ਇਨ੍ਹੀਂ ਦਿਨੀਂ ਜਿੱਥੇ ਕੇਂਦਰ ਤੇ ਸੂਬਾ ਸਰਕਾਰਾਂ ਨੇ ਨਸ਼ਾ ਸਮੱਗਲਰਾਂ ਦੇ ਵਿਰੁੱਧ ਮੁਹਿੰਮ ਛੇੜ ਰੱਖੀ ਹੈ ਉੱਥੇ ਹੀ ਨਸ਼ਾ ਸਮੱਗਲਰ ਵੀ ਸਮੱਗਲਿੰਗ ਦੇ ਨਵੇਂ-ਨਵੇਂ ਢੰਗ ਅਪਣਾ ਕੇ ਆਪਣਾ ਧੰਦਾ ਜਾਰੀ ਰੱਖ ਰਹੇ ਹਨ ਜੋ ਹੇਠਲੀਆਂ ਸਿਰਫ 4 ਦਿਨਾਂ ਦੀਆਂ ਉਦਾਹਰਣਾਂ ਤੋਂ ਸਪੱਸ਼ਟ ਹੈ :
* 26 ਫਰਵਰੀ ਨੂੰ ਹਿਮਾਚਲ ਪ੍ਰਦੇਸ਼ ’ਚ ਬੜਸਰ ਪੁਲਸ ਨੇ ਨਿੱਜੀ ਹਸਪਤਾਲ ਦੀ ਐਂਬੂਲੈਂਸ ’ਚੋਂ 14 ਗ੍ਰਾਮ ਚਿੱਟਾ ਬਰਾਮਦ ਕਰ ਕੇ ਉਸ ’ਚ ਸਵਾਰ ਫਾਰਮਾਸਿਸਟ ਅਤੇ ਡਰਾਈਵਰ ਨੂੰ ਗ੍ਰਿਫਤਾਰ ਕੀਤਾ ਜੋ ਐਂਬੂਲੈਂਸ ਦੇ ਰਾਹੀਂ ਬਾਹਰੀ ਸੂਬਿਆਂ ਤੋਂ ਚਿੱਟੇ ਦੀ ਖੇਪ ਹਿਮਾਚਲ ਪ੍ਰਦੇਸ਼ ’ਚ ਪਹੁੰਚਾਉਂਦੇ ਸਨ।
* 26 ਫਰਵਰੀ ਨੂੰ ਹੀ ਲੁਧਿਆਣਾ ’ਚ ਸੀ. ਆਈ. ਏ.-2 ਦੀ ਪੁਲਸ ਨੇ ਕਾਰ ’ਚ ‘ਪੁਲਸ’ ਦਾ ਸਟਿੱਕਰ ਲਗਾ ਕੇ ਨਸ਼ੇ ਦੀ ਸਮੱਗਲਿੰਗ ਕਰਨ ਵਾਲੇ 2 ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਕੇ ਉਨ੍ਹਾਂ ਦੇ ਕਬਜ਼ੇ ’ਚੋਂ 60 ਗ੍ਰਾਮ ਹੈਰੋਇਨ ਬਰਾਮਦ ਕੀਤੀ।
* 28 ਫਰਵਰੀ ਨੂੰ ਪੰਜਾਬ ’ਚ ਪਟਿਆਲਾ ਦੇ ਥਾਣਾ ਜੁਲਕਾ ਦੀ ਪੁਲਸ ਨੇ ਕਬਾੜ ਦੀ ਰੇਹੜੀ ’ਚ ਪਲਾਸਟਿਕ ਨਾਲ ਢੱਕ ਕੇ ਲਿਜਾਇਆ ਜਾ ਰਿਹਾ 20 ਕਿਲੋ ਗਾਂਜਾ ਬਰਾਮਦ ਕਰ ਕੇ ਇਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ।
* ਅਤੇ ਹੁਣ 1 ਮਾਰਚ ਨੂੰ ਓਡਿਸ਼ਾ ’ਚ ਕਟਕ ਪੁਲਸ ਨੇ ਇਕ ਬੋਲੈਰੋ ਕਾਰ ਰੋਕ ਕੇ ਉਸ ’ਚ ਬਣਾਏ ਇਕ ਸੀਕ੍ਰੇਟ ਚੈਂਬਰ ’ਚ ਲੁਕਾ ਕੇ ਰੱਖਿਆ ਸਾਢੇ 12 ਲੱਖ ਰੁਪਏ ਤੋਂ ਵੱਧ ਦਾ ਗਾਂਜਾ ਬਰਾਮਦ ਕਰ ਕੇ 2 ਸਮੱਗਲਰਾਂ ਨੂੰ ਗ੍ਰਿਫਤਾਰ ਕੀਤਾ।
ਵਰਨਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਬੀਤੇ ਸਾਲ 25 ਜੁਲਾਈ ਨੂੰ ਮੋਹਾਲੀ ਪੁਲਸ ਨੇ ਇਕ ਐਂਬੂਲੈਂਸ ’ਚ ਬਰੇਲੀ ਤੋਂ 8 ਕਿਲੋ ਅਫੀਮ ਲਿਆਉਣ ਵਾਲੇ 3 ਸਮੱਗਲਰਾਂ ਨੂੰ ਗ੍ਰਿਫਤਾਰ ਕੀਤਾ ਸੀ ਜਿਨ੍ਹਾਂ ’ਚੋਂ ਇਕ ਸਮੱਗਲਰ ਐਂਬੂਲੈਂਸ ’ਚ ਰੋਗੀ ਬਣ ਕੇ ਲੇਟਿਆ ਹੋਇਆ ਸੀ ਅਤੇ ਉਸ ਨੇ ਆਪਣੇ ਸਿਰਹਾਣੇ ਦੇ ਹੇਠਾਂ 8 ਕਿਲੋ ਅਫੀਮ ਰੱਖੀ ਹੋਈ ਸੀ।
ਐਂਬੂਲੈਂਸਾਂ ਦੀ ਵਰਤੋਂ ਰੋਗੀਆਂ ਦੀ ਜਾਨ ਬਚਾਉਣ ਲਈ ਹੁੰਦੀ ਹੈ ਪਰ ਹੁਣ ਕੁਝ ਸਮਾਜ ਵਿਰੋਧੀ ਤੱਤ ਇਨ੍ਹਾਂ ਦੀ ਵਰਤੋਂ ਲੋਕਾਂ ਤੱਕ ਮੌਤ ਦਾ ਸਾਮਾਨ ਪਹੁੰਚਾਉਣ ਲਈ ਕਰ ਰਹੇ ਹਨ। ਇਸੇ ਤਰ੍ਹਾਂ ਕੋਈ ਵਾਹਨਾਂ ’ਤੇ ਪੁਲਸ ਦਾ ਸਟਿੱਕਰ ਲਗਾ ਕੇ ਤਾਂ ਕੋਈ ਕਬਾੜ ਦੇ ਰੂਪ ’ਚ ਸਮੱਗਲਿੰਗ ਕਰ ਕੇ ਲੋਕਾਂ ਤੱਕ ਨਸ਼ਾ ਪਹੁੰਚਾ ਰਿਹਾ ਹੈ।
ਇਸ ਲਈ ਨਸ਼ਾ ਸਮੱਗਲਰਾਂ ਦੀਆਂ ਚਾਲਾਂ ਨੂੰ ਅਸਫਲ ਕਰਨ ਦੇ ਲਈ ਜਿੱਥੇ ਪੁਲਸ ਬਲਾਂ ਨੂੰ ਵੱਧ ਮੁਸਤੈਦ ਹੋਣ ਦੀ ਲੋੜ ਹੈ ਉਥੇ ਹੀ ਅਜਿਹੇ ਲੋਕਾਂ ਦੇ ਵਿਰੁੱਧ ਸਖਤ ਕਾਰਵਾਈ ਕਰਨੀ ਸਮੇਂ ਦੀ ਮੰਗ ਹੈ।
-ਵਿਜੇ ਕੁਮਾਰ
ਪੰਜਾਬ ’ਚ ਹੁਣ ਸਾਹਮਣੇ ਆਇਆ ਫਰਜ਼ੀ ਕਾਲਜਾਂ ਨੂੰ 39 ਕਰੋੜ ਰੁਪਏ ਦਾ ਵਜ਼ੀਫਾ ਘਪਲਾ
NEXT STORY 
