ਸਪੋਰਟਸ ਡੈਸਕ- ਰਾਸ਼ਟਰੀ ਖੇਡਾਂ ਵਿੱਚ ਡਿਸਕਸ ਥ੍ਰੋਅ ਵਿੱਚ ਸੋਨ ਤਗਮਾ ਜੇਤੂ ਗਗਨਦੀਪ ਸਿੰਘ ਸਮੇਤ ਕਈ ਖਿਡਾਰੀਆਂ 'ਤੇ ਰਾਸ਼ਟਰੀ ਡੋਪਿੰਗ ਵਿਰੋਧੀ ਏਜੰਸੀ (ਨਾਡਾ) ਨੇ ਤਿੰਨ ਸਾਲ ਦੀ ਪਾਬੰਦੀ ਲਗਾਈ ਹੈ। ਇਨ੍ਹਾਂ ਖਿਡਾਰੀਆਂ ਨੇ ਡੋਪਿੰਗ ਦੇ ਦੋਸ਼ ਲੱਗਣ ਦੇ 20 ਦਿਨਾਂ ਦੇ ਅੰਦਰ ਆਪਣਾ ਅਪਰਾਧ ਸਵੀਕਾਰ ਕਰ ਲਿਆ ਸੀ, ਜਿਸ ਕਾਰਨ ਉਨ੍ਹਾਂ ਦੀ ਸਜ਼ਾ ਚਾਰ ਸਾਲ ਦੀ ਬਜਾਏ ਤਿੰਨ ਸਾਲ ਕਰ ਦਿੱਤੀ ਗਈ ਸੀ।
ਗਗਨਦੀਪ ਸਿੰਘ, ਜੋ ਫੌਜ ਦੀ ਨੁਮਾਇੰਦਗੀ ਕਰਦੇ ਹਨ, ਨੇ 12 ਫ਼ਰਵਰੀ ਨੂੰ ਉੱਤਰਾਖੰਡ ਵਿੱਚ ਹੋਈ ਰਾਸ਼ਟਰੀ ਖੇਡਾਂ ਵਿੱਚ 55.01 ਮੀਟਰ ਦੀ ਸਭ ਤੋਂ ਵਧੀਆ ਥਰੋ ਨਾਲ ਪੁਰਸ਼ਾਂ ਦੇ ਡਿਸਕਸ ਥਰੋ ਮੁਕਾਬਲੇ ਵਿੱਚ ਸੋਨਾ ਜਿੱਤਿਆ ਸੀ। ਇਸ ਤੋਂ ਬਾਅਦ ਡੋਪ ਟੈਸਟ ਵਿੱਚ ਉਹ ਪਾਜ਼ਿਟਿਵ ਪਾਏ ਗਏ। ਸੈਂਪਲ ਵਿੱਚ 'ਟੈਸਟੋਸਟੇਰੋਨ ਮੈਟਾਬੋਲਾਈਟਸ' ਦੀ ਪੁਸ਼ਟੀ ਹੋਣ 'ਤੇ ਉਨ੍ਹਾਂ ਨੂੰ ਅਸਥਾਈ ਤੌਰ 'ਤੇ ਸਸਪੈਂਡ ਕਰ ਦਿੱਤਾ ਗਿਆ ਸੀ। 30 ਸਾਲਾ ਗਗਨਦੀਪ 'ਤੇ ਪਾਬੰਦੀ ਦਾ ਸਮਾਂ 19 ਫ਼ਰਵਰੀ 2025 ਤੋਂ ਸ਼ੁਰੂ ਹੋਵੇਗਾ।
ਨਾਡਾ ਦੇ ਨਿਯਮਾਂ ਅਨੁਸਾਰ, ਪਹਿਲੀ ਵਾਰ ਡੋਪਿੰਗ ਦੇ ਦੋਸ਼ੀ ਖਿਡਾਰੀ ਨੂੰ ਵੱਧ ਤੋਂ ਵੱਧ ਚਾਰ ਸਾਲ ਦੀ ਪਾਬੰਦੀ ਹੁੰਦੀ ਹੈ, ਪਰ ਆਰਟੀਕਲ 10.8 (ਰਿਜ਼ਲਟ ਮੈਨੇਜਮੈਂਟ ਐਗਰੀਮੈਂਟ) ਹੇਠ ਜੇ ਖਿਡਾਰੀ ਜਲਦੀ ਆਪਣੀ ਗਲਤੀ ਮੰਨ ਲੈਂਦਾ ਹੈ ਤਾਂ ਸਜ਼ਾ ਘਟ ਸਕਦੀ ਹੈ। ਗਗਨਦੀਪ ਦਾ ਰਾਸ਼ਟਰੀ ਖੇਡਾਂ ਦਾ ਤਮਗਾ ਵਾਪਸ ਲਿਆ ਜਾਵੇਗਾ ਅਤੇ ਸੰਭਾਵਨਾ ਹੈ ਕਿ ਹਰਿਆਣਾ ਦੇ ਨਿਰਭਯ ਸਿੰਘ ਦਾ ਚਾਂਦੀ ਦਾ ਤਮਗਾ ਹੁਣ ਸੋਨੇ ਵਿੱਚ ਬਦਲ ਜਾਵੇ।
ਇਸ ਪ੍ਰਾਵਧਾਨ ਦਾ ਲਾਭ ਹੋਰ ਐਥਲੈਟਿਕ ਖਿਡਾਰੀਆਂ ਸਚਿਨ ਕੁਮਾਰ ਅਤੇ ਜੈਨੂ ਕੁਮਾਰ ਨੂੰ ਵੀ ਮਿਲਿਆ ਹੈ। ਸਚਿਨ ਦੀ ਤਿੰਨ ਸਾਲ ਦੀ ਪਾਬੰਦੀ 10 ਫ਼ਰਵਰੀ ਤੋਂ, ਜਦਕਿ ਜੈਨੂ ਦੀ 20 ਫ਼ਰਵਰੀ ਤੋਂ ਸ਼ੁਰੂ ਹੋਈ। ਇਸੇ ਤਰ੍ਹਾਂ ਜੂਡੋ ਖਿਡਾਰੀਆਂ ਮੋਨਿਕਾ ਚੌਧਰੀ ਅਤੇ ਨੰਦਿਨੀ ਵਤਸ, ਪੈਰਾ ਪਾਵਰਲਿਫਟਰ ਉਮੇਸ਼ਪਾਲ ਸਿੰਘ ਅਤੇ ਸੈਮੁਅਲ ਵਾਨਲਾਲਤਨਪੁਇਆ, ਵੇਟਲਿਫਟਰ ਕਵਿੰਦਰ, ਕਬੱਡੀ ਖਿਡਾਰੀ ਸ਼ੁਭਮ ਕੁਮਾਰ, ਕੁਸ਼ਤੀਬਾਜ਼ ਮੁਗਲੀ ਸ਼ਰਮਾ, ਵੂਸ਼ੂ ਖਿਡਾਰੀ ਅਮਨ ਅਤੇ ਰਾਹੁਲ ਤੋਮਰ, ਨਾਲ ਹੀ ਇਕ ਨਾਬਾਲਿਗ ਕੁਸ਼ਤੀਬਾਜ਼ ਨੂੰ ਵੀ ਸਜ਼ਾ ਘਟਣ ਦਾ ਫ਼ਾਇਦਾ ਮਿਲਿਆ। ਜ਼ਿਆਦਾਤਰ ਖਿਡਾਰੀਆਂ ਨੂੰ ਇਸ ਸਾਲ ਦੀ ਸ਼ੁਰੂਆਤ ਵਿੱਚ ਹੀ ਨਾਡਾ ਵੱਲੋਂ ਅਸਥਾਈ ਤੌਰ 'ਤੇ ਸਸਪੈਂਡ ਕੀਤਾ ਗਿਆ ਸੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਓਲੰਪਿਕ ਮੇਜ਼ਬਾਨੀ ਲਈ ਆਈ. ਓ. ਸੀ. ਨਾਲ ਲਗਾਤਾਰ ਗੱਲਬਾਤ ਚੱਲ ਰਹੀ ਹੈ : ਖੇਡ ਮੰਤਰੀ
NEXT STORY 
