ਨਵੀਂ ਦਿੱਲੀ— ਤਾਮਿਲਨਾਡੂ ਦੀ ਇੰਟੈਗਰਲ ਕੋਚ ਫੈਕਟਰੀ ਨੇ ਟਰੇਨ-18 ਨਾਂ ਦੀ ਇਕ ਅਜਿਹੀ ਟਰੇਨ ਦਾ ਨਿਰਮਾਣ ਕੀਤਾ ਹੈ, ਜੋ ਬੁਲੇਟ ਟਰੇਨ ਵਰਗੀ ਦਿਸਦੀ ਹੈ। ਇਸ ਟਰੇਨ ਦਾ ਟਰਾਇਲ ਜਲਦ ਹੀ ਹੋਣ ਵਾਲਾ ਹੈ। ਇਹ ਟਰੇਨ ਪੂਰੀ ਤਰ੍ਹਾਂ ਕੰਪਿਊਟਰੀਕ੍ਰਿਤ ਹੈ, ਜਿਸ ਨੂੰ ਚਲਾਉਣ ਲਈ ਇੰਜਣ ਦੀ ਜ਼ਰੂਰਤ ਨਹੀਂ ਹੋਵੇਗੀ। ਇਹ ਭਾਰਤ ਦੀ ਪਹਿਲੀ ਅਜਿਹੀ ਟਰੇਨ ਹੋਵੇਗੀ। ਟਰੇਨ-18 ਨੂੰ ਸ਼ਤਾਬਦੀ ਐਕਸਪ੍ਰੈੱਸ ਦੇ ਮਾਰਗਾਂ 'ਤੇ ਚਲਾਇਆ ਜਾਵੇਗਾ, ਜਿਨ੍ਹਾਂ 'ਚ ਫਿਲਹਾਲ ਦਿੱਲੀ-ਭੋਪਾਲ, ਚੇਨਈ-ਬੇਂਗਲੁਰੂ ਅਤੇ ਮੁੰਬਈ-ਅਹਿਮਦਾਬਾਦ ਸ਼ਾਮਲ ਹਨ।
16 ਕੋਚਾਂ ਵਾਲੀ ਇਸ ਟਰੇਨ 'ਚ ਕਈ ਅਰਾਮਦਾਇਕ ਸਹੂਲਤਾਂ ਸ਼ਾਮਲ ਕੀਤਆਂ ਗਈਆਂ ਹਨ ਅਤੇ ਪੁਰਾਣੀਆਂ ਟਰੇਨਾਂ ਨਾਲੋਂ ਇਸ 'ਚ ਸਫਰ ਦਾ ਸਮਾਂ ਵੀ 10-15 ਫੀਸਦੀ ਘੱਟ ਲੱਗੇਗਾ। ਇਸ ਟਰੇਨ ਨੂੰ ਵਿਸ਼ੇਸ਼ ਤੌਰ 'ਤੇ ਬੁਲੇਟ ਟਰੇਨ ਦੇ ਮਾਡਲ 'ਤੇ ਤਿਆਰ ਕੀਤਾ ਗਿਆ ਹੈ।
ਇੰਟੈਗਰਲ ਕੋਚ ਫੈਕਟਰੀ ਦੇ ਪ੍ਰਬੰਧਕ ਨਿਰਦੇਸ਼ਕ ਸੁਧਾਂਸ਼ੂ ਮਣੀ ਮੁਤਾਬਕ, ਟਰੇਨ-18 ਦੇ ਨਿਰਮਾਣ 'ਤੇ ਤਕਰੀਬਨ 100 ਕਰੋੜ ਰੁਪਏ ਦਾ ਖਰਚ ਆਇਆ ਹੈ। ਇਸ ਟਰੇਨ 'ਚ 16 ਏ. ਸੀ. ਕੋਚ ਅਤੇ ਦੋ ਹੋਰ ਕਲਾਸ ਦੇ ਕੋਚ ਲਗਾਏ ਗਏ ਹਨ। ਇਸ ਖਾਸ ਟਰੇਨ ਦੀ ਰਫਤਾਰ ਸ਼ਤਾਬਦੀ ਅਤੇ ਰਾਜਧਾਨੀ ਨਾਲੋਂ ਜ਼ਿਆਦਾ ਹੋਵੇਗੀ, ਯਾਨੀ 140 ਤੋਂ 220 ਕਿਲੋਮੀਟਰ ਤਕ ਹੋਵੇਗੀ।
ਉਨ੍ਹਾਂ ਕਿਹਾ ਕਿ ਇਸ ਟਰੇਨ ਨੂੰ ਜੇਕਰ ਵਿਦੇਸ਼ ਤੋਂ ਦਰਾਮਦ ਕੀਤਾ ਜਾਂਦਾ ਤਾਂ ਇਸ ਦੀ ਲਾਗਤ ਤਕਰੀਬਨ 170 ਕਰੋੜ ਰੁਪਏ ਤਕ ਹੁੰਦੀ ਪਰ ਸਵਦੇਸ਼ੀ ਨਿਰਮਾਣ ਨਾਲ ਟਰੇਨ ਨੂੰ ਤਕਰੀਬਨ 100 ਕਰੋੜ ਰੁਪਏ 'ਚ ਹੀ ਬਣਾਇਆ ਗਿਆ ਹੈ। ਟਰੇਨ-18 ਦੇ ਹਰ ਕੋਚ 'ਚ 6 ਸੀ. ਸੀ. ਟੀ. ਵੀ. ਕੈਮਰੇ ਲਗਾਏ ਗਏ ਹਨ ਅਤੇ ਇਕ ਕੈਮਰਾ ਯਾਤਰੀਆਂ ਨੂੰ ਦੇਖਣ ਲਈ ਡਰਾਈਵਰ ਕੋਚ ਦੇ ਬਾਹਰ ਲਗਾਇਆ ਹੈ। ਇਸ ਦੇ ਇਲਾਵਾ ਹਰ ਕੋਚ 'ਚ ਸੰਕਟਕਾਲੀਨ ਸਵਿੱਚ ਵੀ ਹੈ। ਸੀਟਾਂ ਨੂੰ ਵੀ ਇੰਨਾ ਅਰਾਮਦਾਇਕ ਬਣਾਇਆ ਗਿਆ ਹੈ ਕਿ ਇਨ੍ਹਾਂ ਨੂੰ 360 ਡਿਗਰੀ 'ਤੇ ਘੁਮਾਇਆ ਜਾ ਸਕਦਾ ਹੈ। ਇੰਨਾ ਹੀ ਨਹੀਂ ਦਿਵਿਆਂਗਾਂ ਲਈ ਵਿਸ਼ੇਸ਼ ਤੌਰ 'ਤੇ ਦੋ ਬਾਥਰੂਮ ਅਤੇ ਬੇਬੀ ਕੇਅਰ ਲਈ ਵਿਸ਼ੇਸ਼ ਸਥਾਨ ਦਿੱਤਾ ਗਿਆ ਹੈ। ਇਕ ਅਧਿਕਾਰੀ ਨੇ ਕਿਹਾ ਕਿ ਜਲਦ ਹੀ ਇਸ ਟਰੇਨ ਦਾ ਸਪੀਡ ਟਰਾਇਲ ਮੁਰਾਦਾਬਾਦ-ਬਰੇਲੀ ਅਤੇ ਕੋਟਾ-ਸਵਾਈ ਮਾਧੋਪੁਰ ਮਾਰਗ 'ਤੇ ਕੀਤਾ ਜਾਵੇਗਾ।
ਡਾਟਾ ਲੀਕ ਮਾਮਲੇ 'ਚ ਪੇਟੀਐੱਮ ਦੇ ਤਿੰਨ ਕਰਮਚਾਰੀ ਗ੍ਰਿਫਤਾਰ
NEXT STORY 
