ਸਪੋਰਟਸ ਡੈਸਕ- ਭਾਰਤੀ ਕ੍ਰਿਕਟ ਪ੍ਰਸ਼ੰਸਕਾਂ ਲਈ ਆਉਣ ਵਾਲੀ 17 ਜੂਨ ਦੀ ਤਰੀਕ ਕਿਸੇ ਵੱਡੇ ਤਿਉਹਾਰ ਤੋਂ ਘੱਟ ਨਹੀਂ ਹੋਣ ਵਾਲੀ। ਇਸ ਦਿਨ ਕ੍ਰਿਕਟ ਦਾ ਅਜਿਹਾ ਰੋਮਾਂਚ ਦੇਖਣ ਨੂੰ ਮਿਲੇਗਾ ਜਿਸਦੀ ਕਲਪਨਾ ਪ੍ਰਸ਼ੰਸਕ ਹਮੇਸ਼ਾ ਕਰਦੇ ਹਨ। ਇਕ ਹੀ ਦਿਨ 'ਚ ਭਾਰਤ ਦੀਆਂ 3 ਵੱਖ-ਵੱਖ ਟੀਮਾਂ ਵੱਖ-ਵੱਖ ਮੈਦਾਨਾਂ 'ਤੇ ਚੁਣੌਤੀ ਪੇਸ਼ ਕਰਦੀਆਂ ਨਜ਼ਰ ਆਉਣਗੀਆਂ। ਪੁਰਸ਼ਾਂ ਦੀ ਸੀਨੀਅਰ ਟੀਮ ਤੋਂ ਲੈ ਕੇ ਮਹਿਲਾ ਟੀਮ ਅਤੇ ਇੰਡੀਆ-ਏ ਤਕ, ਸਾਰੇ ਐਕਸ਼ਨ 'ਚ ਹੋਣਗੇ। ਇਨ੍ਹਾਂ 'ਚੋਂ 2 ਮੈਚ ਤਾਂ ਭਾਰਤ ਅਤੇ ਅਫਗਾਨਿਸਤਾਨ ਦੀਆਂ ਟੀਮਾਂ ਵਿਚਾਲੇ ਖੇਡੇ ਜਾਣਗੇ।
ਦਿਨ ਦੇ ਪਹਿਲੇ ਮੈਚ 'ਚ ਭਾਰਤ ਦੀ ਨੌਜਵਾਨ ਬ੍ਰਿਗੇਡ ਯਾਨੀ ਇੰਡੀਆ-ਏ ਦੀ ਟੀਮ ਮੈਦਾਨ 'ਤੇ ਉਤਰੇਗੀ। ਸ਼੍ਰੀਲੰਕਾ 'ਚ ਖੇਡੀ ਜਾ ਰਹੀ ਟ੍ਰਾਈ ਸੀਰੀਜ਼ 'ਚ ਇੰਡੀਆ-ਏ ਦਾ ਸਾਹਮਣਾ ਅਫਗਾਨਿਸਤਾਨ ਦੀ ਨੌਜਵਾਨ ਟੀਮ ਨਾਲ ਹੋਵੇਗਾ। ਇਹ ਮੈਚ ਭਾਰਤੀ ਸਮੇਂ ਅਨੁਸਾਰ ਸਵੇਰੇ 10 ਵਜੇ ਸ਼ੁਰੂ ਹੋਵੇਗਾ, ਜਿਸ ਨਾਲ ਪ੍ਰਸ਼ੰਸਕਾਂ ਦੇ ਦਿਨ ਦੀ ਸ਼ੁਰੂਆਤ ਕ੍ਰਿਕਟ ਦੇ ਮਜ਼ੇ ਨਾਲ ਹੋਵੇਗੀ।
ਦੁਪਹਿਰ ਹੁੰਦੇ-ਹੁੰਦੇ ਸੀਨੀਅਰ ਪੁਰਸ਼ ਟੀਮ ਕਮਾਨ ਸੰਭਾਲੇਗੀ। ਸ਼ੁੱਭਮਨ ਗਿੱਲ ਦੀ ਅਗਵਾਈ 'ਚ ਭਾਰਤੀ ਟੀਮ ਅਫਗਾਨਿਸਤਾਨ ਖਿਲਾਫ 3 ਮੈਚਾਂ ਦੀ ਵਨਡੇਅ ਸੀਰੀਜ਼ ਦਾ ਦੂਜਾ ਮੈਚ ਖੇਡਣ ਉਤਰੇਗੀ। ਸੀਰੀਜ਼ ਦਾ ਇਹ ਅਹਿਮ ਮੈਚ ਲਖਨਊ ਦੇ ਅਟਲ ਬਿਹਾਰੀ ਵਾਜਪਾਈ ਇਕਾਨਾ ਸਟੇਡੀਅਮ 'ਚ ਖੇਡਿਆ ਜਾਵੇਗਾ। ਇਸ ਮੈਚ ਦੀ ਸ਼ੁਰੂਆਤ ਦੁਪਹਿਰ 1:30 ਵਜੇ ਹੋਵੇਗੀ। ਸੀਰੀਜ਼ 'ਚ ਜੇਤੂ ਬੜ੍ਹਤ ਦੇ ਇਰਾਦੇ ਨਾਲ ਭਾਰਤੀ ਖਿਡਾਰੀ ਮੈਦਾਨ 'ਚ ਆਪਣਾ ਜ਼ੋਹਰ ਦਿਖਾਉਣਗੇ। ਟੀਮ ਇੰਡੀਆ ਨੇ ਪਹਿਲੇ ਮੈਚ 'ਚ 7 ਵਿਕਟਾਂ ਨਾਲ ਜਿੱਤ ਹਾਸਲ ਕੀਤੀ ਸੀ, ਜੋ ਮੀਂਹ ਦੇ ਚਲਦੇ 25-25 ਓਵਰਾਂ ਦਾ ਹੀ ਖੇਡਿਆ ਗਿਆ ਸੀ।
T20 ਵਿਸ਼ਵ ਕੱਪ 'ਚ ਭਾਰਤ ਦਾ ਦੂਜਾ ਮੈਚ
ਸ਼ਾਮ ਦਾ ਸਮਾਂ ਮਹਿਲਾ ਕ੍ਰਿਕਟ ਦੇ ਨਾਂ ਰਹੇਗਾ। ਇੰਗਲੈਂਡ 'ਚ ਆਯੋਜਿਤ ਹੋ ਰਹੇ ਮਹਿਲਾ ਟੀ-20 ਵਿਸ਼ਵ ਕੱਪ 2026 'ਚ ਭਾਰਤੀ ਮਹਿਲਾ ਟੀਮ ਆਪਣਾ ਦੂਜਾ ਗਰੁੱਪ ਮੈਚ ਖੇਡਣ ਉਤਰੇਗੀ। ਇਸ ਮੈਚ 'ਚ ਭਾਰਤ ਦਾ ਸਾਹਮਣਾ ਨੀਦਰਲੈਂਡਸ ਦੀ ਟੀਮ ਨਾਲ ਹੋਵੇਗਾ। ਲੀਡਜ਼ ਦੇ ਹੈਡਿੰਗਲੇ ਕ੍ਰਿਕਟ ਗਰਾਊਂਡ 'ਤੇ ਖੇਡਿਆ ਜਾਣ ਵਾਲਾ ਇਹ ਮੈਚ ਭਾਰਤੀ ਸਮੇਂ ਅਨੁਸਾਰ ਸ਼ਾਮ 7:00 ਵਜੇ ਸ਼ੁਰੂ ਹੋਵੇਗਾ। ਟੀਮ ਇੰਡੀਆ ਦੀ ਨਜ਼ਰ ਲਗਾਤਾਰ ਦੂਜੀ ਜਿੱਤ 'ਤੇ ਹੋਵੇਗੀ, ਉਸਨੇ ਪਹਿਲੇ ਮੈਚ 'ਚ ਪਾਕਿਸਤਾਨ ਨੂੰ ਹਰਾਇਆ ਸੀ।
ਮੈਨੂੰ ਦਬਾਅ ਵਾਲੀਆਂ ਸਥਿਤੀਆਂ ਅਤੇ ICC ਟੂਰਨਾਮੈਂਟਾਂ ਵਿੱਚ ਖੇਡਣਾ ਪਸੰਦ ਹੈ : ਦੀਪਤੀ ਸ਼ਰਮਾ
NEXT STORY 
