ਪੂਰਬ-ਉੱਤਰ ਦੇ 3 ਚੋਣਾਂ ਵਾਲੇ ਸੂਬਿਆਂ ਤ੍ਰਿਪੁਰਾ, ਮੇਘਾਲਿਆ ਅਤੇ ਨਾਗਾਲੈਂਡ ’ਚ ਬੀਤੀ 16 ਅਤੇ 27 ਫਰਵਰੀ ਨੂੰ ਵੋਟਾਂ ਪਈਆਂ ਸਨ ਜਿਨ੍ਹਾਂ ’ਚ ਭਾਜਪਾ, ਕਾਂਗਰਸ ਅਤੇ ਖੱਬੇਪੱਖੀਆਂ ਦਾ ਵੱਕਾਰ ਦਾਅ ’ਤੇ ਲੱਗਾ ਹੋਇਆ ਸੀ।
2018 ਦੀਆਂ ਚੋਣਾਂ ’ਚ ਤ੍ਰਿਪੁਰਾ ’ਚ ਭਾਜਪਾ ਨੇ 60 ਸੀਟਾਂ ’ਚੋਂ 36 ਸੀਟਾਂ ਜਿੱਤ ਕੇ 35 ਸਾਲਾਂ ਦੇ ਖੱਬੇਪੱਖੀਆਂ ਦੇ ਸ਼ਾਸਨ ਨੂੰ ਖਤਮ ਕਰ ਕੇ ਆਪਣੀ ਸਰਕਾਰ ਬਣਾਉਣ ’ਚ ਸਫਲਤਾ ਹਾਸਲ ਕੀਤੀ ਸੀ। ਹਾਲਾਂਕਿ ਇਸ ਵਾਰ ਵੀ ਭਾਜਪਾ ਅਤੇ ਆਈ. ਪੀ. ਐੱਫ. ਟੀ. ਗਠਜੋੜ ਨੇ ਆਪਣੀ ਬੜ੍ਹਤ ਕਾਇਮ ਰੱਖੀ ਹੈ ਪਰ ਉਨ੍ਹਾਂ ਦੀਆਂ ਸੀਟਾਂ ਘਟ ਕੇ 31 ਰਹਿ ਗਈਆਂ ਹਨ। ਭਾਜਪਾ ਨੇ 30 ਅਤੇ ਆਈ. ਪੀ. ਐੱਫ. ਟੀ. ਨੇ 1 ਸੀਟ ਜਿੱਤੀ ਹੈ।
ਮੇਘਾਲਿਆ ਦੀਆਂ 59 ਸੀਟਾਂ ’ਚੋਂ ਪਿਛਲੀ ਵਾਰ ਭਾਜਪਾ ਨੇ 2 ਸੀਟਾਂ ਹੀ ਜਿੱਤੀਆਂ ਸਨ ਅਤੇ ਉਹ 21 ਸੀਟਾਂ ’ਤੇ ਜੇਤੂ ਆਪਣੀ ਸਹਿਯੋਗੀ ‘ਨੈਸ਼ਨਲ ਪੀਪਲਜ਼ ਪਾਰਟੀ’ (ਐੱਨ. ਪੀ. ਪੀ.) ਅਤੇ ਹੋਰਨਾਂ ਪਾਰਟੀਆਂ ਨਾਲ ਮਿਲ ਕੇ ਸਰਕਾਰ ’ਚ ਸ਼ਾਮਲ ਸੀ। ਇਸ ਵਾਰ ਵੀ ਭਾਜਪਾ 2 ਸੀਟਾਂ ਹੀ ਜਿੱਤ ਸਕੀ ਹੈ ਅਤੇ ਐੱਨ. ਪੀ. ਪੀ. 25 ਸੀਟਾਂ ਜਿੱਤ ਕੇ ਸਭ ਤੋਂ ਵੱਡੀ ਪਾਰਟੀ ਦੇ ਰੂਪ ’ਚ ਉਭਰੀ ਹੈ। ਉੱਥੇ ਅਜੇ ਤੱਕ ਲੰਗੜੀ ਵਿਧਾਨ ਸਭਾ ਦੇ ਸੰਕੇਤ ਮਿਲ ਰਹੇ ਹਨ।
ਨਾਗਾਲੈਂਡ ’ਚ ਪਿਛਲੀ ਵਾਰ ਐੱਨ. ਡੀ. ਪੀ. ਪੀ. ਨੇ 60 ’ਚੋਂ 18 ਸੀਟਾਂ ਜਿੱਤੀਆਂ ਸਨ ਜਦਕਿ ਭਾਜਪਾ ਨੇ 12 ਸੀਟਾਂ ਜਿੱਤ ਕੇ ਇਸ ਦੇ ਨਾਲ ਮਿਲ ਕੇ ਸਰਕਾਰ ਬਣਾਈ ਸੀ। ਇਸ ਵਾਰ ਸੂਬੇ ’ਚ ਐੱਨ. ਡੀ. ਪੀ. ਪੀ. 25 ਸੀਟਾਂ ਦੇ ਨਾਲ ਸਭ ਤੋਂ ਵੱਡੀ ਪਾਰਟੀ ਦੇ ਰੂਪ ’ਚ ਉਭਰੀ ਹੈ ਜਦਕਿ ਭਾਜਪਾ ਨੇ ਉੱਥੇ ਪਹਿਲਾਂ ਦੇ ਵਾਂਗ ਹੀ 12 ਸੀਟਾਂ ਹੀ ਜਿੱਤੀਆਂ ਹਨ।
ਪੂਰਬ-ਉੱਤਰ ਦੇ ਉਕਤ ਤਿੰਨਾਂ ਹੀ ਇਸਾਈ ਬਹੁਗਿਣਤੀ ਸੂਬਿਆਂ ’ਚ ਭਾਜਪਾ ਆਪਣੀ ਪਹਿਲਾਂ ਵਾਲੀ ਕਾਰਗੁਜ਼ਾਰੀ ਕਾਇਮ ਰੱਖਣ ’ਚ ਸਫਲ ਰਹੀ ਹੈ। ਇਸ ਦੇ ਪਿੱਛੇ ਅਤੀਤ ਦੇ ਵਿਕਾਸ ਕਾਰਜਾਂ, ਲੋਕਾਂ ਨੂੰ ਵੱਧ ਰਾਸ਼ਨ ਦੀ ਉਪਲੱਬਧਤਾ, ਸਵੱਛ ਭਾਰਤ ਅਭਿਆਨ ਦੇ ਅਧੀਨ ਟਾਇਲਟ ਆਦਿ ਦੇ ਨਿਰਮਣ ਲਈ ਸਮੱਗਰੀ ਦੇਣ ਆਦਿ ਦਾ ਹੱਥ ਰਿਹਾ।
ਕੁਲ ਮਿਲਾ ਕੇ ਜਿੱਥੇ ਇਹ ਚੋਣ ਕਾਂਗਰਸ ਅਤੇ ਖੱਬੇਪੱਖੀਆਂ ਦੇ ਲਈ ਨਿਰਾਸ਼ਾਜਨਕ ਸਿੱਧ ਹੋਈ ਉੱਥੇ ਹੀ ਇਨ੍ਹਾਂ ਚੋਣਾਂ ’ਚ ਮਮਤਾ ਬੈਨਰਜੀ ਦੀ ਵੀ ਪ੍ਰੀਖਿਆ ਹੋਈ ਜਿਨ੍ਹਾਂ ਨੇ ਪਹਿਲੀ ਵਾਰ ਪੱਛਮੀ ਬੰਗਾਲ ਤੋਂ ਬਾਹਰ ਮੇਘਾਲਿਆ ’ਚ ਚੋਣ ਲੜੀ ਅਤੇ ਉਨ੍ਹਾਂ ਦੀ ਪਾਰਟੀ ਤ੍ਰਿਣਮੂਲ ਕਾਂਗਰਸ 5 ਸੀਟਾਂ ਜਿੱਤਣ ’ਚ ਸਫਲ ਰਹੀ।
ਚੋਣ ਨਤੀਜਿਆਂ ਤੋਂ ਸਪੱਸ਼ਟ ਹੈ ਕਿ ਉੱਤਰ-ਪੂਰਬ ਦੇ ਉਕਤ ਸੂਬਿਆਂ ਦੀ ਸੱਤਾ ’ਤੇ ਕਾਬਜ਼ ਕਿਸੇ ਹੱਦ ਤੱਕ ਭਾਜਪਾ ਆਪਣੀ ਪੈਠ ਕਾਇਮ ਰੱਖਣ ’ਚ ਸਫਲ ਹੋਈ ਹੈ। ਇਨ੍ਹਾਂ ਚੋਣਾਂ ਦੇ ਨਤੀਜਿਆਂ ਨੇ ਇਸੇ ਸਾਲ ਹੋਣ ਵਾਲੀਆਂ 6 ਹੋਰਨਾਂ ਸੂਬਿਆਂ ਦੀਆਂ ਵਿਧਾਨ ਸਭਾ ਅਤੇ 2024 ਦੀਆਂ ਲੋਕ ਸਭਾ ਚੋਣਾਂ ’ਚ ਹਵਾ ਦੇ ਰੁਖ ਦਾ ਸੰਕੇਤ ਵੀ ਦੇ ਦਿੱਤਾ ਹੈ।
-ਵਿਜੇ ਕੁਮਾਰ
ਨਸ਼ਾ ਸਮੱਗਲਿੰਗ ਦੇ ਲਈ ਐਂਬੂਲੈਂਸਾਂ, ਪੁਲਸ ਦੇ ਸਟਿੱਕਰ ਲੱਗੇ ਵਾਹਨਾਂ, ਕਬਾੜ ਢੋਣ ਵਾਲੀਆਂ ਰੇਹੜੀਆਂ ਦੀ ਵਰਤੋਂ
NEXT STORY 
