ਕਾਂਗਰਸ ਦੇ ਅੰਦਰ ਅਜਿਹੀ ਚਰਚਾ ਚੱਲ ਰਹੀ ਹੈ ਕਿ ਚੱਲ ਰਹੀਆਂ ਰਾਜ ਵਿਧਾਨ ਸਭਾ ਚੋਣਾਂ ਦੇ ਸੰਪੰਨ ਹੋਣ ਤੋਂ ਬਾਅਦ ਹੀ ਜਥੇਬੰਦਕ ਫੇਰਬਦਲ ਕੀਤਾ ਜਾਵੇਗਾ, ਜਿਸ ’ਚ ਅੰਦਰੂਨੀ ਚਰਚਾਵਾਂ ਪਾਰਟੀ ਢਾਂਚੇ ’ਚ ਜ਼ਿੰਮੇਵਾਰੀਆਂ ਦੀ ਵਿਆਪਕ ਮੁੜ-ਵੰਡ ਦਾ ਸੰਕੇਤ ਦੇ ਰਹੀਆਂ ਹਨ। ਕਾਂਗਰਸ ਦੇ ਕਈ ਸੀਨੀਅਰ ਆਗੂ ਪਾਰਟੀ ਅੰਦਰ ਕਾਂਗਰਸ ਜਨਰਲ ਸਕੱਤਰ ਪ੍ਰਿਯੰਕਾ ਗਾਂਧੀ ਵਾਡਰਾ ਲਈ ਇਕ ਪ੍ਰਮੁੱਖ ਭੂਮਿਕਾ ਦੀ ਵਕਾਲਤ ਕਰ ਰਹੇ ਹਨ। ਦੂਜੇ ਪਾਸੇ, ਉੱਤਰ ਪ੍ਰਦੇਸ਼, ਉੱਤਰਾਖੰਡ, ਪੰਜਾਬ ਅਤੇ ਗੋਆ ’ਚ ਅਗਲੇ ਸਾਲ ਹੋਣ ਵਾਲੀਆਂ ਮਹੱਤਵਪੂਰਨ ਵਿਧਾਨ ਸਭਾ ਚੋਣਾਂ ਨੂੰ ਦੇਖਦੇ ਹੋਏ, ਪਾਰਟੀ ਦਾ ਟੀਚਾ ਪੁਨਰਗਠਨ ਅਭਿਆਸ ਨੂੰ ਕਾਫੀ ਪਹਿਲਾਂ ਪੂਰਾ ਕਰਨਾ ਹੈ। ਇਸ ’ਚ ਸੂਬਾਈ ਲੀਡਰਸ਼ਿਪ ’ਚ ਬਦਲਾਅ, ਜਿਸ ’ਚ ਇਕਾਈ ਮੁਖੀ ਅਤੇ ਪ੍ਰਮੁੱਖ ਜਥੇਬੰਦਕ ਅਹੁਦੇ ਸ਼ਾਮਲ ਹਨ, ਵੀ ਹੋਣੇ ਹਨ।
ਇਸ ਦੌਰਾਨ, ਜਨਰਲ ਸਕੱਤਰ (ਸੰਗਠਨ) ਦਾ ਅਹੁਦਾ ਵੀ ਸਮੀਖਿਆ ਅਧੀਨ ਹੈ, ਕਿਉਂਕਿ ਕੇ. ਸੀ. ਵੇਣੂਗੋਪਾਲ ਲੱਗਭਗ 7 ਵਰ੍ਹਿਆਂ ਤੋਂ ਇਸ ਅਹੁਦੇ ’ਤੇ ਹਨ। ਵੇਣੂਗੋਪਾਲ ਨੂੰ ਰਾਹੁਲ ਗਾਂਧੀ ਦੀ ਅੱਖ ਅਤੇ ਕੰਨ ਮੰਨਿਆ ਜਾਂਦਾ ਹੈ ਅਤੇ ਉਹ ਕਾਂਗਰਸ ਦੇ ਫੈਸਲੇ ਲੈਣ ਵਾਲੇ ਤੰਤਰ ’ਚ ਪ੍ਰਮੁੱਖ ਭੂਮਿਕਾਵਾਂ ’ਚ ਆ ਗਏ ਹਨ। ਚਰਚਾ ਇਹ ਹੈ ਕਿ ਜਨਰਲ ਸਕੱਤਰ ਕੇ. ਸੀ. ਵੇਣੂਗੋਪਾਲ ਕੇਰਲ ’ਚ ਧਿਆਨ ਕੇਂਦਰਿਤ ਕਰਨਾ ਚਾਹੁੰਦੇ ਹਨ ਅਤੇ ਜੇਕਰ ਸੰਯੁਕਤ ਲੋਕਤੰਤਰਿਕ ਮੋਰਚਾ (ਯੂ. ਡੀ. ਐੱਫ.) ਕੇਰਲ ’ਚ ਬਹੁਮਤ ਹਾਸਲ ਕਰਦਾ ਹੈ ਤਾਂ ਉਹ ਮੁੱਖ ਮੰਤਰੀ ਬਣਨ ਦੀ ਇੱਛਾ ਰੱਖਦੇ ਹਨ। ਹਾਲਾਂਕਿ, ਸਾਬਕਾ ਕੇ. ਪੀ. ਸੀ. ਸੀ. ਪ੍ਰਧਾਨ ਕੇ. ਸੁਧਾਕਰਨ ਹੁਣ ਸੀ. ਐੱਮ. ਅਹੁਦੇ ਲਈ ਕੇ. ਸੀ. ਵੇਣੂਗੋਪਾਲ ਦਾ ਸਮਰਥਨ ਕਰ ਰਹੇ ਹਨ! ਸੁਧਾਕਰਨ ਦਾ ਕਹਿਣਾ ਹੈ ਕਿ ਕੇ. ਸੀ. ਇਸ ਅਹੁਦੇ ਲਈ ਸਭ ਤੋਂ ਢੁੱਕਵੇਂ ਵਿਅਕਤੀ ਹਨ ਪਰ ਪਾਰਟੀ ਦੇ ਅੰਦਰ ਸੀਨੀਅਰ ਆਗੂਆਂ ਵੱਲੋਂ ਇਸ ’ਤੇ ਇਤਰਾਜ਼ ਜਤਾਏ ਜਾਣ ਦੀ ਗੱਲ ਸਾਹਮਣੇ ਆਈ ਹੈ, ਜਦਕਿ ਸੀਨੀਅਰ ਕਾਂਗਰਸ ਆਗੂ ਰਮੇਸ਼ ਚੇਨੀਥਲਾ ਨੇ ਕਿਹਾ ਹੈ ਕਿ ਜੇਕਰ ਸੰਯੁਕਤ ਲੋਕਤੰਤਰਿਕ ਮੋਰਚਾ (ਯੂ. ਡੀ. ਐੱਫ.) ਕੇਰਲ ’ਚ ਬਹੁਮਤ ਹਾਸਲ ਕਰਦਾ ਹੈ, ਤਾਂ ਮੁੱਖ ਮੰਤਰੀ ਕੌਣ ਬਣੇਗਾ, ਇਸ ’ਤੇ ਅੰਤਿਮ ਫੈਸਲਾ ਪਾਰਟੀ ਹਾਈਕਮਾਨ ਲਵੇਗੀ।
ਊਧਵ ਠਾਕਰੇ ਹੋਣਗੇ ਐੱਮ. ਵੀ. ਏ. ਦੇ ਸਾਂਝੇ ਉਮੀਦਵਾਰ
ਵਿਰੋਧੀ ਧਿਰ ਮਹਾ ਵਿਕਾਸ ਅਗਾੜੀ (ਐੱਮ. ਵੀ. ਏ.) ਦੇ ਸਾਂਝੇਦਾਰ ਕਾਂਗਰਸ ਅਤੇ ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ (ਐੱਸ. ਪੀ.) ਚਾਹੁੰਦੇ ਹਨ ਕਿ ਸ਼ਿਵ ਸੈਨਾ (ਯੂ. ਬੀ. ਟੀ.) ਦੇ ਪ੍ਰਧਾਨ ਊਧਵ ਠਾਕਰੇ 12 ਮਈ ਨੂੰ ਹੋਣ ਵਾਲੀਆਂ ਮਹਾਰਾਸ਼ਟਰ ਵਿਧਾਨ ਪ੍ਰੀਸ਼ਦ ਚੋਣਾਂ ਲਈ ਗੱਠਜੋੜ ਦੇ ਸਾਂਝੇ ਉਮੀਦਵਾਰ ਬਣਨ। ਹਾਲਾਂਕਿ, ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ (ਐੱਸ. ਪੀ.) ਆਗੂ ਸੁਪ੍ਰਿਆ ਸੁਲੇ ਨੇ ਕਿਹਾ ਕਿ ਠਾਕਰੇ ਦੇ ਤਜਰਬੇ ਨਾਲ ਪ੍ਰੀਸ਼ਦ ਦੇ ਕੰਮਕਾਜ ’ਚ ਗੰਭੀਰਤਾ ਆਵੇਗੀ, ਜਦਕਿ ਕਾਂਗਰਸ ਦੇ ਸੂਬਾ ਪ੍ਰਧਾਨ ਹਰਸ਼ਵਰਧਨ ਸਪਕਾਲ ਨੇ ਉਨ੍ਹਾਂ ਦੀ ਰਿਹਾਇਸ਼ ਮਾਤੋਸ਼੍ਰੀ ’ਚ ਉਨ੍ਹਾਂ ਨਾਲ ਮਿਲਣ ਤੋਂ ਬਾਅਦ ਇਸੇ ਤਰ੍ਹਾਂ ਦੀਆਂ ਭਾਵਨਾਵਾਂ ਪ੍ਰਗਟਾਈਆਂ।
ਦੂਜੇ ਪਾਸੇ, ਸੀਨੀਅਰ ਕਾਂਗਰਸ ਆਗੂ ਵਿਜੇ ਵਡੇਟੀਵਾਰ ਨੇ ਕਿਹਾ ਕਿ ਪਾਰਟੀ ਆਗਾਮੀ ਵਿਧਾਨ ਪ੍ਰੀਸ਼ਦ ਚੋਣਾਂ ’ਚ ਊਧਵ ਠਾਕਰੇ ਦਾ ਸਮਰਥਨ ਕਰਨ ਲਈ ਤਿਆਰ ਹੈ ਪਰ ਬਦਲੇ ’ਚ ਇਕ ਰਾਜ ਸਭਾ ਸੀਟ ਦੀ ਉਮੀਦ ਕਰਦੀ ਹੈ। 10 ਐੱਮ. ਐੱਲ. ਸੀ. ਸੀਟਾਂ ਲਈ ਦੋ-ਸਾਲਾ ਚੋਣਾਂ ਹੋਣਗੀਆਂ। ਵਿਧਾਨ ਸਭਾ ’ਚ ਪਾਰਟੀਆਂ ਦੀ ਗਿਣਤੀ ਅਨੁਸਾਰ, ਸੱਤਾਧਾਰੀ ਮਹਾਯੁਤੀ ਦੀਆਂ 9 ਸੀਟਾਂ ਅਤੇ ਐੱਮ. ਵੀ. ਏ. ਦੀ 1 ਸੀਟ ਜਿੱਤਣ ਦੀ ਸੰਭਾਵਨਾ ਹੈ। ਮਹਾਯੁਤੀ ’ਚ, ਭਾਜਪਾ ਆਪਣੇ ਵਿਧਾਨ ਸਭਾ ਨੰਬਰਾਂ ਅਨੁਸਾਰ 6 ਐੱਮ. ਐੱਲ. ਸੀ. ਸੀਟਾਂ ’ਤੇ ਚੋਣ ਲੜੇਗੀ, ਸ਼ਿਵ ਸੈਨਾ ਨੂੰ 2 ਅਤੇ ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ ਨੂੰ ਇਕ ਸੀਟ ਮਿਲੇਗੀ।
ਭਾਰਤ ਦੀ ਬੌਧ ਵਿਰਾਸਤ ਸੁਰੱਖਿਅਤ ਕਰਨ ’ਤੇ ਜ਼ੋਰ
ਇੰਟਰਨੈਸ਼ਨਲ ਬੁੱਧਿਸਟ ਕਨਫੈਡਰੇਸ਼ਨ ਦੇ ਡਾਇਰੈਕਟਰ ਜਨਰਲ ਅਭਿਜੀਤ ਹਲਦਰ ਨੇ ਭਾਰਤ ਦੀ ਵਿਸ਼ਾਲ ਬੌਧ ਵਿਰਾਸਤ ਬਾਰੇ ਗੱਲ ਕਰਦਿਆਂ ਇਸ ਨੂੰ ਦੁਨੀਆ ਦੇ ਸਾਹਮਣੇ ਉਤਸ਼ਾਹਿਤ ਕਰਨ, ਸੁਰੱਖਿਅਤ ਕਰਨ ਅਤੇ ਪ੍ਰਦਰਸ਼ਿਤ ਕਰਨ ਦੀ ਲੋੜ ’ਤੇ ਜ਼ੋਰ ਦਿੱਤਾ। ਸੋਮਵਾਰ ਸ਼ਾਮ ਇੰਡੀਆ ਇੰਟਰਨੈਸ਼ਨਲ ਸੈਂਟਰ ’ਚ ਲੇਖਿਕਾ ਸੁਨੀਤਾ ਦਿਵੇਦੀ ਦੇ ਇਤਿਹਾਸਕ ਯਾਤਰਾ ਬਿਰਤਾਂਤ ‘ਆਨ ਦਿ ਬੁੱਧਾਜ਼ ਟ੍ਰੇਲ ਇਨ ਬੰਗਲਾਦੇਸ਼’ ਦੇ ਰਿਲੀਜ਼ ਦੇ ਮੌਕੇ ’ਤੇ, ਹਲਦਰ ਨੇ ਆਪਣੇ ਮੁੱਖ ਭਾਸ਼ਣ ’ਚ ਵਿਦੇਸ਼ਾਂ ’ਚ ਬੁੱਧ ਦੇ ਅਵਸ਼ੇਸ਼ਾਂ ਦੀ ਪ੍ਰਦਰਸ਼ਨੀ ਨੂੰ ਉਤਸ਼ਾਹਿਤ ਕਰਨ ਲਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ। ਬੰਗਲਾਦੇਸ਼ ’ਤੇ ਇਸ ਪੁਸਤਕ ਦੇ ਪ੍ਰਕਾਸ਼ਨ ਅਤੇ ਇਸ ਤੋਂ ਪਹਿਲਾਂ ‘ਬੌਧ ਹੈਰੀਟੇਜ ਆਫ ਦਾ ਏਸ਼ੀਅਨ ਸਿਲਕ ਰੋਡ’ ਲੜੀ ਦੀਆਂ 4 ਹੋਰ ਪੁਸਤਕਾਂ (ਜਿਸ ’ਚ ਪਾਕਿਸਤਾਨ, ਅਫਗਾਨਿਸਤਾਨ, ਮੱਧ ਏਸ਼ੀਆ ਅਤੇ ਚੀਨ ਸ਼ਾਮਲ ਹਨ) ਦੇ ਨਾਲ, ਸੁਨੀਤਾ ਦਿਵੇਦੀ ਨੇ ਏਸ਼ੀਆ ਦੇ ਵਿਸ਼ਾਲ ਬੌਧ ਸਰਕਟ ਦੇ ਇਕ ਵੱਡੇ ਹਿੱਸੇ ਨੂੰ ਕਵਰ ਕੀਤਾ ਹੈ, ਜਿਸ ’ਚ ਬੰਗਲਾਦੇਸ਼ ਇਸ ਲੜੀ ਦੀ ਦੱਖਣੀ ਕੜੀ ਹੈ।
ਮਹਿਲਾ ਰਾਖਵਾਂਕਰਨ ਦੇ ਮੁੱਦੇ ’ਤੇ ਮਾਇਆਵਤੀ ਦਾ ਰੁਖ਼
2027 ’ਚ ਹੋਣ ਵਾਲੀਆਂ ਉੱਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ਨੂੰ ਦੇਖਦੇ ਹੋਏ, ਬਸਪਾ ਮੁਖੀ ਮਾਇਆਵਤੀ ਨੇ ਪਾਰਟੀ ਵਰਕਰਾਂ ਨੂੰ ਮਹਿਲਾ ਰਾਖਵਾਂਕਰਨ ਦੇ ਮੁੱਦੇ ’ਤੇ ਕੋਈ ਵਿਰੋਧ ਜਾਂ ਪ੍ਰਦਰਸ਼ਨ ਨਾ ਕਰਨ ਦਾ ਸੁਝਾਅ ਦਿੱਤਾ ਅਤੇ ਕਿਹਾ ਕਿ ਪਾਰਟੀ ਦਾ ਇਹ ਰੁਖ਼ ਕਿ ਔਰਤਾਂ ਲਈ 33 ਫੀਸਦੀ ਕੋਟੇ ਦੇ ਅੰਦਰ ਐੱਸ. ਸੀ., ਐੱਸ. ਟੀ. ਅਤੇ ਓ. ਬੀ. ਸੀ. ਦੀਆਂ ਔਰਤਾਂ ਲਈ ਵੱਖਰਾ ਕੋਟਾ ਹੋਣਾ ਚਾਹੀਦਾ ਹੈ, ਅਟੱਲ ਹੈ। ਮਾਇਆਵਤੀ ਨੇ ਔਰਤਾਂ ਦੀ ਆਬਾਦੀ ਦੇ ਅਨੁਪਾਤ ’ਚ 50 ਫੀਸਦੀ ਰਾਖਵੇਂਕਰਨ ਦੀ ਪਾਰਟੀ ਦੀ ਮੰਗ ਨੂੰ ਵੀ ਦੁਹਰਾਇਆ ਅਤੇ ਦੋਸ਼ ਲਾਇਆ ਕਿ ਹੋਰ ਸਿਆਸੀ ਪਾਰਟੀਆਂ ਆਪਣੇ ‘ਸਵਾਰਥ ਅਤੇ ਮਜਬੂਰੀਆਂ’ ਕਾਰਨ ਇਸ ਨੂੰ ਸਵੀਕਾਰ ਕਰਨ ਲਈ ਤਿਆਰ ਨਹੀਂ ਸਨ। ਉਨ੍ਹਾਂ ਨੇ ਵਰਕਰਾਂ ਨੂੰ ਪਾਰਟੀ ਜਥੇਬੰਦੀ ਨੂੰ ਮਜ਼ਬੂਤ ਕਰਨ, ਇਸ ਦੇ ਸਮਰਥਨ ਆਧਾਰ ਦਾ ਵਿਸਥਾਰ ਕਰਨ ਅਤੇ ਉੱਤਰ ਪ੍ਰਦੇਸ਼ ’ਚ ਬਸਪਾ ਸਰਕਾਰ ਦੌਰਾਨ ਕੀਤੇ ਗਏ ਵਿਕਾਸ ਅਤੇ ਜਨ ਭਲਾਈ ਕਾਰਜਾਂ ’ਤੇ ਚਾਨਣਾ ਪਾਉਣ ਦੇ ਨਿਰਦੇਸ਼ ਦਿੱਤੇ।
-ਰਾਹਿਲ ਨੋਰਾ ਚੋਪੜਾ
ਰਾਜਨੀਤੀ ’ਚ ਕਰੀਅਰ ਬਣਾਉਣ ਅਤੇ ਨੇਤਾਗਿਰੀ ਸਿੱਖਣ ਦਾ ਨਾਂ ਹੈ ‘ਮਹਿਲਾ ਰਾਖਵਾਂਕਰਨ ਬਿੱਲ’
NEXT STORY 
