ਐੱਚ. ਡੀ. ਐੱਫ. ਸੀ. ਬੈਂਕ ਦੇ ਐੱਮ. ਡੀ. ਅਤੇ ਸੀ. ਈ. ਓ. ਸ਼ਸ਼ੀਧਰ ਜਗਦੀਸ਼ ਨੇ ਇਕ ਇੰਟਰਵਿਊ ’ਚ ਦੱਸਿਆ ਕਿ ਅਤਾਨੂ ਚੱਕਰਵਰਤੀ ਦੀਆਂ ‘ਕਦਰਾਂ-ਕੀਮਤਾਂ ਅਤੇ ਨੈਤਿਕਤਾ’ ਦਾ ਹਵਾਲਾ ਦਿੰਦੇ ਹੋਏ ਚੇਅਰਮੈਨ ਦੇ ਅਹੁਦੇ ਤੋਂ ਅਸਤੀਫ਼ੇ ਤੋਂ ਬਾਅਦ, ਬੈਂਕ ਪਿਛਲੇ ਫ਼ੈਸਲਿਆਂ ਦੀ ਸਮੀਖਿਆ ਲਈ ਬੋਰਡ ਦੀਆਂ ਮੀਟਿੰਗਾਂ ਬੁਲਾਏਗਾ। ਬੈਂਕ ’ਚ ਕਮੀਆਂ ਨੂੰ ਦੂਰ ਕਰੇਗਾ, ਕੰਟਰੋਲ ਨੂੰ ਸਖ਼ਤ ਕਰੇਗਾ ਅਤੇ ਬਦਚਲਣੀ ਦੇ ਖ਼ਿਲਾਫ਼ ‘ਸਖ਼ਤੀ’ ਨਾਲ ਕਾਰਵਾਈ ਕਰੇਗਾ।
ਉਨ੍ਹਾਂ ਕਿਹਾ ਕਿ ਅਤੀਤ ’ਚ ਅਸੀਂ ਜਾਣਦੇ ਸੀ ਕਿ ਕਿਹੜੇ ਖੇਤਰਾਂ ’ਚ ਸੁਧਾਰ ਅਤੇ ਤਬਦੀਲੀ ਦੀ ਲੋੜ ਹੈ। ਇਹ ਮਾਮਲਾ ਕਿਸੇ ਭੂਤ ਨਾਲ ਲੜਨ ਵਰਗਾ ਹੈ। ਅਤਾਨੂ ਚੱਕਰਵਰਤੀ ਦੇ ਕਾਰਜਕਾਲ ’ਚ ਅਸੀਂ ਕਦੇ ਇਸ ਦੀ ਕਲਪਨਾ ਵੀ ਨਹੀਂ ਕੀਤੀ ਸੀ। 18 ਮਾਰਚ ਨੂੰ, ਜਦੋਂ ਅਸੀਂ ਉਨ੍ਹਾਂ ਦੇ ਅਸਤੀਫ਼ੇ ਦੇ ਮੁੱਦੇ ’ਤੇ ਉਨ੍ਹਾਂ ਨਾਲ ਗੱਲ ਕੀਤੀ, ਤਾਂ ਅਸੀਂ ਕਿਹਾ ਕਿ ਸਾਡੇ ਕੋਲ ਇਕ ਸਥਾਪਿਤ ਪ੍ਰਕਿਰਿਆ ਹੈ ਜਿਸ ਨੂੰ ਤੁਸੀਂ ਇੰਨੀ ਸਖ਼ਤੀ ਨਾਲ ਲਾਗੂ ਕੀਤਾ ਹੈ। ਜੇਕਰ ਤੁਹਾਡੀ ਕੋਈ ਚਿੰਤਾ ਹੈ, ਤਾਂ ਉਸ ਨੂੰ ਇੱਥੇ ਰੱਖੋ ਅਤੇ ਅਸੀਂ ਸਮੂਹਿਕ ਤੌਰ ’ਤੇ ਉਸ ਦਾ ਹੱਲ ਕਰਾਂਗੇ। ਇਸ ’ਤੇ ਉਨ੍ਹਾਂ ਕਿਹਾ, ਮੇਰੇ ਕੋਲ ਸਾਂਝਾ ਕਰਨ ਲਈ ਕੁਝ ਨਹੀਂ ਹੈ।
ਜਿਸ ਵਿਵਸਥਾ ’ਚ ਅਸੀਂ ਸਾਰੇ ਆਪਣੀ ਰਾਏ ਦਿੰਦੇ ਹਾਂ, ਉਸ ’ਚ ਨੈਤਿਕਤਾ ਜਾਂ ਨਿੱਜੀ ਕਦਰਾਂ-ਕੀਮਤਾਂ ਦੇ ਆਧਾਰ ’ਤੇ ਕੋਈ ਮੁੱਦਾ ਸ਼੍ਰੇਣੀਬੱਧ ਨਹੀਂ ਕੀਤਾ ਜਾ ਸਕਦਾ। ਕੁਝ ਗ਼ਲਤੀਆਂ ਹੋਈਆਂ ਹੋਣਗੀਆਂ, ਜਿਨ੍ਹਾਂ ਨੂੰ ਸੁਧਾਰਿਆ ਗਿਆ ਹੈ। ਕੀ ਇਨ੍ਹਾਂ ਮੁੱਦਿਆਂ ਨੂੰ ਸੁਲਝਾਉਣ ਦੇ ਮਾਮਲੇ ’ਚ ਪੂਰਨ ਸਹਿਮਤੀ ਹੈ? ਬਿਲਕੁਲ। ਕੀ ਕਾਰਵਾਈ ਦੀ ਲੋੜ ’ਚ ਕੋਈ ਫਰਕ ਹੈ? ਹਾਂ, ਸਾਡੇ ’ਚੋਂ ਕੁਝ ਨੂੰ ਲੱਗਦਾ ਹੈ ਕਿ ਪ੍ਰਤੀਕਿਰਿਆ ਉਚਿਤ ਹੈ, ਜਦਕਿ ਦੂਜਿਆਂ ਨੂੰ ਲੱਗਦਾ ਹੈ ਕਿ ਇਹ ਸਖਤ ਜਾਂ ਬਹੁਤ ਨਰਮ ਹੈ ਪਰ ਯਕੀਨ ਮੰਨੋ, ਅਜਿਹਾ ਕੁਝ ਵੀ ਨਹੀਂ ਹੈ ਜਿਸ ’ਤੇ ਧਿਆਨ ਨਾ ਦਿੱਤਾ ਗਿਆ ਹੋਵੇ।
ਤੁਹਾਨੂੰ ਕੀ ਲੱਗਦਾ ਹੈ ਕਿ ਉਨ੍ਹਾਂ ਨੇ ਅਜਿਹਾ ਕਿਉਂ ਕੀਤਾ? ਇਹ ਪੁੱਛਣ ’ਤੇ ਉਨ੍ਹਾਂ ਕਿਹਾ, ਕਾਸ਼ ਮੈਨੂੰ ਪਤਾ ਹੁੰਦਾ। ਕਾਸ਼ ਬੋਰਡ ਨੂੰ ਵੀ ਪਤਾ ਹੁੰਦਾ। ਠੀਕ ਅਗਲੇ ਦਿਨ, 19 ਤਾਰੀਖ਼ ਨੂੰ, ਚੱਕਰਵਰਤੀ ਨੇ ਇਕ ਗੱਲਬਾਤ ’ਚ ਕਿਹਾ ਕਿ ਉਨ੍ਹਾਂ ਦਾ ਅਸਤੀਫ਼ਾ ਸਾਧਾਰਨ ਪ੍ਰਕਿਰਿਆ ਸੀ ਅਤੇ ਬੈਂਕ ਦੇ ਸੰਚਾਲਨ ’ਚ ਕੋਈ ਗੜਬੜੀ ਨਹੀਂ ਹੈ। ਤਾਂ, ਅਜਿਹਾ ਲੱਗਦਾ ਹੈ ਕਿ ਉਨ੍ਹਾਂ ਨੇ ਆਪਣਾ ਰੁਖ਼ ਬਦਲ ਲਿਆ ਹੈ, ਸ਼ਾਇਦ ਇਹ ਸੋਚ ਕੇ ਕਿ ਉਨ੍ਹਾਂ ਨੇ ਕੁਝ ਅਜਿਹਾ ਕਰ ਦਿੱਤਾ ਹੈ, ਜੋ ਉਨ੍ਹਾਂ ਨੂੰ ਨਹੀਂ ਕਰਨਾ ਚਾਹੀਦਾ ਸੀ।
ਬਦਕਿਸਮਤੀ ਨਾਲ, ਨੁਕਸਾਨ ਹੋ ਚੁੱਕਾ ਹੈ ਅਤੇ ਸਾਨੂੰ ਇਸ ਦਾ ਸਾਹਮਣਾ ਕਰਨਾ ਪਵੇਗਾ। ਸਾਡਾ ਪ੍ਰਦਰਸ਼ਨ ਖ਼ੁਦ ਹੀ ਸਭ ਕੁਝ ਦੱਸ ਦੇਵੇਗਾ। ਹੋ ਸਕਦਾ ਹੈ ਕਿ ਉਹ ਕੁਝ ਨਵੇਂ ਮੁੱਦੇ ਉਠਾਉਣ। ਮੈਨੂੰ ਯਕੀਨ ਹੈ ਕਿ ਕੁਝ ਵੀ ਨਵਾਂ ਨਹੀਂ ਹੈ ਕਿਉਂਕਿ ਇਨ੍ਹਾਂ ਵਿਚੋਂ ਕਈ ਮੁੱਦਿਆਂ ਦਾ ਹੱਲ ਹੋ ਚੁੱਕਾ ਹੈ ਜਾਂ ਕੀਤਾ ਜਾ ਰਿਹਾ ਹੈ। ਜੇਕਰ ਕੋਈ ਬਿਲਕੁਲ ਨਵਾਂ ਮੁੱਦਾ ਉੱਠਦਾ ਹੈ ਤਾਂ ਅਸੀਂ ਉਸ ’ਤੇ ਵਿਚਾਰ ਕਰਾਂਗੇ।
ਸਾਲਾਂ ਤੋਂ ਉਨ੍ਹਾਂ ਅਤੇ ਪ੍ਰਬੰਧਨ ਵਿਚਕਾਰ ਮਤਭੇਦ ਰਹੇ ਹਨ ਅਤੇ ਮੈਨੂੰ ਇਸ ਗੱਲ ਦਾ ਕੋਈ ਅਫ਼ਸੋਸ ਨਹੀਂ ਹੈ, ਕਿਉਂਕਿ ਜੇਕਰ ਤੁਸੀਂ ਸੁਸ਼ਾਸਨ ਚਾਹੁੰਦੇ ਹੋ, ਤਾਂ ਤੁਸੀਂ ਸਿਰਫ਼ ਹਾਂ ’ਚ ਹਾਂ ਮਿਲਾਉਣ ਵਾਲੇ ਰਵੱਈਏ ਨਾਲ ਕੰਮ ਨਹੀਂ ਚਲਾ ਸਕਦੇ। ਤੁਹਾਡੇ ਆਪਣੇ ਵਿਚਾਰ ਹੋਣੇ ਚਾਹੀਦੇ ਹਨ। ਅਸੀਂ ਇਕ ਲੋਕਤੰਤਰਿਕ ਸੰਗਠਨ ਹਾਂ। ਜੇਕਰ ਅਸੀਂ ਸਭ ਮਿਲ ਕੇ ਦ੍ਰਿੜ੍ਹਤਾ ਨਾਲ ਮੰਨਦੇ ਹਾਂ ਕਿ ਕੁਝ ਚੀਜ਼ਾਂ ਸਹੀ ਨਹੀਂ ਹਨ, ਤਾਂ ਮੈਂ ਜ਼ਰੂਰ ਬੋਲਾਂਗਾ। ਦੇਖਿਆ ਜਾਵੇ ਤਾਂ ਮੈਂ ਹਮੇਸ਼ਾ ਦੂਜਿਆਂ ਤੋਂ ਰਾਏ ਲੈਣ ਵਾਲਾ ਹੀ ਰਿਹਾ ਹਾਂ, ਨਾ ਕਿ ਰਾਏ ਦੇਣ ਵਾਲਾ।
ਇਸ ਘਟਨਾ ਨਾਲ ਕੰਪਨੀ, ਬੋਰਡ, ਸ਼ੇਅਰਧਾਰਕਾਂ, ਵਿਸ਼ੇਸ਼ ਤੌਰ ’ਤੇ ਖੁਦਰਾ ਸ਼ੇਅਰਧਾਰਕਾਂ ’ਚ ਕਾਫ਼ੀ ਚਿੰਤਾ ਦਾ ਮਾਹੌਲ ਹੈ। ਮੈਂ ਕਾਨੂੰਨੀ ਮਾਹਿਰ ਨਹੀਂ ਹਾਂ ਪਰ ਫਿਲਹਾਲ ਅਸੀਂ ਇਕ ਕਾਨੂੰਨੀ ਮਾਹਿਰ ਨਾਲ ਸਾਰੀਆਂ ਸੰਭਾਵਨਾਵਾਂ ਦੀ ਜਾਂਚ ਕਰਨ ਲਈ ਸੰਪਰਕ ’ਚ ਹਾਂ। ਕੰਪਨੀ ਦੀ ਇਕ ਨਿਸ਼ਚਿਤ ਪ੍ਰਕਿਰਿਆ ਹੈ ਅਤੇ ਉਹ ਆਪਣਾ ਕੰਮ ਕਰੇਗੀ। ਅਸੀਂ ਅਗਲੇ ਮਹੀਨੇ ਕਈ ਬੋਰਡ ਬੈਠਕਾਂ ਆਯੋਜਿਤ ਕਰਾਂਗੇ ਤਾਂ ਜੋ ਸਮੇਂ-ਸਮੇਂ ’ਤੇ ਲਏ ਗਏ ਫ਼ੈਸਲਿਆਂ ’ਤੇ ਸਾਰੇ ਨਿਰਦੇਸ਼ਕਾਂ ਦੇ ਵਿਚਾਰ ਜਾਣ ਸਕੀਏ।
ਅਸੀਂ ਉਨ੍ਹਾਂ ਦੀ ਫਿਰ ਤੋਂ ਸਮੀਖਿਆ ਕਰਾਂਗੇ, ਕਾਰਵਾਈ ਬਿੰਦੂਆਂ ਦਾ ਮੁਲਾਂਕਣ ਕਰਾਂਗੇ ਅਤੇ ਦੇਖਾਂਗੇ ਕਿ ਸਾਨੂੰ ਕਿੱਥੇ ਸੁਧਾਰ ਕਰਨ ਦੀ ਲੋੜ ਹੈ। ਇਹ ਸਮੱਸਿਆ ਸਾਡੀ ਗ਼ਲਤੀ ਨਾਲ ਨਹੀਂ ਹੋਈ, ਇਹ ਸਾਡੇ ’ਤੇ ਥੋਪੀ ਗਈ ਹੈ। ਅਸੀਂ ਪਿਛਲੀਆਂ ਗੱਲਾਂ ਦਾ ਜਾਇਜ਼ਾ ਲਵਾਂਗੇ ਅਤੇ ਸਾਰੇ ਮੁੱਦਿਆਂ, ਮੌਜੂਦਾ ਜਾਂ ਨਵੇਂ, ਨੂੰ ਬਿਨਾਂ ਕੁਝ ਛੁਪਾਏ ਹੱਲ ਕਰਾਂਗੇ। ਜੇਕਰ ਇਹ ਸੰਚਾਲਨ ਸਬੰਧੀ ਮੁੱਦੇ ਹਨ, ਤਾਂ ਅਸੀਂ ਡਿਜ਼ਾਈਨ ਅਤੇ ਕੰਟਰੋਲ ਨੂੰ ਹੋਰ ਸਖ਼ਤ ਕਰਾਂਗੇ। ਜੇਕਰ ਇਹ ਆਚਰਣ ਸਬੰਧੀ ਮੁੱਦੇ ਹਨ, ਤਾਂ ਅਸੀਂ ਸਖ਼ਤ ਕਾਰਵਾਈ ਕਰਾਂਗੇ। ਮੈਂ ਮੰਨਦਾ ਹਾਂ ਕਿ ਇੰਨੇ ਵੱਡੇ ਅਦਾਰੇ ’ਚ ਸਮੱਸਿਆਵਾਂ ਤਾਂ ਹੋਣਗੀਆਂ ਹੀ ਪਰ ਸਾਡੇ ਕੋਲ ਉਨ੍ਹਾਂ ਨਾਲ ਨਜਿੱਠਣ ਲਈ ਮਜ਼ਬੂਤ ਪ੍ਰਣਾਲੀਆਂ ਹਨ।
ਕੀ ਤੁਸੀਂ ਇਸ ਸਾਲ ਅਕਤੂਬਰ ’ਚ ਆਪਣਾ ਦੂਜਾ ਕਾਰਜਕਾਲ ਖਤਮ ਹੋਣ ’ਤੇ ਤੀਜੇ ਕਾਰਜਕਾਲ ਲਈ ਸੀ. ਈ. ਓ. ਅਹੁਦੇ ਹੇਠ ਖ਼ੁਦ ਨੂੰ ਪੇਸ਼ ਕਰੋਗੇ, ਪੁੱਛਣ ’ਤੇ ਸ਼ਸ਼ੀਧਰ ਨੇ ਕਿਹਾ, ਮੈਂ ਸਮਰੱਥ ਅਤੇ ਇੱਛੁਕ ਹਾਂ ਪਰ ਮੈਂ ਚਾਹਾਂਗਾ ਕਿ ਬੋਰਡ ਪ੍ਰਕਿਰਿਆ ਪੂਰੀ ਕਰੇ ਅਤੇ ਫ਼ੈਸਲਾ ਲਵੇ। ਮੈਂ ਇੱਥੇ ਫ਼ੈਸਲਾ ਲੈਣ ਵਾਲਾ ਨਹੀਂ ਹਾਂ।
ਐੱਚ. ਡੀ. ਐੱਫ. ਸੀ. ਅਤੇ ਐੱਚ. ਡੀ. ਐੱਫ.ਸੀ. ਬੈਂਕ ਦੇ ਰਲੇਵੇਂ ਨੂੰ ਲੈ ਕੇ ਮੇਰਾ ਮੰਨਣਾ ਹੈ ਕਿ ਇਹ ਰਲੇਵਾਂ ਸਭ ਤੋਂ ਚੰਗਾ ਨਤੀਜਾ ਹੈ। ਹਾਊਸਿੰਗ ਉਦਯੋਗ ਅਗਲੇ ਕੁਝ ਸਾਲਾਂ ’ਚ ਵਿਕਾਸ ਨੂੰ ਰਫਤਾਰ ਦੇਵੇਗਾ। ਇਸ ਆਕਾਰ ਅਤੇ ਵੰਡ ਵਾਲੀ ਸੰਸਥਾ ਲਈ, ਜੇਕਰ ਅਸੀਂ ਗ੍ਰਹਿ ਕਰਜ਼ਾ ਪ੍ਰਦਾਨ ਨਹੀਂ ਕਰਦੇ, ਤਾਂ ਅਸੀਂ ਇਕ ਵਿਸ਼ਾਲ ਵਿਕਾਸ ਮੌਕੇ ਤੋਂ ਖੁੰਝ ਜਾਂਦੇ। ਮੌਜੂਦਾ ਸਮੇਂ ’ਚ ਅਸੀਂ ਆਪਣੇ ਲੱਗਭਗ 4-5 ਫੀਸਦੀ ਗਾਹਕਾਂ ਨੂੰ ਹੋਮ ਲੋਨ ਪ੍ਰਦਾਨ ਕਰਦੇ ਹਾਂ।
ਅਗਲੇ 5-10 ਸਾਲਾਂ ’ਚ ਇਹ 8-10 ਫੀਸਦੀ ਤੱਕ ਪਹੁੰਚ ਸਕਦਾ ਹੈ, ਜੋ ਆਪਣੇ ਆਪ ’ਚ ਇਕ ਵੱਡੀ ਪ੍ਰਾਪਤੀ ਹੋਵੇਗੀ। ਇਕ ਵਾਰ ਜਦੋਂ ਗਾਹਕ ਦਾ ਸਾਡੇ ਨਾਲ ਮੁਢਲਾ ਬੈਂਕਿੰਗ ਸਬੰਧ ਸ਼ੁਰੂ ਹੋ ਜਾਂਦਾ ਹੈ, ਤਾਂ ਸਮੇਂ ਦੇ ਨਾਲ ਇਸ ਦਾ ਪ੍ਰਭਾਵ ਬਹੁਤ ਮਹੱਤਵਪੂਰਨ ਹੋ ਜਾਂਦਾ ਹੈ। ਪੂਰਾ ਪ੍ਰਬੰਧਨ ਇਹ ਮੰਨਦਾ ਹੈ ਕਿ ਅਸੀਂ ਬਹੁਤ ਮੁਸ਼ਕਲਾਂ ਦਾ ਸਾਹਮਣਾ ਕੀਤਾ ਹੈ ਕਿਉਂਕਿ ਅਸੀਂ ਜਾਇਦਾਦ ਤਾਂ ਲਈ ਪਰ ਕੋਈ ਜਮ੍ਹਾ ਰਾਸ਼ੀ ਨਹੀਂ ਲਈ। ਕਰਜ਼ੇ ਦੀ ਘਟਦੀ ਗਿਣਤੀ ਦੀ ਪੂਰਤੀ ਲਈ ਜਮ੍ਹਾ ਰਾਸ਼ੀ ਵਧਾਉਣਾ ਆਸਾਨ ਨਹੀਂ ਹੈ, ਖ਼ਾਸਕਰ ਜੁਲਾਈ 2023 ਤੋਂ ਚੱਲ ਰਹੇ ਬੇਹੱਦ ਤੰਗ ਨਕਦੀ ਦੇ ਮਾਹੌਲ ’ਚ।
ਕੁਝ ਨਿਵੇਸ਼ਕ ਜਾਣਦੇ ਹਨ ਕਿ ਕੁਝ ਸਮੇਂ ਲਈ ਰਫਤਾਰ ਹੌਲੀ ਕਰਨੀ ਹੋਵੇਗੀ। ਉਨ੍ਹਾਂ ਨੇ ਕਿਹਾ ਹੈ, ‘‘ਅਸੀਂ ਇਸ ਮੁਸ਼ਕਿਲ ਸਮੇਂ ’ਚ ਉਨ੍ਹਾਂ ਦਾ ਸਾਥ ਦਿੱਤਾ ਹੈ, ਹੁਣ ਥੋੜ੍ਹਾ ਪਿੱਛੇ ਹਟ ਕੇ, ਜਲਦੀ ਰਿਟਰਨ ਪਾਉਣ ਲਈ ਕਿਤੇ ਹੋਰ ਨਿਵੇਸ਼ ਕਰੀਏ ਅਤੇ ਜਦੋਂ ਵਚਨਬੱਧਤਾਵਾਂ ’ਤੇ ਸਪਸ਼ਟਤਾ ਆਵੇ ਤਦ ਵਾਪਸ ਆਈਏ।’’
ਸੰਗਠਨ ਦੇ ਪੁਨਰਗਠਨ ਨੂੰ ਲੈ ਕੇ ਉਨ੍ਹਾਂ ਨੇ ਕਿਹਾ, ਅਸੀਂ ਸਮੇਂ-ਸਮੇਂ ’ਤੇ ਲੀਡਰਸ਼ਿਪ ਅਤੇ ਸੰਗਠਨ ਸੰਰਚਨਾ ਦੀ ਸਮੀਖਿਆ ਕਰਦੇ ਹਾਂ, ਹੁਣ ਤਬਦੀਲੀ ਦਾ ਸਮਾਂ ਆ ਗਿਆ ਹੈ ਪਰ ਇਹ ਸਾਰੀਆਂ ਆਮ ਕਾਰੋਬਾਰੀ ਰਣਨੀਤੀਆਂ ਹਨ, ਜੋ ਸਮੇਂ-ਸਮੇਂ ’ਤੇ ਸੰਗਠਨ ਨੂੰ ਊਰਜਾ ਪ੍ਰਦਾਨ ਕਰਦੀਆਂ ਹਨ।
ਸਾਡੀਆਂ ਕਦਰਾਂ-ਕੀਮਤਾਂ, ਨੈਤਿਕਤਾ ਅਤੇ ਸ਼ਾਸਨ ਸਿਧਾਂਤ ਬਰਕਰਾਰ ਹਨ। ਸੰਸਥਾ ਆਰਥਿਕ ਤੌਰ ’ਤੇ ਸੁਦ੍ਰਿੜ੍ਹ ਹੈ। ਰੋਜ਼ਮਰ੍ਹਾ ਦੇ ਮੁੱਦੇ, ਚਾਹੇ ਤਰੁੱਟੀਆਂ ਹੋਣ, ਚੂਕ ਹੋਵੇ ਜਾਂ ਆਚਰਣ ਸਬੰਧੀ ਸਮੱਸਿਆਵਾਂ, ਤੁਰੰਤ ਅਤੇ ਉਚਿਤ ਢੰਗ ਨਾਲ ਹੱਲ ਕੀਤੇ ਜਾਂਦੇ ਹਨ। ਭਵਿੱਖ ਉੱਜਵਲ ਹੈ, ਰਲੇਵੇਂ ਤੋਂ ਬਾਅਦ ਸਾਡੀ ਸਥਿਤੀ ਮਜ਼ਬੂਤ ਹੈ ਅਤੇ ਉਥਲ-ਪੁਥਲ ਦਾ ਸਾਹਮਣਾ ਕਰ ਰਹੇ ਵਿਸ਼ਵ ਦੇ ਹੋਰ ਹਿੱਸਿਆਂ ਦੇ ਮੁਕਾਬਲੇ ਭਾਰਤ ਦੇ ਪ੍ਰਤੀ ਸਾਡਾ ਦ੍ਰਿਸ਼ਟੀਕੋਣ ਬਹੁਤ ਹਾਂਪੱਖੀ ਹੈ। ਅਰਥਵਿਵਸਥਾ ਬਿਹਤਰ ਸਥਿਤੀ ’ਚ ਹੈ ਅਤੇ ਅਸੀਂ ਅਗਲੇ ਕੁਝ ਸਾਲਾਂ ’ਚ ਮਿਲਣ ਵਾਲੇ ਮੌਕਿਆਂ ਦਾ ਲਾਭ ਉਠਾਉਣ ਲਈ ਸਭ ਤੋਂ ਉੱਤਮ ਸਥਿਤੀ ’ਚ ਹਾਂ।
ਸੰਗੀਤਾ ਮਹਿਤਾ
ਦੁਖਦਾਈ ਨਤੀਜਿਆਂ ’ਤੇ ਪਹੁੰਚਦੇ ਲਿਵ-ਇਨ ਰਿਲੇਸ਼ਨਸ਼ਿਪ!
NEXT STORY 
