ਸਪੋਰਟਸ ਡੈਸਕ- ਅਮਰੀਕਾ ਦੇ ਮਹਾਨ ਮੁੱਕੇਬਾਜ਼ ਮਾਈਕ ਟਾਇਸਨ ਨੇ ਲਗਭਗ 20 ਸਾਲਾਂ ਬਾਅਦ ਪੇਸ਼ੇਵਰ ਮੁੱਕੇਬਾਜ਼ੀ ਵਿੱਚ ਵਾਪਸੀ ਕੀਤੀ ਹੈ। ਹਾਲਾਂਕਿ, ਉਸਦੀ ਵਾਪਸੀ ਯਾਦਗਾਰੀ ਨਹੀਂ ਰਹੀ। ਉਸ ਨੂੰ ਜੈਕ ਪਾਲ ਦੇ ਖਿਲਾਫ ਮਹਾਮੁਕਾਬਲੇ 'ਚ 74-78 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਜੱਜਾਂ ਨੇ ਸਰਬਸੰਮਤੀ ਨਾਲ ਜੈਕ ਨੂੰ ਜੇਤੂ ਐਲਾਨ ਦਿੱਤਾ। ਟਾਇਸਨ ਪਹਿਲੇ ਦੋ ਗੇੜਾਂ ਵਿੱਚ ਅੱਗੇ ਸੀ, ਪਰ ਉਹ ਬਾਕੀ ਛੇ ਗੇੜਾਂ ਵਿੱਚ ਪਛੜ ਗਿਆ। ਜੇਕ ਅਤੇ ਟਾਇਸਨ ਦੀ ਉਮਰ ਵਿੱਚ 30 ਸਾਲ ਦਾ ਅੰਤਰ ਹੈ। 58 ਸਾਲ ਦੇ ਹੋਣ ਦੇ ਬਾਵਜੂਦ ਟਾਇਸਨ ਨੇ ਅੰਤ ਤੱਕ ਹਾਰ ਨਹੀਂ ਮੰਨੀ।
ਜੇਕਰ ਦੇਖਿਆ ਜਾਵੇ ਤਾਂ ਮਾਈਕ ਟਾਇਸਨ ਦੇ ਪੇਸ਼ੇਵਰ ਮੁੱਕੇਬਾਜ਼ੀ ਕਰੀਅਰ ਦੀ ਇਹ ਸੱਤਵੀਂ ਹਾਰ ਸੀ। ਇਸ ਤੋਂ ਪਹਿਲਾਂ ਟਾਇਸਨ ਨੇ ਆਪਣਾ ਆਖਰੀ ਪੇਸ਼ੇਵਰ ਮੈਚ ਸਾਲ 2005 'ਚ ਕੇਵਿਨ ਮੈਕਬ੍ਰਾਈਡ ਖਿਲਾਫ ਖੇਡਿਆ ਸੀ, ਜਿਸ 'ਚ ਉਹ ਵੀ ਹਾਰ ਗਏ ਸਨ। ਟਾਇਸਨ ਅਤੇ ਜੈੱਕ ਪਾਲ ਵਿਚਕਾਰ ਮੈਚ 16 ਨਵੰਬਰ (ਸ਼ਨੀਵਾਰ) ਨੂੰ ਆਰਲਿੰਗਟਨ (ਅਮਰੀਕਾ) ਦੇ ਏਟੀਐਂਡਟੀ ਸਟੇਡੀਅਮ ਵਿੱਚ ਸੀ।
ਇੰਝ ਰਿਹਾ ਦੋਵਾਂ ਵਿਚਾਲੇ ਦਾ ਮਹਾਮੁਕਾਬਲਾ
ਮਾਈਕ ਟਾਇਸਨ ਅਤੇ ਜੈਕ ਪਾਲ ਵਿਚਾਲੇ ਇਹ ਹੈਵੀਵੇਟ ਮੈਚ ਅੱਠ ਰਾਊਂਡਾਂ ਦਾ ਸੀ। ਮਾਈਕ ਟਾਇਸਨ ਨੇ ਪਹਿਲਾ ਦੌਰ 10-9 ਨਾਲ ਜਿੱਤਿਆ। ਦੂਜੇ ਦੌਰ ਵਿੱਚ ਵੀ ਉਸ ਨੇ 10-9 ਨਾਲ ਜਿੱਤ ਦਰਜ ਕੀਤੀ। ਜੈਕ ਪਾਲ ਨੇ ਤੀਜੇ ਦੌਰ ਵਿੱਚ ਵਾਪਸੀ ਕੀਤੀ ਅਤੇ ਕੁਝ ਠੋਸ ਪੰਚ ਲਾਏ। ਜੇਕ ਪਾਲ ਨੇ ਤੀਜਾ ਦੌਰ 10-9 ਨਾਲ ਜਿੱਤਿਆ। ਫਿਰ ਚੌਥਾ ਰਾਊਂਡ ਵੀ 10-9 ਨਾਲ ਪਾਲ ਦੇ ਹੱਕ ਵਿੱਚ ਰਿਹਾ। ਚੌਥੇ ਦੌਰ ਤੋਂ ਬਾਅਦ ਸਕੋਰ ਬਰਾਬਰ (38-38) ਰਿਹਾ।
ਪੰਜਵੇਂ ਗੇੜ ਵਿੱਚ, ਮਾਈਕ ਟਾਇਸਨ ਨੂੰ ਪਾਲ ਦੇ ਓਵਰਹੈਂਡ ਪੰਚ ਦੁਆਰਾ ਮੂੰਹ ਵਿੱਚ ਜ਼ੋਰਦਾਰ ਸੱਟ ਲੱਗੀ, ਜਿਸ ਨਾਲ ਉਸਦੀ ਗਤੀ ਪੂਰੀ ਤਰ੍ਹਾਂ ਟੁੱਟ ਗਈ। ਜੇਕ ਪਾਲ ਨੇ ਪੰਜਵਾਂ ਰਾਊਂਡ ਜਿੱਤ ਕੇ ਮੈਚ ਵਿੱਚ ਬੜ੍ਹਤ ਬਣਾ ਲਈ। ਫਿਰ ਪਾਲ ਨੇ ਛੇਵਾਂ, ਸੱਤਵਾਂ ਅਤੇ ਅੱਠਵਾਂ ਰਾਊਂਡ ਵੀ ਜਿੱਤਿਆ। ਮਾਈਕ ਟਾਇਸਨ ਨੂੰ ਇਸ ਮੈਚ ਤੋਂ 20 ਮਿਲੀਅਨ ਡਾਲਰ (ਕਰੀਬ 169 ਕਰੋੜ ਰੁਪਏ) ਮਿਲੇ ਹਨ। ਜਦੋਂ ਕਿ ਉਨ੍ਹਾਂ ਦੇ ਵਿਰੋਧੀ ਜੈਕ ਪਾਲ ਨੂੰ ਕਥਿਤ ਤੌਰ 'ਤੇ 40 ਮਿਲੀਅਨ ਡਾਲਰ (ਕਰੀਬ 338 ਕਰੋੜ ਰੁਪਏ) ਮਿਲੇ ਹਨ।
ਇਸ ਮੈਚ ਤੋਂ ਪਹਿਲਾਂ ਮਾਈਕ ਟਾਇਸਨ ਨੇ ਪੇਸ਼ੇਵਰ ਮੁੱਕੇਬਾਜ਼ ਵਜੋਂ 50 ਮੈਚ ਜਿੱਤੇ ਸਨ। ਜਦਕਿ ਉਹ ਸਿਰਫ਼ ਛੇ ਹੀ ਹਾਰੇ। ਸਾਲ 1987 ਵਿੱਚ, ਟਾਇਸਨ ਨੇ ਸਭ ਤੋਂ ਘੱਟ ਉਮਰ ਦੇ ਹੈਵੀਵੇਟ ਚੈਂਪੀਅਨ ਬਣਨ ਦੀ ਉਪਲਬਧੀ ਹਾਸਲ ਕੀਤੀ। ਉਦੋਂ ਉਹ ਸਿਰਫ਼ 20 ਸਾਲ ਦਾ ਸੀ। ਖਾਸ ਗੱਲ ਇਹ ਸੀ ਕਿ ਟਾਇਸਨ ਨੇ ਨਾਕਆਊਟ ਰਾਹੀਂ 44 ਮੈਚ ਜਿੱਤੇ। ਜਦੋਂ ਕਿ 27 ਸਾਲਾ ਜੈਕ ਪਾਲ ਯੂਟਿਊਬਰ ਤੋਂ ਪੇਸ਼ੇਵਰ ਮੁੱਕੇਬਾਜ਼ ਬਣ ਗਿਆ ਹੈ। ਉਸਨੇ ਸਾਲ 2020 ਵਿੱਚ ਪੇਸ਼ੇਵਰ ਮੁੱਕੇਬਾਜ਼ੀ ਦੀ ਸ਼ੁਰੂਆਤ ਕੀਤੀ। ਪਾਲ ਨੇ ਇਸ ਮੈਚ ਸਮੇਤ 12 ਵਿੱਚੋਂ 11 ਮੈਚ ਜਿੱਤੇ ਹਨ।
ਮਾਈਕਲ ਗੇਰਾਰਡ ਟਾਇਸਨ ਦਾ ਜਨਮ 30 ਜੂਨ, 1966 ਨੂੰ ਬਰੁਕਲਿਨ, ਨਿਊਯਾਰਕ ਵਿੱਚ ਹੋਇਆ ਸੀ। ਮਾਈਕ ਟਾਇਸਨ ਬਚਪਨ ਤੋਂ ਹੀ ਬਹੁਤ ਸ਼ਰਾਰਤੀ ਸੁਭਾਅ ਦਾ ਸੀ। ਕੁਝ ਲੋਕ ਟਾਇਸਨ ਦੇ ਬੋਲਣ ਕਾਰਨ ਉਸਦਾ ਮਜ਼ਾਕ ਉਡਾਉਂਦੇ ਸਨ ਅਤੇ ਟਾਇਸਨ ਅਜਿਹੇ ਲੋਕਾਂ ਨਾਲ ਲੜਦਾ ਸੀ। ਮਾਈਕ ਟਾਇਸਨ ਦੀਆਂ ਸ਼ਰਾਰਤਾਂ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ 13 ਸਾਲ ਦੀ ਉਮਰ ਤੱਕ ਉਸ ਨੂੰ 38 ਵਾਰ ਗ੍ਰਿਫਤਾਰ ਕੀਤਾ ਗਿਆ ਸੀ।
ਮਾਈਕ ਟਾਇਸਨ 1981 ਅਤੇ 1982 ਦੀਆਂ ਜੂਨੀਅਰ ਓਲੰਪਿਕ ਖੇਡਾਂ ਵਿੱਚ ਸੋਨ ਤਗਮਾ ਜਿੱਤਣ ਵਿੱਚ ਸਫਲ ਰਿਹਾ ਸੀ। ਫਿਰ 1984 ਵਿੱਚ ਨਿਊਯਾਰਕ ਵਿੱਚ ਹੋਏ ਨੇਸ਼ਨ ਗੋਲਡਨ ਗਲੋਵਜ਼ ਵਿੱਚ ਟਾਈਸਨ ਨੇ ਜੋਨਾਥਨ ਲਿਟਾ ਨੂੰ ਹਰਾ ਕੇ ਸੋਨ ਤਗ਼ਮਾ ਜਿੱਤਿਆ। ਹੌਲੀ-ਹੌਲੀ ਮਾਈਕ ਟਾਇਸਨ ਨੇ ਮੁੱਕੇਬਾਜ਼ੀ ਵਿੱਚ ਆਪਣਾ ਦਬਦਬਾ ਕਾਇਮ ਕਰਨਾ ਸ਼ੁਰੂ ਕਰ ਦਿੱਤਾ। ਟਾਇਸਨ ਨੇ ਸਿਰਫ 18 ਸਾਲ ਦੀ ਉਮਰ ਵਿੱਚ 1985 ਵਿੱਚ ਪੇਸ਼ੇਵਰ ਮੁੱਕੇਬਾਜ਼ੀ ਦੀ ਸ਼ੁਰੂਆਤ ਕੀਤੀ ਸੀ।
ਵਿਵਾਦਾਂ 'ਚ ਵੀ ਰਹੇ ਹਨ ਮਾਈਕ ਟਾਇਸਨ
ਮੁੱਕੇਬਾਜ਼ੀ ਦੇ ਨਾਲ-ਨਾਲ ਮਾਈਕ ਟਾਇਸਨ ਲਗਾਤਾਰ ਵਿਵਾਦਾਂ 'ਚ ਰਹੇ। 1992 ਵਿੱਚ, ਮਾਈਕ ਟਾਇਸਨ ਨੂੰ ਬਲਾਤਕਾਰ ਦਾ ਦੋਸ਼ੀ ਠਹਿਰਾਇਆ ਗਿਆ ਸੀ ਅਤੇ ਛੇ ਸਾਲ ਦੀ ਸਜ਼ਾ ਸੁਣਾਈ ਗਈ ਸੀ। ਹਾਲਾਂਕਿ ਤਿੰਨ ਸਾਲ ਬਾਅਦ ਹੀ ਉਸ ਨੂੰ ਪੈਰੋਲ 'ਤੇ ਰਿਹਾਅ ਕਰ ਦਿੱਤਾ ਗਿਆ ਸੀ। 1997 ਵਿੱਚ ਇੱਕ ਮੈਚ ਦੌਰਾਨ, ਟਾਇਸਨ ਨੇ ਗੁੱਸੇ ਵਿੱਚ ਵਿਰੋਧੀ ਮੁੱਕੇਬਾਜ਼ ਇਵੇਂਡਰ ਹੋਲੀਫੀਲਡ ਦਾ ਕੰਨ ਕੱਟ ਦਿੱਤਾ। ਟਾਇਸਨ ਨੇ ਹੋਲੀਫੀਲਡ ਦੇ ਸੱਜੇ ਕੰਨ ਨੂੰ ਇੰਨੀ ਤਾਕਤ ਨਾਲ ਕੱਟਿਆ ਸੀ ਕਿ ਉਸ ਦਾ ਕੁਝ ਹਿੱਸਾ ਕੱਟ ਕੇ ਮੁੱਕੇਬਾਜ਼ੀ ਰਿੰਗ ਵਿੱਚ ਹੀ ਡਿੱਗ ਗਿਆ ਸੀ।
ਮਾਈਕ ਟਾਇਸਨ ਦੀ ਨਿੱਜੀ ਜ਼ਿੰਦਗੀ ਇੰਨੀ ਸਫਲ ਨਹੀਂ ਰਹੀ ਹੈ। ਮਾਈਕ ਟਾਇਸਨ ਹੁਣ ਤੱਕ ਤਿੰਨ ਵਾਰ ਵਿਆਹ ਕਰ ਚੁੱਕੇ ਹਨ ਅਤੇ ਅੱਠ ਬੱਚਿਆਂ ਦੇ ਪਿਤਾ ਬਣੇ ਹਨ। ਉਸਨੇ ਪਹਿਲਾ ਵਿਆਹ 1988 ਵਿੱਚ ਅਭਿਨੇਤਰੀ ਰੌਬਿਨ ਗਿਵੇਂਸ ਨਾਲ ਕੀਤਾ ਪਰ ਇੱਕ ਸਾਲ ਦੇ ਅੰਦਰ ਹੀ ਉਹਨਾਂ ਦਾ ਵਿਆਹ ਟੁੱਟ ਗਿਆ। ਫਿਰ 1997 ਵਿੱਚ, ਟਾਇਸਨ ਨੇ ਮੋਨਿਕਾ ਟਰਨਰ, ਜੋ ਕਿ ਪੇਸ਼ੇ ਤੋਂ ਇੱਕ ਡਾਕਟਰ ਸੀ, ਨਾਲ ਵਿਆਹ ਕੀਤਾ। ਬਾਅਦ ਵਿੱਚ 2003 ਵਿੱਚ, ਟਾਇਸਨ ਨੇ ਮੋਨਿਕਾ ਨਾਲ ਵੀ ਬ੍ਰੇਕਅੱਪ ਕਰ ਲਿਆ। ਸਾਲ 2009 ਵਿੱਚ, ਟਾਇਸਨ ਐਲ. ਸਪਾਈਸਰ ਨਾਲ ਵਿਆਹ ਕੀਤਾ ਜੋ ਅੱਜ ਤੱਕ ਜਾਰੀ ਹੈ। ਬਾਕਸਿੰਗ ਰਿੰਗ ਵਿੱਚ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਦੇ ਕਾਰਨ, ਟਾਇਸਨ ਨੂੰ 'ਆਇਰਨ ਮਾਈਕ', 'ਕਿਡ ਡਾਇਨਾਮਾਈਟ' ਅਤੇ 'ਦਿ ਬੈਡਸਟ ਮੈਨ ਆਨ ਦ ਪਲੈਨੇਟ' ਵਰਗੇ ਉਪਨਾਮ ਵੀ ਮਿਲੇ।
ਨੀਰਜ ਗੋਇਤ ਨੇ ਸ਼ਾਨਦਾਰ ਜਿੱਤ ਹਾਸਲ ਕੀਤੀ
ਮਾਈਕ ਟਾਇਸਨ ਅਤੇ ਜੇਕ ਪਾਲ ਦੇ ਮੈਚ ਤੋਂ ਪਹਿਲਾਂ ਭਾਰਤ ਦੇ ਨੀਰਜ ਗੋਇਤ ਦੀ ਤਾਕਤ ਦੇਖਣ ਨੂੰ ਮਿਲੀ। ਨੀਰਜ ਗੋਇਤ ਨੇ ਛੇ ਗੇੜ ਦੇ ਸੁਪਰ ਮਿਡਲਵੇਟ ਮੈਚ ਵਿੱਚ ਬ੍ਰਾਜ਼ੀਲ ਦੇ ਵਿੰਡਰਸਨ ਨੂਨੇਸ ਨੂੰ 60-54 ਨਾਲ ਹਰਾਇਆ। ਨੀਰਜ ਨੇ ਸ਼ੁਰੂਆਤੀ ਦੌਰ ਤੋਂ ਹੀ ਵਿੰਡਰਸਨ 'ਤੇ ਆਪਣਾ ਦਬਦਬਾ ਕਾਇਮ ਰੱਖਿਆ। ਨੀਰਜ ਗੋਇਤ ਭਾਰਤ ਦੇ ਹਰਿਆਣਾ ਰਾਜ ਨਾਲ ਸਬੰਧਤ ਹੈ ਅਤੇ ਉਸਨੇ ਆਪਣੇ ਕਰੀਅਰ ਵਿੱਚ ਕਈ ਪੁਰਸਕਾਰ ਜਿੱਤੇ ਹਨ। ਨੀਰਜ ਸਾਲ 2015, 2016 ਅਤੇ 2017 ਵਿੱਚ WBC ਏਸ਼ੀਅਨ ਚੈਂਪੀਅਨ ਰਹਿ ਚੁੱਕਾ ਹੈ। ਨੀਰਜ ਗੋਇਤ WBC ਰੈਂਕਿੰਗ 'ਚ ਜਗ੍ਹਾ ਬਣਾਉਣ ਵਾਲਾ ਪਹਿਲਾ ਭਾਰਤੀ ਮੁੱਕੇਬਾਜ਼ ਹੈ। ਨੀਰਜ ਨੇ ਪੇਸ਼ੇਵਰ ਮੁੱਕੇਬਾਜ਼ੀ 'ਚ ਹੁਣ ਤੱਕ 18 ਮੈਚ ਜਿੱਤੇ ਹਨ, ਜਦਕਿ ਚਾਰ ਹਾਰੇ ਹਨ।
ਭਾਰਤੀ ਮੁੱਕੇਬਾਜ਼ ਨੀਰਜ ਗੋਇਤ ਦੀ ਸ਼ਾਨਦਾਰ ਜਿੱਤ 'ਤੇ ਬਾਗੋ ਬਾਗ ਹੋਈ ਸਾਰਾ ਗੁਰਪਾਲ
NEXT STORY 
