ਲਾ ਨੂਸੀਆ (ਸਪੇਨ)–ਓਲੰਪਿਕ ਕਾਂਸੀ ਤਮਗਾ ਜੇਤੂ ਮੁੱਕੇਬਾਜ਼ ਲਵਲੀਨਾ ਬੋਰਗੋਹੇਨ ਤੇ ਵਿਸ਼ਵ ਕੱਪ ਸੋਨ ਤਮਗਾ ਜੇਤੂ ਸਚਿਨ ਸਿਵਾਚ ਨੇ ਸ਼ਾਨਦਾਰ ਜਿੱਤ ਦਰਜ ਕਰਦੇ ਹੋਏ ‘ਬਾਕਸੈਮ ਐਲੀਟ ਇੰਟਰਨੈਸ਼ਨਲ 2026’ ਦੇ ਫਾਈਨਲ ’ਚ ਜਗ੍ਹਾ ਬਣਾ ਲਈ। ਇਨ੍ਹਾਂ ਦੋਵਾਂ ਤੋਂ ਇਲਾਵਾ 10 ਹੋਰ ਭਾਰਤੀ ਮੁੱਕੇਬਾਜ਼ ਵੀ ਫਾਈਨਲ ’ਚ ਪਹੁੰਚੇ ਹਨ। ਸੋਨ ਤਮਗੇ ਦੀ ਦਾਵੇਦਾਰੀ ’ਚ ਭਾਰਤ ਦੀਆਂ 8 ਮਹਿਲਾਵਾਂ ਤੇ 4 ਪੁਰਸ਼ ਮੁੱਕੇਬਾਜ਼ ਸ਼ਾਮਲ ਹਨ।
ਲਵਲੀਨਾ ਨੇ 75 ਕਿ. ਗ੍ਰਾ. ਭਾਰ ਵਰਗ ਦੇ ਸੈਮੀਫਾਈਨਲ ’ਚ ਵੇਲਜ਼ ਦੀ ਰੋਜ਼ੀ ਐਕਲੇਸ ਨੂੰ 5-0 ਦੇ ਸਰਬਸੰਮਤੀ ਵਾਲੇ ਫੈਸਲੇ ਨਾਲ ਹਰਾ ਕੇ ਦਮਦਾਰ ਪ੍ਰਦਰਸ਼ਨ ਕੀਤਾ। ਮਹਿਲਾਵਾਂ ਦੇ 54 ਕਿ. ਗ੍ਰਾ. ਵਰਗ ’ਚ ਭਾਰਤ ਦਾ ਸੋਨ ਤਮਗਾ ਪੱਕਾ ਹੋ ਗਿਆ ਹੈ। ਏਸ਼ੀਆਈ ਖੇਡਾਂ ਦੀ ਕਾਂਸੀ ਤਮਗਾ ਜੇਤੂ ਪ੍ਰੀਤੀ ਪਵਾਰ ਨੇ ਸੈਮੀਫਾਈਨਲ ’ਚ ਫਰਾਂਸ ਦੀ ਆਇਆ ਹਮਦੀ ਨੂੰ 5-0 ਨਾਲ ਹਰਾਇਆ ਤੇ ਹੁਣ ਫਾਈਨਲ ’ਚ ਉਸ ਦਾ ਮੁਕਾਬਲਾ ਪੂਨਮ ਨਾਲ ਹੋਵੇਗਾ। ਪੂਨਮ ਨੇ ਇੰਗਲੈਂਡ ਦੀ ਆਈਵੀ-ਜੇਨ ਸਮਿਥ ਨੂੰ 4-1 ਨਾਲ ਹਰਾਇਆ। ਮਹਿਲਾਵਾਂ ’ਚ ਫਾਈਨਲ ’ਚ ਪਹੁੰਚਣ ਵਾਲੀਆਂ ਹੋਰ ਭਾਰਤੀ ਮੁੱਕੇਬਾਜ਼ਾਂ ’ਚ ਮੰਜੂ ਰਾਣੀ (48 ਕਿ. ਗ੍ਰਾ.), ਨੀਤੂ ਘੰਘਾਸ (51 ਕਿ. ਗ੍ਰਾ.), ਪ੍ਰਿਆ (60 ਕਿ. ਗ੍ਰਾ.), ਅਰੁੰਧਤੀ ਚੌਧਰੀ (70 ਕਿ. ਗ੍ਰਾ.), ਤੇ ਨੈਨਾ (80 ਕਿ. ਗ੍ਰਾ.) ਸ਼ਾਮਲ ਹਨ। ਸਾਰਿਆਂ ਨੇ ਆਪਣੇ-ਆਪਣੇ ਸੈਮੀਫਾਈਨਲ ਮੁਕਾਬਲੇ ਜਿੱਤੇ।
ਪੁਰਸ਼ ਵਰਗ ’ਚ 60 ਕਿ. ਗ੍ਰਾ. ’ਚ ਸਚਿਨ ਸਿਵਾਚ ਨੇ ਇੰਗਲੈਂਡ ਦੇ ਜੈਕ ਡ੍ਰਾਇਡਨ ਨੂੰ ਹਰਾ ਕੇ ਆਪਣੀ ਸ਼ਾਨਦਾਰ ਫਾਰਮ ਜਾਰੀ ਰੱਖੀ। ਇਸ ਤੋਂ ਇਲਾਵਾ ਦੀਪਕ (70 ਕਿ. ਗ੍ਰਾ.), ਆਕਾਸ਼ (75 ਕਿ. ਗ੍ਰਾ.) ਤੇ ਅੰਕੁਸ਼ (80 ਕਿ. ਗ੍ਰਾ.) ਨੇ ਵੀ ਜਿੱਤ ਦਰਜ ਕਰ ਕੇ ਭਾਰਤ ਲਈ ਫਾਈਨਲ ’ਚ ਜਗ੍ਹਾ ਬਣਾਈ।
ਅਫਗਾਨਿਸਤਾਨ ’ਚ ਕੌਮਾਂਤਰੀ ਕ੍ਰਿਕਟ ਖੇਡਣ ਦਾ ਸੁਪਨਾ WC ਖੇਡਣ ਤੋਂ ਵੀ ਵੱਡਾ : ਰਾਸ਼ਿਦ ਖਾਨ
NEXT STORY 
