ਸਰਕਾਰ ਦੇ ਭਰਪੂਰ ਯਤਨਾਂ ਦੇ ਬਾਵਜੂਦ ਦੇਸ਼ ’ਚ ਅਪਰਾਧੀ ਅਨਸਰਾਂ ਦੀਆਂ ਸਰਗਰਮੀਆਂ ਲਗਾਤਾਰ ਜਾਰੀ ਹਨ। ਇਨ੍ਹਾਂ ਦੇ ਹੌਸਲੇ ਇੰਨੇ ਵਧ ਗਏ ਹਨ ਕਿ ਹੁਣ ਤਾਂ ਇਹ ਪੁਲਸ ਥਾਣਿਆਂ ਦੇ ਕੰਪਲੈਕਸਾਂ ਅਤੇ ਮਾਲਖਾਨਿਆਂ ਤੱਕ ’ਚ ਰੱਖੇ ਜ਼ਬਤਸ਼ੁਦਾ ਸਾਮਾਨ ਤੱਕ ’ਤੇ ਹੱਥ ਸਾਫ਼ ਕਰ ਰਹੇ ਹਨ ਅਤੇ ਇਸ ’ਚ ਕੁਝ ਪੁਲਸ ਮੁਲਾਜ਼ਮ ਵੀ ਸ਼ਾਮਲ ਪਾਏ ਜਾ ਰਹੇ ਹਨ, ਜਿਨ੍ਹਾਂ ਦੀਆਂ ਸਿਰਫ ਲਗਭਗ 5 ਮਹੀਨਿਆਂ ਦੀਆਂ ਘਟਨਾਵਾਂ ਹੇਠਾਂ ਦਰਜ ਹਨ :
* 22 ਜਨਵਰੀ ਨੂੰ ‘ਬਿਲਾਸਪੁਰ’ (ਛੱਤੀਸਗੜ੍ਹ) ਦੇ ਥਾਣਾ ਕੰਪਲੈਕਸ ’ਚ ਖੜ੍ਹੇ ਦਰਜਨਾਂ ਜ਼ਬਤ ਕੀਤੇ ਗਏ ਮੋਟਰਸਾਈਕਲਾਂ ’ਚੋਂ ਪੈਟਰੋਲ ਅਤੇ ਕੀਮਤੀ ਪਾਰਟਸ ਦੀ ਚੋਰੀ ਦਾ ਮਾਮਲਾ ਸਾਹਮਣੇ ਆਇਆ।
ਕੋਰਟ ਤੋਂ ਵਾਹਨ ਰਿਲੀਜ਼ ਹੋਣ ਦਾ ਹੁਕਮ ਲੈ ਕੇ ਪਹੁੰਚੇ ਪੀੜਤਾਂ ਨੇ ਸ਼ਿਕਾਇਤ ਕੀਤੀ ਕਿ ਥਾਣੇ ਦੇ ਅੰਦਰ ਸੁਰੱਖਿਅਤ ਖੜ੍ਹੀਆਂ ਉਨ੍ਹਾਂ ਦੀਆਂ ਗੱਡੀਆਂ ਦੇ ਟਾਇਰ, ਸਾਈਲੈਂਸਰ ਅਤੇ ਬੈਟਰੀਆਂ ਗਾਇਬ ਸਨ। ਲੋਕਾਂ ਦੇ ਵਿਰੋਧ ਤੋਂ ਬਾਅਦ ਥਾਣਾ ਇੰਚਾਰਜ ਨੇ ਰਾਤ ਦੀ ਗਸ਼ਤ ਵਧਾਉਣ ਅਤੇ ਕੰਪਲੈਕਸ ’ਚ ਨਵੇਂ ਸੀ. ਸੀ. ਟੀ. ਵੀ. ਕੈਮਰੇ ਲਗਾਉਣ ਦਾ ਭਰੋਸਾ ਦਿੱਤਾ।
* 10 ਮਾਰਚ ਨੂੰ ‘ਜੈਪੁਰ’ (ਰਾਜਸਥਾਨ) ’ਚ ਇਕ ਮਾਮਲੇ ਦੇ ਨਿਪਟਾਰੇ ਪਿੱਛੋਂ ਜਦੋਂ ਕੋਰਟ ਦੇ ਹੁਕਮ ’ਤੇ ਵਾਹਨ ਮਾਲਕ ਪੁਲਸ ਵਲੋਂ ਜ਼ਬਤ ਕੀਤੀ ਗਈ ਆਪਣੀ ਗੱਡੀ ਲੈਣ ਥਾਣਾ ਕੰਪਲੈਕਸ ’ਚ ਪਹੁੰਚਿਆ ਤਾਂ ਉਹ ਇਹ ਦੇਖ ਕੇ ਹੈਰਾਨ ਰਹਿ ਗਿਆ ਕਿ ਉਸਦੀ ਗੱਡੀ ਦੇ ਟਾਇਰ, ਬੈਟਰੀ ਅਤੇ ਇੰਜਣ ਦੇ ਕਈ ਹਿੱਸੇ ਗਾਇਬ ਸਨ।
* 10 ਅਪ੍ਰੈਲ ਨੂੰ ਹੀ ‘ਗਾਜ਼ੀਆਬਾਦ’ (ਉੱਤਰ ਪ੍ਰਦੇਸ਼) ਦੇ ‘ਭੋਜਪੁਰ’ ਥਾਣੇ ਦੇ ਮਾਲਖਾਨੇ ’ਚੋਂ 80,000 ਰੁਪਏ ਦੀ ਹੇਰਾਫੇਰੀ ਕਰਨ ਦੇ ਦੋਸ਼ ਹੇਠ ਥਾਣੇ ਦੇ ਹੈੱਡ ਮੁਨਸ਼ੀ ਗਜੇਂਦਰ ਸਿੰਘ ਵਿਰੁੱਧ ਕੇਸ ਦਰਜ ਕੀਤਾ ਗਿਆ।
* 12 ਜੂਨ ਨੂੰ ‘ਕਾਨਪੁਰ’ (ਉੱਤਰ ਪ੍ਰਦੇਸ਼) ਦੇ ‘ਗੋਵਿੰਦ ਨਗਰ’ ਥਾਣਾ ਮਾਲਖਾਨੇ ’ਚੋਂ ਜੂਏ ਅਤੇ ਸੱਟੇਬਾਜ਼ੀ ਦੇ ਮਾਮਲਿਆਂ ’ਚ ਜ਼ਬਤ ਕੀਤੇ ਗਏ 41 ਲੱਖ ਰੁਪਏ ਗਾਇਬ ਪਾਏ ਗਏ। ਇਹ ਮਾਮਲਾ ਨਵੇਂ ਮਾਲਖਾਨਾ ਇੰਚਾਰਜ ਵਲੋਂ ਜ਼ਿੰਮੇਵਾਰੀ ਸੰਭਾਲਣ ਸਮੇਂ ਸਾਹਮਣੇ ਆਇਆ। ਇਸ ਸਿਲਸਿਲੇ ’ਚ ਪੁਰਾਣੇ ਹੈੱਡ ਕਾਂਸਟੇਬਲ ‘ਦਿਨੇਸ਼ ਤਿਵਾੜੀ’ (ਜੋ ਲਖਨਊ ਟ੍ਰਾਂਸਫਰ ਹੋ ਚੁੱਕਾ ਸੀ) ਦੇ ਵਿਰੁੱਧ ਅਮਾਨਤ ’ਚ ਖਿਆਨਤ ਅਤੇ ਹੇਰਾਫੇਰੀ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ।
* 14 ਜੂਨ ਨੂੰ ‘ਕਾਨਪੁਰ’ ਦਿਹਾਤ (ਉੱਤਰ ਪ੍ਰਦੇਸ਼) ਦੇ ‘ਮੰਗਲਪੁਰ’ ਥਾਣੇ ਦੇ ਮਾਲਖਾਨੇ ’ਚੋਂ 443 ਜ਼ਬਤ ਵਸਤਾਂ ਗਾਇਬ ਪਾਈਆਂ ਗਈਆਂ। ਇਸ ਮਾਮਲੇ ’ਚ ਲਾਪ੍ਰਵਾਹੀ ਅਤੇ ਹੇਰਾਫੇਰੀ ਦੇ ਦੋਸ਼ ਹੇਠ ਤਤਕਾਲੀ ਮਾਲਖਾਨਾ ਇੰਚਾਰਜ ਅਤੇ ਮੌਜੂਦਾ ਉਪ-ਨਿਰੀਖਕ ਰਾਜੇਸ਼ ਸਿੰਘ ਨੂੰ ਪੁਲਸ ਮੁਖੀ ਵਲੋਂ ਮੁਅੱਤਲ ਕਰ ਦਿੱਤਾ ਗਿਆ।
* 19 ਜੂਨ ਨੂੰ ‘ਸੁਪੌਲ’ (ਬਿਹਾਰ) ਦੇ ‘ਪ੍ਰਤਾਪਗੰਜ’ ਥਾਣੇ ਦੇ ਮਾਲਖਾਨੇ ’ਚ ਰੱਖਿਆ ਸਾਮਾਨ ਚੋਰੀ ਹੋਣ ਦੀ ਸ਼ਿਕਾਇਤ ’ਤੇ ਇੱਥੇ ਰੱਖੇ ਸਾਮਾਨ ਦੀ ਗਿਣਤੀ ਕਰਨ ’ਤੇ ਉੱਥੇ ਰੱਖੀਆਂ ਕਫ਼ ਸਿਰਪ ਦੀਆਂ 6162 ਬੋਤਲਾਂ, ਗੱਡੀਆਂ ਦੀਆਂ ਬੈਟਰੀਆਂ ਅਤੇ ਪੁਰਜ਼ੇ ਗਾਇਬ ਹੋਣ ਦੇ ਸਿਲਸਿਲੇ ’ਚ ਥਾਣੇ ਦੇ 4 ਮੁਲਾਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।
* 20 ਜੂਨ ਨੂੰ ‘ਫਤੇਹਾਬਾਦ’ (ਹਰਿਆਣਾ) ਦੇ ਸਦਰ ਥਾਣਾ ਮਾਲਖਾਨੇ ’ਚੋਂ ਜ਼ਬਤ ਕੀਤੀਆਂ ਗਈਆ ਨਾਜਾਇਜ਼ ਸ਼ਰਾਬ ਦੀਆਂ 211 ਪੇਟੀਆਂ ਗਾਇਬ ਪਾਈਆਂ ਗਈਆਂ। ਇਸ ਸਿਲਸਿਲੇ ’ਚ ਮਾਲਖਾਨਾ ਦੇ ਇੰਚਾਰਜ ਹੈੱਡ ਕਾਂਸਟੇਬਲ ਕਮਲ ਕੁਮਾਰ ਨੂੰ ਲਾਪ੍ਰਵਾਹੀ ਵਰਤਣ ਦੇ ਦੋਸ਼ ਹੇਠ ਮੁਅੱਤਲ ਕਰ ਦਿੱਤਾ ਗਿਆ।
* ਅਤੇ ਹੁਣ 27 ਜੂਨ ਨੂੰ ‘ਫਰੀਦਾਬਾਦ’ (ਹਰਿਆਣਾ) ਦੇ ਸੈਕਟਰ-8 ਪੁਲਸ ਥਾਣੇ ਦੇ ਮਾਲਖਾਨੇ ’ਚੋਂ ਲੋਕਾਂ ਵਲੋਂ ਸੁਰੱਖਿਆ ਲਈ ਜਮ੍ਹਾ ਕਰਵਾਈਆਂ ਗਈਆਂ 2 ਲੱਖ ਤੋਂ 12 ਲੱਖ ਰੁਪਇਆਂ ਤੱਕ ਦੀ ਕੀਮਤ ਦੀਆਂ ਕਈ ਮਹਿੰਗੀਆਂ ਵਿਦੇਸ਼ੀ ਪਿਸਤੌਲਾਂ ਸਮੇਤ 32 ਲਾਇਸੈਂਸੀ ਹਥਿਆਰਾਂ ਦੀ ਚੋਰੀ ਦਾ ਮਾਮਲਾ ਸਾਹਮਣੇ ਆਇਆ।
ਇਸ ਸਿਲਸਿਲੇ ’ਚ ਪੁਲਸ ਨੇ ਆਈ. ਟੀ. ਆਈ. ਦੇ ਵਿਦਿਆਰਥੀ ‘ਮੀਨੂ’ ਸਮੇਤ 20 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਸ਼ੁਰੂਆਤੀ ਜਾਂਚ ਤੋਂ ਪਿੱਛੋਂ ਮਾਲਖਾਨਾ ਇੰਚਾਰਜ ਏ. ਐੱਸ. ਆਈ. ਬਿਜੇਂਦਰ ਸਿੰਘ ਦੀ ਲਾਪ੍ਰਵਾਹੀ ਸਾਹਮਣੇ ਆਉਣ ’ਤੇ ਉਸ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ।
ਉਪਰੋਕਤ ਘਟਨਾਵਾਂ ਤੋਂ ਸਪੱਸ਼ਟ ਹੈ ਕਿ ਪੁਲਸ ਵਿਭਾਗ ’ਚ ਹੀ ਮੌਜੂਦ ਕੁਝ ਅਪਰਾਧੀ ਅਨਸਰਾਂ ਦੇ ਸਾਹਮਣੇ ਪੁਲਸ ਕਿਸ ਹੱਦ ਤੱਕ ਬੇਵੱਸ ਹੈ। ਜਦੋਂ ਲੋਕਾਂ ਨੂੰ ਚੋਰੀ-ਚਕਾਰੀ ਦੀਆਂ ਘਟਨਾਵਾਂ ਤੋਂ ਬਚਾਉਣ ਲਈ ਕਾਇਮ ਕੀਤੀ ਗਈ ਪੁਲਸ ਦੇ ਥਾਣੇ ’ਚ ਹੀ ਚੋਰੀ ਹੋਣ ਲੱਗੇ, ਤਾਂ ਇਹ ਅਨੁਮਾਨ ਲਗਾਉਣਾ ਮੁਸ਼ਕਲ ਨਹੀਂ ਕਿ ਪੁਲਸ ਵਿਭਾਗ ਦੇ ਕੁਝ ਮੈਂਬਰ ਆਪਣੇ ਫ਼ਰਜ਼ ਦੀ ਪਾਲਣਾ ’ਚ ਕਿਸ ਹੱਦ ਤਕ ਲਾਪ੍ਰਵਾਹੀ ਵਰਤ ਰਹੇ ਹਨ।
ਇਸ ਲਈ, ਅਜਿਹੇ ਮਾਮਲਿਆਂ ’ਚ ਦੋਸ਼ੀ ਪਾਏ ਜਾਣ ਵਾਲੇ ਮੁਲਾਜ਼ਮਾਂ ਅਤੇ ਅਧਿਕਾਰੀਆਂ ਵਿਰੁੱਧ ਸਖ਼ਤ ਕਾਰਵਾਈ ਕਰਨ ਦੀ ਤੁਰੰਤ ਲੋੜ ਹੈ।
—ਵਿਜੇ ਕੁਮਾਰ
ਨੌਜਵਾਨ ਬੈਂਕਰ ‘ਸਰਕਾਰੀ ਬੈਂਕਾਂ’ ਨੂੰ ਕਿਉਂ ਛੱਡ ਰਹੇ ਹਨ
NEXT STORY 
