਤੀਸ਼ਾਲੀ ਲੱਛਣ ਮੌਜੂਦ ਹਨ। ਇਨ੍ਹਾਂ ਲੱਛਣਾਂ ਨੂੰ ਦੇਖ ਕੇ ਚੀਨ ਦੇ ਵਾਇਰੋਲਾਜੀ ਦੇ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਐਕਸ. ਬੀ. ਬੀ. 1.6 ਵਾਇਰਸ ਹੈ ਜੋ ਆਪਣਾ ਅਸਰ ਲੋਕਾਂ ਨੂੰ ਵਿਖਾ ਰਹੀ ਹੈ।
ਵਾਇਰੋਲਾਜਿਸਟਸ ਇਸ ਗੱਲ ਦਾ ਖਦਸ਼ਾ ਪ੍ਰਗਟਾ ਰਹੇ ਹਨ ਕਿ ਇਹ ਇਨਫੈਕਸ਼ਨ ਦੀ ਦੂਜੀ ਲਹਿਰ ਵੀ ਹੋ ਸਕਦੀ ਹੈ। 13 ਅਪ੍ਰੈਲ ਨੂੰ ਹੁਸਨ ਨਿਯੋ ਜੋ ਚੀਨ ਦੀ ਸੀ. ਡੀ. ਸੀ. ਦੇ ਮੁੱਖ ਵਾਇਰੋਲਾਜਿਸਟ ਹਨ, ਨੇ ਕਿਹਾ ਕਿ ਤੇਜ਼ ਇਨਫੈਕਸ਼ਨ ਅਤੇ ਘੱਟ ਮੌਤ ਦਰ ਦੇ ਬਾਵਜੂਦ ਕੋਰੋਨਾ ਦੀ ਇਸ ਲਹਿਰ ’ਚ ਵੱਡੀ ਗਿਣਤੀ ’ਚ ਲੋਕਾਂ ਦੀ ਮੌਤ ਹੋ ਸਕਦੀ ਹੈ। 20 ਅਪ੍ਰੈਲ ਨੂੰ ਚੀਨ ਦੇ ਪ੍ਰਸਿੱਧ ਡਾਕਟਰ ਤਸਾਂਗ ਵਨਹੂੰਗ ਨੇ ਆਪਣੇ ਭਾਸ਼ਣ ’ਚ ਕਿਹਾ ਸੀ ਕਿ ਦੂਜੀ ਸੰਭਾਵਿਤ ਲਹਿਰ ਤੋਂ ਲੋਕਾਂ ਦੇ ਬਚਣ ਲਈ ਸਾਨੂੰ ਉਨ੍ਹਾਂ ਲੋਕਾਂ ’ਤੇ ਵਧੇਰੇ ਧਿਆਨ ਦੇਣ ਦੀ ਲੋੜ ਹੈ ਜੋ ਕੋਰੋਨਾ ਵਾਇਰਸ ਪ੍ਰਤੀ ਸੰਵੇਦਨਸ਼ੀਲ ਹਨ। ਇਸ ਦੇ ਨਾਲ ਹੀ ਸਾਨੂੰ ਸਥਿਤੀ ’ਤੇ ਗੰਭੀਰਤਾ ਨਾਲ ਨਜ਼ਰ ਰੱਖਣੀ ਹੋਵੇਗੀ। ਦਵਾਈਆਂ ਨੂੰ ਤਿਆਰ ਰੱਖਣਾ ਹੋਵੇਗਾ ਤਾਂ ਜੋ ਕੋਈ ਵੀ ਨਵਾਂ ਵੇਰੀਐਂਟ ਆਵੇ ਤਾਂ ਅਸੀਂ ਉਸ ਨੂੰ ਰੋਕਣ ਦੇ ਯਤਨ ਤੇਜ਼ ਕਰ ਦਈਏ।
ਚੀਨੀ ਸੀ. ਡੀ. ਸੀ. ਦੀ ਵੈੱਬਸਾਈਟ ਤੋਂ ਮਿਲੀ ਜਾਣਕਾਰੀ ਅਨੁਸਾਰ 14 ਤੋਂ 20 ਅਪ੍ਰੈਲ ਦਰਮਿਆਨ ਕੋਰੋਨਾ ਦੇ 11 ਨਵੇਂ ਵੇਰੀਐਂਟ ਇਸ ਸਮੇਂ ਚੀਨ ’ਚ ਮੌਜੂਦ ਹਨ ਜਿਨ੍ਹਾਂ ਦੇ ਫੈਲਣ ਦਾ ਖਤਰਾ ਪੂਰੇ ਦੇਸ਼ ’ਚ ਬਣਿਆ ਹੋਇਆ ਹੈ। ਇਸ ਸਮੇਂ ਹਸਪਤਾਲਾਂ ’ਚ ਦਾਖਲ 275 ਨਵੇਂ ਵੇਰੀਐਂਟ ਵਾਲੇ ਮਾਮਲਿਆਂ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਪਰ ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਇਕ ਪਾਸੇ ਤਾਂ ਚੀਨ ਨੇ 3 ਸਾਲਾਂ ਤੱਕ ਲਗਾਤਾਰ ਸਖਤ ਲਾਕਡਾਊਨ ਲਾਇਆ ਅਤੇ ਉਸ ਤੋਂ ਬਾਅਦ ਅਚਾਨਕ ਸਭ ਕੁਝ ਖੋਲ੍ਹ ਦਿੱਤਾ। ਇਸ ਤੋਂ ਪਹਿਲਾਂ ਨਾ ਤਾਂ ਕੋਈ ਤਿਆਰੀ ਕੀਤੀ ਕਿ ਮਹਾਮਾਰੀ ਅੱਗੇ ਨਾ ਫੈਲੇ ਅਤੇ ਹੁਣ ਹਾਲਾਤ ਇੰਨੇ ਭਿਆਨਕ ਹੋ ਰਹੇ ਹਨ ਕਿ ਜੇ ਥੋੜ੍ਹੀ ਜਿਹੀ ਵੀ ਲਾਪ੍ਰਵਾਹੀ ਹੋਈ ਤਾਂ ਇਕ ਵਾਰ ਮੁੜ ਉਹੀ ਮਹਾਮਾਰੀ ਲੋਕਾਂ ’ਤੇ ਆਪਣਾ ਕਹਿਰ ਢਾਵੇਗੀ।
15 ਅਪ੍ਰੈਲ ਨੂੰ ਸੀ. ਡੀ. ਸੀ. ਨੇ 15 ਮਾਮਲੇ ਸਬੰਧੀ ਜਾਣਕਾਰੀ ਦਿੱਤੀ। ਇਨ੍ਹਾਂ ’ਚੋਂ 2 ਮਾਮਲੇ ਐੱਕਸ ਬੀ.ਬੀ. 1.16 1 ਵੇਰੀਐਂਟ ਹਨ। ਇਨ੍ਹਾਂ ਦੀ ਗਿਣਤੀ 42 ਤੱਕ ਵਧ ਚੁੱਕੀ ਹੈ। 5 ਮਾਮਲੇ ਐਕਸ ਬੀ.ਬੀ. 1.16 ਤੇ 16 ਮਾਮਲੇ ਐਕਸ ਬੀ.ਬੀ. 1.17 ਦੇ ਹਨ। ਹੁਣ ਦੇਖਣਾ ਇਹ ਹੈ ਕਿ ਚੀਨ ਅਸਲ ’ਚ ਕੋਰੋਨਾ ਮਹਾਮਾਰੀ ਨਾਲ ਕਿਵੇਂ ਨਜਿੱਠਦਾ ਹੈ ਕਿਉਂਕਿ ਇਸ ਬਿਮਾਰੀ ਨੂੰ ਸਮੁੱਚੀ ਦੁਨੀਆ ’ਤੇ ਚੀਨ ਨੇ ਹੀ ਫੈਲਾਇਆ ਹੈ ਜੋ ਹੁਣ ਉਸ ਦੇ ਆਪਣੇ ਲੋਕਾਂ ਦੀ ਜਾਨ ਲੈ ਰਹੀ ਹੈ।
ਭਾਰਤ ’ਚ ਵਧਦਾ-ਫੁਲਦਾ ਵਿਗਿਆਨ ਤੇ ਤਕਨਾਲੋਜੀ
NEXT STORY